ການສົນທະນາຍຸດທະສາດແລະເສດຖະກິດຈີນ-ອາເມລິກາຮອບທຳອິດໄດ້ຮັບຜົນສຳເລັດຢ່າງຈົບງາມ
-----------------------------------------------------------------------------------------------------------------
ຕອນບ່າຍວັນ ທີ 28 ກໍລະ ກົດນີ້, ທ່ານວາງສີຊ່ານ,ຮອງນາຍົກລັດຖະມົນຕີ ຈີນທີ່ເປັນຜູ່ຕາງຫນ້າພິເສດຂອງທ່ານຫູຈິນທາວ,ປະທານປະເທດຈີນ ແລະທ່ານຕ້າຍປີງກົວ, ທີ່ປຶກສາແຫ່ງລັດຈີນ ກັບນາງຮິວລາຣີ ຄຼິນຕັນ, ລັດຖະມົນຕີວ່າການກະຊວງການຕ່າງປະເທດທີ່ເປັນຜູ່ຕາງຫນ້າພິເສດຂອງທ່ານບາຣັກ ໂອມາບາ,ປະທານາທິບໍດີອາເມລິກາ ແລະທ່ານທີໂມທີ ເກັສ໌ເນີ, ລັດຖະມົນຕີວ່າການກະຊວງການເງິນອາເມລິກາ ໄດ້ປະກົດຕົວຢູ່ອາຄານໄອເຊັນຮາວບໍລິຫານຂອງທຳນຽບຂາວດ້ວຍໃບຫນ້າທີ່ຍິ້ມແຍ້ມແຈ່ມໃສ, ການສົນທະນາຍຸດທະສາດແລະເສດຖະກິດຈີນ-ອາເມລິກາຮອບທຳອິດທີ່ຈັດຂຶ້ນຢູ່ແຫ່ງນີ້ ໄດ້ສິ້ນສຸດລົງດ້ວຍຜົນສຳເລັດຢ່າງຈົບງາມ. ນາງຮິວລາລີ,ລັດຖະມົນຕີວ່າການກະຊວງການຕ່າງປະປະເທດໄດ້ກ່າວຄຳປາໄສ, ແລະຕີລາຄາໃນລະດັບສູງຕໍ່ຫມາກຜົນທີ່ໄດ້ຮັບໃນການສົນທະນາເທື່ອນີ້.
"ພວກເຮົາຫາກໍສິ້ນສຸດການປຶກສາຫາລືສອງວັນທີ່ເຮັດໃຫ້ສະບາຍໃຈແລະມີໝາກຜົນດີງາມ. ສອງມື້ຜ່ານມານັ້ນແມ່ນບໍ່ເຄີຍມີໃນປະຫວັດການພົວພັນລະຫວ່າງຈີນກັບອາເມລິກາ. ໃນການເຈລະຈາທີ່ຫາກໍ່ສິ້ນສຸດລົງ, ພວກເຮົາໄດ້ເຕົ້າໂຮມເຈົ້າໜ້າທີ່ລະດັບສູງຂອງສອງປະເທດຈຳນວນຫຼາຍທີ່ສຸດ, ຂອບເຂດຂອງການເຈລະຈາກ່ຽວພັນເຖິງຫຼາຍຫົວຂໍ້ທີ່ສຸດ. ໝາກຜົນຂອງການເຈລະຈາໄດ້ສ້າງພື້ນຖານໃຫ້ແກ່ການພົວພັນລະຫວ່າງຈີນກັບອາເມລິກາທີ່ມີລັກສະນະການຮ່ວມມື, ຕັ້ງໜ້າແລະຮອບດ້ານ."
