ທ່ານອະພິຊິດ ຫົວໜ້າພັກປະຊາທິປັດໄທໄດ້ຮັບເລືອກຕັ້ງເປັນນາຍົກລັດຖະມົນ ຕີໄທຄົນໃໝ່
-----------------------------------------------------------------------------------------------------------------
ວັນທີ 15 ທັນວານີ້, ທ່ານອະພິຊິດ ເວດຊາຊີວະ ຫົວໜ້າພັກປະຊາທິປັດໄທເຊິ່ງເປັນອະດີດພັກຝ່າຍຄ້ານຂອງໄທໄດ້ຮັບເລືອກຕັ້ງເປັນນາຍົກລັດຖະມົນຕີຜູ້ໃໝ່, ນີ້ເປັນສັນຍາລັກທີ່ນັບແຕ່ປີ 2001 ເປັນຕົ້ນມາ, ປະຫວັດສາດທີ່ພັກການເມືອງຂອງທ່ານທັກສິນ ຊິນນະວັດ ອະດີດນາຍົກລັດຖະມົນຕີໄທຫຼືພັກການເມືອງທີ່ນິຍົມທ່ານທັກສິນແມ່ນພັກຄອງອຳນາດຕົ້ນຕໍຂອງລັດຖະບານທີ່ມາຈາກການເລືອກຕັ້ງຕະຫຼອດມານັ້ນໝົດອຳນາດ.
ນັກວິເຄາະເຫັນວ່າ, ພັກປະຊາທິປັດຄອງອຳນາດຢ່າງສຳເລັດຜົນໃນເທື່ອນີ້ມີສາເຫດຕົ້ນຕໍ 3 ດ້ານ.
ຄືກ່ອນອື່ນໝົດ, ພັກພະລັງປະຊາຊົນທີ່ຖືກສານລັດຖະທຳມະນູນໄທຍຸບນັ້ນເກີດການແຕກແຍກ, "ກຸ່ມນິຍົມ ເນວິນ ຊິດຊອບ"ຂອງພັກພະລັງປະຊາຊົນປະຕິເສດເຂົ້າຮ່ວມກັບພັກເພື່ອໄທ, ແລະປະກາດໃຫ້ການສະໜັບສະໜູນພັກປະຊາທິປັດປະກອບລັດຖະບານ.
ອັນທີສອງ, ວົງການຕ່າງໆຂອງໄທ, ໂດຍສະເພາະແມ່ນບຸກຄົນວົງການອຸດສາຫະກຳການຄ້າໄທຮຽກຮ້ອງໃຫ້"ພັກການເມືອງຄອງອຳນາດຜັດປ່ຽນກັນ"ໂດຍທົ່ວໄປ, ເຂົາເຈົ້າເຫັນວ່າ, ຖ້າວ່າຍັງໃຫ້ພັກເພື່ອໄທເຊິ່ງເປັນຕົວແທນຂອງພັກພະລັງປະຊາຊົນມາຈັດຕັ້ງລັດຖະບານ, ກຸ່ມພັດທະມິດປະຊາຊົນເພື່ອປະຊາທິປະໄຕກໍ່ຍັງຈະໂຮມຊຸມນຸມປະທ້ວງອີກເທື່ອໜຶ່ງຢ່າງແນ່ນອນ, ຮອດເວລານັ້ນທົ່ວປະເທດໄທຈະບໍ່ມີວັນສະຫງົບເລີຍ.
