ຈີນແລະອາເມລິກາມໄດ້ຮັບໝາກຜົນອັນດີງາມກ່ຽວກັບການເພີ່ມທະວີແລະລົງເລິກການພົວພັນເສດຖະກິດສອງຝ່າຍ
-----------------------------------------------------------------------------------------------------------------
ວັນທີ5ທັນວານີ້, ການເຈລະຈາເສດຖະກິດຍຸດທະສາດຈີນອາເມລິກາຄັ້ງທີ5ທີ່ດຳເນີນສອງວັນໄດ້ສິ້ນສຸດລົງຢູ່ປັກກິ່ງແລ້ວ, ຫຼັງຈາກການເຈລະຈາ,ທ່ານວາງຊີສ່ານ ຮອງນາຍົກລັດຖະມົນຕີຈີນ ແລະທ່ານເຮັນຣີ ພໍເຊິນ ລັດຖະມົນຕີວ່າການກະຊວງການເງິນອາເມລິກາໄດ້ຖະແຫຼງຂ່າວຮ່ວມກັນ.ສອງຝ່າຍກ່າວວ່າ,ການເຈລະຈາໄດ້ຮັບໝາກຜົນປະມານ40ລາຍການທີ່ມີຜົນດີຕໍ່ການເພີ່ມທະວີແລະລົງເລິກການພົວພັນເສດຖະກິດສອງຝ່າຍໃນຂົງເຂດສຳຄັນທີ່ມີລັກສະນະຍຸດທະສາດ.
ໃນການເຈລະຈາເສດຖະກິດຍຸດທະສາດຈີນອາເມລິກາຄັ້ງນີ້, ສອງປະເທດເຫັນດີສືບຕໍ່ຮັກສາການແລກປ່ຽນອັນໃກ້ຊິດຕໍ່ນະໂຍບາຍເສດຖະກິດມະຫາພາກ, ແລະໃຫ້ຄຳໝັ້ນສັນຍາອີກເທື່ອໜຶ່ງຈະສືບຕໍ່ໃຊ້ມາດຕະການຕົວຈິງ,ຮັບປະກັນຕະຫຼາດການເງິນໃຫ້ມີສະຖຽນລະພາບ,ຊຸກຍູ້ເສດຖະກິດທົ່ວໂລກເຕີບໂຕຢ່າງຕໍ່ເນື່ອງ.
ໃນການເຈລະຈາ, ສອງຝ່າຍຈີນອາເມລິກາໄດ້ສະແດງຄວາມໝັ້ນໃຈແລະທ່າທີອັນເດັດດ່ຽວໃນການຮ່ວມກັນຮັບມືກັບວິກິດການການເງິນ. ທ່ານຫວາງສີຊ່ານ ຮອງນາຍົກລັດ ຖະມົນຕີຈີນກ່າວວ່າ:"ສອງຝ່າຍກ່າວວ່າ, ຈະເອົາໃຈໃສ່ຄວາມສົນໃຈຂອງຝ່າຍກົງກັນຂ້າມຢ່າງເຕັມສ່ວນ,ຮ່ວມມືຢ່າງໃກ້ຊິດໃນດ້ານປະສານງານນະໂຍບາຍເສດຖະກິດມະຫາພາກ,ການຕິດຕາມຄຸ້ມຄອງການທະນາຄານແລະເພີ່ມຕົວແທນຂອງປະເທດພວມພັດທະນາໃນສະຖາບັນການເງິນສາກົນ,ແລະກ້າວເຖິງຄວາມເຫັນເປັນເອກະສັນກັນກ່ຽວກັບມາດຕະການລະອຽດ."
