ການຟື້ນຟູສົ່ງອາຍແກັສທຳມະຊາດຂອງຣັດເຊຍໄປໃຫ້ເອີລົບພົບກັບອຸປະສັກອີກເທື່ອໜຶ່ງ
-----------------------------------------------------------------------------------------------------------------
ຕາມຂ່າວcri:ພາຍໃຕ້ຄວາມພະຍາຍາມໄກ່ເກ່ຍຂອງເອີລົບໃນມໍ່ໆມານີ້,ຣັດເຊຍກັບອູແກຼນໄດ້ເຫັນດີກ່ຽວກັບບັນຫາກວດກາອາຍແກັສທຳມະຊາດທີ່ຜ່ານດິນແດນອູແກຼນໄປຫາເອີລົບ,ແລະລິເລີ່ມຟື້ນຟູການສະໜອງອາຍແກັສທຳມະຊາດທີ່ຜ່ານອູແກຼນຕໍ່ເອີລົບນັບແຕ່ເວລາ10ໂມງຂອງວັນທີ13ມັງກອນນີ້ຕາມເວລາມົສກູ,ແຕ່ວ່ານັກສຳຫຼວດເອີລົບລາຍງານໃນມື້ດຽວກັນວ່າ,ອາຍແກັສທຳມະຊາດທີ່ໄດ້ສົ່ງຈາກຣັດເຊຍຜ່ານອູແກຼນໄປຫາເອີລົບມີປະລິມານໜ້ອຍດຽວ,ຣັດເຊຍກັບອູແກຼນຕິຕຽນກັນວ່າຄວນຮັບຜິດຊອບຕໍ່ເລື່ອງດັ່ງກ່າວ.ການຟື້ນຟູການສະໜອງອາຍແກັສທຳມະຊາດຕໍ່ເອີລົບມີຄວາມຫຍຸ້ງຍາກອີກເທື່ອໜຶ່ງ.
ຫຼັງຈາກຣັດເຊຍເລີ່ມຟື້ນຟູການສະໜອງອາຍແກັສທຳມະຊາດຕໍ່ເອີລົບໄດ້ຫຼາຍຊົ່ວໂມງແລ້ວ,ຣັດເຊຍກ່າວວ່າ,ເນື່ອງຈາກວ່າອູແກຼນບໍ່ໄດ້ເປີດທໍ່ສົ່ງອາຍແກັສທຳມະຊາດທີ່ຜ່ານອູແກຼນໄປຫາເອີລົບ.ສະນັ້ນຣັດເຊຍບໍ່ສາມາດບັນລຸການສົ່ງອາຍແກັສທຳມະຊາດທີ່ຜ່ານອູແກຼນໄປໃຫ້ເອີລົບໃນມື້ດຽວກັນໄດ້,ແຕ່ອູແກຼນໂຕ້ຕອບວ່າຣັດເຊຍເລືອກຟື້ນຟູບາງທໍ່ສົ່ງອາຍແກັສແມ່ນເປັນໄປບໍ່ໄດ້ໃນດ້ານເຕັກນິກ,ອູແກຼນບໍ່ສາມາດຍອມຮັບທໍ່ສົ່ງອາຍແກັສທຳມະຊາດຂອງຣັດເຊຍ,ຍ້ອນວ່ານີ້ຈະເຮັດໃຫ້ເຂດພາກຕາເວັນອອກແລະພາກໃຕ້ຂອງອູແກຼນຂາດອາຍແກັສທຳມະຊາດ.ອູແກຼນຮຽກຮ້ອງໃຫ້ສົ່ງອາຍແກັສຕາມທໍ່ເກົ່າ,ແຕ່ໄດ້ຮັບການປະຕິເສດຈາກຮັດເຊຍ.ດ້ວຍເຫດນີ້,ຂັ້ນຕອນທີ່ຣັດເຊຍຟື້ນຟູການສົ່ງອາຍແກັສໄປໃຫ້ເອີລົບໂດຍຜ່ານອູແກຼນຈິ່ງໄດ້ພົບກັບອຸປະສັກອີກເທື່ອໜຶ່ງ.
