ກອງປະຊຸມສຸດຍອດພິເສດຂອງAU ເພື່ອແກ້ໄຂຄວາມຂັດແຍ່ງຢູ່ອາຟຼິກາ
-----------------------------------------------------------------------------------------------------------------
ວັນທີ 31 ສິງຫານີ້, ກອງປະຊຸມສຸດຍອດພິເສດຂອງສະຫະພາບອາຟຼິກາຫຼື AU ເພື່ອແກ້ໄຂຄວາມຂັດແຍ່ງທີ່ດຳເນີນເປັນເວລາ 1 ວັນນັ້ນໄດ້ອັດລົງແລ້ວຢູ່ນະຄອນຫຼວງຕຼີໂປຣີຂອງລີບີ, ປະມຸກລັດ, ຫົວຫນ້າລັດຖະບານ ຫຼືຜູ່ຕາງຫນ້າທີ່ມາຈາກ50ກວ່າປະເທດສະມາຊິກຂອງAUໄດ້ປຶກສາຫາລືກັນ ກ່ຽວກັບການແກ້ໄຂບັນຫາການປະທະກັນດ້ວຍກຳລັງອາວຸດຢູ່ໂຊມາລີແລະເຂດດາຟູຂອງຊູດັງແນວໃດເປັນຕົ້ນ. ນັກວິເຄາະຊີ້ອອກວ່າ, ການຈັດກອງປະຊຸມເທື່ອນີ້ສະແດງໃຫ້ເຫັນວ່າ, ບັນດາປະເທດຂອງ AU ສາມາດຮ່ວມກັນສ້າງຄວາມເຂັ້ມແຂງດ້ວຍຕົນເອງຢູ່ພາຍໃນຂອງພາກພື້ນAU,ເພື່ອແກ້ໄຂບັນຫາແລະການທ້າທາຍຕ່າງໆທີ່ປະເຊີນຫນ້າ.
ໃນການທ້າທາຍຫຼາຍຢ່າງທີ່ແຜ່ນດິນໃຫຍ່ອາຟຼິກາປະເຊີນຫນ້ານັ້ນ, ການບັນລຸສັນຕິພາບແລະຄວາມຫມັ້ນຄົງ ແມ່ນເລື່ອງທີ່ບໍ່ຕ້ອງສົງໄສເລີຍວ່າ, ແມ່ນບັນຫາທີ່ຮີບດ່ວນທີ່ສຸດ. ໃນຫຼາຍປີມານີ້, ການປະທະກັນຍັງເກີດຂຶ້ນຢູ່ບາງເຂດຂອງອາຟຼິກາ, ໄດ້ກາຍເປັນອຸປະສັກຂັດຂວາງໃຫຍ່ອັນດັບທີຫນຶ່ງໃນການພັດທະນາເສດຖະກິດແລະສັງຄົມຂອງອາຟຼີກກາ. ສະຖານະການຢູ່ໂຊມາລີທີ່ຮ້າຍແຮງຂຶ້ນຢ່າງບໍ່ຢຸດຢັ້ງແມ່ນຈຸດສຸມຫນຶ່ງໃນກອງປະຊຸມສຸດຍອດພິເສດເທື່ອນີ້. ໂຊມາລີໄດ້ເກີດໄພສົງຄາມເລື້ອຍໆນັບແຕ່ 1991 ເປັນຕົ້ນມາ, ໂດຍສະເພາະແມ່ນນັບແຕ່ຕົ້ນເດືອນພຶດສາປີນີ້ເປັນຕົ້ນມາ,ກຳລັງປະກອບອາວຸດຕ້ານລັດຖະບານຂອງໂຊມາລີ ກັບກອງທະຫານລັດຖະບານ ໄດ້ຍິງປືນໃສ່ກັນຢ່າງຕໍ່ເນື່ອງ ຢູ່ນະຄອນຫຼວງໂມກາດີຊູຂອງໂຊມາລີ, ແລ້ວເຮັດໃຫ້ຫຼາຍພັນຄົນເສຍຊີວິດແລະບາດເຈັບ, ມີ 2 ແສນກວ່າຄົນຕ້ອງອົບພະຍົບໄປຢູ່ແຫ່ງອື່ນຫຼືປະເທດອື່ນ. ກອງທະຫານຮັກສາສັນຕິພາບຂອງ AU ທີ່ເຄີຍພະຍາຍາມຫຼີກເວັ້ນບໍ່ໃຫ້ເຂົ້າແຊກແຊງການປະທະກັນຂອງກຳລັງ ປະກອບອາວຸດໂຊມາລີນັ້ນ ໄດ້ເກີດການປະທະກັນດ້ວຍອາວຸດກັບກຳລັງປະກອບອາວຸດຕ້ານລັດຖະບານໂຊມາລີໂດຍກົງ. ວິກິດການດ້ານມະນຸດສະທຳຢູ່ທ້ອງຖິ່ນກໍຮ້າຍແຮງຂຶ້ນຕື່ມອີກ.
