ກອງປະຊຸມສະຫຼອງສະພາປຶກສາການເມຶອງປະຊາຊົນຈີນສ້າງຕັ້ງຂຶ້ນຄົບຮອບ 60 ປີຈັດຂຶ້ນຢູ່ປັກກິ່ງ

(GMT+08:00) 2009-09-20 17:04:36 cri
-----------------------------------------------------------------------------------------------------------------

ວັນທີ 20 ກັນຍານີ້, ກອງປະຊຸມສະຫຼອງສະພາປຶກສາການເມືອງປະຊາຊົນຈີນສ້າງຕັ້ງຂຶ້ນຄົບຮອບ 60 ປີໄດ້ຈັດຂຶ້ນຢູ່ປັກກິ່ງ. ໃນກອງປະຊຸມ, ທ່ານຫູຈີນທາວ, ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນໄດ້ກ່າວຄຳປາໄສຊີ້ອອກວ່າ, ສະພາປຶກສາການເມືອງປະຊາຊົນຈີນແມ່ນອົງການສຳຄັນທີ່ຫຼາຍພັກຮ່ວມມືແລະປຶກສາການເມືອງທີ່ນຳໂດຍພັກກອມມູນິດຈີນ, ມີກຳລັງຊີວິດອັນແຂງແຮງແລະມີອະນາຄົດອັນກວ້າງຂວາງ, ຕ້ອງທະນຸຖະໜອມທີ່ສຸດແລະຍຶດໝັ້ນເປັນເວລາຍາວນານ.

ເດືອນກັນຍາປີ 1949, ກອງປະຊຸມຄົບຄະນະຂອງສະພາປຶກສາການເມຶອງປະຊາຊົນຈີນຄັ້ງປະຖົມມະເລີກໄດ້ຈັດຂຶ້ນຢູ່ປັກກິ່ງ, ເປັນຂີດໝາຍສະແດງໃຫ້ເຫັນວ່າ, ສະພາປຶກສາການເມືອງປະຊາຊົນໄດ້ສ້າງຕັ້ງຂຶ້ນຢ່າງເປັນທາງການ, ກອງປະຊຸມເທື່ອນີ້ໄດ້ຕາງໜ້າຄວາມເຈຕະນາລົມຂອງປະຊາຊົນບັນດາເຜົ່າໃນທົ່ວປະເທດຈີນ, ໄດ້ປະກາດການສ້າງຕັ້ງສາທາລະນະລັດປະຊາຊົນຈີນ. ຫຼັງຈາກນັ້ນ 60 ປີ, ສະພາປຶກສາການເມືອງປະຊາຊົນຈີນໄດ້ເສີມຂະຫຍາຍບົດບາດທີ່ເຂົ້າແທນບໍ່ໄດ້ໃນດ້ານຕ່າງໆຂອງການສ້າງສາປະເທດຊາດເຊັ່ນ: ການຟຶ້ນຟູແລະພັດທະນາເສດຖະກິດແຫ່ງຊາດ, ປັບປຸງອຳນາດການປົກຄອງຂອງປະຊາຊົນທີ່ເກີດໃໝ່ໃຫ້ໝັ້ນຄົງ, ຊຸກຍູ້ການປະຕິຮູບແລະໄຂປະຕູສູ່ພາຍນອກ, ແລະການສ້າງສາທັນສະໄໝຂອງສັງຄົມນິຍົມເປັນຕົ້ນ. ໃນເວລາກ່າວຄຳປາໄສ, ທ່ານຫູຈີນທ່າວໄດ້ຕີລາຄາສູງຕໍ່ເລື້ອງນີ້ວ່າ:

