ທ່ານຊາໂກຊີ ພົບປະກັບດາໄລລາມະໄດ້ທຳລາຍການພົວພັນຈີນຝະຣັ່ງຢ່າງຫນັກຫນ່ວງ
-----------------------------------------------------------------------------------------------------------------
ຕາມຂ່າວCRI: ວັນທີ 6ທັນວານີ້ ,ທ່ານນີໂຄລັສ ຊາໂກຊີ ປະທານາ ທິບໍດີຝຣັ່ງບໍ່ເອົາຫົວຊານຳການຄັດຄ້ານຢ່າງຮຸນແຮງຂອງປະຊາຊົນຈີນ ແລະການປະທ້ວງຢ່າງເຄັ່ງຂຶມຂອງຈີນເທື່ອແລ້ວເທື່ອອີກ, ພົບປະກັບດາໄລລາມະຕາມລຳພັງໃຈດ້ວຍສອງຖານະຄື: ປະທານາທິບໍດີຝະລັ່ງແລະປະເທດປະທານໝູນວຽນຂອງສະຫະພາບເອີລົບ , ນີ້ໄດ້ແຊກແຊງວຽກງານພາຍໃນຂອງຈີນຢ່າງຮ້າຍແຮງ, ທຳລາຍຜົນປະໂຫຍດອັນເປັນພື້ນຖານຂອງຈີນຢ່າງໜັກໜ່ວງ, ທຳລາຍພື້ນຖານການເມືອງໃນການພົວພັນລະຫວ່າງຈີນກັບຝະຣັ່ງ.
ໃນເວລາທ່ານອູຈ້ຽນມິນ ອະດີດເອກອັກຄະລັດຖະທູດຈີນປະຈຳຝຣັ່ງ ທັງເປັນກຳມະການໃຫ້ຄຳປຶກສາດ້ານນະໂຍບາຍການຕ່າງປະເທດຂອງກະຊວງການຕ່າງປະເທດຈີນ ໄດ້ໃຫ້ສຳພາດຕໍ່ນັກຂ່າວຂອງວິທະຍຸພວກເຮົາ, ທ່ານກ່າວວ່າ, ທ່ານຊາໂກຊີໄດ້ມີການກະທຳທີ່ບໍ່ສະຫຼາດເລີຍໃນບັນຫາຕິເບດ, ນີ້ບໍ່ພຽງແຕ່ທຳລາຍການພົວພັນຈີນຝຣັ່ງເທົ່ານັ້ນ, ຍັງກີດຂວາງ ບໍ່ໃຫ້ການສົນທະນາ ແລກປ່ຽນແລະຮ່ວມມືກັນລະຫວ່າງຈີນກັບເອີລົບດຳເນີນເປັນປົກກະຕິ, ເພາະວ່າ ການພົວພັນລະຫວ່າງປະເທດກັບປະເທດແລະການພົວພັນລະຫວ່າງຈີນກັບເອີລົບແມ່ນສ້າງຕັ້ງຂຶ້ນບົນພື້ນຖານທີ່ໂຄລົບເຊິ່ງກັນແລະກັນ ສະເຫມີພາບຕ່າງຝ່າຍຕ່າງມີຜົນປະໂຫຍດ, ການທີ່ທ່ານຊາໂກຊີພົບປະກັບດາໄລລາມະນັ້ນໄດ້ລະເມີດຫຼັກການນີ້ຢ່າງເປັນເປີດແປນ.
ເປັນຫຍັງທ່ານຊາໂກຊີຕ້ອງພົບປະກັບດາໄລລາມະຕາມລຳພັງໃຈ? ທ່ານລິວຈ້ຽນເສີງ ຮອງນັກຄົ້ນຄວ້າພະແນກຄົ້ນຄວ້າສະຫະພາບເອີລົບຂອງສະຖາບັນຄົ້ນຄວ້າກ່ຽວກັບບັນຫາສາກົນຂອງຈີນເຫັນວ່າ, ທ່ານຊາໂກຊີຢາກຜ່ານການພົບປະກັບດາໄລລາມະ ເພື່ອກອບກູ້ສະພາບການເມືອງຂອງຕົນທີ່ມີຄວາມຫຍຸ້ງຍາກຢູ່ພາຍໃນແລະຕ່າງປະເທດ. ທ່ານລິວຈ້ຽນເສີງ
ຊີ້ອອກວ່າ, ການສົ່ງຕໍ່ທວນໄຟໂອລິມປິກປັກກິ່ງໄດ້ເກີດເຫດການຕ່າງໆໃນເວລາສົ່ງຕໍ່ຢູ່ເອີລົບແລະອາເມລິກາ. ທ່ານຊາໂກຊີ ຢາກສະແດງຄວາມສາມາດຂອງຕົນທີ່ເປັນຜູ່ນຳເອີລົບເພື່ອແກ້ໄຂວິກິດການການເງິນໃນຍາມເປັນປະເທດປະທານຫມູນວຽນຂອງສະຫະພາບເອີລົບ. ນອກນີ້, ປະຊາຊົນຝຣັ່ງຈຳນວນຫນຶ່ງ ມີທັດສະນະປະຫວັດສາດທີ່ຜິດພາດ, ເຂົາເຈົ້າເຫັນວ່າ ຕິເບດແມ່ນປະເທດທີ່ເປັນເອກະລາດ, ສ່ວນທ່ານຊາໂກຊີກໍ່ໄດ້ເອົາໃຈໃສ່ນຳທັດສະນະທີ່ຜິດພາດຂອງຄົນເຫຼົ່ານີ້ ເພື່ອໃຫ້ເພິ່ນໄດ້ຮັບການສະຫນັບ ສະຫນູນຈາກພາຍໃນປະເທດ.
ປະຈຸບັນ, ຈີນກັບສະຫະພາບເອີລົບທີ່ລວມມີຝຣັ່ງໄດ້ມີຜົນປະໂຫຍດຮ່ວມກັນຢ່າງກວ້າງຂວາງ, ການເພີ່ມທະວີແລະຂະຫຍາຍການພົວພັນລະຫວ່າງຈີນກັບເອີລົບນັ້ນມີຜົນດີຕໍ່ສອງປະເທດແລະໂລກ. ໂດຍສະເພາະແມ່ນໃນສະພາບການໃນປະຈຸບັນ, ຈີນກັບສະຫະພາບເອີລົບຕ້ອງເພີ່ມທະວີການຮ່ວມມືຮັບມືກັບສິ່ງທ້າທາຍຕ່າງໆທີ່ມີລັກສະນະທົ່ວໂລກເຊັ່ນ: ຮັບມືກັບວິກິດການການເງິນສາກົນ ຄວາມປອດໄພດ້ານອາຫານແລະພະລັງງານ ການປ່ຽນແປງຂອງດິນຟ້າອາກາດແລະອື່ນໆ. ທ່ານອູຈ້ຽນມິນຫວັງໃຫ້ຝຣັ່ງຢຸດຕິການທຳລາຍອະທິປະໄຕແລະຜືນແຜ່ນດິນອັນຄົບຖ້ວນຂອງຈີນ, ເພື່ອປັບປຸງການພົວພັນຈີນຝຣັ່ງທີ່ໄດ້ຖືກທຳລາຍໃນປະຈຸບັນໃຫ້ກັບຄືນດີຂຶ້ນ.
