ສະພາຄວາມໝັ້ນຄົງຈັດກອງປະຊຸມຄັ້ງວິສາມັນເພື່ອປຶກສາສະຖານະກາໃນເຂດກາຊາ
-----------------------------------------------------------------------------------------------------------------
ວັນທີ 6 ມັງກອນນີ້, ໃນເວລາທີ່ການເຄື່ອນໄຫວທາງການທະຫານຂອງອິສຣາແອນຕໍ່ເຂດກາຊາກ້າວເຂົ້າສູ່ມື້ທີ 11, ສະພາຄວາມໝັ້ນຄົງສະຫະປະຊາຊາດໄດ້ຈັດກອງປະຊຸມຄັ້ງວິສາມັນເພື່ອປຶກສາສະຖານະການໃນເຂດກາຊາປະຈຸບັນ. ທ່ານປານກີມູນ ເລຂາທິການໃຫຍ່ສະຫະປະຊາຊາດຫວັງໃຫ້ສະພາຄວາມໝັ້ນຄົງໃຊ້ການກະທຳທີ່ເດັດຂາດແລະວ່ອງໄວ, ຫຼີກເວັ້ນບໍ່ໃຫ້ການປະທະກັນລະຫວ່າງອິສຣາແອນກັບອົງການຮາມາສ໌ຮຸນແຮງເພີ່ມຂຶ້ນຈົນພາໃຫ້ເກີດວິກິດການໜັກໜ່ວງກວ່າເກົ່າ.
ຕາມຂ່າວແຈ້ງວ່າ, ປະຈຸບັນການປະທະກັນໄດ້ເຮັດໃຫ້ມີຊາວປາເລັສຕິນ 570 ກວ່າຄົນເສຍຊີວິດແລະ 2700 ກວ່າຄົນບາດເຈັບ. ຝ່າຍອິສຣາແອນກໍມີທະຫານ 5 ຄົນແລະປະຊາຊົນ 4 ຄົນເສຍຊີວິດແລະເກືອບຮ້ອຍຄົນບາດເຈັບ. ມື້ດຽວກັນ, ສິ່ງກໍ່ສ້າງຂອງສະຫະປະຊາຊາດທີ່ໃຊ້ເປັນບ່ອນຫຼົບໄພຂອງຊາວອົບພະຍົບໃນເຂດກາຊາກໍ່ຖືກໂຈມຕີ.
ທ່ານປານກີມູນກ່າວເນັ້ນວ່າ, ສອງຝ່າຍຕ້ອງບັນລຸການຢຸດຍິງທີ່ຖາວອນແລະເປັນທີ່ຍອມຮັບຈາກຝ່າຍຕ່າງໆ, ຮັບປະກັນໃຫ້ມາດຕະການຊ່ອຍເຫຼືອດ້ານມະນຸດສະທຳສາມາດໄດ້ຮັບການປະຕິບັດ.
ໃນກອງປະຊຸມ, ທ່ານມາມຸດ ອາບບັສ ປະທານອົງການອຳນາດແຫ່ງຊາດປາເລັສຕິນຮຽກຮ້ອງໃຫ້ສະພາຄວາມໝັ້ນຄົງໃຊ້ມາດຕະການທັນທີ, ເຮັດໃຫ້ອິສຣາແອນຢຸດຕິການກໍ່"ໄພພິບັດໃໝ່". ນາງກາເບຼລາ ຊາເລ ຜູ້ຕາງໜ້າຖາວອນຂອງອິສຣາແອນປະຈຳສະຫະປະຊາຊາດພັດຖິ້ມຄວາມຜິດໄປໃສ່ອົງການຮາມາສ. ນາງກ່າວວ່າກໍຍ້ອນວ່າອົງການຮາມາສສະກັດກັ້ນຂະບວນການສັນຕິພາບປາເລັສຕິນກັບອິສຣາແອນຢ່າງບໍ່ຢຸດຢັ້ງໃນ 8 ປີຜ່ານມາຈຶ່ງພາໃຫ້ເກີດສະຖານະການໃນປະຈຸບັນ.
ທ່ານຈ່າງເຢ້ຍສຸຍ ຜູ້ຕາງໜ້າຖາວອນຂອງຈີນປະຈຳສະຫະປະຊາຊາດກໍ່ໄດ້ປະກອບຄຳເຫັນໃນກອງປະຊຸມດັ່ງກ່າວ, ທ່ານກ່າວວ່າຈີນເປັນຫວ່ງຫຼາຍຕໍ່ປາເລັສຕິນກັບອິສຣາແອນເກີດປະທະກັນອີກແລະເຮັດໃຫ້ຊິວິດຊັບສິນເວຍຫາຍຢ່າງຫຼວງຫຼາຍ, ແລະສະແດງຄວາມເປັນຫ່ວງຫຼາຍຕໍ່ວິກິດການດ້ານມະນຸດສະທຳທີ່ເກີດຂຶ້ນໃນເຂດກາຊາ. ທ່ານຈ່າງເຢ້ຍສຸຍຮຽກຮ້ອງໃຫ້ຝ່າຍຕ່າງໆຄວນຢຸດຍິງໃນທັນທີ, ແລະຮຽກຮ້ອງໃຫ້ປະຊາຄົມໂລກສະໜອງການຊ່ອຍເຫຼືອດ້ານມະນຸດສະທຳໃຫ້ແກ່ເຂດກາຊາຕື່ມອີກ.
ທ່ານຈ່າງເຢ້ຍສຸຍກ່າວເນັ້ນວ່າ, ຈີນຄັດຄ້ານການໃຊ້ກຳລັງອາວຸດແກ້ໄຂຂໍ້ຍັດແຍ່ງມາໂດຍຕະຫຼອດ, ປະນາມການໃຊ້ຄວາມຮຸນແຮງທັງໝົດທີ່ແນ່ໃສ່ສາມັນຊົນ. ທ່ານຫວັງໃຫ້ຝ່າຍຕ່າງໆທີ່ກ່ຽວຂ້ອງຈົ່ງຮັກສາຄວາມອົດກັ້ນສຸດຂີດ, ສະແດງຄວາມກ້າຫານແລະສະຕິປັນຍາ, ສືບຕໍ່ແກ້ໄຂຄວາມເຫັນທີ່ແຕກຕ່າງກັນດ້ວຍການເຈລະຈາ, ແລະຮຽກຮ້ອງໃຫ້ປະຊາຄົມໂລກຕັ້ງໜ້າຊຸກຍູ້ຂະບວນການສັນຕິພາບ, ແກ້ໄຂບັນຫາປະທະກັນລະຫວ່າງປາເລັສຕິນກັບອິສຣາແອນຢ່າງຍຸຕິທຳແລະສົມເຫດສົມຜົນ, ຊຸກຍູ້ໃຫ້ປາເລັສຕິນກັບອິສຣາແອນບັນລຸສັນຕິພາບຢ່າງແທ້ຈິງແລະຖາວອນ.
