ກອງປະຊຸມລັດຖະມົນຕີການຕ່າງປະເທດອາຊຽນໄຂຂຶ້ນຢູ່ພູເກັດ
-----------------------------------------------------------------------------------------------------------------
ຕາມຂ່າວCRI:ວັນທີ20ກໍລະກົດນີ້,ຢູ່ເກາະພູເກັດ,ພາກໃຕ້ຂອງໄທ,ກອງປະຊຸມລັດຖະມົນ ຕີວ່າການກະຊວງການຕ່າງປະເທດອາຊຽນປີນີ້ໄດ້ໄຂຂຶ້ນ,ກອງປະຊຸມຈະລົງເລິກຫາລືຫົວຂໍ້ສຳຄັນຕ່າງໆ ເຊັ່ນ ການສ້າງປະຊາຄົມອາຊຽນ,ເພີ່ມພະລັງຕ້ານກັບສິ່ງທ້າທາຍຕ່າງໆແລະສ້າງການພົວພັນກັບພາຍນອກຂອງອາຊຽນເປັນຕົ້ນ.
ໃນສຽງເພງ"ເສັ້ນທາງຂອງອາຊຽນ"ທີ່ໄດ້ຮັບຮອງໃຫ້ເປັນເພງສັນາລັກຂອງອາຊຽນໃນປີນີ້,ກອງປະຊຸມລັດຖະມົນຕີວ່າການກະຊວງການຕ່າງປະເທດອາຊຽນຄັ້ງທີ42ກໍ່ໄດ້ໄຂຂຶ້ນ ຢ່າງເປັນທາງການ.ຫົວຂໍ້ຂອງກອງປະຊຸມຄັ້ງນີ້ແມ່ນ"ພ້ອມກັນດຳເນີນງານເພື່ອຮັບມືກັບການທ້າທາຍທົ່ວໂລກ".ກອງປະຊຸມຄັ້ງນີ້ແມ່ນກອງປະຊຸມລັດຖະມົນຕີວ່າການກະຊວງການຕ່າງປະເທດຄັ້ງທຳອິດພາຍຫຼັງກົດບັດອາຊຽນມີຜົນບັງຄັບໃຊ້ຢ່າງເປັນທາງການແຕ່ເດືອນທັນວາປີ2008ເປັນຕົ້ນມາ.ນອກນີ້,ກອງປະຊຸມວົງກວ້າງຂອງລັດຖະມົນຕີການຕ່າງ ປະເທດອາຊຽນແລະເວທີປຶກສາຫາລືດ້ານການເມືອງແລະຄວາມໝັ້ນຄົງໃນພາກພື້ນອາຊຽນຫຼືARFຄັ້ງທີ16ກໍ່ຈະຈັດຂຶ້ຕາມລຳດັບ.
ໃນພິທີໄຂກອງປະຊຸມ,ທ່ານກະສິດ ພິລົມ,ລັດຖະມົນຕີວ່າການກະຊວງການຕ່າງປະເທດຂອງໄທ,ເຊິ່ງເປັນປະເທດປະທານໝູນວຽນຂອງອາຊຽນໄດ້ສະແດງຄວາມຍິນດີຕ້ອນຮັບຕໍ່ລັດຖະມົນຕີການຕ່າງປະເທດແລະຜູ້ຕາງໜ້າຂອງປະທດຕ່າງໆທີ່ມາຮ່ວມປະຊຸມ.ທ່ານ ກ່າວວ່າ:
"ເດືອນສິງຫາປີ 1967, ໄທໄດ້ຈັດກອງປະຊຸມລັດຖະມົນຕີການຕ່າງປະເທດອາຊຽນຄັ້ງທຳອິດ, ເວລານັ້ນມີລັດຖະມົນຕີການຕ່າງປະເທດຂອງ 5 ປະເທດອາຊີອາຄະເນໄດ້ເຂົ້າຮ່ວມປະຊຸມ. ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທຳອິດໄດ້ອອກຖະແຫຼງການບາງກອກ, ປະກາດສ້າງຕັ້ງສະມາຄົມປະຊາຊາດອາຊີຕາເວັນອອກສຽງໃຕ້ຫຼືອາຊຽນນ. ມື້ນີ້, ໄທໄດ້ຈັດກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 42 ຢ່າງພາກພູມໃຈ. ໃນມື້ສຸດທ້ຍ, ລັດຖະມົນຕີການຕ່າງປະເທດຂອງ 27 ປະເທດແລະອົງການສາກົນຈະປຶກສາຫາລືຫົວຂໍ້ສຳຄັນພາກພື້ນແລະສາກົນທີ່ຈະມີຜົນກະທົບຕໍ່ອາຊຽນ."