"ປະຫວັດສາດໄດ້ຢືນຢັນຢ່າງເຕັມທີ່ວ່າ, ອົງການການເມືອງແລະຮູບການປະຊາທິປະໄຕທີ່ມີສີສັນພິເສດຂອງຈີນຄືສະພາປຶກສາການເມືອງປະຊາຊົນ ແມ່ນການປະດິດສ້າງອັນຍິ່ງໃຫຍ່ໃນການສ້າງສາການເມືອງປະຊາທິປະໄຕສັງຄົມນິຍົມຂອງຈີນ, ສອດຄ່ອງກັບກະແສພັດທະນາປະຊາທິປະໄຕຂອງໂລກ, ກໍ່ໄດ້ສະແດງໃຫ້ເຫັນສະຕິປັນຍາທາງການເມືອງຂອງພັກກອມມູນິດຈີນແລະປະຊາຊົນຈີນ, ມີກຳລັງຊີວິດອັນແຂງແຮງແລະມີອະນາຄົດອັນກວ້າງຂວາງ, ພວກເຮົາຕ້ອງທະນຸຖະໜອມທີ່ສຸດແລະຍຶດໝັ້ນຍາວນານ."

ສະພາປຶກສາການເມືອງປະຊາຊົນປະກອບດ້ວຍພັກກອມມູນິດຈີນ, 8 ພັກຝ່າຍປະຊາທິປະໄຕ, ບຸກຄົນປະຊາທິປະໄຕທີ່ບໍ່ຂຶ້ນກັບພັກຝ່າຍໃດ, ອົງການຈັດຕັ້ງປະຊາຊົນ, ຜູ້ແທນຂອງ 56 ຊົນເຜົ່າແລະວົງການຕ່າງໆຂອງຈີນ, ຜູ້ແທນພີ່ນ້ອງຮ່ວມຊາດຂອງເຂດບໍລິຫານພິເສດຮົງກົງ, ເຂດບໍລິຫານພິເສດມາກາວ, ເຂດໄຕ້ຫວັນ, ແລະຊາວຈີນຕ່າງດ້າວທີ່ກັບມາຢູ່ຈີນ, ພ້ອມດ້ວຍບຸກຄົນທີ່ເຊື້ອເຊີນພິເສດ, ມີພື້ນຖານສັງຄົມອັນກວ້າງຂວາງແລະມີລັກສະນະອະນຸໂລມທາງການເມືອງ. ພາລະບົດບາດແມ່ນ: ປຶກສາການເມືອງ, ຕິດຕາມແບບປະຊາທິປະໄຕ, ເຂົ້າຮ່ວມການປົກຄອງແລະປຶກສາການປົກຄອງ. ຫຼັງຈາກສ້າງຕັ້ງປະເທດຈີນໃໝ່ໂດຍສະເພາະແມ່ນຫຼັງຈາກດຳເນີນການປະຕິຮູບແລະໄຂປະຕູສູ່ພາຍນອກ 30 ປີມານີ້, ວຽກງານປຶກສາການເມືອງປະຊາຊົນໄດ້ນັບມື້ນັບຂະຫຍາຍຕົວແລະເຕີບໃຫຍ່ຂຶ້ນເລື້ອຍໆ. ປະຈຸບັນ, ອົງການປຶກສາການເມຶອງ 4 ລະດັບຄືລະດັບຊາດ, ລະດັບແຂວງ, ລະດັບນະຄອນແລະລະດັບເມືອງມີ 3.100 ກວ່າອົງການ, ກຳມະການສະພາປຶກສາການເມືອງລະດັບຕ່າງໆມີ 6 ແສນກວ່າຄົນ.

ໃນກອງປະຊຸມຂອງສະພາປຶກສາການເມືອງປະຊາຊົນ, ຄວາມເຫັນຕ່າງໆກໍ່ສາມາດກ່າວອອກໄດ້, ສິດປະຊາທິປະໄຕຂອງກຳມະການສະພາປຶກສາການເມືອງໄດ້ຮັບການປົກປ້ອງຢ່າງເຕັມສ່ວນ. ພັກກອມມູນິດຈີນແລະລັດຖະບານຈີນໄດ້ປຶກສາຫາລືກັບສະພາປຶກສາການເມືອງປະຊາຊົນເລື້ອຍໆກ່ຽວກັບບັນຫາສຳຄັນຕ່າງໆ, ເພື່ອຮັບຟັງຄວາມເຫັນແລະຂໍ້ສະເໜີຂອງເຂົາເຈົ້າ.

