ລົດຍົນທີ່ໃຊ້ພະລັງງານໃໝ່ຂອງຈີນວາງສະແດງຢູ່ອາເມລິກາເໜືອແລະກາຍເປັນຈຸດເດັ່ນແຫ່ງຄວາມສົນໃຈ
-----------------------------------------------------------------------------------------------------------------
ຕາມຂ່າວCRI:ງານວາງສະແດງລົດຍົນສາກົນອາເມລິກາເໜືອທີ່ເປັນໜຶ່ງໃນ 5 ງານວາງສະແດງລົດຍົນທີ່ສຳຄັນຂອງໂລກຈະຕ້ອນຮັບຜູ້ຊົມວົງການຕ່າງໆຢູ່ນະຄອນເດໂຕຼຍອາເມລິການັບແຕ່ວັນທີ 17 ຫາວັນທີ 25 ເດືອນນີ້.ພາຍໃຕ້ສະພາບທີ່ຕະຫຼາດລົດຍົນອາເມລິກາເໜືອຊຸດໂຊມລົງຢ່າງໜັກໜ່ວງແລະບໍລິສັດຜະລິດລົດຍົນຫຼາຍແຫ່ງບໍ່ໄດ້ມາເຂົ້າຮ່ວມງານວາງສະແດງເທື່ອນີ້,ລົດຍົນທີ່ໃຊ້ພະລັງງານໃໝ່ທີ່ໂຮງງານຜະລິດລົດຍົນຈີນຄົ້ນຄວ້າຜະລິດນັ້ນໄດ້ກາຍເປັນຈຸດເດັ່ນໃນງານວາງສະແດງເທື່ອນີ້,ນີ້ກໍ່ແມ່ນການກະກຽມບາດກ້າວໜຶ່ງຂອງບໍລິສັດຈີນເພື່ອເຂົ້າສູ່ຕະຫຼາດລົດຍົນອາເມລິກາເໜືອ.
ບໍລິສັດປີຢາຕີແລະບໍລິສັດຮວາເຊີນທີ່ມາຈາກຈີນໄດ້ເຂົ້າຮ່ວມງານວາງສະແດງລົດຍົນເທື່ອນີ້.ທ່ານວາງຊວນຟູ ຜູ້ອຳນວຍການໃຫຍ່ບໍລິສັດປີຢາຕີກ່າວວ່າ,ປີນີ້,ລົດຍົນຍີ່ຫໍ້ປີຢາຕີໄດ້ຮັບຄວາມນິຍົມເກີນຄາດ.ກອງປະຊຸມຂ່າວກໍ່ຟົດຟື້ນເກີນຄາດຄືກັນ.ເພາະວ່າປີກາຍ,ພວກເຮົາກໍ່ໄດ້ມາເຂົ້າຮ່ວມ,ແຕ່ມີປະມານ 50 ກວ່າຄົນເທົ່ານັ້ນມາເຂົ້າຮ່ວມກອງປະຊຸມຂ່າວ,ແຕ່ປີນີ້,ມີຮອດ 600 ກວ່າຄົນ.
ໃນງານວາງສະແດງຄັ້ງນີ້,ບໍລິສັດບີຢາຕີໄດ້ວາງສະແດງລົດຈຳລອງແບບ E6 ທີ່ໃຊ້ໄຟຟ້າທີ່ບໍລິສັດນີ້ຄົ້ນຄວ້າຜະລິດ.ທ່ານວາງຊວນຟູກ່າວວ່າ, ພວກຂ້າພະເຈົ້າກຽມໃຊ້ເວລາສອງປີເພື່ອສຳເລັດການທົດລອງແລະຜະລິດລົດຍົນນີ້,ແລະເຈາະຕະຫລາດຈຳຫນ່າຍ,ຖ້າວ່າທຸກສິ່ງທຸກຢ່າງດຳເນີນໄປຕາມແຜນ, ກໍ່ຈະກຽມສົ່ງໄປຂາຍຢູ່ທົ່ວອາເມລິກາໃນປີ 2011.ພວກຂ້າພະເຈົ້າມີຄວາມຫມັ້ນໃຈອັນເຕັມປ່ຽມຕໍ່ຜະລິດຕະພັນຂອງຕົນເອງ. ລົດແບບ F3DM ທີ່ເລີ່ມຂາຍໃນເດືອນທັນວາປີກາຍແມ່ນລົດທີ່ໃຊ້ພະລັງງານໃຫມ່ຄັນທຳອິດໃນທົ່ວໂລກທີ່ບັນລຸການຜະລິດແລະຂາຍ.ນີ້ກໍ່ແມ່ນວິສາຫະກິດລົດຍົນຈີນເປັນຜູ່ນຳຫນ້າໃນຂະແຫນງການລົດຍົນ.ພວກເຮົາມີທ່າແຣງທາງດ້ານເຕັກນິກ, ບວກກັບທ່າແຮງດ້ານທຶນຮອນ,ກໍ່ສາມາດກວມເອົາອັດຕາສ່ວນຫລາຍໃນຕະຫລາດອາເມລິກາເຫນືອໄດ້ແລ້ວ.
