ລັດຖະບານຊຸດໃໝ່ຂອງໄທປະເຊີນກັບການທ້າທາຍຫຼາຍຢ່າງ
-----------------------------------------------------------------------------------------------------------------
ອັນທຳອິດແມ່ນ, ພັກເພື່ອໄທ ພັກຝ່າຍຄ້ານຍັງບໍ່ຍອມເສຍອຳນາດການປົກຄອງ, ບໍ່ດົນພັກນີ້ກໍ່ຈະເລີ່ມໂຈມຕີລັດຖະບານອະພິສິດໃນລັດຖະສະພາ. ຫຼັງຈາກພັກພະລັງປະຊາຊົນ ອະດີດພັກກຳອຳນາດຕົ້ນຕໍຖືກສັ່ງຍຸບແລ້ວ, ສະມາຊິກສ່ວນຫຼາຍໄດ້ເຂົ້າເປັນສະມາຊິກຂອງພັກເພື່ອໄທ. ປະຈຸບັນ, ພັກເພື່ອໄທຍັງເປັນພັກໃຫຍ່ອັນດັບໜຶ່ງໃນລັດຖະສະພາ, ທີ່ນັ່ງໃນສະພາຫຼາຍກວ່າພັກປະຊາທິປັດ. ສ່ວນບັນດາພັກຮ່ວມລັດຖະບານທີ່ຖືພັກປະຊາທິປັດເປັນຫົວໜ້າກໍມີຫຼາຍພັກຝ່າຍ, ແລະມີບາງພັກຝ່າຍມາຈາກອະດີດພັກພະລັງປະຊາຊົນທີ່ເປັນຝ່າຍກົງກັນຂ້າມຂອງພັກປະຊາທິປັດຕະຫຼອດມາ. ຖ້າວ່າພັກປະຊາທິປັດບໍ່ສາມາດຮັກສາຄວາມສາມັກຄີຂອງພວກຮ່ວມລັດຖະບານ, ອາດຈະຖືກພັກຝ່າຍຄ້ານຂັດຂວາງໃນລັດຖະສະພາ.
ອັນທີສອງ, ຍ້ອນຖືກຜົນກະທົບຈາກຫຼາຍປັດໃຈ, ພາບລວມຂອງລັດຖະບານອະພິສິດ ເວດຊາຊີວະແມ່ນບໍ່ດີປານໃດ, ຄວາມສາມາດໃນການກຳອຳນາດຈະຖືກຫຼາຍຝ່າຍສົງໃສແລະຈຳກັດ. ທີ່ຈິງແລ້ວ, ກ່ອນໜ້ານີ້,ວົງການອຸດສາຫະກຳການຄ້າຂອງໄທກໍ່ໄດ້ສະແດງຄວາມຜິດຫວັງຕໍ່ຜູ້ໄດ້ຮັບການແຕ່ງຕັ້ງໃນຄະນະລັດຖະບານຂອງອະພິສິດ, ເຫັນວ່າ, ບາງຄົນບໍ່ມີບົດຮຽນທາງດ້ານການປົກຄອງ.