ທ່ານອະພິຊິດ ເວດຊາຊີວະ, ນາຍົກລັດຖະມົນຕີໄທໄດ້ເຂົ້າຮ່ວມພິທີໄຂປະຊຸມແລະໄດ້ຕ້ອນຮັບລັດຖະມົນຕີກະຊວງການຕ່າງປະເທດຂອງ 10 ປະເທດອາຊຽນທີ່ເຂົ້າຮ່ວມກອງປະຊຸມເທື່ອນີ້. ທ່ານກ່າວວ່າ, ເພື່ອບັນລຸເປົ້າໝາຍທີ່ສ້າງປະຊາຄົມອາຊຽນກ່ອນປີ 2015, ປະເທດສະມາຊິກອາຊຽນຕ້ອງການຜົນຂະຫຍາຍຈິດໃຈຂອງ"ກົດບັດອາຊຽນ"ໃຫ້ນເປັນການກະທຳຕົວຈິງ. ທ່ານກ່າວວ່າ:
"ຖ້າວ່າປະເທດຕ່າງໆລ້ວນແຕ່ໄດ້ທຳຄວາມພະຍາຍາມຮ່ວມກັນແລະໄດ້ຮັບຜົນປະໂຫຍດຮ່ວມກັນ, ຂະບວນການເຊື່ອມໂຍງເຂົ້າກັນຂອງປະຊາຄົມອາຊຽນກໍ່ຈະໄດ້ຮັບຜົນສຳເລັດ. ປະຊາຊົນໃນພາກພື້ນນີ້ພຽງແຕ່ໃຊ້ການກະທຳອັນຕັ້ງໜ້າທີ່ຈິງຈັງຈິ່ງສາມາດໄດ້ຮັບຜົນປະໂຫຍດຈາກຂະບວນການໂລກາພິວັດ. ອາຊຽນຕ້ອງເປັນກຳລັງນຳພາຂອງພາກພື້ນຈິ່ງສາມາດເຮັດໃຫ້ອາຊຽນສາມາດພັດທະນາຢ່າງຕໍ່ເນື່ອງແລະໄດ້ຮັບຜົນປະໂຫຍດດ້ານການເມືອງ."
ທ່ານອະພິສິດ ເວດຊາຊີວະ ຍັງກ່າວເນັ້ນວ່າ,ຄວນເພີ່ມທະວີການຮ່ວມມືລະຫວ່າງປະເທດຕ່າງໆຂອງອາຊຽນ ກັບປະເທດຄູ່ເຈລະຈາຕື່ມອີກ, ຮ່ວມພະລັງຕ້ານກັບສິ່ງທ້າທາຍຂອງພາກພື້ນນີ້ໃນຂົງເຂດຕ່າງໆ, ເພື່ອຮັບມືກັບການທ້າທາຍຕ່າງໆໃນປະຈຸບັນແລະອະນາຄົດຢ່າງບັງເກີດຜົນ, ສິ່ງທ້າທາຍເຫຼົ່ານີ້ລວມມີ: ວິກິດການເສດຖະກິດແລະການເງິນທີ່ມີລັກສະນະທົ່ວໂລກ, ສິ່ງແວດລ້ອມແລະໄພທຳມະຊາດ, ໄພຂົ່ມຂູ່ທີ່ແຝງຊ້ອນຢູ່ ພ້ອມດ້ວຍບັນຫາຄວາມປອດໄພອື່ນໆ.
ຫຼັງຈາກພິທີໄຂປະຊຸມ, ລັດຖະມົນຕີວ່າການກະຊວງການຕ່າງປະເທດຂອງ 10 ປະເທດອາຊຽນຈະພິຈາລະນາເຖິງມະຕິສະບັບປັບປຸງຕ່າງໆເຊັ່ນ: ຮ່າງກົດບັດຂອງອົງການສິດທິມະນຸດອາຊຽນ, ຍັດຕິກົດບັດອາຊຽນ ສະບັບປັບປຸງແລະອື່ນໆ. ຫຼັງຈາກພິຈາລະນາແລ້ວ, ຈະຍື່ນໃຫ້ກອງປະຊຸມສຸດຍອດອາຊຽນຄັ້ງທີ 15 ຮັບຮອງ. ກອງປະຊຸມສຸດຍອດອາຊຽນຄັ້ງທີ 15 ຈະຈັດຂຶ້ນຢູ່ເກາະພູເກັດຂອງໄທໃນເດືອນຕຸລາປີນີ້.
