ສັນຍານ"ການຕ່າງປະເທດໃນເດືອນຈຽງ"ທີ່ຈີນສົ່ງໄປສູ່ໂລກ
-----------------------------------------------------------------------------------------------------------------
ຕາມຂ່າວສານຊິນຮວາ: ເດືອນຈຽງຕາມຈັນທະຄະຕີຈີນ, ທ່ານເວີນເຈ່ຍປາວ ນາຍົກລັດຖະມົນຕີຈີນໄດ້ຢ້ຽມຢາມ 4 ປະເທດເອີລົບແລະສຳນັກງານໃຫຍ່ຂອງສະຫະພາບເອີລົບ. ວັນທີ 8 ກຸມພານີ້, ທ່ານສີຈິ້ນຜີງ ຮອງປະທານປະເທດຈີນເລີ່ມຢ້ຽມຢາມ 5 ປະເທດອາເມລິກາລາຕິນແລະມານຕາຢ່າງເປັນທາງການ. ວັນທີ 10 ກຸມພານີ້, ທ່ານຫູຈີນທ່າວ ປະທານປະເທດຈີນຈະຢ້ຽມຢາມ 5 ປະເທດອາຟຼິກາແລະອາຊີທາງລັດຖະກິດ. "ການຕ່າງປະເທດໃນເດືອນຈຽງ"ຂອງຜູ້ນຳຈີນໄດ້ສະແດງໃຫ້ເຫັນຄວາມປາດຖະໜາຂອງລັດຖະບານແລະປະຊາຊົນຈີນທີ່ຮ່ວມມືມິດຕະພາບກັບປະເທດຕ່າງໆໃນໂລກ, ໄດ້ສົ່ງຄວາມໝັ້ນໃຈຂອງຈີນຕໍ່ອະນາຄົດຂອງໂລກພາຍໃຕ້ສະພາບທີ່ພວມເກີດວິກິດການການເງິນສາກົນ.
ວັນທີ 10 ຫາວັນທີ 17 ກຸມພານີ້, ທ່ານຫູຈີນທ່າວ ປະທານປະເທດຈີນຈະໄປຢ້ຽມຢາມອາລາບີຊາອຸດິດ ມາລີ ເຊເນການ ຕັງຊານີແລະໂມຣີຕຸດສ໌ທາງລັດຖະກິດ.
ຫາງສຽງຂອງຕາເວັນອອກກາງແລະອາຟຼິກາລ້ວນແຕ່ເຫັນວ່າ, ພາຍໃຕ້ສະຖານະການວິກິດການການເງິນສາກົນມີຜົນກະທົບຕໍ່ຈີນແລະປະເທດອາຊີແລະອາຟຼິກາ, ການຢ້ຽມຢາມຂອງປະທານຫູຈີນທ່າວຈະເຮັດໃຫ້ການພົວພັນມິດຕະພາບລະຫວ່າງຈີນກັບປະເທດດັ່ງກ່າວໃຫ້ໝັ້ນຄົງແລະເພີ່ມທະວີຂຶ້ນ, ຊຸກຍູ້ການຮ່ວມມືລະຫວ່າງຈີນກັບຄະນະກຳມາທິການຮ່ວມມືເຂດອ່າວເປີເຊຍຕື່ມອີກ, ຊຸກຍູ້ການປະຕິບັດໝາກຜົນຂອງກອງປະຊຸມສຸດຍອດປັກກິ່ງຂອງເວທີປຶກສາຫາລືການຮ່ວມມືລະຫວ່າງຈີນກັບອາຟຼິກາ, ມີຜົນດີຕໍ່ຈີນກັບປະເທດຕາເວັນອອກກາງແລະປະເທດອາຟຼິກາຮ່ວມກັນຜ່ານຜ່າ"ລະດູໜາວ"ຂອງເສດຖະກິດໂລກ.
ໃນເວລາທ່ານປະທານຫູຈິນທ່າວຈະໄປຢ້ຽມຢາມອາລາບີຊາອູດິດແລະ4ປະເທດອາຟະລິກາ,ທ່ານເວີ່ນເຈ່ຍປາວ ນາຍົກລັດຖະມົນຕີຈີນຫາກໍ່ສິ້ນສຸດການຢ້ຽມຢາມເອີລົບຢ່າງເປັນທາງການ.ສື່ມວນຊົນຕ່າງໆ ຄື ໜັງສືພິມນິວຢອກແທັມສ໌ແລະໜັງສືພິມໄຟແນນໂຊແທັມສ໌ລາຍງານວ່າ,ການຢ້ຽມຢາມຂອງທ່ານນາຍົກເວີ່ນເຈ່ຍປາວເທື່ອນີ້ແມ່ນຈຸດພົ້ນເດັ່ນພຽງອັນດຽວໃນລະດູໜາວຂອງເອີລົບ,ເພາະວ່າການຢ້ຽມຢາມຂອງທ່ານນາຍົກເວີ່ນເຈ່ຍປາວແມ່ນການຢ້ຽມຢາມຄວາມໝັ້ນໃຈ,ບໍ່ພຽງແຕ່ເຮັດໃຫ້ປະຊາຄົມໂລກເພີ່ມຄວາມໝັ້ນໃຈທີ່ຮ່ວມມືກັນຜ່ານຜ່າຄວາມຫຍຸ້ງຍາກໃນປະຈຸບັນນີ້ທໍ່ນັ້ນ,ຍັງເຮັດໃຫ້ເອີລົບກໍ່ຄືທົ່ວໂລກມີຄວາມໝັ້ນໃຈຫຼາຍກວ່າເກົ່າຕໍ່ຄວາມຕັດສິນໃຈຂອງຈີນທີ່ຍຶດໝັ້ນປະຕິບັດການປະຕິຮູບແລະໄຂປະຕູສູ່ພາຍນອກແລະຄວາມສາມາດຂອງຈີນທີ່ຮັບມືກັບວິກິດການການເງິນສາກົນ.
