ກອງປະຊຸມທົບທວນເດີບັນຂອງສະຫະປະຊາຊາດເກີດການໂຕ້ຖຽງຢ່າງດຸເດືອດກ່ຽວກັບບັນຫາສິດທິມະນຸດ
-----------------------------------------------------------------------------------------------------------------
ຕາມCRIລາຍງານວ່າ: ກອງປະຊຸມທົບທວນເດີບັນໂດຍມີຂ້າຫຼວງໃຫຍ່ຮັບຜິດຊອບວຽກງານສິດທິມະນຸດຂອງສະຫະປະຊາຊາດເປັນເຈົ້າພາບນັ້ນໄດ້ໄຂຂຶ້ນຢູ່ຫໍນານາຊາດທີ່ເປັນສຳນັກງານໃຫຍ່ສະຫະປະຊາຊາດປະຈຳເອີລົບຢູ່ເຊີແນວແຫ່ງປະເທດສວິສໃນວັນທີ20ເມສານີ້.ກອງປະຊຸມມີຈຸດປະສົງເພື່ອຕໍ່ຕ້ານລັດທິຈຳແນກເຊື້ອຊາດຜິວພັນ,ນີ້ແມ່ນກອງປະຊຸມທົ່ວໄປກ່ຽວກັບສິດທິມະນຸດຂອງສະຫະປະຊາຊາດເທົ່ານັ້ນ,ແຕ່ຍ້ອນວ່າໄດ້ກ່ຽວພັນເຖິງຫົວຂໍ້ຂອງອິສຣາແອນແລະທ່ານມາມຸດອາມາດິນເນຈັດ ປະທານາທິບໍດີອີຣານເຂົ້າຮ່ວມກອງປະຊຸມ,ຈິ່ງປົກຄຸມໄປດ້ວຍບັນຍາກາດແຫ່ງຄວາມຂັດແຍ່ງ,ເກີດມີການໂຕ້ຖຽງກັນຢ່າງດຸເດືອດທີ່ສຸດກ່ຽວກັບບັນຫາສິດທິມະນຸດນັບແຕ່ສະພາສິດທິມະນຸດສະຫະປະຊາຊາດສ້າງຕັ້ງຂຶ້ນ3ປີປາຍມານີ້.
100ກວ່າປະເທດໄດ້ສົ່ງຄະນະຜູ່ແທນເຂົ້າຮ່ວມກອງປະຊຸມທີ່ຈະດຳເນີນເປັນເວລາ5ວັນເທື່ອນີ້.ໃນເວລາກ່າວຄຳປາໄສໄຂກອງປະຊຸມ,ທ່ານບານກີມູນ ເລຂາທິການໃຫຍ່ສະຫະປະຊາຊາດໄດ້ສະແດງຄວາມຜິດຫວັງຕໍ່ການຂວ້ຳບາດຕໍ່ກອງປະຊຸມຂອງປະເທດສ່ວນໜ້ອຍເຊັ່ນອາເມລິກາແລະອິສຣາແອນເປັນຕົ້ນ.
ໃນເວລາກ່າວຄຳປາໄສຫຼັງພິທີໄຂງານ, ທ່ານມາມຸດ ອາມາດີ ເນຈັດ ປະທານາທິບໍດີອີຣານໄດ້ກ່າວຄຳປາໄສຕິຕຽນອິສຣາແອນ,ໂດຍກ່າວວ່າປີ1948 ອັນທີ່ສ້າງຕັ້ງຂຶ້ນຢູ່ດິນແດນປາເລັສຕິນທີ່ຖືກຍຶດຄອງແມ່ນອຳນາດການປົກຄອງລັດທິຈຳແນກເຊື້ອຊາດຜິດພັນທີ່ໂຫດຮ້າຍທີ່ສຸດ." ໃນເວລານັ້ນ, ມີຜູ້ປະທ້ວງຫຼາຍຄົນແລ່ນຂຶ້ນໄປເທິງເວທີ, ແລ້ວຖືກຄຸມຕົວອອກຈາກສະຖານທີ່ປະຊຸມ. ພ້ອມກັນນັ້ນ, ຜູ້ແທນຂອງ23ປະເທດສະຫະພາບເອີລົບໄດ້ຍ່າງອອກຈາກຫ້ອງປະຊຸມເພື່ອສະແດງການປະທ້ວງ. ຕອນບ່າຍມື້ດຽວກັນ, ຜູ້ປະທ້ວງຫຼາຍຮ້ອຍຄົນຍັງໄດ້ຈັດການປະທ້ວງຢູ່ສະຖານທີ່ທີ່ທ່ານເນຈັດຈັດງານຖະແຫຼງຂ່າວ, ລະບຽບການຢູ່ແຫ່ງນັ້ນວຸ້ນວາຍແລະເຄັ່ງຕຶງໃນໄລຍະໜຶ່ງ. ຫຼັງຈາກນັ້ນ, ທ່ານບານກີມູນໄດ້ອອກຖະແຫຼງການວ່າ, ກ່ອນການກ່າວຄຳປາໄສ, ທ່ານເຄີຍແລກປ່ຽນຄວາມເຫັນກັບທ່ານເນຈັດແລ້ວ, ແລະເຕືອນໃຫ້ທ່ານເນຈັດເຄົາລົບຄວາມຈິງທາງປະຫວັດສາດ, ບໍ່ຄວນເອົາລັດທິຟື້ນຟູປະເທດຊາວຢິວເທົ່າມາປຽບທຽບກັບລັດທິຈຳແນກເຊື້ອຊາດຜິວພັນ, ແຕ່ທ່ານເຈຈັດບໍ່ເຊື່ອຟັງຄຳເຕືອນດັ່ງກ່າວ.
