ຜູ່ນຳສີ່ປະເທດບຣິກພົບປະກັນຢ່າງເປັນທາງການຄັ້ງທຳອິດ
-----------------------------------------------------------------------------------------------------------------
ວັນທີ 16 ມິຖຸນານີ້,ການພົບປະກັນຢ່າງເປັນທາງການຄັ້ງທຳອິດຂອງຜູ່ນຳສີ່ປະເທດບຣິກໄດ້ຈັດຂຶ້ນຢູ່ເຢຄາເຕີແຣັງບວກຂອງຣັດເຊຍ.ໃນສະພາບທີ່ວິກິດການການເງິນທົ່ວໂລກພວມແຜ່ລາມອອກແລະນັບມື້ນັບຮຸນແຮງຂຶ້ນ, ຈີນ,ຣັດເຊຍ,ເບຼຊິນແລະອິນເດຍໃນຖານະເປັນປະເທດທີ່ເປັນຕະຫລາດຈະເລີນໃຫມ່ນັ້ນໄດ້ກ້າວເຖິງຂັ້ນມີຄວາມຮັບຮູ້ເປັນເອກະສັນກັນກ່ຽວກັບການເພີ່ມທະວີການຮ່ວມມື,ຮັບມືກັບການກະທົບຂອງວິກິດການການເງິນສາກົນແລະຮ່ວມກັນຊຸກຍູ້ໃຫ້ເສດຖະກິດໂລກຟື້ນຕົວຄືນໃຫມ່.
ໃນຖະແຫລງການຮ່ວມທີ່ເຜີຍແຜ່ຫລັງກອງປະຊຸມ,ສີ່ປະເທດດັ່ງ ກ່າວໄດ້ຮຽກຮ້ອງໃຫ້ຝ່າຍຕ່າງໆຈົ່ງຜັນຂະຫຍາຍຄວາມຮັບຮູ້ທີ່ເປັນເອກະສັນກັນທີ່ບັນລຸໃນກອງປະຊຸມສຸດຍອດການເງິນລອນດອນຂອງກຸ່ມ G20 ໃນເດືອນເມສາປີນີ້,ແລະໃຫ້ຄຳຫມັ້ນສັນຍາວ່າຈະດຳເນີນການຮ່ວມມືຢ່າງແຫນ້ນແຟ້ນເພື່ອຜັນຂະຫຍາຍຄວາມຮັບຮູ້ດັ່ງກ່າວ.ກ່ຽວກັບບັນຫາປະຕິຮູບໂຄງປະກອບການເງິນສາກົນທີ່ຝ່າຍຕ່າງໆສົນໃຈໃນປັດຈຸບັນ,ສີ່ປະເທດໄດ້ສະເຫນີອອກວ່າຄວນເພີ່ມສິດປະກອບຄຳຄິດຄຳເຫັນແລະສິດການເປັນຕົວແທນຂອງຕະຫລາດທີ່ຈະເລີນໃຫມ່ແລະປະເທດທີ່ພວມພັດ ທະນາໃນອົງການການເງິນສາກົນ.ແລະກ່າວເນັ້ນວ່າຄວນສ້າງລະບົບເງິນຕາ ສາກົນທີ່ຫມັ້ນທ່ຽງ,ສາມາດຄາດຄະເນໄດ້ແລະມີຫລາຍເຄົ້າ. ໃນຖະ ແຫລງການ,ສີ່ປະເທດຍັງຮຽກຮ້ອງໃຫ້ສະກັດກັ້ນລັດທິປົກປ້ອງການ ຄ້າ.
ທ່ານຫູຈີນທ່າວ, ປະທານປະເທດຈີນສະເໜີວ່າ, ສີ່ປະເທດຄວນນຳໃຊ້ກົນໄກທີ່ມີໃນປັດຈຸບັນໃຫ້ດີກວ່ານີ້, ເພີ່ມຄວາມໄວ້ເນື້ອເຊື່ອໃຈກັນດ້ານການເມືອງໂດຍຜ່ານການສົນທະນາແລະການແລກປ່ຽນ. ທ່ານກ່າວເນັ້ນວ່າ, ສີ່ປະເທດຍັງຄວນເຄົາລົບເສັ້ນທາງພັດທະນາທີ່ປະເທດອື່ນເລືອກ, ແລກປ່ຽນບົດຮຽນການພັດທະນາເຊິ່ງກັນແລະກັນ, ຖອດຖອນບົດຮຽນຮູບການພັດທະນານຳກັນ, ແບ່ງປັນບົດຮຽນກັບປະເທດທີ່ພວມພັດທະນາອື່ນໆບົນພື້ນຖານທີ່ສະໝັກໃຈ.
ໃນເວລາກ່າວຄຳປາໄສ, ທ່ານຫູຈີນທ່າວໄດ້ມີຂໍ້ສະເໜີກ່ຽວກັບວ່າສີ່ປະເທດຈະເຮັດແນວໃດເພື່ອພະຍາຍາມຮັບມືກັບວິກິດການການເງິນສາກົນແລະ, ຊຸກຍູ້ການຟື້ນຟູເສດຖະກິດໂລກ. ທ່ານສະເໜີວ່າ, ກ່ອນອື່ນໝົດ, ສີ່ປະເທດຄວນພະຍາຍາມນຳໜ້າຟື້ນຟູເສດຖະກິດຄືນໃໝ່ຈາກວິກິດການການເງິນສາກົນ, ອັນທີສອງ, ສຸມກຳລັງເພື່ອຊຸກຍູ້ການປະຕິຮູບລະບົບການເງິນສາກົນ. ອັນທີສາມ, ສຸມກຳລັງປະຕິບັດເປົ້າໝາຍພັດທະນາສະຫັດສະວັດຂອງສະຫະປະຊາຊາດ. ສີ່ປະເທດຄວນສືບຕໍ່ຮຽກຮ້ອງໃຫ້ປະຊາຄົມໂລກເອົາໃຈໃສ່ນຳຜົນກະທົບຂອງວິກິດການການເງິນສາກົນຕໍ່ປະເທດທີ່ພວມພັດທະນາໂດຍສະເພາະແມ່ນປະເທດດ້ອຍພັດທະນາ. ອັນທີສີ່, ຄວນມີສາຍຕາກວ້າງໄກໃນການວາງແຜນເປັນເອກະພາບ, ແລະແກ້ໄຂບັນຫາພົ້ນເດັ່ນອື່ນໆທີ່ມີຜົນກະທົບຕໍ່ການພັດທະນານັ້ນຢ່າງເໝາະສົມ.
