ລັດຖະບານໄທຮັບມືກັບການປະທ້ວງຂອງ"ກຸ່ມເສື້ອແດງ"ແລະ"ກຸ່ມເສື້ອເຫຼືອງ"ຢ່າງສຸຂຸມຮອບຄອບ
-----------------------------------------------------------------------------------------------------------------
ຕາມຂ່າວCRI:ພາຍຫຼັງກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດຫຼື"ກຸ່ມເສື້ອແດງ"ທີ່ສະໜັບສະໜູນທ່ານທັກສິນ ຊິນນະວັດ,ອະດີດນາຍົກລັດຖະມົນຕີແລະກຸ່ມພັນທະມິດປະຊາຊົນເພື່ອປະຊາທິປະໄຕຫຼື"ກຸ່ມເສື້ອເຫຼືອງ" ທີ່ຄັດຄ້ານທ່ານທັກສິນນັ້ນຕ່າງໄດ້ຈັດການໂຮມຊຸມນຸມ ປະທ້ວງຢ່າງຂະໜາດໃຫຍ່ໃນວັນທີ19ກັນຍານີ້ແລ້ວ,ວັນທີ20ກັນຍານີ້,ສະມາຊິກ33ຄົນຂອງ"ກຸ່ມເສື້ອເຫຼືອງ"ໄປປະທ້ວງຢູ່ເດີ່ນຜາສາດພະວິຫານທີ່ຕັ້ງຢູ່ເຂດຊາຍແດນໄທກຳປູເຈຍນັ້ນຢູ່ໃຕ້ການຄວບຄຸມສະຖານະການຂອງທະຫານໄທປະມານ300ຄົນ.
ຢູ່ແຫ່ງນັ້ນ,ທ່ານວິລະສົມຄວາມຄິດ,ຜູ່ຕາງໜ້າ"ກຸ່ມເສື້ອເຫຼືອງ"ໄດ້ອ່ານຖະແຫຼງການວ່າ,ອີງຕາມຜົນຂີດແບ່ງຊາຍແດນຂອງໄທກຳປູເຈຍໃນປີ1904,ຜາສາດພະວິຫານແລະເຂດອ້ອມຂ້າງແມ່ນດິນແດນຂອງໄທ,ກຸ່ມພັນທະມິດປະຊາຊົນເພື່ອປະຊາທິປະໄຕຂໍໃຫ້ລັດຖະບານກຳປູເຈຍຖອນປະຊາຊົນແລະທະຫານຂອງຕົນອອກຈາກເຂດນີ້ໂດຍດ່ວນ.ວັນທີ 19 ແມ່ນວັນເກີດການລັດຖະທະຫານຢູ່ໄທໃນປີ 2006 ຄົບຮອບ 3 ປີ.ໃນມື້ນັ້ນ, ກຸ່ມເສື້ອແດງທີ່ສະຫນັບສະຫນູນທ່ານທັກສິນ ຊິນນະວັດ,ອະດີດນາຍົກລັດຖະມົນຕີໄທໄດ້ຈັດການໂຮມຊຸມນຸມປະທ້ວງຢູ່ນະຄອນຫລວງບາງກອກທີ່ມີປະມານ 2 ຫມື່ນຄົນເຂົ້າຮ່ວມ.