ການເປັນປໍລະປັກກັນທີ່ເກີດໃນມື້ທຳອິດຂອງກອງປະຊຸມທົບທວນເດີບັນໄດ້ສ້າງປັນຍາກາດເຄັ່ງຕຶງໃຫ້ແກ່ກອງປະຊຸມເທື່ອນີ້,ເຮັດໃຫ້ຫຼາຍຝ່າຍເປັນຫ່ວງເຖິງຜົນສຳເລັດຂອງກອງປະຊຸມ ແລະ ອະນາຄົດຫຼາຍ. ນອກນີ້, ການເປັນປໍລະປັກກັນເທື່ອນີ້ໄດ້ສົ່ງສັນຍານ 2 ອັນຕໍ່ວົງການພາຍນອກ. ຄື ອັນທີໜຶ່ງ, ນັບແຕ່ສະພາຄວາມໝັ້ນຄົງດ້ານສິດທິມະນຸດຂອງສະຫະປະຊາຊາດສ້າງຕັ້ງຂຶ້ນຄົບຮອບ3ປີມານີ້,ທຸກຝ່າຍຫວັງໃຫ້ປະເທດຕ່າງໆໃຊ້ການສົນທະນາທີ່ສະເໝີພາບ,ຫາລືແກ້ໄຂບັນຫາສິດທິມະນຸດ,ບໍ່ເປັນປໍລະປັກຕໍ່ສິດທິມະນຸດ,ເຮັດໃຫ້ພາລະກິດສິດທິມະນຸດເກີດມີສະພາບໃໝ່. ມັນເປັນທີ່ເດັ່ນຊັດແລ້ວວ່າ, "ລະຄອນ"ທີ່ໄດ້ສະແດງຢູ່ພະລາຊະວັງແຫ່ງຊາດ(Palace des Nations)ແຫ່ງນີ້ບອກໃຫ້ຄົນທັງຫຼາຍຮູ້ວ່າ, ການເປັນປໍລະປັກ ແລະ ການສູ້ຢັນກັນໃນຂົງເຂດສິດທິມະນຸດຈະບໍ່ລະງັບງ່າຍໆ ຄືຄົນທັງຫຼາຍຄິດ. ອັນທີ2,ຫຼັງຈາກຂຶ້ນຮັບຕຳແໜ່ງ,ທ່ານບາຣັກ ໂອບາມາ ປະທານາທິບໍດີອາເມລິກາຜູ້ໃໝ່ກ່າວວ່າ ອາເມລິກາຈະປ່ຽນທ່າທີທີ່ບໍ່ປະກອບຄຳເຫັນ ແລະ ບໍ່ເຂົ້າຮ່ວມໃນສະພາມົນຕີສິດທິມະນຸດໃນໄລຍະສອງປີຜ່ານມາ,ແລະຈະເຂົ້າຮ່ວມກິດຈະກຳຂອງສະພາມົນຕີສິດທິມະນຸດດ້ວຍທ່າທີອັນຕັ້ງໜ້າ. ແຕ່ເມື່ອເບິ່ງຈາກການທີ່ອາເມລິກາຂວ້ຳບາດກອງປະຊຸມເທື່ອນີ້ດ້ວຍທຳນອງສຽງ,ຄຳທີ່ແຝງຊ້ອນຢູ່ຂອງທ່ານໂອບາມາແມ່ນ,ປະຖົມປັດໄຈຂອງ"ການເຂົ້າຮ່ວມຢ່າງຕັ້ງໜ້າ"ແມ່ນຍາດແຍ່ງສິດນຳພາໃນວຽກງານສິດທິມະນຸດ.
