ທ່ານໂອບາມາສະແຫວງຫາການເລີ່ມຕົ້ນການພົວພັນໃໝ່ລະຫ່ວາງອາເມລິກາກັບໂລກອິສຣາມ
-----------------------------------------------------------------------------------------------------------------
ຕາມຂ່າວCRI: ວັນທີ 4 ມິຖຸນານີ້, ທ່ານບາຣັກ ໂອບາມາ, ປະທານາທິບໍດີອາເມລິກາທີ່ໄປຢ້ຽມຢາມເອຢິບໄດ້ກ່າວປາຖະກະຖາຕໍ່ໂລກອິສລາມຢູ່ມະຫາວິທະຍາໄລເລີແກ, ຮຽກຮ້ອງໃຫ້ສິ້ນສຸດ"ການລະແວງສົງໄສແລະຂັດແຍ່ງກັນ"ທີ່ມີມາໄລຍະຍາວນານລະຫວ່າງອາເມລິກາກັບໂລກອິສຣາມ, ພວມສະແຫວງຫາການເລີ່ມຕົ້ນໃໝ່ຂອງການພົວພັນລະຫວ່າງສອງຝ່າຍບົນພື້ນຖານຜົນປະໂຫຍດຮ່ວມແລະຄວາມເຄົາລົບນັບຖືເຊິ່ງກັນແລະກັນ.
ໃນເວລາກ່າວປາຖະກະຖາ, ທ່ານໂອບາມາກ່າວວ່າ, ທ່ານຈະເອົການລົບລ້າງຄວາມເຫັນທີ່ລຳອຽງຂອງອາເມລິກາທີ່ມີຕໍ່ປະເທດອິສຣາມເປັນໜ້າທີ່ຂອງຕົນ, ພ້ອມກັນນັ້ນກໍຫວັງໃຫ້ປະເທດອິສຣາມລົບລ້າງຄວາມເຂົ້າໃຈຜິດຕໍ່ອາເມລິກາ. ທ່ານຮຽກຮ້ອງໃຫ້ສອງຝ່າຍຈົ່ງມີຄວາມຈິງໃຈຕໍ່ກັນ, ຟັງຄວາມເຫັນເຊິ່ງກັນແລະກັນແລະຮ່ຳຮຽນນຳກັນ, ເຄົາລົບນັບຖືກັນແລະຊອກຫາຈຸດທີ່ຄືກັນ.
ຫາງສຽງທົ່ວໄປເຫັນວ່າ, ກ່ອນລັດຖະບານໂອບາມາຂຶ້ນຄອງອຳນາດ, ການພົວພັນອາເມລິກາກັບໂລກມຸສລິມ ບໍ່ດີຕະຫຼອດມາ. ຫຼັງຈາກທ່ານ ໂອບາມາ ຂຶ້ນເປັນປະທານາທິບໍດີແລ້ວ, ກໍ່ສະແດງທ່າທີທີ່ອ່ອນໂຍນຫຼາຍເທື່ອໃນການຈະປັບປຸງການພົວພັນລະຫວ່າງອາເມລິກາກັບໂລກມຸສລິມ. ວັນທີ 6 ເມສາປີນີ້, ໃນເວລາທີ່ທ່ານໂອບາມາໄປຢ້ຽມຢາມຕວກກີ, ທ່ານໄດ້ ກ່າວປາຖະກະຖາຢູ່ສະພາແຫ່ງຊາດຕວກກີວ່າ, ໃນຫຼາຍປີຜ່ານມາ, ລະຫວ່າງປະເທດມຸສລິມກັບອາເມລິກາໄດ້ເກີດຄວາມລະແວງສົງໃສກັນ, ແຕ່ທ່ານກ່າວຢ້ຳວ່າ,ອາເມລິກາ ຈະບໍ່ເຮັດສົງຄາມກັບປະເທດມຸສລິມຈັກເທື່ອ . ເດືອນມີນາປີນີ້, ໃນໂອກາດປີໃຫມ່ຂອງອີຣານ, ທ່ານໂອບາມາໄດ້ຜ່ານວິດີໂອສົ່ງຈົດຫມາຍໄປຍັງຜູ່ນຳແລະປະຊາຊົນຂອງອີຣານ, ຫວັງຢາກໃຫ້ສອງຝ່າຍຕ່າງໂຄລົບກັນແລະບໍ່ຂົ່ມຂູ່ເຊິ່ງກັນແລະກັນ, ເພື່ອເຮັດໃຫ້ການພົວພັນລະຫວ່າງສອງປະເທດເປີດຫນ້າປະຫວັດສາດໃຫມ່.
ນັກວິເຄາະເຫັນວ່າ,ທ່ານໂອບາມາສະແດງຄວາມເປັນມິດຕໍ່ໂລກອິສລາມ,ແມ່ນການສ່ອງແສງໃຫ້ເຫັນທິດທາງການຕ່າງປະເທດຂອງລັດຖະບານອາເມລິກາຊຸດປະຈຸບັນທີ່ຖືແນວຄິດ"ໃຊ້ຄວາມສະຫຼາດ"ເປັນທິດນຳ.ນະໂຍບາຍການຕ່າງປະເທດທີ່"ໃຊ້ຄວາມສະຫຼາດ"ທີ່ລັດຖະບານໂອບາມາປະຕິບັດນັ້ນຖືການ"ຮັບຟັງ", "ປຶກສາຫາລື"ແລະ"ຕິດຕໍ່ພົວພັນ"ເປັນພື້ນຖານ,ອີງໃສ່ສະພາບຕົວຈິງແລະຄວາມຄ່ອງແຄ້ວ,ເລັງໃສ່ການປັບປຸງພາບພົດຂອງອາເມລິກາໃນໂລກທີ່ໄດ້ຖືກທຳລາຍມາຫຼາຍແລ້ວ,ຈຸດປະສົງແມ່ນເພື່ອສ້າງສະພາບແວດລ້ອມພາຍນອກອັນດີເພື່ອຮັກສາບົດບາດນຳພາຂອງອາເມລິກາໃນທົ່ວໂລກ.ນັກວິເຄາະກໍ່ຊີ້ອອກວ່າ,ການພົວພັນລະຫວ່າງອາເມລິກາກັບໂລກອິດລາມແມ່ນບັນຫາທີ່ ສັບສົນຫຼາຍ,ແລະກໍ່ແມ່ນໝາກຜົນຂອງຄວາມຂັດແຍ່ງກັນທີ່ສະສົມມາຫຼາຍປີ.ລັດຖະບານໂອບາມາໃຊ້ທ່າທີອັນຕັ້ງໜ້າເພື່ອສະແຫວງຫາຄວາມປອງດອງກັນນັ້ນມີຜົນດີຕໍ່ການຜ່ອນຄາຍຄວາມຂັດແຍ່ງກັນລະຫວ່າງສອງຝ່າຍ,ແຕ່ປະຈຸບັນນີ້,ພຽງແຕ່ອາໄສທ່າທີອ່ອນໂຍນຂອງທ່ານໂອບາມາກໍ່ສະຫຼຸບວ່າການພົວພັນສອງຝ່າຍຈະດີຂຶ້ນຢ່າງຫຼວງຫຼາຍ ນັ້ນຍັງບໍ່ຮອດເວລາເທື່ອ.
