ນາຍົກໄທຫວັງວ່າການຢ້ຽມຢາມຈີນຈະໄດ້ຮັບໝາກຜົນຫຼາຍຢ່າງ
-----------------------------------------------------------------------------------------------------------------
ທີ່ນີ້ວິທະຍຸສາກົນແຫ່ງປະເທດຈີນ！ ວັນທີ 21 ມິຖຸນານີ້ຢູ່ທີ່ບາງກອກ, ທ່ານອະພິຊິດ ເວດຊາຊີວະ, ນາຍົກລັດຖະມົນຕີໄທທີ່ຈະໄປຢ້ຽມຢາມຈີນກ່າວວ່າ, ຫວັງວ່າການຢ້ຽມຢາມເທື່ອນີ້ຈະສາມາດຊຸກຍູ້ກາຍພົວພັນຄູ່ຮ່ວມມືລະຫວ່າງໄທກັບຈີນຂະຫຍາຍໄປຂ້າງໜ້າ, ພ້ອມກັນນັ້ນເພີ່ມການຮ່ວມມືກັບຈີນໃນຂົງເຂດເສດຖະກິດການຄ້າ, ການທ່ອງທ່ຽວແລະການສຶກສາເປັນຕົ້ນ.
ໂດຍຕອບສະໜອງຕາມຄຳເຊີນຂອງທ່ານເວີນເຈ່ຍປາວ, ນາຍົກລັດຖະມົນຕີຈີນ, ທ່ານອະພິຊິດຈະໄປຢ້ຽມຢາມຈີນຢ່າງເປັນທາງການແຕ່ວັນທີ 24 ຫາວັນທີ 27 ມິຖຸນານນີ້, ນີ້ແມ່ນທ່ານໄປຢ້ຽມຢາມຈີນເປັນຄັ້ງທຳອິດພາຍຫຼັງຂຶ້ນຮັບຕຳແໜ່ງເປັນນາຍົກລັດຖະ ມົນຕີໄທໃນເດືອນທັນວາປີກາຍມານີ້. ຕອນບ່າຍວັນທີ 21 ມິຖຸນານີ້, ທ່ານໄດ້ໃຫ້ສຳພາດຕໍ່ສື່ມວນຊົນຈີນປະຈຳໄທຫຼາຍສື່ເຊັ່ນວິທະຍຸCRIເປັນຕົ້ນຢູ່ຕຶກລັດຖະສະພາຂອງໄທທີ່ບາງກອກ. ທ່ານອະພິຊິດເຫັນວ່າການຢ້ຽມຢາມເທື່ອນີ້ສຳຄັນຫຼາຍ, ທ່ານກ່າວວ່າ: " ເຖິງວ່າໄທກັບຈີນ ສ້າງສາຍພົວພັນທາງການທູດຄົບຮອບ 34 ປີກໍຕາມ, ແຕ່ການພົວພັນລະຫວ່າງປະຊາຊົນຂອງສອງປະເທດແມ່ນມີມູນເຊື້ອມາດົນນານແລະຖືກັນເປັນເຫນືອນຍາດພີ່ນ້ອງ. ປະຈຸບັນ,ທົ່ວໂລກພວມປະເຊີນຫນ້າກັບວິກິດການການເງິນ, ໃນໄລຍະນີ້,ຂ້າພະເຈົ້າຈະມາຢ້ຽມຢາມຈີນ, ເພື່ອຫວັງໃຫ້ສາມາດເພີ່ມທະວີການພົວພັນຄູ່ຮ່ວມມືລະຫວ່າງສອງປະເທດ ຕື່ມອີກ,ພ້ອມທັງສວຍໃຊ້ໂອກາດເທື່ອນີ້ ເພື່ອຂະຫຍາຍການພົວພັນຮ່ວມມືລະຫວ່າງໄທກັບຈີນແລະອາຊຽນກັບຈີນຕື່ມອີກ. ສະນັ້ນ,ພວກຂ້າພະເຈົ້າເອົາໃຈໃສ່ຢ່າງໃກ້ຊິດທີ່ສຸດຕໍ່ການຢ້ຽມຢາມເທື່ອນີ້,ການສະແດງອອກຢ່າງຈະແຈ້ງຢູ່ບ່ອນຫນຶ່ງກໍ່ແມ່ນ: ຄະນະຜູ່ແທນທີ່ຂ້າພະເຈົ້ານຳພາມາຢ້ຽມຢາມຈີນແມ່ນຄະນະຜູ່ແທນທີ່ຫຼາຍກວ່າທຸກຄັ້ງຜ່ານມາໃນປະຫວັດສາດມານີ້, ໃນນັ້ນ, ນັກວິສາຫະກິດຫຼາຍສົມຄວນແມ່ນຫົວຫນ້າຂອງວິສາຫະກິດເອກະຊົນ."
