ງານໂອລິມປິກປັກກິ່ງຝາກມໍລະດົກອັນອຸດົມຮັ່ງມີໄດ້ໃຫ້ທົ່ວໂລກ
-----------------------------------------------------------------------------------------------------------------
ໃນທ້າຍປີ2008, ພວກເຮົາມາຮ່ວມກັນສະຫຼຸບມໍລະດົກອັນລ້ຳຄ່າທີ່ງານໂອລິມປິກປັກກິ່ງຝາກໄວ້ໃຫ້ຈີນແລະທົ່ວໂລກ.
ວັນທີ27 ພະຈິກປີ2008,ໃນກອງປະຊຸມສະຫຼຸບງານໂອລິມປິກປັກກິ່ງທີ່ຈັດຂຶ້ນຢູ່ລອນດອນ,ທ່ານເຮນ ເວີບຼູເກິນ ປະທານຄະນະກຳມະການປະສານງານງານໂອລິມປິກປັກກິ່ງຂອງຄະນະກຳມະການໂອລິມປິກສາກົນກ່າວວ່າ,ລັດຖະບານຈີນໄດ້ບັນລຸຄຳໝັ້ນສັນຍາຕໍ່ປະຊາຄົມໂລກ,ໄດ້ຝາກມໍລະດົກອັນລ້ຳຄ່າໄວ້ໃຫ້ຈີນແລະງານກິລາໂອລິມປິກ.ທ່ານອາເລກສ໌ ຈີລາດີ ກຳມະການຄະນະກຳມະການໂອລິມປິກສາກົນຕີລາຄາວ່າ:"ງານໂອລິມປິກຈະຝາກມໍລະດົກອັນລ້ຳຄ່າໄວ້ໃຫ້ປັກກິ່ງ,ລວມທັງພື້ນຖານໂຄງລ່າງເຊັ່ນຖະໜົນ,ລົດໄຟໃຕ້ຕິນ,ສະໜາມບິນແລະອື່ນໆ, ສະໜາມກິລາທີ່ສວຍງານ,ກໍ່ຈະຝາກຄວາມຮູ້ສຶກອັນດີງາມໃຫ້ແກ່ທຸກຄົນ,ເພາະວ່າພວກເຂົາເຈົ້າໄດ້ປະກອບສ່ວນເຂົ້າໃນງານໂອລິມປິກອັນຍິ່ງໃຫຍ່ຄັ້ງໜຶ່ງ,ພວກເຂົາເຈົ້າຈະຮູ້ສຶກເຖິງຄວາມສຸກຍ້ອນວ່າເຄີຍເຂົ້າຮ່ວມງານໂລລິມປິກ."
ໃນໄລຍະຈັດງານກິລາໂອລິມປິກປັກກິ່ງ, ຢູ່ປັກກິ່ງທ້ອງຟ້າສີຄາມ ແສງແດດແຈ່ມໃສ, ໄດ້ຝາກຄວາມຊົງຈຳອັນດີງາມໃຫ້ແກ່ນັກກິລາປະເທດຕ່າງໆແລະຊາວປັກກິ່ງ. ທັງໝົດເຫຼົ່ານີ້ແມ່ນຜົນປະໂຫຍດທີ່ໄດ້ຈາກມາດຕະການອະນຸລັກສິ່ງແວດລ້ອມຕ່າງໆທີ່ອົງການປົກຄອງປັກກິ່ງໄດ້ປະກາດໃຊ້. ທ່ານຊາກ ໂຣເກ ປະທານຄະນະກຳມະການໂອລິມປິກສາກົນໄດ້ຕີລາຄາສູງຕໍ່ເລື່ອງນີ້, ທ່ານເວົ້າວ່າ, ຂ້າພະເຈົ້າຊົມເຊີຍລັດຖະບານຈີນທີ່ໄດ້ໃຊ້ມາດຕະການຕ່າງໆ, ນີ້ບໍ່ພຽງແຕ່ແມ່ນເພື່ອຈັດງານກິລາໂອລິມປິກເທົ່ານັ້ນ, ຍັງແມ່ນເພື່ອປັບປຸງສິ່ງແວດລ້ອມຂອງຈີນໃຫ້ດີຂຶ້ນຢ່າງຖາວອນ. ສະນັ້ນຂ້າພະເຈົ້າເຫັນວ່າ, ຈີນໄດ້ຮັບຜົນສຳເລັດອັນໃຫຍ່ຫຼວງໃນດ້ານປັບປຸງສິ່ງແວດລ້ອມ.