ເພື່ອຈັດຕັ້ງປະຕິບັດຄວາມຮັບຮູ້ທີ່ເປັນເອກະສັນກັນຂອງກອງປະຊຸມສຸດຍອດG20,ຈີນອາເມລິກາຍັງໄດ້ປຶກສາຫາລືຫົວຂໍ້ທີ່ວ່າຈະເຮັດແນວໃດນຳໃຊ້ສະຖາບັນການເງິນແລະເສດຖະກິດສາກົນໃຫ້ດີແລະຊຸກຍູ້ໃຫ້ເສດຖະກິດໂລກເຕີບໂຕແລະມີສະຖຽນລະພາບ.ທ່ານພໍຊັນ ລັດຖະມົນຕີວ່າການກະຊວງການເງິນອາເມລິກາກ່າວວ່າ: "ເສດຖະກິດຈີນກໍ່ຄືກັນກັບເສດຖະກິດອາເມລິກາ,ລ້ວນແຕ່ອາໄສການຄ້າທົ່ວໂລກໃນລະດັບສູງ.ຈີນພວມພະຍາຍາມຊຸກຍູ້ໃຫ້ເສດຖະກິດໂລກມີສະຖຽນລະພາບແລະເຕີບໂຕ.ຂ້າພະເຈົ້າສະໜັບສະໜູນຈີນກາຍເປັນສະມາຊິກເວທີປຶກສາຫາລືສະຖຽນລະພາບຂອງການເງິນໃນຕໍ່ໜ້າ.ນີ້ແມ່ນຄວາມຮັບຮູ້ທີ່ເປັນເອກະສັນກັນທີ່ບັນລຸໃນກອງປະຊຸມສຸດຍອດG20ກ່ຽວກັບຕະຫຼາດການເງິນແລະເສດຖະກິດໂລກທີ່ຈັດຂຶ້ນໃນເດືອນພະຈິກແລ້ວນີ້,ແມ່ນການກະທຳທີ່ລະອຽດອັນໜຶ່ງທີ່ດຳເນີນເພື່ອເຮັດໃຫ້ເສດຖະກິດທົ່ວໂລກມີສະຖຽນລະ ພາບ."
ເພື່ອຊຸກຍູ້ການຄ້າລະຫວ່າງຈີນກັບອາເມລິກາແລະລະຫວ່າງຈີນອາເມລິກາກັບອົງກອນເສດຖະກິດທີ່ຈະເລີນໃໝ່,ທະນາຄານຂາເຂົ້າຂາອອກຈີນແລະທະນາຄານຂາເຂົ້າຂາອອກອາເມລິກາເຫັນດີສະໜອງເງິນທຶນໃໝ່ສະໜັບສະໜູນການຄ້າ,ໃນນັ້ນ,ຈີນສະໜອງ8ຕື້ໂດລາ,ອາເມລິກາສະໜອງ12ຕື້ໂດລາ,ເພື່ອຊ່ວຍເຫຼືອການສົ່ງອອກຂອງຜະລິດຕະພັນຫຼືການບໍລິການຂອງຈີນແລະອາເມລິກາໃນເວລາອັນຈຳເປັນ.
ນອກນັ້ນ, ພາຍໃຕ້ສະພາບທີ່ເສດຖະກິດໂລກໃນປະຈຸບັນຊຸດໂຊມລົງຢ່າງບໍ່ຢຸດຢັ້ງ, ຈີນອາເມລິກາກ່າວເນັ້ນແລະຮ່ວມກັນໃຫ້ຄຳໝັ້ນສັນຍາວ່າຈະຊຸກຍູ້ໃຫ້ການລົງທຶນແລະການຄ້າເປີດກວ້າງກວ່າເກົ່າ. ສອງຝ່າຍເຫັນວ່າ, ນັບມາຮອດປະຈຸບັນ, ການເຈລະຈາສັນຍາປົກປ້ອງການລົງທຶນສອງຝ່າຍທີ່ດຳເນີນມາເປັນ 3 ເທື່ອແລ້ວແມ່ນໄດ້ຮັບໝາກຜົນອັນດີງາມ. ສອງຝ່າຍຈະອອກແຮງເພື່ອບັນລຸສັນຍາທີ່ຕ່າງຝ່າຍຕ່າງອຳນວຍຜົນປະໂຫຍດໃຫ້ແກ່ກັນ, ເພື່ອອອກແຮງປົກປ້ອງການລົງທຶນແລະເຮັດໃຫ້ການລົງທຶນສະດວກກວ່າເກົ່າ, ແລະຍົກຄວາມປອດໃສແລະຄວາມຄາດຄະເນໄດ້ຂອງການລົງທຶນໃຫ້ສູງຂຶ້ນ.
ທ່ານພໍຊັນ ລັດຖະມົນຕີວ່າການກະຊວງການເງິນອາເມລິກາຍັງໄດ້ສະແດງຄວາມຊົມເຊີຍຕໍ່ຈີນເປີດຕະຫຼາດການເງິນເພີ່ມຂຶ້ນ.