ອັນທີສາມ, ຜົນສະທ້ອນຂອງທ່ານທັກສິນ ຊິນນະວັດ ອະດິດນາຍົກລັດຖະມົນຕີໄທຢູ່ໃນເວທີການເມືອງຍັງປະໝາດບໍ່ໄດ້. ກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດຫຼືນ.ປ.ຊທີ່ສະໜັບສະໜູນທ່ານທັກສິນປະກາດວ່າ, ຈະລະດົມໃຫ້ຜູ້ສະໜັບສະໜູນທີ່ນຸ່ງເສື້ອສີແດງຄື"ກອງທັບເສື້ອແດງ"ດຳເນີນການເຄື່ອນໄຫວປະທ້ວງລັດຖະບານຊຸດໃໝ່. ເຖິງວ່າທ່ານອະພິສິດຜ່ານສື່ມວນຊົນກ່າວຫຼາຍເທື່ອວ່າ, ຢາກໃຫ້ທ່ານທັກສິນທີ່ພັດຖີ່ນຢູ່ຕ່າງປະເທດນັ້ນກັບຄືນປະເທດເພື່ອສືບຕໍ່ສູ່ຄະດີ, ແຕ່ທ່ານທັກສິນບໍ່ໄດ້ມີທ່າທີຕອບຕໍ່ເລື່ອງນີ້.ສ່ວນກຸ່ມນ.ປ.ຊໄດ້ຈັດຕັ້ງການໂຮມຊຸມນຸມທາງການເມືອງເລື້ອຍໆໃນຫວ່າງມໍ່ໆນີ້, ໂດຍກ່າວໂຈມຕີວ່າ ພັກປະຊາທິປັດຂຶ້ນກຳອຳນາດມີເບື້ອງຫຼັງທີ່ຝ່າຍທະຫານສະໜັບສະໜູນ, ແມ່ນອຳນາດການປົກຄອງທີ່ໄດ້ມາຢ່າງບໍ່ສະຫງ່າຜ່າເຜີຍ. ຖ້າລັດຖະບານຊຸດໃໝ່ບໍ່ສາມາດແກ້ໄຂບັນຫາ"ກອງທັບເສື້ອແດງ"ໃຫ້ດີ, ກໍ່ອາດຈະເກີດຄວາມຂັດແຍ່ງໃນສັງຄົມຂຶ້ນໃໝ່ໄດ້.
ແລະອັນສຸດທ້າຍ, ທີ່ສຳຄົນກວ່າໝູ່ແມ່ນບັນຫາເສດຖະກິດ. ຍ້ອນສະຖາການການເມືອງປັ່ນປ່ວນຢ່າງຕໍ່ເນື່ອງ, ຂະແໜງການທ່ອງທ່ຽວຖືວ່າເປັນຂະແໜງການຫຼັກແລະຂະແໜງການທີ່ກ່ຽວຂ້ອງໄດ້ຮັບຜົນກະທົບທາງລົບຢ່າງຮ້າຍແຮງ, ກະວ່າ, ຈຳນວນນັກທ່ອງທ່ຽວຕ່າງປະເທດທີ່ຈະເຂົ້າໄປທ່ຽວໄທໃນປີໜ້ານັ້ນຈະຫຼຸດລົງເຄິ່ງໜຶ່ງ. ເສດຖະກິດໄທທາງດ້ານການສົ່ງອອກຍັງຈະປະເຊີນກັບບັນຫາທີ່ຕະ ຫຼາດເອີລົບແລະອາເມລິກາເຂັ້ມງວດແລະການສົ່ງອອກຫຼຸດໜ້ອຍລົງ. ປັດໃຈຕ່າງໆທີ່ບໍ່ມີຜົນດີອາດຈະເຮັດໃຫ້ຜູ້ຫວ່າງງານຢູ່ໄທເພີ່ມຂຶ້ນຮອດ1ລ້ານ2ແສນຄົນ, GDPອາດຈະຫຼຸດລົງຮອດ2%ຫຼືຕ່ຳກວ່ານີ້ອີກ. ສະນັ້ນ, ກ່ອນນີ້, ທ່ານອະພິສິດໄດ້ປະກາດວ່າ, ຈະນຳພາຄະນະເສດຖະກິດ, ຖືການພັດທະນາເສດຖະກິດເປັນໜ້າທີ່ຕົ້ນຕໍຂອງລັດຖະບານຊຸດນີ້. ແຕ່ວ່າ, ໂດຍປະເຊີນກັບສະພາບການທີ່ເສດຖະກິດທົ່ວໂລກຊຸດໂຊມລົງຢ່າງໜັກ, ເສດຖະກິດໄທຈະສາມາດຜ່ານໄປໄດ້ຫຼືບໍຍັງເປັນເລື່ອງທີ່ຕ້ອງຕິດຕາມຕໍ່ໄປ.