ສ່ວນກຸ່ມເສື້ອເຫລືອງທີ່ເປັນຄູ່ປໍລະປັກຂອງກຸ່ມເສື້ອແດງເລືອກເອົາວັນນີ້ຈັດການເຄື່ອນໄຫວແມ່ນມີຈຸດປະສົງອັນເລິກແລບ.ນັກວິເຄາະຊີ້ອອກວ່າ, ການກະທຳແນວນີ້ດ້ານຫນຶ່ງແມ່ນເພີ່ມຄວາມກົດດັນໃຫ້ລັດຖະບານຊຸດປະຈຸບັນທີ່ນຳໂດຍທ່ານອະພິສິດ ເວດຊະຊີວະ,ເພື່ອສະແດງຄວາມປາຖະຫນາທີ່ປະຊາຊົນ ຈຳນວນຫນຶ່ງຫວັງຢາກໃຫ້ລັດຖະບານກູ້ເອົາດິນແດນທີ່ເກີດການພິພາດກັນຢູ່ຊາຍແດນໄທກຳປູເຈຍ,ອີກດ້ານຫນຶ່ງກໍ່ແມ່ນເພື່ອຫັນເຫຄວາມສົນໃຈຢູ່ຂອງພາຍໃນປະເທດທີ່ມີຕໍ່ການໂຮມຊຸມນຸມປະທ້ວງຂອງກຸ່ມເສື້ອແດງ.ແຕ່ວ່າ,ປັດຈຸບັນ, ສິ່ງຂົ່ມຂູ່ລັດຖະບານຂອງທ່ານອະພິສິດຕົ້ນຕໍຍັງແມ່ນການໂຮມຊຸມນຸມປະທ້ວງຕ້ານລັດຖະບານຂອງກຸ່ມເສື້ອແດງ.ເພື່ອເປັນການຕອບໂຕ້ຕໍ່ການໂຮມຊຸມນຸມປະທ້ວງທີ່ກຸ່ມເສື້ອແດງຈັດຂຶ້ນໃນວັນທີ 19 ກັນຍານີ້, ເລີ່ມແຕ່ວັນທີ 18 ເປັນຕົ້ນມາ, ລັດຖະບານໄທກໍ່ໄດ້ປະຕິບັດກົດຫມາຍຄວາມປອດໄພພາຍໃນປະເທດຢູ່ບໍລິເວນສຳນັກງານນາຍົກລັດ ຖະມົນຕີແລະຕືກລັດຖະສະພາ,ໄດ້ສົ່ງຕຳຫລວດ 6 ພັນກວ່າຄົນໄປເພີ່ມທະວີການຮັກສາຄວາມສະຫງົບ.ພ້ອມກັນນັ້ນ, ທ່ານອະພິສິດກໍ່ກ່າວວ່າ, ລັດຖະບານຈະບໍ່ແຊກແຊງການເຄື່ອນໄຫວໂຮມຊຸມນຸມປະທ້ວງທີ່ກຸ່ມເສື້ອແດງຈັດຂຶ້ນທີ່ຖືກກົດຫມາຍ, ຕຳຫລວດພຽງແຕ່ຮັກສາຄວາມເປັນລະບຽບຮຽບ ຮ້ອຍຂອງການຊຸມນຸມທໍ່ນັ້ນ. ສ່ວນຝົນທີ່ຕົກແຮງໃນວັນທີ 19 ກໍ່ໄດ້ຊ່ວຍໃຫ້ຕຳຫລວດຮັກສາຄວາມສະຫງົບໄດ້ດີຕື່ມ.ຕະຫລອດໄລຍະຈັດການຊຸມນຸມປະທ້ວງແມ່ນມີຄວາມສະຫງົບ,ແລະສິ້ນສຸດລົງໂດຍສັນຕິໃນຕອນຄ່ຳມື້ດຽວກັນ.