ໃນກອງປະຊຸມດັ່ງກ່າວ, ຜູ່ນຳຂອງປະເທດອາຟຼິກາຕ່າງໆໄດ້ປຶກສາຫາລືກ່ຽວກັບວິທີຈະໃຫ້ການສະໜັບສະໜູນຫຼາຍກວ່າເກົ່າແກ່ລັດຖະບານຊົ່ວຄາວຂອງໂຊມາລີດ້ວຍຫຼາຍຊ່ອງທາງ., ແລະສະໜັບສະໜູນທ່ານຊາຣິຟ ເຊຮ ອາເມັດ, ປະທານາທິ ບໍດີໂຊມາລີ, ຢືນຢັນຄວາມຄືບໜ້າທີ່ລັດຖະບານຊົ່ວຄາວຂອງໂຊມາລີໄດ້ຮັບໃນການຕໍ່ຕ້ານກອງປະກອບອາວຸດຕ້ານລັດຖະບານ. ນອກນີ້, ກອງປະຊຸມຍັງ ເຕືອນໃຫ້ປະເທດສະມາຊິກຕ່າງໆຂອງAUຈົ່ງປະຕິບັດຕາມຄຳໝັ້ນສັນຍາ, ສະໜັບສະໜູນກອງທະຫານຮັກສາສັນຕິພາບຂອງAUປະຈຳໂຊມາລີໂດຍໄວ, ເພື່ອຊ່ອຍເຫຼືອລັດຖະບານຊົ່ວຄາວຂອງໂຊມາລີເຮັດໃຫ້ສະຖານະການໝັ້ນຄົງ.
ບັນຫາດາຟູແມ່ນຫົວຂໍ້ສຳຄັນອີກອັນໜຶ່ງຂອງກອງປະຊຸມສຸດຍອດພິເສດເທື່ອນີ້. ໜ່ວຍງານລະດັບນສູງບັນຫາດາຟູຂອງAUໄດ້ພົບປະກັບເຈົ້າໜ້າທີ່ແລະຜູ່ຕາງໜ້າຂອງ ຝ່າຍຕ່າງໆຂອງຊູດັງຫຼາຍເທື່ອ, ແລະໄດ້ໄປສຳຫຼວດເຂດດາຟູ, ແລະສົ່ງບົດລາຍງານທີ່ກ່ຽວຂ້ອງຕໍ່ກອງປະຊຸມສຸດຍອດພິເສດເທື່ອນີ້, ສະເໜີຄວາມເຫັນແລະຂໍ້ສະເໜີເພື່ອແກ້ໄຂບັນຫາດາຟູ. ທ່ານທາໂບ ມູເຢວາ ມູເບກີ, ຫົວໜ້າໜ່ວຍງານລະດັບສູງບັນຫາດາຟູຂອງAU, ອະດີດປະທານາທິບໍດີອາຟຼິກາໃຕ້ກ່າວວ່າ, AUເອົາໃຈໃສ່ໃນລະດັບສູງນຳບົດລາຍງານຂອງໜ່ວຍງານດັ່ງກ່າວ, ຫວັງໃຫ້ບົດລາຍງານສະບັບນີ້ຈະໄດ້ຮັບການສະໜັບສະໜູນຈາກຝ່າຍຕ່າງໆຂອງຊູດັງ, ເຮັດໃຫ້ຄວາມພະຍາຍາມເພື່ອແກ້ໄຂບັນຫາດາຟູສາມາດໄດ້ຮັບຄວາມຄືບໜ້າຢ່າງຕັ້ງໜ້າ, ເພື່ອໃຫ້ເຂດດາຟູປອງດອງກັນໄດ້ຢ່າງຮອບດ້ານ.
ພ້ອມກັນນັ້ນ, ທ່ານໂອມາ ອານ ບາຊິຣ໊,ປະທານາທິບໍດີຊູດັງກໍ່ໄດ້ຮັບຄຳເຊີນເຂົ້າຮ່ວມກອງປະຊຸມສຸດຍອດພິເສດເທື່ອນີ້,ກໍ່ແມ່ນຈຸດເດັ່ນອັນຫນຶ່ງທີ່ສື່ມວນຊົນໃຫ້ຄວາມສົນໃຈໃສ່ທີ່ສຸດ.ເພາະວ່າໃນເດືອນມີນາປີນີ້,ສານອາຍາສາກົນໄດ້ປະກາດຄຳສັ່ງຈັບຕົວທ່ານບາຊິຣ໊ດ້ວຍຂໍ້ຫາອາຊະຍາກອນສົງຄາມແລະຕ້ານມະນຸດຢູ່ເຂດດາຟູ,ສະຫະພາບອາຟຼີກາຄັດຄ້ານເລື່ອງນີ້ຫລາຍເທື່ອ.ນັກວິເຄາະຊີ້ອອກວ່າ, ສະຫະພາບອາຟຼີກາເຮັດແນວນີ້ແມ່ນເພື່ອສະແດງໃຫ້ເຫັນວ່າປະເທດອາຟຼີກາຕ່າງໆຫວັງແກ້ໄຂຄວາມຂັດແຍ່ງແລະການປະທະກັນດ້ວຍຄວາມພະຍາຍາມຂອງຕົນເອງໂດຍບໍ່ຕ້ອງການໃຫ້ພາຍນອກເຂົ້າມາແຊກແຊງ.