ເດືອນກັນຍາປີກາຍນີ້, ບໍລິສັດຫຸ້ນສ່ວນຄຸ້ມຄອງພະລັງງານອາເມລິກາກາງຫຼືບໍລິສັດMEHCຂອງທ່ານວໍ ບັບເຟັດຫຼືຫຼາຍຄົນເອີ້ນເພິ່ນວ່າ"ເທບແຫ່ງຫຸ້ນ"ໄດ້ໃຊ້ເງິນ 230 ລ້ານໂດລາຊື້ຫຸ້ນສ່ວນ 10% ຂອງບໍລິສັດບີຢາຕີ, ເຮັດໃຫ້ບໍລິສັດບີຢາຕີມີຊື່ສຽງດັງຂຶ້ນຢູ່ອາເມລິກາເໜືອ. ທ່ານເຕວິດ ໂຊໂຄ ປະທານຄະນະບໍລິຫານບໍລິສັດMEHCກ່າວວ່າ, "ສາເຫດທີ່ບໍລິສັດບີຢາຕີພົ້ນເດັ່ນຂຶ້ນກໍຍ້ອນວ່າຜົນງານໃນໄລຍະສັ້ນຂອງເຂົາເຈົ້າດີຫຼາຍ. ໃນເວລາທີ່ບໍລິສັດຫຼາຍແຫ່ງພວມສະແດງລົດພະລັງງານໃໝ່ຂອງຕົນ, ເຂົາເຈົ້າພັດເຮັດມາໄດ້ດົນແລ້ວ. ຍິງກວ່ານັ້ນ, ໃນເວລາລົມກັນກັບຜູ້ບໍລິໂພກຈຳນວນໜຶ່ງຂອງບໍລິສັດບີຢາຕີ, ຂ້າພະເຈົ້າໄດ້ເຫັນວ່າເຂົາເຈົ້າຕີລາຄາສູງຫຼາຍຕໍ່ຍີ່ຫໍ້ນີ້. ຍັງມີອີກຢ່າງໜຶ່ງແມ່ນສູນຄົ້ນຄວ້າຂອງເຂົາເຈົ້າ, ບໍ່ພຽງແຕ່ເອົາໃຈໃສ່ນຳການຄົ້ນຄວ້າຕໍ່ໝໍ້ໄຟ, ຍັງເອົາໃຈໃສ່ພະລັງງານຕາເວັນແລະເຕັກນິກວິທະຍາສາດໃໝ່ອື່ນໆ."
ບໍລິສັດຫວາເສີງທີ່ໃກ້ກັບບ່ອນວາງສະແດງຂອງບໍລິສັດບີຢາຕີໄດ້ສະເໜີລົດໃໝ່ກາ"ຈົ່ງຫວາ" 4 ຊະນິດ. ບໍລິສັດຫວາເສີງກໍຕັດສິນໃຈທີ່ຈະເຂົ້າສູ່ຕະຫຼາດອາເມລິກາເໜືອ, ແຕ່ບໍ່ໄດ້ເປີດເຜີຍເວລາທີ່ແນ່ນອນ. ທ່ານຈອນ ທຣັດສ໌ຂອງເວັບໄຊnational Auto Review Examinerຂອງອາເມລິກາກ່າວວ່າ:" ລົດເຫຼົ່ານີ້ງາມຫຼາຍ, ແຕ່ຂ້າພະເຈົ້າຄຶດວ່າລົດຈີນຍັງຕ້ອງພິສູດວ່າໜ້າເຊື່ອຖືໄດ້ແລະຄຸນນະພາບທີ່ສູງຂອງຕົນ, ເພາະເລື່ອງນີ້ສຳລັບຜູ້ບໍລິໂພກອາເມລິກາແລ້ວຍັງບໍ່ໝັ້ນໃຈປານໃດ.
