ທ່ານເຈຍຊີ້ງລິນເຂົ້າຮ່ວມພິທີສະເຫຼີມສະຫຼອງການສ້າງສາຍພົວພັນການທູດຈີນກຳປູເຈຍຄົບຮອບ 50 ປີ

(GMT+08:00) 2008-12-05 16:09:19 cri
-----------------------------------------------------------------------------------------------------------------

ຕາມຂ່າວCRI: ວັນທີ 4 ທັນວານີ້, ທ່ານເຈຍຊີ້ງລິນ ປະທານສະພາເປິກສາການເມືອງປະຊາຊົນແຫ່ງຊາດຈີນທີ່ພວມດຳເນີນການຢ້ຽມຢາມສັນຖະວະໄມຕີຢ່າງເປັນທາງການຢູ່ກຳປູເຈຍໄດ້ເຂົ້າຮ່ວມພິທີສະເຫຼີມສະຫຼອງການສ້າງສາຍພົວພັນທາງການທູດຈີນກຳປູເຈຍຄົບຮອບ 50 ປີ, ແລະໄດ້ກ່າວຄຳປາໄສທີ່ມີຫົວຂໍ້ວ່າ "ປັບປຸງມິດຕະພາບທີ່ເປັນມູນເຊື້ອ, ຮ່ວມກັນສ້າງອະນາຄົດອັນດີງາມ".

ເດືອນກໍລະກົດ 1958, ຈີນກັບກຳປູເຈຍສ້າງສາຍພົວພັນທາງການທູດຢ່າງເປັນທາງການ. ໃນ 50 ປີມານີ້, ສອງປະເທດບ້ານໃກ້ເຮືອນຄຽງທີ່ດີທີ່ມີວັດທະນະທຳຄ້າຍຄືກັນນີ້, ໄດ້ເສີມສ້າງມິດຕະພາບອັນເລິກເຊິ່ງ. ປະຈຸບັນ, ການພົວພັນລະຫວ່າງຈີນກັບກຳປູເຈຍໄດ້ເຂົ້າໃນໄລຍະພັດທະນາໃໝ່ແຫ່ງການສ້າງການພົວພັນຄູ່ຮ່ວມມືຮອບດ້ານ. ແຕ່ເດືອນມັງກອນຫາເດືອນກັນຍາປີນີ້, ມູນຄ່າການຄ້າລະຫວ່າງຈີນກັບກຳປູເຈຍບັນລຸ 910 ລ້ານໂດລາ, ກຳປູເຈຍໄດ້ກາຍເປັນໜຶ່ງໃນບັນດາຈຸດໝາຍທີ່ພິຈາລະນະລົງທຶນໂດຍກົງກ່ອນໝູ່ຂອງຈີນ. ໂດຍແນໃສ່ອະນາຄົດການພັດທະນາທີ່ດີງາມລະຫວ່າງຈີນກັບກຳປູເຈຍ, ທ່ານເຈຍຊີ້ງລິນກ່າວວ່າ:

"ລັດຖະບານຈີນເອົາໃຈໃສ່ພັດທະນາການພົວພັນກັບກຳປູເຈຍໃນລະດັບສູງ, ຍິນດີທຳຄວາມພະຍາຍາມຮ່ວມກັບກຳປູເຈຍ, ຊຸກຍູ້ໃຫ້ການພົວພັນຄູ່ຮ່ວມມືຮອບດ້ານລະຫວ່າງຈີນກັບກຳປູເຈຍພັດທະນາໃນໄລຍະຍາວແລະປອດໃສຕື່ມອີກ, ເຮັດໃຫ້ປະຊາຊົນສອງປະເທດເປັນເພື່ອນມິດທີ່ດີ, ອ້າຍນ້ອງທີ່ດີ, ບ້ານໃກ້ເຮືອນຄຽງທີ່ດີ."

