ການສ້າງສາປະຊາຄົມເສດຖະກິດອາຊຽນ ກ້າວໄປສູ່ການພັດທະນາທີ່ວ່ອງໄວ
-----------------------------------------------------------------------------------------------------------------
ວັນທີ16ສິງຫານີ້, ກອງປະຊຸມຕ່າງໆຂອງລັດຖະມົນຕີເສດຖະກິດອາຊຽນ ຄັ້ງທີ41 ແລະກອງປະຊຸມອື່ນໆທີ່ກ່ຽວຂ້ອງ ທີ່ຈັດຂຶ້ນຢູ່ນະຄອນຫຼວງບາງກອກຂອງໄທໄດ້ອັດລົງແລ້ວ. ໃນກອງປະຊຸມເທື່ອນີ້, ລັດຖະມົນຕີເສດຖະກິດຂອງ 10 ປະເທດອາຊຽນຕົ້ນຕໍໄດ້ຖືການສ້າງສາປະຊາຄົມເສດຖະກິດອາຊຽນເປັນເປົ້າຫມາຍ, ແລະປຶກສາຫາລືກັນກ່ຽວກັບຂອບໄລຍະຂ້າມຜ່ານ ຫຼັງຈາກປີ 2015, ສ້າງລະບົບການປະເມີນຂອງປະຊາຄົມເສດຖະກິດອາຊຽນ, ຫາລືຂອບເຂດການຄ້າເສລີອາຊຽນ ພ້ອມດ້ວຍຫົວຂໍ້ເສດຖະກິດພາຍໃຕ້ຂອບຂອງອາຊຽນບວກ 6 ແລະອື່ນໆ. ພ້ອມກັນນັ້ນ, ອາຊຽນກັບອິນເດຍແລະຈີນ ຍັງໄດ້ເຊັນສັນຍາການຄ້າ ແລະສັນຍາການລົງທຶນກັບເຂດການຄ້າເສລີອາຊຽນ. ຕໍ່ໄປເຊີນຟັງບົດແຈ້ງຂ່າວລະອຽດກ່ຽວກັບເລື່ອງນີ້.
ໃນກອງປະຊຸມທີ່ຈັດຂຶ້ນໃນວັນທີ 14 ສິງຫານີ້, ລັດຖະມົນຕີເສດຖະກິດຂອງບັນດາປະເທດອາຊຽນໄດ້ເຊັນ"ຂອບການຄ້າສະດວກອາຊຽນ", ແລະອອກຖະແຫຼງການຮ່ວມ. ຖະແຫຼງການ ຊີ້ອອກວ່າ, ຂອບດັ່ງກ່າວຈະກາຍເປັນທິດທາງຊີ້ນຳທີ່ປະເທດສະມາຊິກອາຊຽນ ປະຕິບັດນະໂຍບາຍການຄ້າອາຊຽນເປັນແບບສະດວກ,ແລະອະນຸມັດໃຫ້ສ້າງຕັ້ງຄະນະກຳມະ ການໃຫ້ຄຳປຶກສາຮ່ວມກ່ຽວກັບການຄ້າອາຊຽນເປັນແບບສະດວກ.ນອກນີ້, ລັດຖະມົນຕີເສດຖະກິດຂອງປະເທດຕ່າງໆອາຊຽນ ຍັງເຫັນດີໃຫ້ສັນຍາການຄ້າສິນຄ້າອາຊຽນມີຜົນບັງຄັບໃຊ້ໃນໄລຍະກອງປະຊຸມສຸດຍອດອາຊຽນທີ່ຈະຈັດຂຶ້ນໃນເດືອນຕຸລາປີນີ້.
