ຕາມຂ່າວcri:ໂດຍຕອບສະໜອງຄຳເຊີນຂອງທ່ານຮວນ ປົນສ໌ ເອັນຣີເລ ປະທານສະພາສູງຟີລິບປິນ,ຕອນບ່າຍວັນທີ19 ພະຈິກນີ້ເວລາທ້ອງຖິ່ນ,ທ່ານເຈຍຊິ້ງລິນ ປະທານສະພາເປິກສາການເມືອງປະຊາຊົນແຫ່ງຊາດຈີນຂີ່ຍົນເດີນທາງໄປຮອດມານີລາ ນະຄອນຫຼວງຂອງຟີລິບິນ,ເລີ່ມຢ້ຽມຢາມຟີລິບປິນຢ່າງເປັນທາງການແລະໄມຕີຈິດ.
ຢູ່ສະໜາມບິນ,ທ່ານເຈຍຊິ້ງລິນໄດ້ກ່າວຄຳປາໄສເປັນລາຍລັກອັກສອນ.ທ່ານກ່າວວ່າ,ຈີນກັບຟີລິບປິນແມ່ນປະເທດໃກ້ຄຽງທີ່ມີໄມຕີຈິດ,ມິດຕະພາບມູນເຊື້ອລະຫວ່າງປະຊາຊົນສອງຊາດມີປະຫວັດອັນຍາວນານແລ້ວ.ພາຍຫຼັງສ້າງຕັ້ງສາຍພົວພັນທາງການທູດ34ປີມານີ້,ຄວາມໄວ້ເນື້ອເຊື່ອໃຈທາງການເມືອງລະຫວ່າງສອງປະເທດໄດ້ເພີ່ມທະວີຢ່າງບໍ່ຢຸດຢັ້ງ,ການຮ່ວມມືໃນຂົງເຂດຕ່າງໆມີຜົນຫຼາຍໆ,ການໄປມາຫາສູ່ກັນຂອງປະຊາຊົນນັບມື້ນັບສະໜິດແໜ້ນ.ການພັວພັນລະຫວ່າງຈີນກັບຟີລິບປິນຂະຫຍາຍຕົວຢ່າງສະດວກ,ໄດ້ນຳເອົາຜົນປະໂຫຍດຕົວຈິງໃຫ້ແກ່ປະຊາຊົນສອງຊາດ,ກໍ່ມີຜົນດີຕໍ່ສັນຕິພາບ,ສະຖຽນລະພາບແລະການພັດທະນາຂອງພາກພື້ນນີ້.ທ່ານເຊື່ອວ່າການຢ້ຽມຢາມເທື່ອນີ້ຈະເພີ່ມທະວີຄວາມຮັບຮູ້ເຊິ່ງກັນແລະກັນ,ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນ,ຊຸກຍູ້ການພົວພັນທາງການຮ່ວມມືທາງຍຸດທະສາດລະຫວ່າງຈີນຟີລິບປິນຂະຫຍາຍຕົວຕື່ມອີກ.
ໃນໄລຍະຢ້ຽມຢາມ,ທ່ານເຈຍຊິ້ງລິນຈະພົບປະທ່ານນາງໂກຼເລຍ ມາກາປາກາ ອາໂຣໂຢ ປະທານາທິບໍດີຟີລິບປິນ,ທ່ານຮວນ ປົນສ໌ ເອັນຣີເລ ປະທານສະພາສູງແລະທ່ານນາງມາເຣຍ ອາເມລີຕາ ກາລີມບາສ ວີລາໂຣຊາ ວ່າການແທນປະທານສະພາຕ່ຳ,ລົງເລິກແລກປ່ຽນຄວາມເຫັນກ່ຽວກັບບັນຫາທີ່ສອງຝ່າຍເອົາໃຈໃສ່ຮ່ວມກັນ.
