ລັດຖະບານສ.ເກົາຫຼີປະເຊີນກັບການເລືອກເສັ້ນທາງທີ່ຫຍຸ້ງຍາກ
-----------------------------------------------------------------------------------------------------------------
ຕາມCRIລາຍງານວ່າ: ວັນທີ19ເມສານີ້,ກະຊວງເອກະພາບສ.ເກົາຫຼີກ່າວວ່າ,ສ.ເກົາຫຼີໄດ້ເຫັນດີກັບຂໍ້ສະເໜີຂອງສປປເກົາຫຼີ,ແລະຈະສົ່ງເຈົ້າໜ້າທີ່ໄປເຈລະຈາກັບເຈົ້າໜ້າທີ່ສປປເກົາຫຼີຢູ່ເມືອງເຄຊົງຂອງສປປເກົາຫຼີ.ນີ້ຈະແມ່ນສອງປະເທດຈັດການເຈລະຈາລະຫວ່າງລັດຖະບານເທື່ອທຳອິດພາຍຫຼັງທ່ານລີມຽງບັກ ຂຶ້ນຮັບຕຳແໜ່ງປະທານາທິບໍດີສ.ເກົາຫຼີໃນເດືອນກຸມພາປີກາຍນີ້.ເພື່ອເລື່ອງນີ້,ລັດຖະບານສ.ເກົາຫຼີເລື່ອນເວລາປະກາດເຂົ້າຮ່ວມ"ຂໍ້ລິເລີ່ມຄວາມປອດໄພກ່ຽວກັບການປ້ອງກັນບໍ່ແຜ່ຜາຍອາວຸດນີວເຄຼຍ"ຫຼືPSIທີ່ນຳພາໂດຍອາເມລິການັ້ນຈາກວັນທີ19ປ່ຽນໄປຮອດຫຼັງວັນທີ21ເມສານີ້.
ສື່ມວນຊົນສ.ເກົາຫຼີໄດ້ສັງເກດເຫັນແລ້ວວ່າ,ສປປເກົາຫຼີແມ່ນສະເໜີໃຫ້ຈັດການເຈະລຈາເທື່ອນີ້ໃນໂອກາດທີ່ສະຖານະການແຫຼມເກົາຫຼີເຄັ່ງຕຶງຂຶ້ນແລະລັດຖະບານສ.ເກົາຫຼີໃກ້ຈະປະກາດເຂົ້າຮ່ວມ"ຂໍ້ລິເລີ່ມຄວາມປອດໄພກ່ຽວກັບການປ້ອງກັນບໍ່ແຜ່ຜາຍອາວຸດນີວເຄຼຍ"ຢ່າງຮອບດ້ານ.
ວັນທີ 5 ເມສານີ້, ສ.ປ.ປ.ເກົາຫຼີໄດ້ປະກາດສົ່ງດາວທຽມສື່ສານທົດລອງ"ກວງມີງຊົງ2"ຢ່າງສຳເລັດຜົນ. ວັນທີ 14 ເມສານີ້, ກະຊວງການຕ່າງປະເທດສ.ປ.ປ.ເກົາຫຼີອອກຖະແຫຼງການປະຕິເສດບໍ່ຮັບຮອງຖະແຫຼງການຂອງປະທານສະພາຄວາມໝັ້ນຄົງສະຫະປະຊາຊາດ,ພ້ອມທັງປະກາດຖອນຕົວອອກຈາກການເຈລະຈາຫົກຝ່າຍກ່ຽວກັບບັນຫານີວເຄຼຍແຫຼມເກົາຫຼີ,ແລະຈະຟື້ນຟູສິ່ງກໍ່ສ້າງນີວເຄຼຍທີ່ໄດ້ເສື່ອມສະມັດຖະພາບແລ້ວນັ້ນ
ຜູ້ຊ່ຽວຊານແລະ ສື່ມວນຊົນສ.ເກົາຫຼີເຫັນວ່າ, ສ.ປ.ປ.ເກົາຫຼີສະເໜີຈັດການເຈລະຈາໃນໄລຍະອ່ອນໄຫວແບບນີ້,ເຖິງວ່າໄດ້ສະແດງຄວາມປາຖະໜາທີ່ຢາກດຳເນີນການເຈລະຈາແບບເປີດປະຕູກັບສ.ເກົາຫຼີໃນລະດັບໃດໜຶ່ງກໍ່ຕາມ,ແຕ່ຕົ້ນຕໍຍັງແມ່ນການເຕືອນໃຫ້ສ.ເກົາຫຼີຢ່າເຂົ້າຮ່ວມ"ຂໍ້ລິເລິ່ມຄວາມປອດໄພປ້ອງກັນບໍ່ໃຫ້ແຜ່ຜາຍອາວຸດ ຫຼືPSI". ຜູ້ຊ່ຽວຊານຈຳນວນໜຶ່ງກໍ່ຄາດວ່າ,ສ.ປ.ປ.ເກົາຫຼີຈະສົ່ງຄຳຂາດສຸດທ້າຍໃຫ້ສ.ເກົາຫີຼ ໃນການເຈລະຈາທີ່ຈະຈັດຂຶ້ນ.
