ສະພາຄວາມໝັ້ນຄົງບໍ່ຕໍ່ອາຍຸການປະຈຳການຂອງກອງທະຫານຕ່າງປະເທດໃນອີຣັກ
-----------------------------------------------------------------------------------------------------------------
ວັນທີ22ທັນວານີ້,ສະພາຄວາມໝັ້ນຄົງສະຫະປະຊາຊາດເປັນເອກະສັນກັນຜ່ານມະຕິ,ຕົກລົງອາຍຸການປະຈຳຂອງກອງທະຫານຕ່າງປະເທດໃນອີຣັກທີ່ນຳໂດຍອາເມລິການັ້ນຈະສິ້ນສຸດລົງໃນວັນທີ31ທັນວານີ້.ມະຕິຍັງຕົກລົງຕໍ່ເວລາທີ່ສະຫະປະຊາຊາດຄຸ້ມຄອງຊັບສິນການທະນາຄານແລະນ້ຳມັນເຊື້ອໄຟຂອງອີຣັກ.
ມະຕິຮັບຮອງວ່າ,ສະພາບຄວາມສະຫງົບໃນອີຣັກໄດ້ດີຂຶ້ນ,ສະຖານະການປະຈຸບັນຕ່າງກັນຫຼາຍກັບເວລາທີ່ສະພາຄວາມໝັ້ນຄົງຜ່ານມະຕິເລກທີ661ເພື່ອລົງໂທດທາງເສດຖະກິດອີຣັກແລະຫ້າມຂາຍອາວຸດໃຫ້ອີຣັກພາຍຫຼັງອີຣັກເຂົ້າຮຸກຮານຄູເວດໃນປີ1990,ຍັງຮັບຮອງອີກວ່າ ມີຄວາມຈຳເປັນຕ້ອງເຮັດໃຫ້ອີຣັກມີບົດບາດສາກົນຄືກັນກັບເວລາກ່ອນຜ່ານມະຕິເລກທີ661.ໃນມື້ດຽວກັນ,ສະພາຄວາມໝັ້ນຄົງຍັງຕົກລົງວ່າ,ຕໍ່ເວລາການຈັດສັນທີ່ສະສົມລາຍໄດ້ຈາກການສົ່ງອອກນ້ຳມັນ ຜະລິດຕະພັນນ້ຳມັນແລະອາຍແກັສທຳມະຊາດເຂົ້າໃນກອງທຶນເພື່ອພັດທະນາອີຣັກແລະການຈັດສັນທີ່ເຮັດໃຫ້ຄະນະກຳມະການໃຫ້ຄຳປຶກສາແລະຕິດຕາມກວດກາສາກົນຮັບຜິດຊອບການຕິດຕາມກວດກາກອງທຶນດັ່ງ ກ່າວທີ່ກຳນົດໃນມະຕິສະບັບຜ່ານໄປນັ້ນໄປຮອດວັນທີ31ທັນວາ2009.ນີ້ຈະເຮັດໃຫ້ນ້ຳມັນຂອງອີຣັກແລະຊັບສິນອື່ນໆທີ່ຕົກເປັນມູນຄ່າຫຼາຍສິບຕື້ໂດລາທີ່ຕົກທອດຈາກສະໄໝຊັດດາມນັ້ນໄດ້ຮັບການຄຸ້ມຄອງຢ່າງບັງເກີດຜົນ.
ມະຕິທີ່ກ່ຽວຂ້ອງຂອງສະພາຄວາມໝັ້ນຄົງແມ່ນເຮັດຕາມຄວາມຮຽກຮ້ອງຂອງຝ່າຍອີຣັກ.
ທ່ານໂຮສ໌ຢາ ຈິບາຣີ ລັດຖະມົນຕີວ່າການກະຊວງການຕ່າງປະເທດອີຣັກທີ່ເຂົ້າຮ່ວມກອງປະຊຸມຂອງສະພາຄວາມໝັ້ນຄົງຕາມຄຳເຊີນໄດ້ກ່າວຄຳປາໄສໂດຍກ່າວວ່າ,ນັບແຕ່ລັດຖະບານໃໝ່ອີຣັກສ້າງຕັ້ງຂຶ້ນເປັນຕົ້ນມາ,ອີຣັກກໍພະຍາຍາມສ້າງຄວາມກ້າວໄປໜ້າຕາມທາງປະຊາທິປະໄຕ,ຄວາມປອດໄພແລະຄວາມໝັ້ນຄົງຕະຫຼອດມາ.ປະຊາຄົມໂລກສາມາດພິຈາລະນາໃໝ່ຕໍ່ປະເທດນີ້.ຍ້ອນສະພາບການຄວາມປອດໄພພາຍໃນອີຣັກດີຂຶ້ນຫຼາຍແລ້ວ, ແລະອີຣັກແລະອາເມລິກາໄດ້ເຊັນສັນຍາກ່ຽວກັບຄວາມປອດໄພແລ້ວ, ສະນັ້ນອີຣັກຈຶ່ງບໍ່ສະແຫວງຫາການໃຫ້ສະພາຄວາມໝັ້ນຄົງຕໍ່ອາຍຸປະຈຳການຢູ່ອີຣັກຂອງທະຫານຈາກຕ່າງປະເທດອີກ.
ມື້ດຽວກັນ,ທ່ານຈາມາອີ ຮາລິຈັດ ຜູ້ຕາງໜ້າຖາວອນຂອງອາເມລິກາປະຈຳສະຫະປະຊາຊາດກ່າວວ່າ,ລັດຖະບານອາເມລິກາຂໍສະແດງຄວາມຊົມເຊີຍຕໍ່ມະຕິດັ່ງກ່າວຂອງສະພາຄວາມໝັ້ນຄົງ.ທ່ານເຫັນວ່າ, ນີ້ຈະຊຸກຍູ້ໃຫ້ປະເທດແລະສັງຄົມອີຣັກພັດທະ ນາໃຫ້ດີກ່ວາເກົ່າ.ທ່ານກ່າວວ່າ,ຫຼັງຈາກມະຕິສະບັບນີ້ຜ່ານການຮັບຮອງແລ້ວ,ລັດຖະບານອີຣັກຈະສາມາດນຳໃຊ້ກອງທຶນພັດທະນາຈຳນວນໜຶ່ງເພື່ອສ້າງສາເສດຖະກິດຂອງຕົນຫຼືໂຄງການພັດທະນາອື່ນໆ,ນີ້ຈະເສີມຂະຫຍາຍບົດບາດທີ່ເລັ່ງລັດຄວາມກ້າວໜ້າແລະການພັດທະນາຂອງອີຣັກ.