"ການມີຄວາມໝັ້ນໃຈຢ່າງໜັກແໜ້ນແມ່ນແຫຼ່ງພະລັງຂອງການເອົາຊະນະວິກິດການ, ການຮ່ວມມືກັນຢ່າງຕິດແທດຕົວຈິງແມ່ນຊ່ອງທາງທີ່ບັງເກີດຜົນຂອງການເອົາຊະນະວິກິດການ,ແລະການຫາບແບກໜ້າທີ່ຮັບຜິດຊອບແມ່ນພື້ນຖານອັນສຳຄັນທີ່ຂາດເຂີນບໍ່ໄດ້ຂອງການເອົາຊະນະວິກິດການ."ຄວາມໝັ້ນໃຈການຮ່ວມມືແລະໜ້າທີ່ຮັບຜິດຊອບແມ່ນໃບສັ່ງຢາທີ່ຖືກກັບພະຍາດທີ່ທ່ານນາຍົກເວີ່ນເຈ່ຍປາວອອກໃຫ້ວິກິດການການເງິນທົ່ວໂລກ.ນອກຈາກໄດ້ສົ່ງຄວາມໝັ້ນໃຈໄປເຖິງທົ່ວໂລກແລ້ວ,ຈີນຍັງໃຊ້ການກະທຳຕົວຈິງຊຸກຍູ້ການເພີ່ມທະວີການຮ່ວມມືດ້ານເສດຖະກິດການຄ້າລະຫວ່າງຈີນກັບເອີລົບ.ໃນໄລຍະຢ້ຽມຢາມຂອງທ່ານເວີ່ນເຈ່ຍປາວ,ຈີນກັບສະຫະພາບເອີລົບ ພ້ອມດ້ວຍສະວິສ ເຢຍລະມັນ ແອສປາຍແລະອັງກິດໄດ້ເຊັນສັນຍາທັງໝົດ38ສະບັບ,ມູນຄ່າ15ຕື້ກວ່າຢວນ.
ນອກນີ້,ທ່ານຊີຈີ້ນຜິງ ຮອງປະທານປະເທດຈີນໄດ້ຢ້ຽມຢາມແມັກຊິກ ຈາໄມກາ ໂກລົມບີ ເວເນຊູເອລາ ເບຼຊິນ ແລະມານຕາຢ່າງເປັນທາງການແຕ່ວັນທີ8ຫາວັນທີ22ກຸມພານີ້.
ໃນຫຼາຍປີມານີ້,ຈີນ ກັບອາເມລິກາລາຕິນແລະພາກພື້ນກາຣາອິບໄດ້ແລກປ່ຽນການຢ້ຽມຢາມກັນລະຫວ່າງຜູ້ນຳຊັ້ນສູງເລື້ອຍໆ,ຄວາມໄວ້ເນື້ອເຊື່ອໃຈກັນດ້ານການເມືອງໄດ້ເພີ່ມທະວີຂຶ້ນ,ການພັດທະນາການພົວພັນລະຫວ່າງສອງຝ່າຍໄດ້ກ້າວເຂົ້າສູ່ໄລຍະການພັດທະນາໄວຂຶ້ນ.ໂດຍປະເຊີນກັບສະພາບການຂອງເສດຖະກິດແລະການເງິນສາກົນທີ່ຂ້ຽວຂາດໃນປະຈຸບັນ,ອາເມລິກາລາຕິນແລະພາກພື້ນກາຣາອິບພວມຕັ້ງໜ້າສະແຫວງຊ່ອງທາງເພື່ອເພີ່ມທະວີການຮ່ວມມືກັບຈີນ,ບົນພື້ນຖານທີ່ຕ່າງຝ່າຍຕ່າງໄດ້ຮັບຜົນປະໂຫຍດ ຮ່ວມກັນພະຍາຍາມຕໍ່ສູ້ກັບວິກິດການການເງິນ.ວົງການຕ່າງໆຂອງອາເມລິກາລາຕິນແລະພາກພື້ນກາຣາອິບເຫັນວ່າ,ການໄປຢ້ຽມຢາມຂອງຮອງປະທານຊີຈີ້ນຜິງເທືອນີ້ແມ່ນໂອກາດໃໝ່ທີ່ຈີນເພີ່ມທະວີການແລກປ່ຽນແລະຮ່ວມມືກັບພາກພື້ນດັ່ງກ່າວ.
