ລົງເລິກການຮ່ວມມືລະຫວ່າງຈີນກັບອາລາບີຊາອຸດິດ ສ້າງຄວາມສຸກໃຫ້ແກ່ປະຊາຊົນສອງປະເທດ
-----------------------------------------------------------------------------------------------------------------
ວັນທີ 11 ກຸມພານີ້, ການຢ້ຽມຢາມອາລາບີຊາອຸດິດທາງລັດຖະກິດຂອງທ່ານຫູຈີນທ່າວ ປະທານປະເທດຈີນໄດ້ເຂົ້າສູ່ມື້ທີສອງ.ປະທານຫູຈີນທ່າວໄດ້ໄປຊົມໂຄງການຮ່ວມມືລະຫວ່າງວິສາຫະກິດແລະອົງການຄົ້ນຄວ້າວິທະຍາສາດຈີນກັບອາລາບີຊາອຸດິດ, ຕໍ່ໄປແມ່ນເນື້ອໃນລະອຽດ.
ຕອນເຊົ້າວັນທີ 11 ກຸມພານີ້ຕາມເວລາທ້ອງຖິ່ນ, ທ່ານຫູຈີນທ່າວພ້ອມດ້ວຍຄະນະໄດ້ໄປຊົມໂຮງງານຜະລິດຂອງບໍລິສັດຊີມັງຣີຢັດທີ່ຕັ້ງຢູ່ພາກຕາເວັນຕົກຫ່າງຈາກນະຄອນຫຼວງຣີຢັດ 75 ກິໂລແມັດ, ນີ້ແມ່ນໂຮງງານຊີມັງທີ່ບໍລິສັດວິສະວະກຳສາກົນຊີໂນມາຈຳກັດຂອງຈີນໃຫ້ສ້າງ.ຢູ່ຫ້ອງຄວບຄຸ້ມສູນກາງ,ທ່ານຫູຈີນທ່າວໄດ້ຖາມສະພາບການຜະລິດຢ່າງລະອຽດ.
ວັດຖຸກໍ່ສ້າງເຊັ່ນຊີມັງປະເທດຕາເວັນອອກກາງຕ້ອງການນັ້ນສ່ວນຫຼາຍຕ້ອງນຳເຂົ້າຈາກຕ່າງປະເທດ, ປະເທດຕາເວັນອອກກາງຕ່າງໆລວມທັງອາລາບີຊາອຸດິດລ້ວນແຕ່ເອົາໃຈໃສ່ນຳການຍົກສູງຄວາມສາມາດຜະລິດດ້ວນຕົນເອງຫຼາຍ.ປະຈຸບັນ,ບໍລິສັດວິສະວະກຳສາກົນຊີໂນມາຈຳກັດທີ່ມີເຕັກນິກຢູ່ໃນລະດັບແຖວໜ້າຂອງໂລກໄດ້ເຊັນສັນຍາທີ່ຕິດລະບົບຜະລິດຊີມັງ7ລະບົບ, ໃນນັ້ນມີ 5 ລະບົບໄດ້ເລີ່ມຜະລິດແລ້ວ.ພາຍຫຼັງທຸກລະບົບເລີ່ມຜະລິດແລ້ວ,ຜົນຜະລິດຈະກວມປະມານ40%ຂອງຍອດປະລິມານການຜະລິດຊີມັງຂອງອາລາບີຊາອຸດິດ. ໃນເວລາໃຫ້ສຳພາດຕໍ່ນັກຂ່າວCRI, ທ່ານນາເຊຍອູດິນ ຊິດດິກ ຜູ້ຊ່ອຍຜູ້ຈັດການໃຫຍ່ຂອງບໍລິສັດຊີມັງຣີຢັດທີ່ເດີນທາງໄປນຳປະທານຫູຈີນທ່າວໄດ້ສະແດງຄວາມເພິ່ງພໍໃຈທີ່ສຸດຕໍ່ການຮ່ວມມືກັບບໍລິສັດວິສະວະກຳສາກົນຊີໂນມາຈຳກັດ, ແລະຍ້ອງຍໍຄວາມດຸໝັ່ນແລະຄວາມຮັບຜິດຊອບສູງຂອງພະນັກງານຈີນຕະຫຼອດ.
"ການຮ່ວມມືລະຫວ່າງພວກເຮົາກັບບໍລິສັດຊີໂນມາແມ່ນດີທີ່ສຸດ, ພວກເຮົາໄດ້ຮ່ວມມືກັນ4ປີແລ້ວ,ການຮ່ວມມືໄດ້ກາຍເປັນແບບຢ່າງແລ້ວ. ພວກເຮົາເຮັດວຽກນຳກັນ,ເໝືອນກັບຄະນະດຽວກັນ,ນີ້ກໍ່ແມ່ນສາເຫດສຳຄັນທີ່ພວກເຮົາໄດ້ຮັບຜົນສຳເລັດ."
