ຫມາກຜົນທີ່ກອງປະຊຸມສຸດຍອດວິສາມັນລະຫວ່າງສ.ເກົາຫລີກັບອາຊຽນໄດ້ຮັບຈະເຮັດໃຫ້ການພົວພັນຮ່ວມມືກັນລະຫວ່າງສອງຝ່າຍຍົກສູງຂຶ້ນຢ່າງຮອບດ້ານ
(GMT+08:00) 2009-06-03 15:28:43 cri
-----------------------------------------------------------------------------------------------------------------
-----------------------------------------------------------------------------------------------------------------
ຕາມຂ່າວ cri:ວັນທີ 2 ມິຖຸນານີ້, ກອງປະຊຸມສຸດຍອດວິສາມັນລະຫວ່າງສ.ເກົາຫລີກັບອາຊຽນທີ່ດຳເນີນເປັນເວລາສອງວັນຢູ່ເກາະເຈຈູຂອງສ.ເກົາຫລີນັ້ນໄດ້ອັດລົງພາຍຫລັງອອກຖະແຫລງການຮ່ວມ.ປະມຸກລັດຂອງສ.ເກົາຫລີແລະ 10 ປະເທດສະມາຊິກອາຊຽນເປັນເອກະສັນກັນກ່າວວ່າ, ຈະເພີ່ມທະວີການຮ່ວມມືໃນຂົງເຂດການເມືອງ,ຄວາມປອດໄພ,ການພັດທະນາເສດຖະກິດແລະການແລກປ່ຽນດ້ານວັດທະນະທຳສັງຄົມ.ຫາງສຽງທົ່ວໄປ ເຫັນວ່າ, ກອງປະຊຸມສຸດຍອດເທື່ອນີ້ໄດ້ອຳນວຍໂອກາດໃຫມ່ໃຫ້ແກ່ການຍົກລະດັບການພົວພັນຮ່ວມມືກັນລະຫວ່າງສອງຝ່າຍໃຫ້ສູງຂຶ້ນ.
ຕັ້ງແຕ່ສ.ເກົາຫລີກັບອາຊຽນສ້າງການພົວພັນເປັນປະເທດຄູ່ເຈລະຈາໃນປີ 1989 ເປັນຕົ້ນມາ, ການພົວພັນລະຫວ່າງສອງຝ່າຍໄດ້ຂະຫຍາຍຕົວຢ່າງວ່ອງໄວ, ອາຊຽນໄດ້ກາຍເປັນຄູ່ການຄ້າໃຫຍ່ອັນດັບສາມແລະເຂດລົງທຶນຢູ່ຕ່າງປະເທດທີ່ໃຫຍ່ອັນດັບສອງຂອງນສ.ເກົາຫລີ.ກອງປະຊຸມສຸດຍອດເທື່ອນີ້ແມ່ນຈັດຂຶ້ນໃນໂອກາດທີ່ສອງຝ່າຍສ້າງຕັ້ງການພົວພັນຄູ່ເຈລະ ຈາກັນຄົບຮອບ 20 ປີ, ແມ່ນມີຄວາມຫມາຍປະຫວັດສາດພິເສດ.
ໃນໄລຍະກອງປະຊຸມ, ສອງຝ່າຍໄດ້ເປັນເອກະສັນກັນຢືນຢັນຫມາກຜົນທີ່ໄດ້ຮັບໃນການຮ່ວມມືທີ່ຕ່າງຝ່າຍຕ່າງມີຜົນປູະໂຫຍດໃນ 20 ປີທີ່ຜ່ານມາ,ສອງຝ່າຍໄດ້ປຶກສາຫາລືດ້ວຍຫລາຍຮູບແບບກ່ຽວກັບແຜນການຮ່ວມມືໃນຂົງເຂດການເມືອງ,ເສດຖະກິດແລະວັດທະນະທຳສັງຄົມ,ໄດ້ສ້າງພື້ນຖານອັນສຳຄັນໃຫ້ແກ່ສອງຝ່າຍເພີ່ມທະວີການຮ່ວມມືຮອບດ້ານຕື່ມອີກ.
ອັນທີຫນຶ່ງ,ສອງຝ່າຍໄດ້ເຊັນສັນຍາການລົງທຶນ,ເລີ່ມປະຕິບັດກົນໄກຮ່ວມມືເສດຖະກິດຢ່າງຮອບດ້ານ.ສ.ເກົາຫລີກັບອາຊຽນເລີ່ມເຈລະຈາກ່ຽວກັບການເຊັນສັນຍາການຄ້າເສລີໃນເດືອນກຸມພາປີ 2005.ສັນຍາການລົງທຶນທີ່ເຊັນກັນໃນກອງປະຊຸມເທື່ອນີ້ເປັນຂີດຫມາຍສະແດງໃຫ້ເຫັນວ່າສອງຝ່າຍໄດ້ສຳເລັດການເຈລະຈາທີ່ແກ່ຍາວມາເປັນເວລາ 4 ປີປາຍ,ແລ້ວເຊັນສັນຍາການຄ້າເສລີລະຫວ່າງສອງຝ່າຍໃນທີ່ສຸດ,ຫລັງຈາກນີ້ໄປ,ສອງຝ່າຍຈະຂະຫຍາຍຕົວເປັນປະຊາຄົມການຄ້າທີ່ເປັນຮູບປະທຳກວ່າເກົ່າ.ກະຊວງການຕ່າງປະເທດສ.ເກົາຫລີເຜີຍວ່າ, ສ.ເກົາຫລີມີແຜນການປະຕິບັດການປອດພາສີຕໍ່ສິນຄ້າ 80%ຂອງ 6 ປະເທດສະມາຊິກອາຊຽນຄື: ມາເລເຊຍ,ອິນໂດເນເຊຍ,ໄທ,ຟິລິບປິນ,ສິງກະໂປແລະບຼູໄນກ່ອນປີ 2012,ແລະຈະປະຕິບັດການປອດພາສີຕໍ່ສິນຄ້າ 90% ຂອງທັງຫມົດປະເທດສະມາຊິກອາຊຽນກ່ອນປີ 2020.