ຈຸດສຸມທີ່ຫນ້າສົນໃຈອີກອັນຫນຶ່ງຂອງກອງປະຊຸມແມ່ນກອງປະຊຸມລັດຖະມົນຕີເສດຖະກິດລະຫວ່ງອາຊຽນກັບ 6 ປະເທດຄູ່ເຈລະຈາຄື ຈີນ,ຍີ່ປຸ່ນ, ສາທາລະນະລັດເກົາຫລີ,ອົສຕຼາລີ,ນູແວນເຊລັງແລະອິນເດຍຫລື ອາຊຽນ+6.ລັດຖະມົນຕີທີ່ຮ່ວມປະຊຸມຕົ້ນຕໍໄດ້ຫາລືກ່ຽວກັບບັນຫາເສດຖະກິດໃນອບເຂດການຄ້າເສລີອາຊຽນແລະຂອບອາຊຽນ +6,ນີ້ຈະມີບົດບາດອັນຕັ້ງຫນ້າຕໍ່ການຊຸກຍູ້ຂະບວນວິວັດສ້າງເຂດການຄ້າເສລີອາຊຽນ.ຕອນບ່າຍວັນທີ 13 ສິງຫານີ້, ອາຊຽນກັບອິນເດຍໄດ້ຈັດກອງປະຊຸມລັດຖະມົນຕີເສດຖະກິດ,ໄດ້ເຊັນສັນຍາການຄ້າສິນຄ້າແລະເອກະສານທີ່ກ່ຽວກັບເຂດການຄ້າເສລີອາຊຽນອິນເດຍ, ສັນຍາສະບັບນີ້ໄດ້ປຶກສາຫາລືກັນມາ 6 ປີປາຍ, ການເຊັນສັນຍາສະບັບນີ້ໄດ້ສົ່ງສັນຍານອັນຕັ້ງຫນ້າຕໍ່ປະຊາຄົມໂລກວ່າອາຊຽນກັບອິນເດຍຍັງພວມອອກແຮງຊຸກຍູ້ການຄ້າເສລີຢູ່ຄືເກົ່າ.
ແຕ່ໃນກອງປະຊຸມລັດຖະມົນຕີເສດຖະກິດຈີນ-ອາຊຽນຄັ້ງທີ 8 ທີ່ຈັດຂຶ້ນໃນຕອນເຊົ້າວັນທີ 15 ສິງຫານີ້, ທ່ານເສີງເຕີມິງ, ລັດຖະມົນຕີວ່າການກະຊວງການຄ້າຈີນແລະລັດຖະມົນຕີເສດຖະກິດຂອງ 10 ປະເທດອາຊຽນທີ່ເຂົ້າຮ່ວມກອງປະຊຸມໄດ້ຮ່ວມກັນເຊັນສັນຍາກ່ຽວກັບການລົງທຶນຂອງສັນຍາການຄ້າເສລີຈີນ-ອາຊຽນ, ນີ້ເປັນຂີດໝາຍສະແດງໃຫ້ເຫັນວ່າການເຈລາຈາສັນຍາການຄ້າເສລີລະຫວ່າງຈີນກັບອາຊຽນໄດ້ສຳເລັດລົງແລ້ວ, ເຂດການຄ້າເສລີຈີນ-ອາຊຽນຈະສ້າງສຳເລັດຮອບດ້ານໃນປີ 2010, ເຂດການຄ້າເສລີແຫ່ງນີ້ຈະມີປະຊາກອນ 1 ຕື້ 900 ລ້ານຄົນ, ລວມຍອດGDPຫຼາຍກວ່າ 6000 ຕື້ໂດລາແລະກວມເນື້ອທີ່ດິນກວ້າງກວ່າ 13 ລ້ານກິໂລແມັດຕາ.
ນັກວິເຄາະເຫັນວ່າ, ຍ້ອນວ່າການເຈລະຈາກ່ຽວກັບເຂດການຄ້າເສລີລະຫວ່າງອາຊຽນກັບຍີ່ປຸ່ນແລະສ.ເກົາຫຼີລ້ວນແຕ່ໄດ້ສຳເລັດລົງແລ້ວ, ສະນັ້ນໃນກອງປະຊຸມເທື່ອນີ້, ການເຊັນສັນຍາການຄ້າແລະການລົງທຶນລະຫວ່າງອາຊຽນກັບອິນເດຍແລະຈີນໝາຍຄວາມວ່າການກໍ່ສ້າງເຂດການຄ້າເສລີອາຊຽນໄດ້ກ້າວເຂົ້າສູ່ໄລຍະໃໝ່, ມີຄວາມໝາຍທີ່ເປັນຫຼັກໝາຍທາງ, ໃນຖານະເປັນສ່ວນປະກອບສຳຄັນໃນການສ້າງປະຊາຄົມເສດຖະກິດອາຊຽນ, ການກໍ່ສ້າງເຂດການຄ້າເສລີຍ່ອມຈະຊຸກຍູ້ຂະບວນເສດຖະກິດເຊື່ອມໂຍງເຂົ້າກັນຂອງອາຊຽນຢ່າງແຂງແຮງແນ່ນອນ, ເຮັດໃຫ້ການກໍ່ສ້າງປະຊາຄົມອາຊຽນກ້າວຂຶ້ນສູ່ທາງດ່ວນໄວກວ່າເກົ່າ.