ຍ້ອນການໂຮມຊຸມນຸມປະທ້ວງຂອງກຸ່ມເສື້ອແດງເທື່ອນີ້ພໍດີແມ່ນເວລາທີ່ທ່ານອະພິສິດ ເວດຊາຊີວະ,ນາຍົກລັດຖະມົນຕີໄທ ຈະເດີນທາງໄປອາເມລິກາ ເພື່ອເຂົ້າຮ່ວມກອງປະຊຸມສະມັດຊາໃຫຍ່ສະຫະປະຊາຊາດ, ຫາງສຽງຂອງພາຍໃນປະເທດໄທ ເຄີຍຄາດເດົາໂດຍທົ່ວໄປວ່າ, ທ່ານອະພິສິດ ອາດຈະລົງຈາກຕຳແຫນ່ງລັກສະນະດຽວກັນກັບທ່ານທັກສິນ ຊິນນະວັດ, ອະດີດ ນາຍົກລັດຖະມົນຕີໄທ. ໃນເວລາ 3 ປີກ່ອນ ພໍດີແມ່ນເວລາທີ່ທ່ານທັກສິນ ຊິນນະວັດໄປເຂົ້າຮ່ວມກອງປະຊຸມສະມັດຊາໃຫຍ່ສະຫະປະຊາຊາດ, ໄທໄດ້ເກີດເຫດການລັດຖະປະຫານທີ່ເຮັດໃຫ້ທ່ານທັກສິນ ຊິນນະວັດ ຈຳເປັນຕ້ອງລົງຈາກຕຳແຫນ່ງແລ້ວຫນີໄປສູ່ຕ່າງປະເທດ, ຫຼັງຈາກນັ້ນມາທ່ານ ກໍ່ກັບຄືນປະເທດຍາກຫຼາຍ. ແຕ່ວ່າ, ໃນຫວ່າງມໍ່ໆນີ້,ພົນເອກອະນຸພົງ ເຜົ່າຈິນດາ,ຜູ່ບັນຊາການທະຫານບົກທີ່ເປັນບຸກຄົນສຳຄັນທີ່ກຳອຳນາດຂອງກອງທັບໄທ ໄດ້ຖະແຫຼງຈະແຈ້ງວ່າ, ໃນເວລາທ່ານອະພິສິດ ເວດຊາຊີວະ ຈະໄປຢ້ຽມຢາມຢູ່ຕ່າງປະເທດ,ກອງທັບໄທ ຈະບໍ່ກໍ່ລັດຖະປະຫານ. ແຕ່ເລື່ອງທີ່ການໂຮມຊຸມນຸມປະທ້ວງຂອງກຸ່ມເສື້ອແດງເທື່ອນີ້ໄດ້ສິ້ນສຸດລົງໂດຍສັນຕິນັ້ນ ສະແດງໃຫ້ເຫັນວ່າ, ພື້ນຖານການກຳອຳນາດຂອງລັດຖະບານອະພິສິດ ພວມນັບມື້ນັບຫນັກແຫນ້ນແລະຫມັ້ນຄົງກວ່າເກົ່າ.
ແຕ່ເມື່ອສັງເກດຈາກດ້ານນີ້ແລ້ວເຫັນວ່າ, ລັດຖະບານໄທຍັງພວມປະເຊີນກັບຫນ້າທີ່ອັນຮີບດ່ວນ ເພື່ອບັນລຸຄວາມປອງດອງທາງການເມືອງ ,ຊຸກຍູ້ຄວາມສາມັກຄີລະຫວ່າງປະຊາຊົນແລະຊຸກຍູ້ໃຫ້ປະເທດກ້າວໄປຫນ້າຕາມເສັ້ນທາງທີ່ພັດທະນາເປັນຢ່າງດີ. ຜູ່ນຳຂອງກຸ່ມເສື້ອແດງໄດ້ຖະແຫຼງວ່າ, ຈະຈັດຕັ້ງການປະທ້ວງຕ້ານລັດຖະບານອີກໃນອະນາຄົດ. ສ່ວນກຸ່ມເສື້ອເຫຼືອງກໍ ມີຄວາມເຫັນທີ່ແຕກຕ່າງກັນ ຕໍ່ນະໂຍບາຍຈຳນວນຫນຶ່ງຂອງລັດຖະບານທີ່ລວມມີທັງການດັດແກ້ລັດຖະທຳມະນູນ. ສະນັ້ນ, ສະຖານະການຂອງໄທໃນອະນາຄົດຍັງສັບສົນແລະມີການປ່ຽນແປງຕະຫຼອດ, ລັດຖະບານຊຸດປະຈຸບັນຕ້ອງໄດ້ຮັບມືກັບສະພາບດັ່ງກ່າວຢ່າງຮອບຄອບ.
