ຄວາມບໍ່ສະຫງົບຂອງໄທເຮັດໃຫ້ກອງປະຊຸມສຸດຍອດອາຊຽນຖືກເລື່ອນເວລາ
-----------------------------------------------------------------------------------------------------------------
ຂ່າວຈາກ cri:ວັນທີ 2 ທັນວານີ້ ລັດຖະບານໄທປະກາດວ່າ, ຍ້ອນສະຖານະການພາຍໃນປະເທດບໍ່ຫມັ້ນຄົງ,ສະນັ້ນຕົກລົງເລື່ອນເວລາຈັດກອງປະຊຸມສຸດຍອດອາຊຊຽນຄັ້ງທີ 14 ທີ່ແຕ່ເດີມຈະຈັດຂຶ້ນໃນເດືອນທັນວານີ້ ໄປຈັດໃນເດືອນມີນາປີຫນ້າ.ປັດຈຸບັນ, ເຖິງວ່າກອງເລຂາອາຊຽນໄດ້ເຫັນດີນຳການຕົກລົງຂອງໄທແລ້ວກໍ່ຕາມ, ແຕ່ສະມາຊິກອາຊຽນຈຳນວນຫນຶ່ງໄດ້ສະແດງຄວາມຜິດຫວັງຕໍ່ເລື່ອງນີ້.ນັກວິເຄາະເຫັນວ່າ, ກອງປະຊຸມສຸດ ຍອດອາຊຽນຈະຈັດຂຶ້ນຢູ່ບ່ອນໃດໃນເວລາໃດຍັງບໍ່ແນ່ນອນເທື່ອ, ນີ້ຈະເຮັດໃຫ້ບັນຫາກ່ຽວກັບກົດບັດອາຊຽນສັບສົນເຂົ້າ.
ເດືອນພະຈິກປີ 2007, ຜູ່ນຳຂອງ 10 ປະເທດອາຊຽນໄດ້ເຊັນກົດບັດອາຊຽນໃນກອງປະຊຸມສຸດຍອດຄັ້ງທີ 13 ທີ່ຈັດຂຶ້ນຢູ່ສິງກະໂປ,ທ່ານສຸລິນ ພິດສຸວັນ ເລຂາທິການໃຫຍ່ອາຊຽນປະກາດວ່າກົດບັດດັ່ງກ່າວຈະບັງເກີດຜົນບັງຄັບໃຊ້ໃນທ້າຍປີ 2008.ນີ້ແມ່ນເອກະສານສະບັບທຳອິດທີ່ມີການຜູກມັດທາງດ້ານກົດຫມາຍທົ່ວໄປຕໍ່ບັນດາສະມາຊິກອາຊຽນໃນ 40 ປີທີ່ສ້າງຕັ້ງອາຊຽນມານີ້,ມີຄວາມຫມາຍເປັນຫລັກຫມາຍທາງໃນຂະບວນວິວັດຫັນອາຊຊຽນເປັນເອກະພົບດຽວ.ກອງປະຊຸມສຸດຍອດຄັ້ງທີ 14 ແຕ່ເດີມແມ່ນຈະຈັດຂຶ້ນຢູ່ບາງກອກຂອງໄທ,ກໍ່ແມ່ນເພື່ອຈັດງານສະຫລອງພິເສດຢູ່ບາງກອກທີ່ເປັນບ່ອນຫ້າປະເທດທີ່ສ້າງຕັ້ງອາຊຽນເຊັນຖະແຫລງການໃນຄາວນັ້ນ,ເພື່ອສະຫລອງກົດບັດອາຊຽນກາຍເປັນຈິງ.
ແຕ່ວ່າ, ຍ້ອນສະຖານະການໄທຕົກຢູ່ໃນສະພາບປັ່ນປ່ວນ, ວັນທີ2ທັນວານີ້, ລັດຖະບານໄທໄດ້ຈັດກອງປະຊຸມ, ອະນຸມັດຂໍ້ສະເໜີຂອງກະຊວງການຕ່າງປະເທດໄທກ່ຽວກັບການເລື່ອນເວລາຈັດກອງປະຊຸມສຸດຍອດອາຊຽນແລະກອງປະຊຸມສຸດຍອດອາຊີຕາເວັນອອກໄປຮອດເດືອນມີນາປີໜ້າ.