ນັກວິເຄາະຊີ້ອອກວ່າ, ເຖິງວ່າພາຍໃຕ້ການໄກ່ເກ່ຍຂອງສະຫະພາບເອີລົບ, ແລະຣັດເຊຍກັບອູແກຼນກໍ່ໄດ້ກ້າວເຖິງຂັ້ນຕົກລົງກັນໃນບັນຫາຕິດຕາມກວດກາການສົ່ງອາຍແກັສຜ່ານແດນແລ້ວກໍ່ຕາມ, ແຕ່ໃນເລິກໆ, ສອງຝ່າຍຍັງກົດດັນກັນຢ່າງລັບໆ. ອູແກຼນເຫັນວ່າ, ອາຍແກັສຂອງຣັດເຊຍເຂົ້າສູ່ທໍ່ສົ່ງໃນແດນອູແກຼນ 36 ຊົ່ວໂມງແລ້ວກໍ່ສາມາດໄປຮອດປາຍທໍ່ສົ່ງໄປເອີລົບທີ່ຕັ້ງຢູ່ພາກຕາເວັນຕົກອູແກຼນ. ແຕ່ຣັດເຊຍພັດເຫັນວ່າ, ໃນເວລາເຊົາສົ່ງອາຍແກັສໃນວັນທີ 7 ມັງກອນ, ທໍ່ຂອງອູແກຼນກໍ່ໄດ້ມີອາຍແກັສທີ່ຣັດເຊຍສະໜອງໃຫ້ກ່ອນໜ້ານັ້ນເຕັມແລ້ວ, ສະນັ້ນ, ຂໍແຕ່ວ່າອາຍແກັສເຂົ້າສູ່ທໍ່ສົ່ງອາຍແກັສຂອງອູແກຼນ, ເອີລົບກໍ່ຄວນໄດ້ຮັບອາຍແກັສໃນທັນທີໂລດ. ນອກນັ້ນ, ອູແກຼນໄດ້ກ່າວຫຼາຍເທື່ອວ່າ, ຈະສືບຕໍ່ໃຊ້ອາຍແກັສຂອງຣັດເຊຍເປັນການສິ້ນເປືອງດ້ານເຕັກນິກຂອງການສົ່ງແກັສ, ແຕ່ແກັສຈຳນວນນີ້ຈະໄລ່ເຂົ້າໃນຄ່າຜ່ານແດນທີ່ອູແກຼນເກັບນັ້ນ, ນີ້ອາດຈະກາຍເປັນຂໍ້ຂັດແຍ້ງອີກຂໍ້ໜຶ່ງຂອງສອງຝ່າຍ. ສະນັ້ນ, ເຖິງວ່າປະຈຸບັນ, ຣັດເຊຍໄດ້ຟື້ນຟູສົ່ງອາຍແກັສໃຫ້ເອີລົບແລ້ວ, ແຕ່ຖ້າສອງຝ່າຍແກ້ໄຂບັນຫາດັ່ງກ່າວບໍ່ໄດ້ໃນອະນາຄົດ, ຣັດເຊຍອາດຈະເຊົາສົ່ງອາຍແກັສໃຫ້ເອີລົບອີກເທື່ອໜຶ່ງ. ທ່ານປູຕີນເຄີຍກ່າວເຕືອນວ່າ, ຖ້າກວດພົບວ່າອູແກຼນຍັງ"ລັກອາຍແກັສ", ຣັດເຊຍຈະຢຸດເຊົາສົ່ງອາຍແກັສໃຫ້ເອີລົບທີ່ຜ່ານແດນອູແກຼນອີກ.
ສາເຫດໂດຍກົງທີ່ພາໃຫ້ເກີດຄວາມຂັດແຍ່ງກັນໃນປະຈຸບັນແມ່ນຍ້ອນຣັດເຊຍກັບອູແກຼນຍັງບໍ່ໄດ້ເຊັນຂໍ້ຜູກພັນສະໜອງອາຍແກັສທຳມະຊາດສະບັບໃໝ່. ແຕ່ຖ້າສອງຝ່າຍຢາກຕົກລົງກັນໄດ້ກ່ຽວກັບບັນຫາການສະໜອງອາຍແກັສທຳມະຊາດສຳລັບປີ 2009, ແລະເຊັນຂໍ້ຜູກພັນຕ່າງໆທີ່ກ່ຽວຂ້ອງ, ກໍ່ຕ້ອງແກ້ໄຂຂໍ້ຂັດແຍ່ງຕ່າງໆກ່ອນເຊັ່ນ: ລາຄາການສະໜອງອາຍແກັສທຳມະຊາດ, ອັດຕາຄ່າສົ່ງອາຍແກັສຜ່ານອູແກຼນແລະໜີ້ສິນເປັນຕົ້ນ. ເຖິງວ່າປະຈຸບັນສອງຝ່າຍລ້ວນແຕ່ຢາກສືບຕໍ່ການເຈລະຈາໃນລະດັບສູງກວ່າເກົ່າກໍຕາມ, ແຕ່ຣັດເຊຍຍັງຍຶດໝັ້ນລາຄາໃໝ່ຄື450ໂດລາຕໍ່ພັນແມັດກ້ອນທີ່ອາດຈະເປັນອຸປະສັກທີ່ຜ່ານຍາກໃນການເຈລະຈາຂອງສອງຝ່າຍ. ສະນັ້ນ, ຢາກຢຸດຕິຄວາມຂັດແຍ່ງເລື້ອງອາຍແກັສທຳມະຊາດໄດ້, ຣັດເຊຍກັບອູແກຼນຍັງຈະຕ້ອງໃຊ້ຄວາມພະຍາຍາມຢ່າງສູງ. ສຳລັບສະຫະພາບເອີລົບແລ້ວ, ຄາດວ່າຈຳເປັນຕ້ອງໄດ້ເຂົ້າຮ່ວມການແກ້ໄຂຂໍ້ຂັດແຍ່ງຂອງສອງປະເທດໃນເທື່ອນີ້.
