ສປປເກົາຫລີທົດລອງນິວເຄຼຍຄັ້ງທີສອງ ປະຊາຄົມໂລກມີປະຕິກິລິຍາຢ່າງຮຸນແຮງ
-----------------------------------------------------------------------------------------------------------------
ວັນທີ 25 ພຶດສະພານີ້,ຂ່າວສານສູນກາງຂອງສາທາລະນະລັດປະຊາຊົນປະຊາທິປະໄຕເກົາຫລີລາຍງານວ່າ, ມື້ດຽວກັນ,ສປປເກົາຫລີໄດ້ທົດລອງອາວຸດນິວເຄຼຍໃຕ້ດິນອີກຄັ້ງຫນຶ່ງ.ນີ້ແມ່ນເທື່ອທີສອງທີ່ສປປເກົາຫລີທົດລອງອາວຸດນິວເຄຼຍຫລັງຈາກເຄີຍໄດ້ທົດລອງເທື່ອຫນຶ່ງແລ້ວໃນວັນທີ 9 ຕຸລາ 2006.ເມື່ອຂ່າວດັ່ງກ່າວເຜີຍແຜ່ໄປອອກ,ປະຊາຄົມໂລກກໍ່ມີປະຕິກິລິຍາຢ່າງຮຸນແຮງ.ການລາຍງານຂອງຂ່າວສານສູນກາງສປປເກົາຫລີກ່າວວ່າ, ເພື່ອຍົກລະດັບຄວາມສາມາດຂອງອາວຸດນິວເຄຼຍແບບປ້ອງກັນຕົວເອງ, ວັນທີ 25 ພຶດສະພານີ້, ສປປເກົາຫລີໄດ້ທົດລອງນິວເຄຼຍໃຕ້ດິນຢ່າງສຳເລັດຜົນອີກເທື່ອຫນຶ່ງ. ຄວາມແຮງລະເບີດແລະເຕັກນິກຂອງການທົດລອງເທື່ອນີ້ໄດ້ຍົກສູງຂຶ້ນຕື່ມ.ຂ່າວສານສູນກາງສປປເກົາຫລີຍັງກ່າວວ່າ,ຜ່ານການທົດລອງເທື່ອນີ້ໄດ້ຍົກສູງດ້ານວິທະຍາສາດເຕັກນິກຕ່າງໆເຊັ່ນກຳລັງທຳລາຍຂອງອາວຸດນິວເຄຼຍແລະອື່ນໆ,ເຊິ່ງຈະປະກອບສ່ວນເຂົ້າໃນການປ້ອງກັນປະເທດສປປເກົາຫລີ,ຮັບປະກັນສັນຕິພາບແລະຄວາມຫມັ້ນທ່ຽງຢູ່ແຫລມເກົາຫລີແລະເຂດອ້ອມແອ້ມ.
ຂ່າວການທົດລອງທັງສອງຄັ້ງນີ້ໄດ້ຖືກປະຊາຄົມໂລກຄັດຄ້ານຢ່າງຮຸນແຮງ, ໂດຍຕອບສະຫນອງການສະເຫນີຂອງຍີ່ປຸ່ນ, ວັນທີ 25 ພຶດສະພານີ້, ສະພາຄວາມຫມັ້ນຄົງສະຫະປະຊາຊາດໄດ້ຈັດກອງປະຊຸມດ່ວນກ່ຽວກັບບັນຫານີ້.ຫລັງກອງປະຊຸມ, ທ່ານຊິວກິນ,ຜູ່ຕາງຫນ້າຖາວອນຂອງຣັດເຊຍປະຈຳສຫະປະຊາຊາດ,ປະທານປະຈຳເດືອນນີ້ຂອງສະພາຄວາມຫມັ້ນຄົງກ່າວວ່າ, 15 ປະເທດຄະນະມົນຕີຂອງສະພາຄວາມຫມັ້ນຄົງເປັນເອກະສັນກັນເຫັນວ່າ, ສປປເກົາຫລີທົດລອງອາວຸດນິວເຄຼຍໄດ້ລະເມີດມະຕິເລກທີ 1718 ຂອງສະພາຄວາມຫມັ້ນຄົງ, ສະນັ້ນສະພາຄວາມຫມັ້ນຄົງໄດ້ຄັດຄ້ານແລະຕິຕຽນຢ່າງຮຸນແຮງ,ແລະຮຽກຮ້ອງສປປເກົາຫລີປະຕິບັດຕາມພັນທະທີ່ກ່ຽວຂ້ອງຢ່າງຮອບດ້ານໂດຍອີງຕາມມະຕິແລະຖະແຫລງການທີ່ກ໋ຽວຂ້ອງຂອງສະພາຄວາມຫມັ້ນຄົງ.ທ່ານກ່າວວ່າ, ສະພາຄວາມຫມັ້ນຄົງຕົກລົງຜ່ານມະຕິສະບັບຫນຶ່ງກ່ຽວກັບເລື່ອງທີ່ສປປເກົາຫລີທົດລອງນິວເຄຼຍ.