ກອງເລຂາອາຊຽນແລະປະເທດສະມາຊິກຈຳນວນໜຶ່ງມີຄວາມເຫັນຕ່າງກັນຕໍ່ການເລື່ອນເວລາຈັດກອງປະຊຸມສຸດຍອດ. ວັນທີ3ທັນວານີ້ຢູ່ສຳນັກງານໃຫຍ່ອາຊຽນທີ່ຕັ້ງຢູ່ຈາກາຕາແຫ່ງອິນໂດເນເຊຍ, ທ່ານຊຸລິນ ພິດຊຸວັນ ເລຂາທິການໃຫຍ່ອາຊຽນໄດ້ອອກຖະແຫຼງການ, ສະແດງຄວາມຂອບໃຈນຳລັດຖະບານໄທທີ່ໄດ້ຕົກລົງແບບນີ້ຫຼັງຈາກພິຈາລະນາປັດໄຈຕ່າງໆຢ່າງຮອບດ້ານ, ທ່ານກ່າວວ່າ, ຂໍ້ຕົກລົງທີ່ເລື່ອນເວລາຈັດກອງປະຊຸມສຸດຍອດບໍ່ຄວນກະທົບເຖິງຄວາມພະຍາຍາມຕ່າງໆຂອງອາຊຽນເພື່ອປັບປຸງຊີວິດການເປັນຢູ່ແລະສະຫວັດດີການຂອງປະຊາຊົນປະເທດຕ່າງໆໃນພາກພື້ນນີ້.
ສີງກະໂປພັດສະແດງຄວາມຜິດຫວັງຕໍ່ເລື່ອງນີ້. ໂຄສົກກະຊວງການຕ່າງປະເທດສີງກະໂປກ່າວວ່າ, ປະຈຸບັນວິກິດການການເງິນທົ່ວໂລກໄດ້ມີຜົນກະທົບຕໍ່ປະເທດສະມາຊິກອາຊຽນທັງໝົດ. ຍ້ອນສະຖານະການເຄັ່ງຂຶ້ນ, ກອງປະຊຸມສຸດຍອດອາຊຽນຄວນຈັດຂຶ້ນໂດຍໄວ. ຖ້າວ່າໄທບໍ່ສາມາດຈັດກອງປະຊຸມສຸດຍອດໃນໄວໆນີ້, ກໍຄວນພິຈາລະນາຈັດກອງປະຊຸມສຸດຍອດເທື່ອນີ້ຢູ່ສຳນັກງານໃຫຍ່ອາຊຽນທີ່ຕັ້ງຢູ່ຈາກາຕາໃນຖານະເປັນປະທານວຽນ. ກ່ອນໜ້າທີ່, ທ່ານຊູຊີໂຣ ບຳບັງ ປະທານາທິບໍດີອິນໂດເນເຊຍກ່າວວ່າ, ຖ້າວ່າສະຖານະການໄທບໍ່ສາມາດຄວບຄຸມໄດ້, ອິນໂດເນເຊຍຍິນດີຮັບຈັດກອງປະຊຸມສ່ວນໜຶ່ງຂອງກອງປະຊຸມສຸດຍອດເທື່ອນີ້.
ລັດຖະບານໄທໄດ້ກ່າວວ່າ, ກ່ຽວກັບວັນເວລາລະອຽດທີ່ຈັດກອງປະຊຸມສຸດຍອດ, ໄທຈະຕົກລົງພາຍຫຼັງປຶກສາຫາລືກັບ 9 ປະເທດສະມາຊິກອື່ນໆ. ແຕ່ວ່າມີຫາງສຽງຊີ້ອອກວ່າ, ຖ້າວ່າບັນຫາກອງປະຊຸມສຸດຍອດອາຊຽນເລື່ອນເວລາບໍ່ສາມາດໄດ້ຮັບການແກ້ໄຂຢ່າງທັນການ, ອາດຈະເຮັດໃຫ້ບັນຫາ"ກົດບັດອາຊຽນ"ສັບສົນເຂົ້າ.
