ທ່ານໂອບາມາກ່າວປາຖະກະຖາຢູ່ລັດຖະສະພາເປັນຄັ້ງທຳອິດ
-----------------------------------------------------------------------------------------------------------------
ຕາມຂ່າວCRI, ຕອນຄ່ຳວັນທີ24ກຸມພານີ້, ທ່ານບາຣັກ ໂອບາມາ ປະທານາທິບໍດີອາເມລິກາໄດ້ກ່າວປາຖະກະຖາອັນສຳຄັນຢູ່ລັດຖະສະພາ, ຮຽກຮ້ອງໃຫ້ປະຊາຊົນອາເມລິກາສ້າງຄວາມໝັ້ນໃຈຄືນໃໝ່ພາຍໃຕ້ສະພາບຫຍຸ້ງຍາກແຫ່ງວິກິດການເສດຖະກິດປະຈຸບັນ. ທ່ານກ່າວວ່າ, ລັດຖະບານຈະເພີ່ມງົບປະມານໃນດ້ານພະລັງງານ, ການປະກັນສຸຂະພາບແລະການສຶກສາ, ແລະເຕືອນໃຫ້ສະມາຊິກລັດຖະສະພາຮູ້ວ່າ, ການກອບກູ້ຂະແໜງການທະນາຄານເພື່ອຮັບປະກັນໃຫ້ເສດຖະກິດອາເມລິກາຈະເລີນຄືນໃໝ່ນັ້ນອາດຈະຕ້ອງການເງິນທຶນຫຼາຍກວ່າເກົ່າ.
ການກ່າວປາຖະກະຖາທີ່ຖືກຂ່າວສານອາເປເອີ້ນເປັນລະດັບບົດວິພາກສະພາບແຫ່ງຊາດອາເມລິການັ້ນແມ່ນທ່ານໂອບາມາກ່າວປາຖະກະຖາຕໍ່ສະມາຊິກສະພາສູງແລະສະພາຕ່ຳອາເມລິກາຢູ່ລັດຖະສະພາເປັນຄັ້ງທຳອິດພາຍຫຼັງທ່ານຂຶ້ນຮັບຕຳແໜ່ງປະທານາທິບໍດີອາເມລິກາ, ສະນັ້ນ, ຈິ່ງເຮັດໃຫ້ຄົນທັງຫຼາຍເອົາໃຈໃສ່ນຳ. ພາຍຫຼັງຂຶ້ນຮັບຕຳແໜ່ງແລ້ວ, ທ່ານໂອບາມາໄດ້ວາງແຜນກະຕຸ້ນເສດຖະກິດທີ່ມີມູນຄ່າ787ຕື້ໂດລາແລະແຜນສ້າງຕະຫຼາດທີ່ດິນແລະເຮືອນຢູ່ໃຫ້ຈະເລີນທີ່ມີມູນຄ່າ275ຕື້ໂດລາ, ທ່ານຍັງເຈດຕະນາຮັກສາຄວາມໝັ້ນຄົງຂອງຂະແໜງການທະນາຄານ, ແຕ່ປະຈຸບັນນີ້ຍັງບໍ່ໄດ້ຜົນປານໃດ. ສະນັ້ນ, ການກ່າວປາຖະກະຖາເທື່ອນີ້ຖືກຖືເປັນໂອກາດທີ່ດີທີ່ສຸດສຳລັບທ່ານໂອບາມາສະແຫວງຫາຄວາມສະໜັບສະໜູນຈາກສະມາຊິກລັດຖະສະພາແລະປະຊາຊົນອາເມລິກາ.
ໃນເວລາກ່າວປາຖະກະຖາ, ກ່ອນອື່ນ, ທ່ານໂອບາມາໄດ້ກ່າວເນັ້ນວ່າອາເມລິກາພວມປະເຊີນກັບວິກິດການເສດຖະກິດທີ່ໜັກໜ່ວງ, ແລະສະແດງຄວາມຊົມເຊີຍຕໍ່ລັດຖະສະພາທີ່ໄດ້ຜ່ານແຜນການກະຕຸ້ນເສດຖະກິດຂອງລັດຖະບານໃນຫວ່າງບໍ່ດົນນີ້. ແຕ່ທ່ານຊີ້ອອກວ່າ, ຕໍ່ໜ້ານີ້ຍັງມີໄລຍະທາງຍາວໄກ, ຕໍ່ໄປພາຍໜ້າ, ຍັງຕ້ອງແກ້ໄຂບັນຫາຢ່າງຫຼວງຫຼາຍ, ນີ້ໄດ້ສະແດງໃຫ້ເຫັນວ່າທ່ານໂອມາບາຫວັງໃຫ້ປະຊາຊົນສາມາດຮັກສາຄວາມຄາດຫວັງທີ່ໃຈເຢັນຕໍ່ແຜນການກະຕຸ້ນເສດຖະກິດຈະບັງເກີດຜົນໃນໄລຍະສັ້ນ. ແຕ່ພ້ອມກັນນັ້ນ, ທ່ານກໍໃຫ້ຄຳໝັ້ນສັນຍາຕໍ່ປະຊາຊົນອາເມລິກາວ່າ, ຊີວິດໃນອະນາຄົດຈະດີງາມກວ່າເກົ່າ.