ໃນການປະກອບຄຳເຫັນຕໍ່ກອງປະຊຸມເທື່ອນີ້, ທ່ານດີມີຕຼີ ເມັດເວເດັຟ, ປະທານາທິບໍດີຣັດເຊຍກ່າວວ່າ, 4 ປະເທດບຣິກທີ່ມີກຳລັງແຮງທາງເສດຖະກິດອັນ ໃຫຍ່ຫຼວງ ຄວນເພີ່ມທະວີການປະສານງານກັນ, ປັບປຸງໃຫ້ລະບົບການເງິນສາກົນໃຫ້ສົມບູນຂຶ້ນ, ເພີ່ມທະວີການຮ່ວມມືຫຼາຍຝ່າຍແລະສອງຝ່າຍ,ຮ່ວມກັນຮັບມືແກ້ໄຂບັນຫາຄວາມປອດໄພດ້ານພະລັງງານ, ດ້ານອາຫານແລະການປ່ຽນແປງຂອງດິນຟ້າອາກາດເປັນຕົ້ນ. ທ່ານລູອິສ ອີນາຊີໂອ ລູລາ ດາຊິນວາ,ປະທານາທິບໍດີເບຼຊິນ ຊີ້ອອກວ່າ, ວິກິດການການເງິນສາກົນໄດ້ເຮັດໃຫ້ປະຊາຄົມໂລກ ຮັບຮູ້ຄວາມສຳຄັນຂອງປະເທດຕະຫຼາດຈະເລີນໃຫມ່, ການຮ່ວມມືລະຫວ່າງ 4 ປະເທດບຣິກ ມີຊ່ອງທາງພັດທະນາອັນມະຫາສານ. ທ່ານມານໂມຮັນ ຊິງ, ນາຍົກລັດຖະມົນຕີອິນເດຍ ກ່າວວ່າ, 4 ປະເທດຄວນຄັດຄ້ານລັດທິປົກປ້ອງການຄ້າຢ່າງເດັດດ່ຽວ,ຊຸກຍູ້ການປະຕິຮູບໂຄງປະກອບເສດຖະກິດການເງິນສາກົນ, ພ້ອມກັນນັ້ນ,ກໍ່ເພີ່ມທະວີການຮ່ວມມືໃນດ້ານເສດຖະກິດຕົວຈິງ,ແລະເປີດກວ້າງການຮ່ວມມືກັນຕື່ມອີກໃນຂົງເຂດຕ່າງໆເຊັ່ນ: ເຕັກນິກວິທະຍາສາດ, ພະລັງງານ, ແລະກະສິກຳເປັນຕົ້ນ.
ຄຳສັບທີ່ວ່າ＂4 ປະເທດບຣິກ" ແມ່ນມະໂນພາບເສດຖະກິດທີ່ນັກເສດຖະສາດວາງອອກໃນຕົ້ນສະຕະວັດທີ 21
ໃນຖານະທີ່ເປັນປະເທດຕະຫຼາດຈະເລີນໃຫມ່ທີ່ສຳຄັນໃນປະຈຸບັນ ແລະມີປະຊາກອນກວມ 42% ຂອງໂລກນັ້ນ, ອັດຕາປະກອບສ່ວນເຂົ້າໃນການເຕີບໂຕທາງເສດຖະກິດໂລກຂອງ 4 ປະເທດນີ້ມີຫຼາຍກວ່າ 50% ຕາມການຄິດໄລ່ຕາມລາຄາຂອງກຳລັງຊື້. ຜູ່ນຳຂອງ 4 ປະເທດບຣິກທີ່ພັດທະນາຢ່າງວ່ອງໄວໄດ້ເຕົ້າໂຮມກັນເປັນເທື່ອທຳອິດ ພາຍໃຕ້ສະພາບຂອງວິກິດການການເງິນການພົບປະຄັ້ງປະຫວັດສາດເທື່ອນີ້ ສະແດງໃຫ້ປະຊາຄົມໂລກເຫັນຄວາມຕັດສິນໃຈຂອງປະເທດຕະຫຼາດຈະເລີນໃຫມ່ທີ່ສຳຄັນເພື່ອຮັບມືກັບການທ້າທາຍຂອງວິກິດການຍ່າງຕັ້ງຫນ້າ, ແລະກໍ່ສົ່ງສັນຍານແຫ່ງຄວາມຫວັງທີ່ດີງາມໃຫ້ແກ່ຄົນທົ່ວໂລກທີ່ມີຕໍ່ອະນາຄົດ.
ທ່ານຜູ່ຟັງທີ່ໂຄລົບ,ທີ່ທ່ານຟັງມານັ້ນແມ່ນຄໍລຳCRIເຈາະຂ່າວທີ່ເວົ້າເຖິງຜູ່ນຳ 4 ປະເທດບຣິກພົບປະກັນຢ່າງເປັນທາງການຄັ້ງທຳອິດ.