ທ່ານຫວາງສີຊ່ານ, ຮອງນາຍົກລັດຖະມົນຕີຈີນກ່າວວ່າ, ຈີນອາເມລິກາໄດ້ກ້າວເຖິງຂັ້ນມີຄວາມຮັບຮູ້ທີ່ເປັນເອກະສັນກັນຕ່າງໆໃນດ້ານການຮັບມືກັບວິກິດການການເງິນສາກົນ. ທ່ານກ່າວວ່າ:
"ສອງຝ່າຍໄດ້ຮັບຮູ້ວ່າ, ໃນຂະນະທີ່ວິກິດການເສດຖະກິດໂລກເດີນໄປສູ່ການຟື້ນຟູ, ການກະຕຸ້ນເສດຖະກິດໃຫ້ເຕີບໂຕຍັງແມ່ນໜ້າທີ່ສຳຄັນທີ່ສຸດຂອງການຮ່ວມມືລະຫວ່າງຈີນກັບອາເມລິກາ. ສອງຝ່າຍຄວນເພີ່ມທະວີການປະສານງານນະໂຍບາຍດ້ານເສດຖະກິດມະຫາພາກ, ເຮັດໃຫ້ຕະຫຼາດການເງິນໝັ້ນທ່ຽງ, ພະຍາຍາມຊຸກຍູ້ການຟື້ນຟູເສດຖະກິດແລະເພີ່ມໂອກາດປະກອບອາຊີບ. ພ້ອມກັນນັ້ນ, ກໍ່ຕັ້ງໜ້າປ່ຽນແປງວິທີພັດທະນາເສດຖະກິດ, ອອກແຮງຊຸກຍູ້ການປັບປຸງໂຄງປະກອບ, ເພີ່ມທະວີການຮ່ວມມືດ້ານການປະຕິຮູບການປິ່ນປົວສາທາລະນະສຸກແລະການກໍ່ສ້າງລະບົບປະກັນສັງຄົມ, ຊຸກຍູ້ໃຫ້ເສດຖະກິດພັດທະນາແບບຍືນຍົງ."
ໃນການສົນທະນາຍຸດທະສາດຄັ້ງນີ້,ສອງຝ່າຍນອກຈາກໄດ້ສົນທະນາກ່ຽວກັບການພົວ ພັນກັນແລ້ວ,ຍັງໄດ້ລົງເລິກຫາລືບັນຫາສາກົນແລະພາກພື້ນທີ່ສົນໃຈຮ່ວມກັນ,ຄື: ບັນຫາ ນິວເຄຼຍແຫຼມເກົາຫຼີ ສະຖຽນລະພາບຂອງອາຊີໃຕ້ແລະສະພາບການໃນ ຕາເວັນອອກກາງແລະບັນຫາອື່ນໆ,ຄື:ການປ່ຽນແປງຂອງດິນຟ້າອາກາດ,ຄວາມປອດໄພດ້ານພະລັງງານ,ການອະນຸລັກສິ່ງແວດລ້ອມແລະສາທາລະນະສຸກເປັນຕົ້ນ.ສອງຝ່າຍກ່າວວ່າຈະຮ່ວມກັນຮັບມືກັບການທ້າທາຍແລະບັນຫາ ອັນສັບສົນຕ່າງໆທີ່ສັງຄົມມະນຸດພວມປະເຊີນ,ຕ່າງຝ່າຍຕ່າງມີຜົນປະໂຫຍດ,ພ້ອມກັນກ້າວໄປໜ້າ.ສອງຝ່າຍຕົກລົງວ່າ,ການສົນທະນາຍຸດທະສາດແລະເສດຖະກິດຈີນອາເມລິກາຮອບທີ2ຈະຈັດຂຶ້ນຢູ່ປັກກິ່ງໃນປີໜ້າ.ທ່ານຜູ່ຟັງທີ່ໂຄລົບ,ທີ່ຟັງມານັ້ນແມ່ນCRIເຈາະຂ່າວທີ່ພາດຫົວເລື່ອງວ່າ:ການສົນທະນາ ຍຸດທະສາດແລະເສດຖະກິດລະຫວ່າງຈີນກັບອາເມລິກາຮອບທຳອິດໄດ້ຮັບໝາກຜົນເປັນຢ່າງດີ.