ທ່ານໂອບາມາກ່າວວ່າ, ທ່ານຈະຍື່ນແຜນງົບປະມານສະບັບທຳອິດພາຍຫຼັງຂຶ້ນຮັບຕຳແໜ່ງເປັນປະທານາທິບໍດີໃຫ້ລັດຖະສະພາໂດຍໄວ, ແລະຖືແຜນງົບປະ ມານດັ່ງກ່າວເປັນແຜນຜັງທີ່ກ່ຽວພັນກັບອະນາຄົດຂອງອາເມລິກາ. ທ່ານກ່າວເນັ້ນວ່າ, ແຜນງົບປະມານສະບັບນີ້ຈະເອົາບັນຫາຕ່າງໆ ເຊັ່ນພະລັງງານ, ການປະກັນສຸຂະພາບ, ການສຶກສາແລະອື່ນໆເປັນຈຸດສຳຄັນຂອງວຽກງານລັດຖະບານ. ໂດຍສະເພາະແມ່ນສະແຫວງຫາຜົນສຳເລັດໃນຂົງເຂດພະລັງງານ, ເພື່ອເຮັດໃຫ້ອາເມລິກາບໍ່ເປັນປະເທດທີ່ອາໃສການຂາເຂົ້ານ້ຳມັນເຊື້ອໄຟຈາກຕ່າງປະເທດອີກ. ທ່ານຫວັງໃຫ້ລັດຖະສະພາສາມາດຜ່ານຮ່າງກົດໝາຍສະບັບໜຶ່ງເພື່ອຫຼຸດການລະບາຍອາຍຜິດເຮືອນແກ້ວແຕ່ລະປີ, ຈະຈັດງົບປະມານ15ຕື້ໂດລາໃຊ້ເຂົ້າໃນການພັດທະນາແລະນຳໃຊ້ພະລັງງານທີ່ເກີດໃໝ່ໄດ້. ທ່ານກ່າວວ່າ, ໃນດ້ານການຜະລິດແລະນຳໃຊ້ພະລັງງານສະອາດ, ອາເມລິກາຕົກຢູ່ຫຼັງຂອງຈີນ, ເຢຍລະມັນ, ຢີ່ປຸ່ນແລະປະເທດອື່ນໆ, ທ່ານຮຽກຮ້ອງນັກທຸລະກິດອາເມລິກາກໍ່ບຸກໜ້າບືນຕົວໃຊ້ພາຫະນະພັດທະນາວິທະຍາສາດເຕັກນິກ, ເຮັດໃຫ້ອາເມລິກາກາຍເປັນປະເທດນຳໜ້າໃນດ້ານນຳໃຊ້ພະລັງງານທີ່ມີປະສິທິພາບສູງ.
ທ່ານກ່າວເນັ້ນວ່າມາດຕະການກູ້ຕະຫຼາດຂອງອາເມລິກາມີຄວາມຈຳເປັນຕໍ່ການຟື້ນຟູເສດຖະກິດ.
ການກ່າວປາຖະກະຖາໃນລັດຖະສະພາຂອງທ່ານໂອບາມາເທື່ອນີ້ບໍ່ພຽງແຕ່ໄດ້ຮັບຄວາມສົນໃຈຈາກປະຊາຊົນອາເມລິກາເທົ່ານັ້ນ, ປະເທດຕ່າງໆຂອງໂລກກໍ່ໄດ້ສະແດງຄວາມສົນໃຈຢ່າງໃກ້ຊິດ, ແຕ່ຈົນຮອດຕອນທ້າຍ, ທ່ານໂອບາມາຈຶ່ງໄດ້ກ່າວເຖິງນະໂຍບາຍການຕ່າງປະເທດຂອງອາເມລິກາ, ແລະບໍ່ໄດ້ເວົ້າຫຼາຍ. ທ່ານໃຫ້ຄຳໝັ້ນສັນຍາວ່າຈະຖອນເອົາກອງທັບອາເມລິກາອອກຈາກອີຣັກ, ແຕ່ບໍ່ໄດ້ເວົ້າເຖິງຈະໃຊ້ຮູບການໃດແລະຕາຕະລາງເວລາທີ່ລະອຽດ. ທ່ານກ່າວວ່າຈະອອກແຮງສຸດຂີດຕໍ່ຕ້ານອົງການອານເຄດາແລະກຸ່ມລັດທິກໍ່ການຮ້າຍຢູ່ອັຟການິສະຖານແລະປາກິສະຖານ, ແຕ່ບໍ່ໄດ້ອະທິບາຍຮູບການລະອຽດເຊັ່ນກັນ. ໃນທີ່ສຸດ, ທ່ານໂອບາມາກ່າວເນັ້ນວ່າ, ຍຸກສະໄໝໃໝ່ທີ່ອາເມລິກາເຊື່ອມໂຍງກັບໂລກໄດ້ມາເຖິງແລ້ວ, ລັດຖະບານອາເມລິກາຈະຮ່ວມມືກັບປະເທດອື່ນໆຮັບມືກັບການທ້າທາຍ. ນີ້ຄືຊິເຮັດໃຫ້ຄົນທັງຫຼາຍເຫັນວ່າ, ວຽກງານການຕ່າງປະເທດຂອງອາເມລິກາໃນອະນາຄົດອາດຈະກ້າວໄປສູ່ການຮ່ວມມືຫຼາຍກວ່າເກົ່າ.