ວິກິດການເງິນກູ້ດ້ອຍຄຸນນະພາບອາເມລິກາທີ່ເກີດຂຶ້ນໃນທ້າຍປີກາຍນີ້ໄດ້ແຜ່ລາມເປັນວິກິດການການເງິນສາກົນ. ໂດຍໄດ້ຮັບຜົນກະທົບຈາກວິກິດການການເງິນ, ຈີນໄດ້ວາງນະໂຍບາຍຢ່າງທັນການຕາມການປ່ຽນແປງຂອງສະພາບການຕົວຈິງ, ໄດ້ເພີ່ມທະວີການຄຸ້ມຄອງມະຫາພາກ. ທ່ານເຈຍຊີ້ງລິນກ່າວວ່າ, ເສດຖະກິດຈີນພັດທະນາຢ່າງໝັ້ນທ່ຽງແລະໄວສົມຄວນ, ເລື່ອງນີ້ເອງກໍ່ແມ່ນການປະກອບສ່ວນສຳຄັນຕໍ່ການຮັກສາຄວາມໝັ້ນທ່ຽງຂອງການເງິນສາກົນແລະຊຸກຍູ້ການພັດທະນາເສດຖະກິດຂອງໂລກ. ທ່ານກ່າວວ່າ:

"ໃນຖານະເປັນສະມາຊິກທີ່ຮັບຜິດຊອບຂອງປະຊາຄົມໂລກ,ຈີນຍິນດີສືບຕໍ່ໃຊ້ທ່າທີຮັບຜິດຊອບ,ເຂົ້າຮ່ວມການຮ່ວມມືສາກົນທີ່ຮັກສາການເງິນສາກົນໃຫ້ມີສະຖຽນລະພາບ,ຊຸກຍູ້ເສດຖະກິດໂລກພັດທະນາ,ສະໜັບສະໜູນສະຖາບັນການເງິນສາກົນເພີ່ມທະວີຄວາມສາມາດລະດົມທຶນຕາມການປ່ຽນແປງຂອງຕະຫຼາດການເງິນສາກົນ,ເພີ່ມທະວີການສະໜັບສະໜູນຕໍ່ປະເທດພວມພັດທະນາທີ່ຖືກວິກິດການການເງິນກະທົບ."

ທ່ານເຈຍຊິ້ງລິນຍັງເຫັນວ່າ,ໂດຍປະເຊີນໜ້າກັບສິ່ງທ້າທາຍທີ່ວິກິດການການເງິນນຳມາໃຫ້,ຈີນກັບກຳປູເຈຍຮ່ວມມືກັນ,ສະໜັບສະໜູນເຊິ່ງກັນແລະກັນ,ຫັນສິ່ງທ້າທາຍເປັນໂອກາດ,ຊຸກຍູ້ການພົວພັນແບບຮອບດ້ານເລິກເຊິ່ງລະຫວ່າງຈີນກັບກຳປູເຈຍ,ນີ້ມີຄວາມໝາຍຕົວຈິງອັນສຳຄັນແລະຄວາມໝາຍຍຸດທະສາດອັນຍາວນານ,ສອດຄ່ອງກັບຄວາມປາຖະໜາຮ່ວມຂອງປະຊາຊົນສອງຊາດ,ແລະມີຜົນດີຕໍ່ສັນຕິພາບ,ສະຖຽນລະພາບແລະການພັດທະນາຂອງພາກພື້ນຕົນ.ຕໍ່ເລື່ອງນີ້,ທ່ານສະເໜີວ່າ:

"ສອງຝ່າຍຄວນຢືນຢູ່ບົນພື້ນຖານທີ່ໂຄລົບເຊິ່ງກັນແລະກັນ,ຂຸດຄົ້ນກຳລັງແຮງບົ່ມຊ້ອນຂອງການຮ່ວມມື,ເພີ່ມທະວີທ່າແຮງທີ່ຄ້ຳຊູກັນ,ບັນລຸຕ່າງຝ່າຍຕ່າງມີຜົນປະໂຫຍດ.ສອງຝ່າຍຄວນແລກປ່ຽນຄວາມເຫັນກ່ຽວກັບທ່າທີຕໍ່ບັນຫາສາກົນແລະພາກພື້ນອັນສຳຄັນໂດຍຜ່ານຮູບການທາງການທູດ.ພ້ອມກັນຊຸກຍູ້ການພົວພັນຄູ່ຮ່ວມມືຍຸດທະສາດທີ່ມີສຳຕິພາບແລະຈະເລີນຮຸ່ງເຮືອງລະຫວ່າງຈີນກັບອາຊຽນ,ເພີ່ມທະວີການສ້າງສາເຂດການຄ້າເສລີຈີນກັບອາຊຽນ."

ຂ່າວ-ບົດທີ່ກ່ຽວຂ້ອງ

ຄຳເຫັນ