ທ່ານຫູຈີນທ່າວກ່າວເນັ້ນວ່າ, ສະພາປຶກສາການເມືອງປະຊາຊົນຕ້ອງຍຶດໝັ້ນເດີນຕາມເສັ້ນທາງພັດທະນາການເມືອງສັງຄົມນິຍົມທີ່ມີສີສັນພິເສດຂອງຈີນ:

"ການພັດທະນາການເມືອງປະຊາທິປະໄຕຂອງສັງຄົມນິຍົມຕ້ອງຖອດຖອນເອົາບົດຮຽນທີ່ມີຜົນດີຈາກອະລິຍະທຳການເມືອງຂອງມວນມະນຸດ, ແຕ່ເດັດຂາດບໍ່ໃຫ້ເຮັດຕາມເປົ້າແບບລະບອບການເມືອງຂອງຝ່າຍຕາເວັນຕົກ. ສະພາປຶກສາການເມືອງປະຊາຊົນຕ້ອງຕັ້ງໜ້າຊີ້ນຳແລະຊຸກຍູ້ໃຫ້ພັກຝ່າຍຕ່າງໆ, ອົງການຕ່າງໆ, ຊົນເຜົ່າຕ່າງໆ, ຊົນຊັ້ນຕ່າງໆແລະບຸກຄົນວົງການຕ່າງໆທີ່ເຂົ້າຮ່ວມສະພາປຶກສາການເມືອງປະຊາຊົນເພີ່ມຄວາມຮັບຮູ້ດ້ານການເມືອງແລະດ້ານແນວຄິດຕໍ່ສັງຄົມນິຍົມທີ່ມີສີສັນພິເສດຂອງຈີນເລື້ອຍໆ, ເພີ່ມທະວີຄວາມຕື່ນຕົວແລະຄວາມຍຶດໝັ້ນໃນການເດີນຕາມເສັ້ນທາງພັດທະນາການເມືອງສັງຄົມນິຍົມທີ່ມີສີສັນພິເສດຂອງຈີນ.

ການສະເໜີຍັດຕິແມ່ນວິທີສຳຄັນຂອງກຳມະການສະພາໃນການປະຕິບັດໜ້າທີ່ຂອງຕົນ. ໃນ 60 ປີຜ່ານມາ, ວຽກງານສະເໜີຍັດຕິຂອງສະພາປຶກສາການເມືອງປະຊາຊົນໄດ້ໝູນອ້ອມວຽກງານໃຈກາງຂອງພັກແລະລັດ, ຊ່ວຍຊູຍູ້ໜູນການພັດທະນາເສດຖະກິດສັງຄົມ, ເອົາໃຈໃສ່ຊີວິດການເປັນຢູ່ຂອງປະຊາຊົນ, ປະກອບຄວາມເຫັນທີ່ມີຜົນດີຢ່າງຕັ້ງໜ້າ, ໄດ້ຮັບຜົນສຳເລັດທີ່ດີເດັ່ນ. ຕາມສະຖິຕິ, ນັບແຕ່ສ້າງຕັ້ງສະພາປຶກສາການເມືອງປະຊາຊົນຈີນມານີ້, ກຳມະການສະພາປຶກສາການເມືອງທົ່ວປະເທດອັນໄພສານ, ສູນກາງພັກຝ່າຍປະຊາທິປະໄຕຕ່າງໆ, ສະຫະພັນອຸດສາຫະກຳການຄ້າທົ່ວປະເທດ, ແລະອົງການມະຫາຊົນທີ່ກ່ຽວຂ້ອງໄດ້ສະເໜີຍັດຕິ 8 ໝື່ນ 5 ພັນກວ່າສະບັບ, ຄວາມເຫັນແລະຂໍ້ສະເໜີຕ່າງໆໃນຍັດຕິໄດ້ສ່ອງແສງໃຫ້ເຫັນຢູ່ໃນການຕົກລົງນະໂຍບາຍສຳຄັນຂອງລັດແລະວຽກງານຂອງພາກສ່ວນຕ່າງໆແລ້ວ.

ຂ່າວ-ບົດທີ່ກ່ຽວຂ້ອງ

ຄຳເຫັນ