ອັງກິດປະກາດຕາຕະລາງເວລາຖອນທະຫານອອກຈາກອີຣັກ
-----------------------------------------------------------------------------------------------------------------
ໃນຖະແຫຼງການຮ່ວມສະບັບໜຶ່ງທີ່ປະກາດໃນວັນທີ 17 ທັນວານີ້, ທ່ານກໍດອນ ບຼາວ ນາຍົກລັດຖະມົນຕີອັງກິດທີ່ໄປຢ້ຽມຢາມອີຣັກຢ່າງກະທັນຫັນແລະທ່ານນູຣີ ມາລີກີ ນາຍົກລັດຖະມົນຕີອີຣັກປະກາດວ່າ, ກອງທະຫານອັງກິດປະຈຳອີຣັກຈະຖອນອອກຈາກອີຣັກກ່ອນທ້າຍເດືອນກໍລະກົດປີໜ້າ, ແລ້ວສິ້ນສຸດໜ້າທີ່ທາງການທະຫານຢູ່ອີຣັກທີ່ເປັນເວລາ 5 ປີ.
ນັບແຕ່ສົງຄາມອີຣັກເກີດຂຶ້ນເມື່ອປີ 2003 ມານີ້, ການຄັດຄ້ານສົງຄາມຢູ່ພາຍໃນປະເທດອົງກິດເປັນຂະບວນຢ່າງບໍ່ຢຸດຢັ້ງ, ສຽງຮຽກຮ້ອງໃຫ້ລັດຖະບານພັກແຮງງານຖອນທະຫານອອກຈາກອີຣັກນັບມື້ນັບດັງຂຶ້ນ. ນັກວິເຄາະເຫັນວ່າ, ອັງກິດຕົກລົງຕາຕະລາງເວລາຖອນທະຫານເທື່ອນີ້ມີຫຼາຍສາຍເຫດຄື:
ກ່ອນອື່ນໝົດ, ແມ່ນນັບແຕ່ສົງຄາມອີຣັກເກີດຂຶ້ນມານີ້, ກອງທະຫານອັງກິດປະຈຳອີຣັກໄດ້ມີເວລາ 5 ປີແລ້ວ, ໃນໄລຍະນັ້ນກອງທະຫານອັງກິດຖືກຫຼອນໂຈມຕີດ້ວຍຮູບແບບຕ່າງໆຢ່າງຫຼວງຫຼາຍ, ນັບມາຮອດປະຈຸບັນໄດ້ມີທະຫານ 178 ຄົນເສຍຊີວິດ. ໃນຫວ່າງມໍ່ໆນີ້, ກອງທະຫານອັງກິດເຫັນວ່າສະຖານະການຄວາມປອດໄພຂອງເມືອງບາສລາໄດ້ດີຂຶ້ນຢ່າງຈະແຈ້ງ, ຈິ່ງບໍ່ມີຄວາມຈຳເປັນທີ່ຈະປະຈຳຢູ່ຕໍ່ໄປ.
ອັນທີສອງ, ກອງທະຫານອັງກິດຍັງມີໜ້າທີ່ສູ້ລົບກັບກຸ່ມຕາລີບານຂອງອັຟການີສະຖານ, ສູ້ລົບຢູ່ສອງບ່ອນເປັນໄລຍະດົນນານ, ເຮັດໃຫ້ທະຫານອັງກິດເລີ່ມຂາດຂວັນກຳລັງໃຈແລ້ວ. ໂດຍສະເພາະໃນຫວ່າງມໍ່ໆນີ້, ສະຖານະການສົງຄາມຕ້ານລັດທິກໍ່ການຮ້າຍຂອງອັຟການີສະຖານເຄັ່ງຕຶງຂຶ້ນ, ລັດຖະບານບຼາວເຫັນວ່າສົງຄາມໂຈມຕີການເຄື່ອນໄຫວລັດທິກໍ່ການຮ້າຍຢູ່ອັຟການີສະຖານແມ່ນສຳຄັນຫຼາຍຕໍ່ອັງກິດ. ອີກດ້ານໜຶ່ງ, ລັດຖະບານອີຣັກກໍຢາກໃຫ້ກອງທະຫານຕ່າງປະເທດທີ່ປະຈຳຢູ່ອີຣັກຖອນອອກໄປ, ດ້ວຍການສະແດງຄວາມໝັ້ນໃຈແລະຄວາມສາມາດຂອງອີຣັກຕໍ່ຕ່າງປະເທດທີ່ຄວບຄຸມສະຖານະການແລະປົກຄອງປະເທດດ້ວຍຕົນເອງ. ໃນເດືອນຕຸລາປີນີ້, ໃນເວລາໃຫ້ສຳພາດຕໍ່ສື່ມວນຊົນອັງກິດ, ທ່ານມາລີກີ ນາຍົກລັດຖະມົນຕີອີຣັກກໍ່ກ່າວວ່າ, ທ່ານຂອບໃຈນຳກອງທະຫານອັງກິດເຄີຍຫາບແບກໜ້າທີ່, ແຕ່ທ່ານເຫັນວ່າກອງທະຫານອັງກິດບໍ່ມີຄວາມຈຳເປັນສືບຕໍ່ປະຈຳຢູ່ອີຣັກເພື່ອຮັກສາຄວາມສະຫງົບແລະຄວບຄຸມສະຖານະການ.
ແຕ່ວ່າ, ນັກວິເຄາະເຫັນວ່າ, ພາຍຫຼັງປະກາດຕາຕະລາງເວລາຖອນທະຫານແລ້ວ, ທ່ານບຼາວກໍ່ຈະບໍ່ໄດ້ຮັບຄວາມຊົມເຊີຍຈາກພາຍໃນອັງກິດຢ່າງຈະແຈ້ງ. ຫາງສຽງອັງກິດເຖິງວ່າດີໃຈຍ້ອນເວລາຖອນທະຫານໄດ້ຫຍໍ້ເຂົ້າມາອີກກໍ່ຕາມ, ແຕ່ທົ່ວປະເທດອັງກິດເອົາໃຈໃສ່ນຳການພິຈາລະນາຄືນຕໍ່ສົງຄາມອີຣັກແລະການສຳຫຼວດສາຍເຫດຂອງການກໍ່ສົງຄາມຫຼາຍກວ່າ. ພັກຝ່າຍຄ້ານສຳຄັນແລະພັກການເມືອງຈຳນວນໜຶ່ງຮຽກຮ້ອງໃຫ້ລັດຖະບານພັກແຮງງານດຳເນີນການສຳຫຼວດຢ່າງເປີດເຜີຍຕໍ່ສາຍເຫດທີ່ກໍ່ສົງຄາມອີຣັກ, ແລະຕົກລົງຕາຕະລາງເວລາຂອງການສຳຫຼວດ. ຄາດໄດ້ວ່າຮອດເວລານັ້ນ, ລັດຖະບານພັກແຮງງານທີ່ທ່ານບຼາວນຳພານັ້ນຈະປະເຊີນກັບການຕິຕຽນຫຼາຍກວ່າເກົ່າ.