ອັນທີສອງ,ສອງຝ່າຍໄດ້ປະສານຫລັກຫມັ້ນຕໍ່ສປປເກົາຫລີ,ໄດ້ຢືນຢັນຄວາມປາຖະຫນາທີ່ເພີ່ມທະວີການຮ່ວມມືດ້ານການທູດ.ຕອນບ່າຍວັນທີ 2 ມິຖຸນານີ້, ປະມຸກລັດຕ່າງໆທີ່ຮ່ວມປະຊຸມໄດ້ເຊັນຖະແຫລງຮ່ວມກ່ຽວກັບສປປເກົາຫລີທົດລອງນິວເຄຼຍ,ໂດຍກ່າວວ່າ, ສປປເກົາຫລີທົດລອງນິວເຄຼຍແລະຍິງລູກສອນໄຟນຳວິຖີໄດ້ລະເມີດສັນຍາຂອງການເຈລະຈາຫົກຝ່າຍແລະມະຕິຂອງສະພາຄວາມຫມັ້ນຄົງສະຫະປະຊາຊາດ.ຖະແຫລງການຍັງກ່າວວ່າ, ຄວນແກ້ໄຂບັນຫານິວເຄຼຍແຫລມເກົາຫລີດ້ວຍສັນຕິວິທີ,ເພື່ອບັນລຸໃຫ້ແຫລມເກົາຫລີປອດນິວເຄຼຍ, ຮັກສາສັນຕິພາບແລະສະຖຽນລະພາບຂອງພາກພື້ນອາຊີປາຊິກຟິກ.ຖະແຫລງການຍັງສະຫນັບສະຫນູນຢ່າງແຂງແຮງໃຫ້ຟື້ນຟູການເຈລະຈາຫົກຝ່າຍຄືນໃຫມ່.ນີ້ສະແດງໃຫ້ເຫັນຄວາມຕັດສິນໃຈຂອງປະເທດຕ່າງໆຂອງອາຊຽນກັບສ.ເກົາຫລີທີ່ເປັນເອກະພາບກັນໃນບັນຫານິວເຄຼຍແຫລມເກົາຫລີ,ແລະເພີ່ມທະວີການຮ່ວມມືກັນຕື່ມອີກ.
ນອກນີ້,ສອງຝ່າຍຍັງໄດ້ລົງເລິກບັນຫາວິກິດການການເງິນສາກົນ, ຄວາມປອດໄພດ້ານອາຫານແລະພະລັງງານພ້ອມດ້ວຍການປ່ຽນແປງຂອງດິນຟ້າອາກາດແລະບັນຫາທົ່ວໂລກຕ່າງໆ,ແລະໄດ້ມີຄວາມເຫັນເປັນເອກະພາບກັນຫລາຍບັນຫາ.
ທ່ານລີມຽງບັກ,ປະທານາທິບສ.ເກົາຫລີກ່າວໃນກອງປະຊຸມຂ່າວຫລັງກອງປະຊຸມວ່າ,ຜ່ານຈາກກອງປະຊຸມເທື່ອນີ້,ສ.ເກົາຫລີກັບອາຊຽນໄດ້ກາຍເປັນເພື່ອນບ້ານໃກ້ຄຽງທີ່ເຂົ້າໃຈກັນແລະເປັນເພື່ອນມິດທີ່ພ້ອມກັນສະແຫວງຫາການພັດທະນາ.ທ່ານອະພິສິດ ເວດຊາຊີວະ,ນາຍົກລັດຖະມົນຕີໄທທີ່ເປັນປະເທດປະທານຫມູນວຽນຂອງອາຊຽນກໍ່ກ່າວວ່າ, ຫວັງໃຫ້ສ.ເກົາຫລີແລະອາຊຽນຖືສັນຍາການຄ້າເສລີເປັນພື້ນຖານ,ດຳເນີນການຮ່ວມມືດ້ານເສດຖະກິດທີ່ດີກວ່າເກົ່າ.ສື່ມວນຊົນສ.ເກົາຫລີກ່າວວ່າ, ກອງປະຊຸມສຸດຍອດເທື່ອນີ້ແມ່ນກອງປະຊຸມສຳຄັນຄັ້ງທຳອິດທີ່ຈັດຂຶ້ນຢູ່ພາຍໃນປະເທດສ.ເກົາຫລີພາຍຫລັງທ່ານລີມຽງບັກເປັນປະທານາທິບໍດີ,ເຊິ່ງຈະຊຸກຍູ້ການພົວພັນຮ່ວມມືກັນລະຫວ່າງສ.ເກົາຫລີກັບອາຊຽນຂຶ້ນສູ່ລະດັບໃຫມ່.
ຂ່າວ-ບົດທີ່ກ່ຽວຂ້ອງ
ຄຳເຫັນ
