ລັດຖະບານອະພິສິດສາມາດເຮັດໃຫ້ສະຖານະການໄທໝັ້ນຄົງໄດ້ຫຼືບໍ່?
-----------------------------------------------------------------------------------------------------------------
ນັບແຕ່ວັນທີ 13 ເມສານີ້ເປັນຕົ້ນໄປ, ໄທໄດ້ເຂົ້າສູ່ກຸດສົງການກໍ່ຄືບຸນປີໃໝ່ຕາມຈັດທະຄະຕິໄທ, ແຕ່ວ່າວັນທີ 13 ເມສານີ້, ພັດໄດ້ເກີດການປະທະກັນນອງເລືອດລະຫວ່າງທະຫານ, ຕຳຫຼວດກັບຜູ້ປະທ້ວງຕ້ານລັດຖະບານ, ສະນັ້ນ, ຈຶ່ງເຮັດໃຫ້ວັນບຸນທີ່ຄວນຄຶກຄື້ນມ່ວນຊື່ນນັ້ນປົກຫຸ້ມໄປດ້ວຍເງົາມືດ. ນັກວິເຄາະຊີ້ອອກວ່າ, ສະຖານະການໄທຈະສາມາດສະຫງົບລົງຫຼືບໍ່ນັ້ນຍັງເປັນເລື່ອງທີ່ບໍ່ທັນແນ່ນອນ.
ວັນທີ 13 ເມສານີ້, ທະຫານໄທໄດ້ໃຊ້ການປະຕິບັດການຂັບໄລ່ຜູ້ປະທ້ວງໃນນະຄອນຫຼວງບາງກອກ, ແລະເກີດການປະທະກັນກັບຜູ້ປະທ້ວງ. ສ່ວນຜູ້ປະທ້ວງກໍ່ແຍກເປັນຫຼາຍກຸ່ມສືບຕໍ່ປະທ້ວງແລະຂັດຂວາງການຈໍລະຈອນຢູ່ຫຼາຍຈຸດຂອງບາງກອກ, ເຂົາເຈົ້າເຜົາລົດແລະຢາງຕີນລົດເພື່ອຂັດຂວາງການປະຕິບັດການຂອງທະຫານ, ບາງກອກຕົກຢູ່ໃນສະພາບການວຸ້ນວາຍ. ຂ່າວສານໄທແຈ້ງວ່າ, ປະຈຸບັນ, ໄດ້ມີ 77 ຄົນບາດເຈັບໃນເຫດການວຸ້ນວາຍ. ສ່ວນລັດຖະບານໄທກໍ່ຢືນຢັນວ່າ, ໄດ້ມີ 2 ຄົນເສຍຊີວິດໃນການປະທະກັນລະຫວ່າງຜູ້ປະທ້ວງກັບປະຊາຊົນ. ນອກຈາກບາງກອກ,ເຂດອື່ນຂອງໄທກໍ່ບໍ່ສະຫງົບຄືກັນ. ວັນທີ 13 ເມສານີ້, ຜູ້ປະທ້ວງໄດ້ໂຮມຊຸມນຸມປະທ້ວງຢູ່ຕໍ່ໜ້າວິທະຍຸໂທລະພາບແຫ່ງຊາດໄທສາຂາຈັງຫວັດຂອນແກ່ນ, ເຮັດໃຫ້ສະຖານີໂທລະພາບຕ້ອງໄດ້ຢຸດການອອກອາກາດລາຍການຢູ່ 10 ຈັງຫວັດພາກຕາເວັນອອກສຽງເໜືອ.
ສະຖານະການອັນປັ່ນປ່ວນຢູ່ພາຍໃນປະເທດໄທໄດ້ສົ່ງຜົນສະທ້ອນອັນໃຫຍ່ຫຼວງໃຫ້ຊີວິດການເປັນຢູ່ຂອງປະຊາຊົນທົ່ວໄປ.ປັດຈຸບັນ,ສະຖານີລົດໄຟຂອງບາງກອກຕ້ອງໄດ້ເຊົາບໍລິການ,ລົດເມປະຈຳທາງບາງສາຍກໍ່ໄດ້ປ່ຽນທາງຫຼືເຊົາແລ່ນລົດ,ຮ້ານຄ້າໃຫຍ່ທີ່ຢູ່ເຂດການຄ້າກໍ່ອັດປະຕູ.ນອກນີ້,ການຫຼິ້ນບຸນກຸດສົງການຕ່າງໆຂອງບາງກອກໄດ້ຍົກເລີກໝົດ,ການຫົດສົງກັນທີ່ປະຊາຊົນເຮັດຢ່າງເປັນເຈົ້າການກໍ່ຖືກຊັກຊວນໃຫ້ຢຸດເຊົາ.ບາງປະເທດກໍ່ອອກຄຳເຕືອນໃຫ້ພົນລະເມືອງປະເທດຕົນຢ່າໄປທ່ຽວປະເທດໄທ.