ແລະສາເຫດສຸດທ້າຍແມ່ນ, ສື່ມວນຊົນໄທເປີດເຜີຍວ່າ, ຫວ່າງມໍ່ໆນີ້, ຝ່າຍທະຫານໄທໄດ້ເຂົ້າຮ່ວມວຽກງານປະກອບລັດຖະບານໃນນາມ"ບຸກຄົນສຳຄັນຂອງຊາດຮຽກຮ້ອງໃຫ້ປ່ຽນພັກຄອງອຳນາດ, ກາຍເປັນປັດໄຈທີ່ສຳຄັນທີ່ເຮັດໃຫ້ພັກຮ່ວມລັດຖະບານເກົ່າຕ້ອງສິ້ນອຳນາດ, ໃນ 6 ພັກການເມືອງຂອງອະດີດພັກຮ່ວມລັດຖະບານ, ຍັງມີແຕ່ພັກປະຊາລາດເກົ່ານີ້ທີ່ຍັງສະໜັບສະໜູນພັກເພື່ອໄທ.
ເຖິງວ່າລັດຖະບານຊຸດໃໝ່ທີ່ຖືພັກປະຊາທິປັດເປັນໃຈກາງໃກ້ຈະສ້າງຕັ້ງ ຂຶ້ນກໍຕາມ,ແຕ່ຄວາມແຕກແຍກກັນແລະຄວາມຂັດແຍ່ງກັນທາງການເມືອງພາຍໃນປະເທດໄທຍັງຄົງຢູ່,ເສັ້ນທາງຄອງອຳນາດຂອງລັດຖະບານຊຸດໃໝ່ຈະປະເຊີນຄວາມຫຍຸ້ງຍາກຢ່າງຫຼວງຫຼາຍ.
ກ່ອນອື່ນ,ພັກເພື່ອໄທຮູ້ສຶກບໍ່ຍອມຮັບວ່າພັກປະຊາທິປັດເປັນພັກຄອງອຳນາດ,ຫວ່າງກ່ອນນີ້ບໍ່ດົນ ກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດທີ່ສະໜັບສະໜູນພັກເພື່ອໄທໄດ້ປະກາດວ່າ,ຖ້າວ່າພັກປະຊາທິ ປັດຈັດຕັ້ງລັດຖະບານສຳເລັດ,ກຸ່ມນີ້ຈະທຳການເຄື່ອນໄຫວປະທ້ວງ.
ອີກອັນໜຶ່ງ,ຍ້ອນວ່າພັກຮ່ວມລັດຖະບານມີຫຼາຍພັກຫຼາຍຝ່າຍ,ບາງຝ່າຍແມ່ນຂຶ້ນກັບອະດີດພັກພະລັງປະຊາຊົນທີ່ເປັນປໍລະປັກກັບພັກປະຊາທິປັດຕະຫຼອດມາ,ສະນັ້ນຄວາມສາມາດໃນການຄອງອຳນາດຂອງພັກປະຊາທິປັດຍ່ອມຈະຖືກຈຳກັດຈາກພັກຝ່າຍຕ່າງໆ.
ນອກນີ້,ຍ້ອນວ່າພັກຮ່ວມລັດຖະບານພຽງແຕ່ກວມທີ່ນັ່ງຂອງສະພາຜູ່ແທນລາຊະດອນຫຼາຍກວ່າພັກຝ່າຍຄ້ານ 34 ທີ່ນັ່ງເທົ່ານັ້ນ,ນີ້ຍ່ອມຈະເປັນອຸປະສັກທີ່ໜັກໜ່ວງຕໍ່ການຈັດຕັ້ງຄະນະລັດຖະບານແລະການຄອງອຳນາດ.
ສຸດທ້າຍ,ຄະນະກຳມະການເລືອກຕັ້ງຂອງໄທກຳນົດຈັດການເລືອກຕັ້ງເພີ່ມຢູ່26ເຂດເລືອກຕັ້ງໃນ22ຈັງຫວັດໃນເດືອນມັງກອນປີໜ້າ,ໂດຍຈະເລືອກສະມາຊິກສະພາຜູ່ແທນລາຊະດອນ29ທີ່ນັ່ງ,ຜົນການເລືອກຕັ້ງອອກມາແນວໃດກໍ່ຈະເກີດຜົນກະທົບຕໍ່ຄວາມໝັ້ນຄົງຂອງພັກຮ່ວມລັດຖະບານ.