ນອກຈາກມໍລະດົກທາງວັດຖຸ, ງານກິລາໂອລິມປິກປັກກິ່ງຍັງໄດ້ຝາກມໍລະດົກດ້ານຈິດໃຈທີ່ລ້ຳຄ່າໄວ້ອີກ. ໃນງານກິລາໂອລິມປິກຄັ້ງນີ້, ໄດ້ທຳລາຍສະຖິຕິງານໂອລິມ ປິກ85ລາຍການແລະສະຖິຕິໂລກ38ລາຍການ. 87ປະເທດແລະເຂດແຄວ້ນຊີງໄດ້ຫຼຽນລາງວັນ, ຫຼຽນລາງວັນແຈກຢາຍຢູ່ໃນປະເທດແລະເຂດແຄວ້ນຫຼາຍກວ່າເກົ່າ. ໃນຖານະເປັນຊັບສົມບັດທາງຈິດໃຈຮ່ວມກັນຂອງມວນມະນຸດ, ນ້ຳໃຈໂອລິມປິກ ຄື "ສູງກວ່າເກົ່າ ໄວກວ່າເກົ່າແລະແຂງແຮງກວ່າເກົ່າ"ໄດ້ຮັບການແຜ່ຂະຫຍາຍຢ່າງກວ້າງຂວາງກວ່າເກົ່າ.
ໃນງານໂອລິມປິກຄົນພິການທີ່ຈັດຂຶ້ນຫລັງງານໂອລິມປິກ, ຈີນໄດ້ສະເຫນີທັດສະນະທີ່ວ່າ ງານໂອລິມປິກສອງຄັ້ງຍອດຢ້ຽມຄືກັນ,ຄວາມເວົ້ານີ້ກໍ່ໄດ້ຮັບຄວາມຍ້ອງຍໍຊົມເຊີຍຈາກປະຊາຄົມໂລກຫລາຍ.ທ່ານໂຄລິນ ໂມນີຮານ ປະທານຄະນະກຳມະການໂອລິມປິກອັງກິດກ່າວວ່າ:ການບໍລິການ ອຸ ປະກອນຕ່າງໆແລະລະດັບການຕ້ອນຮັບນັກກິລາຄົນພິການຂອງງານໂອລິມ ປິກຄົນພິການປັກກິ່ງແມ່ນບໍ່ເຄີຍມີມາກ່ອນ.ຂ້າພະເຈົ້າເຫັນວ່າ, ງານໂອລິມປິກຄົນພິການໄດ້ບັນລຸເຖິງລະດັບໃຫມ່ທີ່ສຳຄັນທີ່ສຸດ,ກໍ່ຄືສິ່ງທີ່ຄົນທັງຫລາຍສົນໃຈນັ້ນບໍ່ແມ່ນຄວາມພິການຊື່ໆ,ແຕ່ຫາກແມ່ນຄວາມສາມາດຂອງນັກກິລາທີ່ເຂົ້າຮ່ວມງານກິລາ.ນີ້ແມ່ນບາດກ້າວອັນສຳຄັນຂອງງານໂອລິມປິກຄົນພິການໃນອະນາຄົດ,ແມ່ນມໍລະດົກໂອລິມປິກ ອັນສຳຄັນທີ່ງານໂອລິມປິກຄົນພິການປັກກິ່ງຝາກໄວ້ໃຫ້.
ໃນພິທີອັດງານໂອລິມປິກແລະງານໂອລິມປິກຄົນພິການ, ຜູ່ຊົມແລະນັກກິລາໄດ້ມອບຊໍດອກໄມ້ແລະສຽງຕົບມືໄປໃຫ້ຜູ່ຕາງຫນ້າອາສາສະຫມັກ.ເພາະເຂົາເຈົ້າເຮັດໃຫ້ທົ່ວໂລກຊື່ນຊົມດ້ວຍຮອຍຍິ້ມຂອງເຂົາເຈົ້າ, ທັງໄດ້ສະແດງໃຫ້ເຫັນເຖິງຮູບໂສມໃຫມ່ຂອງປະຊາຊົນຈີນ.
ນອກນີ້, ງານໂອລິມປິກປັກກິ່ງໄດ້ອຳນວຍໂອກາດໃຫ້ຈີນກັບໂລກເຂົ້າໃຈກັນຫລາຍຂຶ້ນ. ທ່ານເສີນຕິ່ງລີ ຫົວຫນ້າສູນຄົ້ນຄວ້າອາເມລິກາຂອງມະຫາວິທະຍາໄຫລຟູ້ຕ້ານເຫັນວ່າ:ງານໂອລິມປິກຊ່ວຍໃຫ້ປະຊາຊົນຂອງພວກເຮົາຫລຸດຄວາມຫ່າງເຫີນກັນດ້ານຈິດໃຈກັບຊາວໂລກ,ເຮັດໃຫ້ໂລກຍິ່ງໃກ້ຊິດກັບຈີນ, ແລະໃຫ້ຈີນກ້າວໄປສູ່ໂລກ.