ມື້ດຽວກັນ, ທ່ານບານກີມູນ, ເລຂາທິການໃຫຍ່ສະຫະປະຊາຊາດຮຽກຮ້ອງໃຫ້ສປປເກົາຫລີຈົ່ງປະຕິບັດຕາມຄຳຫມັ້ນສັນຍາທີ່ມີຕໍ່ປະຊາຄົມໂລກໃນເມື່ອກ່ອນຢ່າງຮອບດ້ານ.ມື້ດຽວກັນ, ກະຊວງການຕ່າງປະເທດຈີນໄດ້ອອກຖະແຫລງການກ່າວວ່າ, ສປປເກົາຫລີບໍ່ສົນໃຈຕໍ່ການຄັດຄ້ານທົ່ວໄປຂອງປະຊາຄົມໂລກ,ເຮັດການທົດລອງນິວເຄຼຍອີກຄັ້ງຫນຶ່ງ, ລັດຖະບານຈີນຄັດຄ້ານຢ່າງເດັດດ່ຽວຕໍ່ເລື່ອງນີ້.ຈີນຮຽກຮ້ອງຢ່າງເດັດດ່ຽວໃຫ້ສປປເກົາຫລີປະຕິບັດຕາມຄຳຫມັ້ນສັນຍາທີ່ປອດນິວເຄຼຍ,ຢຸດຕິການກະທຳທີ່ອາດຈະເຮັດໃຫ້ສະຖານະການຊຸດໂຊມລົງຕື່ມອີກ, ແລະກັບຄືນສູ່ການເຈລະຈາຫົກຝ່າຍຄືນໃຫມ່.
ທ່ານບາຣັກ ໂອບາມາ, ປະທານາທິບໍດີອາເມລິກາ ອອກຖະແຫຼງການວ່າ, ກ່າວປະນາມເລື່ອງສ.ປ.ປເກົາຫຼີທຳການທົດລອງອາວຸດນິວເຄຼຍໃຕ້ດິນນັ້ນລະເມີດກົດຫມາຍສາກົນ, ແມ່ນການກະທຳທີ່ທ້າທາຍຕໍ່ປະຊາຄົມໂລກຢ່າງບໍ່ຄິດຫາຜົນຮ້າຍຢ້ອນຫຼັງ. ຖະແຫຼງການຂຽນວ່າ, ການກະທຳທ້າທາຍທີ່ສ.ປ.ປເກົາຫຼດຳເນີນການທົດລອງອາວຸດນິວເຄຼຍ ມີແຕ່ຈະເຮັດໃຫ້ປະເທດຕົນຕົກຢູ່ໃນສະພາບການທີ່ໂດດດ່ຽວກວ່າເກົ່າ.
