ເປັນຫຍັງກູບາເຂົ້າຮ່ວມກອງປະຊຸມສຸດຍອດການພັດທະນາແລະເຊື່ອມໂຍງອາເມລິກາລາຕິນແລະກາຣາອິບ
-----------------------------------------------------------------------------------------------------------------
ວັນທີ 16 ທັນວານີ້, ກອງປະຊຸມສຸດຍອດການພັດທະນາແລະເຊື່ອມໂຍງອາເມລິກາລາຕິນແລະກາຣາອິບຫຼືSLACຄັ້ງທຳອິດໄດ້ໄຂຂຶ້ນຢູ່ເບຼຊີນ. ໃນຜູ້ນຳປະເທດຕ່າງໆທີ່ເຂົ້າຮ່ວມກອງປະຊຸມ, ຜູ້ທີ່ດຶງດູດຄວາມສົນໃຈຫຼາຍທີ່ສຸດແມ່ນທ່ານຣາອູນ ກາສໂຕຣ ປະທານສະພາແຫ່ງລັດກູບາທັງເປັນປະທານສະພາຜູ້ແທນອຳນາດປະຊາຊົນແຫ່ງຊາດກູບາ. ນີ້ບໍ່ພຽງແຕ່ແມ່ນການຢ້ຽມຢາມຄັ້ງທຳອິດຂອງທ່ານພາຍຫຼັງໄດ້ຮັບການເລືອກຕັ້ງເປັນປະທານສະພາຜູ້ແທນອຳນາດປະຊາຊົນແຫ່ງຊາດກູບາໃນເດືອນກຸມພາປີນີ້ເທົ່ານັ້ນ, ວົງການພາຍນອກຍັງເຫັນວ່ານີ້ແມ່ນ"ການເຄື່ອນໄຫວຄັ້ງໃຫຍ່"ທີ່ກູບາທັບມ້າງການປິດລ້ອມຂອງອາເມລິກາ.
ພ້າທຽບກັບທ່ານຟີແດນ ກາສໂຕຣ ອ້າຍຂອງທ່ານຣາອູນ ກາສໂຕຣທີ່ເປັນຄົນເດັດຂາດເຂັ້ມແຂງແລ້ວ, ທ່ານຣາອູນເຮັດວຽກຕິດແທດກັບຕົວຈີງແລະເອົາໃຈໃສ່ນຳການພັດທະນາເສດຖະກິດແຫ່ງຊາດຫຼາຍກວ່າ. ນັບແມ່ທ່ານກຳອຳນາດການປົກຄອງມານີ້, ການຕ່າງປະເທດຂອງກູບາໄດ້ຫ້າວຫັນຂຶ້ນແບບທີ່ບໍ່ເຄີຍມີມາກ່ອນ, ໄດ້ເພີ່ມທະວີການປັບປຸງການພົວພັນກັບປະເທດອ້ອມຂ້າງໃຫ້ດີຂຶ້ນ, ແລະໄດ້ດຳເນີນການຮ່ວມມືຢ່າງຕັ້ງໜ້າກັບປະເທດອາເມລິກາລາຕິນໃນຂົງເຂດພະລັງງານແລະສະບຽງອາຫານເປັນຕົ້ນ. ນີ້ເຮັດໃຫ້ກູບາມີຊ່ອງທາງການເຄື່ອນໄຫວຫຼາຍກວ່າເກົ່າໃນດ້ານການທັບມ້າງການປິດລ້ອມຂອງອາເມລິກາແລະຍາດເອົາການສະໜັບສະໜູນຂອງພາກພື້ນ. ໃນວັນທີ 16 ເດືອນນີ້, ກູບາໄດ້ເຂົ້າເປັນສະມາຊິກຂອງກຸ່ມກົນໄກປະສານງານແລະໃຫ້ຄຳປຶກສາຖາວອນດ້ານການເມືອງຂອງອາເມລິກາລາຕິນຫຼືກຸ່ມຣີໂອຢ່າງເປັນທາງການ.
ກູບາສາມາດໄດ້ຮັບການສະໜັບສະໜູນຢ່າງກວ້າງຂວາງຈາກປະເທດອາເມລິກາລາຕິນ, ກໍຍ້ອນສຽງຮຽກຮ້ອງໃຫ້ເຂດອາເມລິກາລາຕິນເຊື່ອມໂຍງເຂົ້າກັນນັບມື້ນັບດັງຂຶ້ນແລະອິດທິພົນຂອງອາເມລິກາຫຼຸດລົງເລື້ອຍໆ. ໃນຫຼາຍປີມານີ້, ກຳລັງຝ່າຍຊ້າຍທີ່ມີຈຸດປະສົງຢາກຮ່ວມກັນສ້າງຕົນເອງໃຫ້ເຂັ້ມແຂງຄ່ອຍໆເຕີບໂຕຂຶ້ນຢູ່ປະເທດອາເມລິກາລາຕິນ. ປະຈຸບັນ, ເບຼຊີນ ເວເນຊູເອລາແລະອາກຊັງຕິນແລະປະເທດອື່ນໆເຊິ່ງເປັນປະເທດສຳຄັນຂອງອາເມລິກາລາຕິນລ້ວນແຕ່ມີຜູ້ນຳຝ່າຍຊ້າຍຂຶ້ນກຳອຳນາດການປົກຄອງ. ປະເທດເຫຼົ່ານີ້ໄດ້ສະແດງຄວາມປາດຖະໜາທີ່ຢາກພົ້ນຈາກອຳນາດອິດທິພົນຂອງອາເມລິກາແລະຊຸກຍູ້ໃຫ້ອາເມລິກາລາຕິນເຊື່ອມໂຍງເຂົ້າກັນຢ່າງບໍ່ຢຸດຢັ້ງ. ກອງປະຊຸມສຸດຍອດເທື່ອນີ້ທີ່ມີທຸກປະເທດຂອງເຂດກາຣາອິບແລະຫຼາຍອົງການກໍໄດ້ປະຕິເສດອາເມລິກາອີກ. ທ່ານໂພໂລ ໂຣເປີໂທ ຟຼັນກາ ຫົວໜ້າຄະນະກຳມາທິການປະສານງານກອງປະຊຸມກ່າວວ່າ, ກອງປະຊຸມສຸດຍອດພາກພື້ນເທື່ອນີ້ທີ່ບໍ່ມີອາເມລິກາເຂົ້າຮ່ວມຈະສະໜອງໂອກາດທີ່ດີເພື່ອ"ໃກ້ຊິດກັນ"ໃຫ້ແກ່ປະເທດແລະອົງການຕ່າງໆຂອງອາເມລິກາລາຕິນ. ກູບາເຂົ້າຮ່ວມກອງປະຊຸມເທື່ອນີ້, ຍິ່ງສະແດງໃຫ້ເຫັນວ່າກຳລັງຝ່າຍຊ້າຍຂອງເຂດດັ່ງກ່າວເພີ່ມຂຶ້ນຕື່ມອີກ, ພ້ອມກັນນັ້ນກໍໄດ້ເພີ່ມເງື່ອນໄຂໃຫ້ແກ່ເຂດດັ່ງກ່າວໃນການຕິດຕໍ່ພົວພັນກັບອາເມລິກາ.