ຫຼາຍປີມານີ້, ການຮ່ວມມືລະຫວ່າງຈີນກັບອາຣາບີຊາອູດິດບໍ່ພຽງແຕ່ກ່ຽວພັນເຖິງຂົງເຂດການຄ້າ ພະລັງງານໂຄງການ, ແລະການລົງທຶນເຊິ່ງກັນແລະກັນ,ການຄົ້ນຄວ້າວິທະຍາສາດກໍ່ໄດ້ກາຍເປັນຈຸດສຳຄັນຂອງການຮ່ວມມືຂອງສອງຝ່າຍ.ວັນທີ11ກຸມພານີ້,ທ່ານປະທານຫູຈີນທ່າວຍັງໄປຢ້ຽມຢາມໂຄງການຄົ້ນຄວ້າແຊນໝາກກະທັນຕົ້ນປາມທີ່ມີໝາກຄືໝາກກະທັນຈີນອາຣາບີຊາອຸດິດ ເຊິ່ງເປັນໂຄງການທຳອິດຫຼັງເຊັນສັນຍາຮ່ວມມືວິທະຍາສາດເຕັກນິກນຳກັນ.
ໝາກກະທັນຕົ້ນປາມແມ່ນພືດເສດຖະກິດທີ່ສຳຄັນກວ່າໝູ່ໃນເຂດຕາເວັນອອກກາງແລະອາຟຼິກກາເໜືອ,ຜົນຜະລິດຂອງໝາກໄມ້ຊະນິດນີ້ຂອງອາຣາບີຊາອຸດິດກວມ 15%ຂອງທົ່ວໂລກ.ແຜນການຄົ້ນຄວ້າແຊນໝາກກະທັນຕົ້ນປາມຈີນອາຣາບີຊາອຸດິດທີ່ສະຖາບັນແຊນປັກກິ່ງຂອງສະພາບັນດິດວິທະຍາສາດຈີນຮ່ວມມືກັບອາຣາບີຊາອຸດິດດຳເນີນນັ້ນແມ່ນໂຄງການຄົ້ນຄວ້າຂົງເຂດວິທະຍາສາດຊີວິດທີ່ໃຫຍ່ກວ່າໝູ່ທີ່ລັດຖະບານອາຣາບີຊາອຸດິດອອກທຶນຊ່ວຍເຫຼືອ, ແລະກໍ່ແມ່ນນະໂຍບາຍຍຸດທະສາດອັນໜຶ່ງຂອງອາຣາບີຊາອຸດິດເພື່ອຊຸກຍູ້ການພັດທະນາວິທະຍາສາດດ້ານຊີວະຊາດແລະອຸດສາຫະກຳເຕັກນິກຊີວະຊາດຂອງຕົນ.
ທ່ານຫູຈິນທ່າວສະແດງຄວາມຍໍ້ຍອງສັນລະເສີນຕໍ່ຄວາມພະຍາຍາມຂອງນັກວິທະຍາສາດຈີນ.ເມື່ອກ່າວເຖິງການຮ່ວມມືດ້ານວິທະຍາສາດເຕັກນິກລະຫວ່າງຈີນກັບອາລາບີຊາອູດິດ,ທ່ານຫູຈິນທ່າວກ່າວວ່າ:"ລັດຖະບານຈີນແລະລັດຖະບານອາລາບີຊາອຸດິດລ້ວນແຕ່ເອົາໃຈໃສ່ທີ່ສຸດນຳການພັດທະນາວິທະຍາສາດເຕັກນິກ,ແລະເອົາໃຈໃສ່ໃນລະດັບສູງຕໍ່ການຮ່ວມມືລະຫວ່າງສອງປະເທດໃນຂົງເຂດວິທະຍາສາດເຕັກນິກ,ຂ້າພະເຈົ້າຫວັງຢ່າງຈິງໃຈໃຫ້ການຮ່ວມມືລະຫວ່າງນັກວິທະຍາສາດຈີນກັບນັກວິທະຍາສາດອາລາບີຊາອຸດິດໃນການຄົ້ນຄວ້າແຊນໝາກກະທັນຕົ້ນປາມນັ້ນຈົ່ງໄດ້ຮັບໝາກຜົນຢ່າງເຕັມເມັດເຕັມໜ່ວຍ,ແລະຍິນດີພ້ອມກັນຊຸກຍູ້ການຮ່ວມມືລະຫວ່າງຈີນກັບອາລາບູຊາອຸດິດໃນຂົງເຂດວິທະຍາສາດເຕັກນິກ."