ເດືອນກຸມພາປີກາຍນີ້, ລັດຖະບານລີມຽງບັກໂປໄດ້ຂຶ້ນຮັບຕຳແໜ່ງ, ເຖິງວ່າໄດ້ໃຊ້ມາດຕະການເດັດຂາດຕໍ່ສປປເກົາຫຼີ, ແຕ່ກໍ່ບໍ່ມີຄວາມຕັດສິນໃຈໃນບັນຫາຈະ ເຂົ້າຮ່ວມPSIຢ່າງຮອບດ້ານ. ເຈົ້າໜ້າທີ່ຂອງລັດຖະບານສເກົາຫຼີເຜີຍໃຫ້ຮູ້ວ່າ, ລັດຖະບານໄດ້ຕົກລົງເຂົ້າຮ່ວມຂໍ້ລິເລີ່ມດັ່ງກ່າວ, ແຕ່ເລື່ອນເວລາປະກາດການຕົກລົງມາຕະຫຼອດ. ນັບແຕ່ເດືອນມິນາປີນີ້ເປັນຕົ້ນມາ, ສເກົາຫຼີໄດ້ສະແດງໃຫ້ເຫັນວ່າພວມພິຈາລະນາເຂົ້າຮ່ວມPSIຢ່າງຮອບດ້ານຫຼາຍເທື່ອແລ້ວ. ສປປເກົາຫຼີກ່າວເຕືອນວ່າ, ຖ້າສເກົາຫຼີເຂົ້າຮ່ວມຂໍ້ລິເລີ່ມນີ້ກໍ່ເທົ່າກັບເປັນການປະກາດສົງຄາມຕໍ່ ສປປເກົາຫຼີ, ສປປເກົາຫຼີຈະໃຊ້ມາດຕະການຮັບມືຢ່າງເດັດຂາດ.
ໜັງສືພິມລາຍວັນໂຊຊົງອິນໂບຂອງສເກົາຫຼີຊີ້ອອກວ່າ, ສຳລັບບັນຫາສປປເກົາຫຼີ, ພຽງແຕ່ເກີດມີການຕັດສິນໃຈທີ່ພິດພາດນ້ອຍໜຶ່ງກໍ່ອາດຈະກໍ່ໃຫ້ເກີດວິກິດການຄວາມປອດໄພຢ່າງຮ້າຍແຮງ.
ສຳນັກຂ່າວສານຢົນຮັບຂອງສເກົາຫຼີເຫັນວ່າ, ລັດຖະບານສເກົາຫຼີມີແຜນຈະປະ ກາດການຕົກລົງກ່ຽວກັບການເຂົ້າຮ່ວມPSIຢ່າງຮອບດ້ານຫຼັງສປປເກົາຫຼີສົ່ງດາວທຽມຂຶ້ນສູ່ອະວະກາດ, ແຕ່ຍ້ອນສປປເກົາຫຼີເຕືອນແລະຄວາມເຫັນພາຍໃນລັດຖະ ບານສເກົາຫຼີມີຄວາມແຕກແຍກກັນ, ຈິ່ງເລື່ອນເວລາປະກາດຢ່າງເປັນທາງການ, ເຮັດໃຫ້ຫຼາຍຄົນສົງໃສວ່າລັດຖະບານສເກົາຫຼີປ່ຽນແຜນການຫຼືບໍ່. ຫາງສຽງທົ່ວໄປ ເຫັນວ່າ, ສເກົາຫຼີຈະເລືອກແນວໃດໃນການເຈລະຈາເທື່ອນີ້ທີ່ຈະຈັດຂຶ້ນ, ເປັນເລື່ອງທີ່ຫຼາຍຝ່າຍໃຫ້ຄວາມສົນໃຈ.
