ອາຊຽນແລະສະຫະພາບເອີລົບເພີ່ມທະວີການຮ່ວມມືລະຫວ່າງພາກພື້ນ
-----------------------------------------------------------------------------------------------------------------
ວິທະຍຸສາກົນແຫ່ງປະເທດຈີນລາຍງານວ່າ: ວັນທີ 28 ພຶດສະພານີ້, ກອງປະຊຸມລະດັບລັດຖະມົນຕີອາຊຽນ-ສະຫະພາບເອີລົບຄັ້ງທີ 17 ໄດ້ຈັດຂຶ້ນຢູ່ພະນົມເປັນ, ນະຄອນຫຼວງຂອງກຳປູເຈຍ. ອາຊຽນກັບສະຫະພາບເອີລົບໄດ້ເຊັນຖະແຫຼງການໃນກອງປະຊຸມເທື່ອນີ້, ສະຫະພາບເອີລົບຈະເຂົ້າຮ່ວມ"ສົນທິສັນຍາມິດຕະພາບຮ່ວມມືອາຊີຕາເວັນອອກສຽງໃຕ້". ເພີ່ມທະວີການຮ່ວມມືລະຫວ່າງພາກພື້ນກັບອາຊຽນຕື່ມອີກ. ຕໍ່ໄປເຊີນຟັງລາຍງານອັດສຽງຂອງນັກຂ່າວCRI.
ຫົວຂໍ້ຕົ້ນຕໍຂອງກອງປະຊຸມລະດັບລັດຖະມົນຕີອາຊຽນ-ສະຫະພາບເອີລົບເທືອ່ນີ້ແມ່ນ"ອາຊຽນ-ສະຫະພາບເອີລົບຊຸກຍູ້ສັນຕິພາບ, ເສດຖະກິດເຕີບໂຕແລະຂະຫຍາຍການພົວພັນໝູ່ຄູ່". ຜູ້ຕາງໜ້າຂອງ27ປະເທດສະມາຊິກສະຫະພາບເອີລົບ, 10ປະເທດສະມາຊິກອາຊຽນ, ຄະນະກຳມະການເອີລົບແລະສຳນັກງານເລຂາທິການອາຊຽນໄດ້ເຂົ້າຮ່ວມກອງປະຊຸມເທື່ອນີ້.
ໃນເວລາກອງປະຊຸມສິ້ນສຸດລົງ, ທ່ານຈັນ ໂກຮຸດ, ລັດຖະມົນຕີວ່າການກະຊວງການຕ່າງປະເທດເຊັກເຊິ່ງເປັນປະເທດປະທານໝູນວຽນຂອງສະຫະພາບເອີລົບໄດ້ລົງນາມ"ຖະແຫຼງການກ່ຽວກັບສະຫະພາບເອີລົບແລະຄະນະກຳມະການເອີລົບເຂົ້າຮ່ວມສົນທິສັນຍາມິດຕະພາບຮ່ວມມືອາຊີຕາເວັນອອກສຽງໃຕ້. ທ່ານກາຊິດ ພິລົມ ລັດຖະມົນຕີການຕາງປະເທດໄທ ປະເທດປະທານໝູນວຽນຂອງອາຊຽນຕາງໜາປະເທດສະມາຊິກອາຊຽນລົງນາມໃນຖະແຫຼງການກ່ຽວກັບອາຊຽນເຫັນດີສະຫະພາບເອີລົບແລະຄະນະກຳມະການເອີລົບເຂົ້າຮ່ວມສົນທິສັນຍາມິດຕະພາບຮ່ວມມືອາຊີຕາເວັນອອກສຽງໃຕ້. ການກະທຳດັ່ງກ່າວສະແດງໃຫ້ເຫັນວ່າ, ສະຫະພາບເອີລົບຈະເລີ່ມດຳເນີນຂະບວນການ ເຂົ້າຮ່ວມ"ສົນທິສັນຍາມິດຕະພາບຮ່ວມມືອາຊີຕາເວັນອອກສຽງໃຕ້"
ໃນຖານະເປັນອົງການພາກພື້ນທີ່ມີລັກສະນະເປີດປະຕູ, ອາຊຽນມີທ່າທີຕັ້ງໜ້າຕໍ່ການເພີ່ມຄູ່ຮ່ວມມືສົນທະນາໃໝ່. ວັນທີ 28 ພຶດສະພານີ້, ທ່ານຮຸນແຊນ, ນາຍົກລັດຖະ ມົນຕີກຳປູເຈຍກ່າວວ່າ, ຫວັງໃຫ້ຂະບວນການສະຫະພາບເອີລົບເຂົ້າຮ່ວມ"ສົນທິສັນຍາ ມິດຕະພາບຮ່ວມມືອາຊີຕາເວັນອອກສຽງໃຕ້"ຈະເລັ່ງໄວຕື່ມອີກ. ທ່ານກ່າວວ່າ:
"ການເຊັນຖະແຫຼງການສະແດງໃຫ້ເຫັນວ່າການພົວພັນລະຫວ່າງອາຊຽນກັບສະຫະພາບເອີລົບໄດ້ຮັບຄວາມຄືບໜ້າຢ່າງເດັ່ນຊັດ. ຄືດັ່ງຄົນທັງຫຼາຍຮັບຮູ້ນັ້ນວ່າ, ສະຫະພາບເອີລົບແລະຄະນະກຳມະການເອີລົບເຂົ້າຮ່ວມ"ສົນທິສັນຍາມິດຕະພາບຮ໋ວມມືອາຊີຕາເວັນອອກສຽງໃຕ້"ຈະຊຸກຍູ້ສັນຕິພາບ, ຄວາມໝັ້ນຄົງແລະສະຖຽນລະພາບຂອງອາຊີຕາເວັນອອກກໍຄືເຂດກວ້າງຂວາງກວ່າຢ່າງແນ່ນອນ. ຍ້ອນວ່າສະຫະພາບເອີລົບມີຖານະສຳຄັນໃນວຽກງານສາກົນແລະການພົວພັນລະຫວ່າງອາຊຽນກັບສະຫະພາບເອີລົບມີລັກສະນະສຳຄັນ, ຂ້າພະເຈົ້າເຫັນວ່າພວກເຮົາຄວນສືບຕໍ່ເລັ່ງລັດຂະບວນການທີ່ສະຫະພາບເອີລົບເຂົ້າຮ່ວມ"ສົນທິສັນຍາມິດຕະພາບຮ່ວມມືອາຊີຕາເວັນອອກສຽງໃຕ້", ຂະບວນດັ່ງກ່າວອາດຈະສຳເລັດພາຍໃນປີນີ້, ເພື່ອຮັກສາພະລັງແມ່ແຮງ, ຄວາມສົນໃຈແລະຄວາມປາດຖະໜາດ້ານການເມືອງຂອງສອງຝ່າຍຕໍ່ເລື່ອງນີ້."
ໃນເວລາເພີ່ມທະວີການຮ່ວມມືລະຫວ່າງພາກພື້ນຢ່າງບໍ່ຢຸດຢັ້ງ, ອາຊຽນກັບສະຫະພາບເອີລົບກໍປະເຊີນກັບການທ້າທາຍຮ່ວມເຊັ່ນວິກິດການການເງິນສາກົນ. ຕໍ່ເລື່ອງນີ້, ກອງປະຊຸມລະດັບລັດຖະມົນຕີອາຊຽນ-ສະຫະພາບເອີລົບເທື່ອນີ້ເຫັນວ່າ, ການຮ່ວມມືແລະການປັບປຸງລະຫວ່າງພາກພື້ນແມ່ນວິທີດີທີ່ສຸດຂອງການຮັບມືກັບການທ້າທາຍຮ່ວມ, ສະນັ້ນ, ກອງປະຊຸມໄດ້ສ້າງ"ວາລະປະຊຸມພະນົມເປັນ"ກ່ຽວກັບດຳເນີນງານຂອງອາຊຽນ-ສະຫະພາບເອີລົບໃນປີ 2009 ຫາປີ 2010. ຕາມ"ວາລະປະຊຸມພະນົມເປັນ", ສະຫະພາບເອີລົບແລະອາຊຽນຈະເພີ່ມທະວີການຮ່ວມມືໃນຂົງເຂດການເມືອງແລະຄວາມໝັ້ນຄົງ, ເສດຖະກິດການຄ້າແລະວັດທະນະທຳສັງຄົມເປັນຕົ້ນ, ເພື່ອສະໜັບສະໜູນອາຊຽນເຊື່ອມໂຍງເຂົ້າກັນແລະກໍ່ສ້າງປະຊາຄົມອາຊຽນ, ເຮັດໃຫ້ການພົວພັນສົນທະນາລະຫວ່າງອາຊຽນກັບສະຫະພາບເອີລົບລົງສູ່ລວງເລິກ. ທ່ານໂກຮຸດ, ລັດຖະມົນຕີວ່າການກະຊວງການຕ່າງປະເທດເຊັກເຊິ່ງເປັນປະເທດປະທານໝູນວຽນຂອງສະຫະພາບເອີລົບກ່າວວ່າ:
"ນີ້ແມ່ນກອງປະຊຸມເທື່ອໜຶ່ງທີ່ມີຄວາມໝາຍແລະມີຄວາມສຳຄັນຫຼາຍ, ຂ້າພະເຈົ້າດີໃຈຫຼາຍຍ້ອນວ່າມັນໄດ້ແຕ້ມພາບອະນາຄົດອັນຈະແຈ້ງໃຫ້ແກ່ການເຄື່ອນໄຫວຂອງພວກເຮົາ."