ຕອນທ່ຽງມື້ດຽວກັນ, ທ່ານຫຼີ້ມຽງບັກ, ປະທານາທິບໍດີສ.ເກົາຫຼີ ຮຽກປະຊຸມດ່ວນເພື່ອຮັບປະກັນຄວາມໝັ້ນຄົງແຫ່ງຊາດທີ່ມີລັດຖະມົນຕີທີ່ກ່ຽວ ຂ້ອງເຂົ້າຮ່ວມ. ຫຼັງກອງປະຊຸມ, ໂຄສົກທຳນຽບປະທານາທິບໍດີສ.ເກົາຫຼີອອກຖະແຫຼງການກ່າວວ່າ, ສ.ປ.ປເກົາຫຼີດຳເນີນການທົດລອງອາວຸດນິວເຄຼຍອີກເທື່ອຫນຶ່ງເປັນໄພຂົ່ມຂູ່ອັນຫນັກຫນ່ວງຕໍ່ສັນຕິພາບຂອງ ແຫຼມເກົາຫຼີ, ອາຊີຕາເວັນອອກສຽງເຫນືອກໍ່ຄືທົ່ວໂລກ. ແມ່ນການທ້າທາຍອັນຫນັກຫນ່ວງຕໍ່ລະບົບປອດອາວຸດນິວເຄຼຍສາກົນ, ແມ່ນການກະທຳທ້າທາຍທີ່ອົດກັ້ນບໍ່ໄດ້. ຕອນເຊົ້າມື້ດຽວກັນ, ລັດຖະບານສ.ເກົາຫຼີປະກາດວ່າ, ນອກຈາກເຂດອຸດສາຫະກຳແຄເຊິງແລ້ວ,ຈະຫ້າມບໍ່ໃຫ້ພົນລະເມືອງຂອງສ.ເກົາຫຼີ ໄປຢ້ຽມຢາມສ.ປ.ປເກົາຫຼີ ຊົ່ວຄາວ.
ທ່ານທາໂຣ ອາໂຊະ , ນາຍົກລັດຖະມົນຕີຍີ່ປຸ່ນອອກຖະແຫຼງ ການວ່າ, ກ່າວປະນາມຢ່າງຮຸນແຮງຕໍ່ສ.ປ.ປເກົາຫຼີທີ່ດຳເນີນການທົດລອງນິວເຄຼຍໃນວັນທີ 25 ພຶດສະພານີ້.
ມື້ດຽວກັນ, ກະຊວງການຕ່າງປະເທດຣັດເຊຍກໍ່ອອກຖະແຫຼງການວ່າ, ຮຽກຮ້ອງໃຫ້ສ.ປ.ປເກົາຫຼີໃຊ້ທ່າທີທີ່ຮັບຜີດຊອບໃນດ້ານຕ່າງໆເຊັ່ນ: ປົກປັກຮັກສາຄວາມຫມັ້ນຄົງຂອງພາກພື້ນ, ແລະລະບົບມີອາວຸດລ້າງຜານຂະຫນາດໃຫຍ່ໃນການຄອບຄອງແລະອື່ນໆ.
ທ່ານຈາເວຍ ໂຊຣານາ, ຜູ່ຕາງຫນ້າລະດັບສູງທີ່ຮັບຜິດຊອບນະໂຍ ບາຍການຕ່າງປະເທດແລະຄວາມຫມັ້ນຄົງຂອງສະຫະພາບເອີລົບກ່າວປະນາມວ່າ , ການກະທຳຂອງສ.ປ.ປເກົາຫຼີເທື່ອນີ້ແມ່ນການກະທຳທີ່ລະເມີດມະຕິເລກທີ 1718 ຂອງສະພາຄວາມຫມັ້ນຄົງສະຫະປະຊາຊາດຢ່າງ ບັງອາດ , ສະຫະພາບເອີລົບຈະສືບຕໍ່ຫາລືມາດຕະການທີ່ກ່ຽວຂ້ອງກັບປະເທດຄູ່ຮ່ວມມືອື່ນໆ.
ນອກນີ້,ລັດຖະບານຂອງປະເທດຕ່າງໆເຊັ່ນ:ອັງກິດ,ຝຣັ່ງ,ເຢຍລະມັນ, ຫວຽດນາມ,ສິງກະໂປແລະປະເທດອື່ນໆ ກໍ່ໄດ້ສະແດງຄວາມເປັນຫ່ວງທີ່ສ.ປ.ປເກົາຫຼີ ດຳເນີນການທົດລອງອາວຸດນິວເຄຼຍ, ພ້ອມທັງກ່າວປະນາມ.