ໂດຍປະເຊີນໜ້າກັບສະພາບປັ່ນປ່ວນວຸ້ນວາຍ,ລັດຖະບານອະພິສິດກັບຝ່າຍທະຫານ,ຕຳຫຼວດໄດ້ຈິດໜຶ່ງໃຈດຽວກັນທີ່ບໍ່ເຄີຍມີມາກ່ອນ.ມື້ດຽວກັນ,ທ່ານອະພິສິດ ເວດຊາຊີວະໄດ້ກ່າວຄຳປາໄສຜ່ານທາງໂທລະພາບຫຼາຍເທື່ອ,ຮຽກຮ້ອງໃຫ້ຜູ້ປະທ້ວງກັບບ້ານ.ພ້ອມດຽວກັນນັ້ນ,ພົນເອກຊົງກິດຕິ ຈັກກາບາດ,ຜູ່ບັນຊາການທະຫານສູງສຸດກອງທັບໄທກ່າວຄຳປາໄສວ່າ,ໜ້າທີ່ສຳຄັນອັນດັບໜຶ່ງຂອງກອງທັບແມ່ນເຮັດໃຫ້ເສັ້ນທາງທີ່ຖືກກຸ່ມປະທ້ວງປິດການສັນຈອນນັ້ນໃຫ້ເປີດຄືນໃໝ່,ທະຫານຈະບໍ່ໃຊ້ອາວຸດ.ຕຳຫຼວດກໍ່ກ່າວວ່າຈະລົງໂທດຜູ່ນຳກຸ່ມແນວໂຮມປະຊາ ທິປະໄຕຕໍ່ຕ້ານພະເດັດການແຫ່ງຊາດຫຼືກຸ່ມເສື້ອແດງທີ່ຖືກຈັບຕົວນັ້ນຢ່າງມີຄວາມຍຸດຕິທຳ.ມື້ດຽວກັນ,ທ່ານອະພິສິດຍັງໄດ້ອອກຄຳສັ່ງ,ສ້າງຕັ້ງກອງບັນຊາການປະຕິບັດກົດໝາຍພາວະສຸກເສີນທີ່ປະກອບດ້ວຍ3ຝ່າຍຄືກອງທັບ,ຕຳຫຼວດແລະລັດຖະບານ.
ເຖິງວ່າລັດຖະບານໄທ ທຳຄວາມພະຍາຍາມສຸດຂີດເພື່ອເຮັດໃຫ້ສະຖານະການຫມັ້ນທ່ຽງກໍຕາມ, ແຕ່ການຂັບໄລ່ແບບບັງຄັບແລະການປະທະກັນຢ່າງນອງເລືອດທີ່ເກີດຂຶ້ນຢູ່ບາງກອກ ພັດເຮັດໃຫ້ວົງການການເມືອງຂອງໄທ ມີປະຕິກິລິຍາຫຼາຍດ້ານ.ທ່ານປະສົບສຸກ ບຸນເດດ,ປະທານວຸດທິສະພາ ກ່າວວ່າ,ລັດຖະບານໃຊ້ຄວາມຮຸນແຮງເກີນໄປ ເພື່ອປາບປາມຜູ່ປະທ້ວງຕ້ານລັດຖະບານ,ວຸດທິສະພາຈະຈັດກອງປະຊຸມດ່ວນເພື່ອປຶກສາຫາລືບັນຫາສະຖານະການໃນປະຈຸບັນໃນວັນທີ 14 ເມສານີ້. ມື້ດຽວກັນ,ທ່ານສຸຊົນ ຊາລີເຄືອ,ອະດີດປະທານວຸດທິສະພາຍັງນຳສະມາຊິກສະພາສ່ວນຫນຶ່ງຍື່ນສານດີກາ ໃຫ້ສຳນັກພະລາຊະວັງພິຈາລະນາ,ເພື່ອຂໍໃຫ້ເຈົ້າຊີວິດ ອອກມາຊ່ອຍຢຸດຕິດ້ວຍຄວາມຮຸນແຮງໃນປະຈຸບັນ.ພັກຊາດໄທທີ່ເປັນພັກຝ່າຍຄ້ານສຳຄັນໃນສະພາຜູ່ແທນລາຊະດອນ ໄດ້ ຮຽກຮ້ອງໃຫ້ລັດຖະບານຢຸດຕິການໃຊ້ອາວຸດແລະຄວາມຮຸນແຮງເພື່ອຂັບໄລ່ຜູ່ປະທ້ວງ.
ໂດຍປະເຊີນກັບສະຖານະການຂອງພາຍໃນປະເທດທີ່ສັບສົນທີ່ສຸດ,ການກະທຳຂອງລັດຖະບານອະພິສິດທີ່ໃຊ້ຄວາມຮຸນແຮງຂັບໄລ່ຜູ່ປະທ້ວງນັ້ນຈະສາມາດເຮັດໃຫ້ສະຖານະການດີຂຶ້ນຫຼືບໍ່, ຍັງເປັນເລື່ອງທີ່ບໍ່ແນ່ນອນເທື່ອ. ຂ່າວແຈ້ງວ່າ,ກຸ່ມພັນທະມິດປະຊາຊົນເພື່ອປະຊາທິປະໄຕ ຫຼືກຸ່ມເສື້ອເຫຼືອງກໍ່ ໄດ້ຂູ່ວ່າ ຈະອອກມາປະທ້ວງຄືນໃຫມ່ຢູ່ຕາມຖະຫນົນ, ຖ້າມີກຸ່ມເສື້ອເຫຼືອງມາປະເຊີນຫນ້າກັບກຸ່ມເສື້ອແດງ. ສະຖານະການຂອງໄທອາດຈະຮ້າຍແຮງຂຶ້ນຕື່ມອີກ