ຕົວເລກສະແດງໃຫ້ເຫັນວ່າ, ໃນຫຼາຍປີມານີ້,ການຄ້າລະຫວ່າງຈີນກັບໄທໄດ້ພັດທະນາຢ່າງວ່ອງໄວ , ປີ 2008, ມູນຄ່າການຄ້າຂອງສອງຝ່າຍສູງເຖິງ 4 ຕື້ 200 ລ້ານໂດລາ, ເພີ່ມຂຶ້ນຫຼາຍກວ່າເວລາດຽວກັນຂອງປີກ່ອນ 18,9%.ປະຈຸບັນ,ຄາດຫມາຍຂອງຈີນກັບໄທທີ່ໄດ້ກຳນົດໃນດ້ານຕ່າງໆເຊັ່ນ:ການຄ້າ,ການລົງທຶນ,ຈຳນວນນັກທ່ອງທ່ຽວແລະອື່ນໆແມ່ນ: ເມື່ອຮອດປີ 2010 , ພະຍາຍາມເຮັດໃຫ້ບັນລຸມູນຄ່າການຄ້າຂອງສອງຝ່າຍ ມີເຖິງ 50 ຕື້ໂດລາ, ການລົງທຶນລະຫວ່າງສອງຝ່າຍ6ຕື້500 ລ້ານໂດລາແລະຈຳນວນນັກທ່ອງທ່ຽວ 4 ລ້ານເທື່ອຄົນ. ແຕ່ວ່າ, ວິກິດການການເງິນທີ່ພວມເກີດຂຶ້ນໃນປະຈຸບັນອາດຈະສ້າງຜົນກະທົບທາງລົບໃຫ້ແກ່ການພັດທະນາເສດຖະກິດການຄ້າຂອງສອງປະເທດ. ທ່ານອະພິສິດ ກ່າວວ່າ, ລັດຖະບານໄທແລະຈີນລ້ວນແຕ່ມີຄວາມຕັດສິນໃຈແລະໄດ້ວາງນະໂຍບາຍຕົວຈິງເພື່ອເພີ່ມທະວີການຮ່ວມມືດ້ານເສດຖະກິດການຄ້າ.
"ກ່ອນວິກິດການເສດຖະກິດ,ທຸກສິ່ງທຸກຢ່າງລ້ວນແຕ່ເປັນປົກກະຕິ,ພວກຂ້າພະເຈົ້າໄດ້ກ້າວໄປສູ່ເປົ້າໝາຍທີ່ຕັ້ງໄວ້ກ່ອນ.ແຕ່ວ່າໃນຫົກເດືອນຕົ້ນປີນີ້,ມູນຄ່າສົ່ງອອກຂອງໄທແລະຈຳນວນນັກທ່ອງທ່ຽວທີ່ໄປທ່ຽວໄທໄດ້ຫຼຸດລົງຢ່າງຫຼວງຫຼາຍ.ພວກຂ້າພະເຈົ້າເປັນຫ່ວງເລື່ອງນີ້ຫຼາຍ,ແລະຈະຫາລືເພື່ອຊອກໄດ້ວິທີແກ້ໄຂ.ຖ້າວ່າມີມາດຕະການອັນເໝາະສົມ,ຂ້າພະເຈົ້າຄິດວ່າ,ໃນປີ2010ຫຼືປິ2011,ພວກຂ້າພະເຈົ້າກໍ່ຈະສາມາດບັນລຸເປົ້າໝາຍສູງກວ່າເກົ່າ."
ໃນການຢ້ຽມຢາມຈີນເທື່ອນີ້,ທ່ານອະພິຊິດຈະມາຢ້ຽມຢາມນະຄອນຫຼວງປັກກິ່ງ ນະຄອນທຽນສິນແລະນະຄອນກວາງໂຈ່ວ.ທ່ານກ່າວວ່າ,ໄທໄດ້ວາງແຜນການກະຕຸ້ນເສດຖະກິດສຳລັບສາມປີຕໍ່ໜ້າ,ໃນນັ້ນລວມທັງຫຼາຍໂຄງການກໍ່ສ້າງພື້ນຖານໂຄງລ່າງຄົມມະນາຄົມ,ຈີນສາມາດເສີມຂະຫຍາຍບົດບາດອັນສຳຄັນໃນໂຄງການເຫຼົ່ານີ້.ທ່ານອະພິຊິດກ່າວວ່າ,ໃນຖານະເປັນປະເທດປະທານໝູນວຽນຂອງອາຊຽນ,ໄທກໍ່ຫວັງຢາກຊຸກຍູ້ການເຈລະຈາ ກ່ຽວກັບເຂດການຄ້າເສລີຈີນອາຊຽນຢ່າງຕັ້ງໜ້າ,ໃຫ້ໄດ້ເຊັນສັນຍາໂດຍໄວ.
