ໃນໄລຍະຈັດງານວາງສະແດງສິນຄ້າຈີນ-ອາຊຽນຄັ້ງທີ 8, ທ່ານສົມສະຫວາດ ເລັ່ງສະຫວັດຮອງນາຍົກລັດຖະມົນຕີແຫ່ງສປປລາວໃຫ້ກຽດຕອບຄຳສຳພາດຂອງນັກຂ່າວCRI, ກ່ຽວກັບຈີນລາວ, ລາວຈີນສ້າງສາຍພົວພັນທາງການທູດຄົບຮອບ 50 ປີ, ໂດຍທີ່ທ່ານໄດ້ກ່າວຫວນຄືນ 50 ປີທີ່ຈີນລາວລາວຈີນສ້າງສາຍພົວພັນທາງການທູດ, ແລະເສັ້ນທາງພັດທະນາໃນໄລຍະ 20 ປີທີ່ຈີນອາຊຽນສ້າງສາຍພົວພັນຄູ່ເຈລະຈາມານີ້, ຫຼຽວເບິ່ງອະນາຄົດການຣ່ວມມືມິດຕະພາບລະຫວ່າງລາວຈີນຈີນລາວ, ແລະໄດ້ກ່າວຊົມເຊີຍການປະກອບ ສ່ວນຂອງວິທະຍຸສາກົນແຫ່ງປະເທດຈີນພະແນກພາສາລາວເພື່ອຊຸກຍູ້ມິດຕະພາບລະຫວ່າງສອງປະເທດ. ຕໍ່ໄປເຊີນຟັງລາຍງານລະອຽດ.
ລາວຈີນໄດ້ສ້າງສາຍພົວພັນທາງການທູດເມື່ອປີ 1961, ໃນ 50 ປີມານີ້, ລັດຖະບານແລະປະຊາຊົນສອງປະເທດໄດ້ເພີ່ມທະວີຄວາມເຂົ້າໃຈກັນ, ລົງເລິກຄວາມໄວ້ເນື້ອເຊື່ອໃຈເຊິ່ງກັນແລະກັນແລະເປີດກວ້າງການຮ່ວມມືມິດຕະພາບຢ່າງບໍ່ຢຸດຢັ້ງ. ຫວນຄືນໄລຍະຫາກໍ່ສ້າງສາຍພົວພັນທາງການທູດ, ລັດຖະບານຈີນໄດ້ສົ່ງຄະນະຜູ້ແທນເສດຖະກິດວັດທະນະທໄປປະຈຳແຂວງຊຽງຂວາງຂອງລາວ, ສະໜັບສະໜູນແລະຊ່ວຍເຫຼືອການຕໍ່ສູ້ປົດປ່ອຍຊາດຂອງປະຊາຊົນລາວໃນການຕ້ານການຮຸກຮານແລະຍາດເອົາຄວາມເປັນເອກະລາດແຫ່ງຊາດດ້ວຍການປະຕິບັດຕົວຈິງ. ໃນເວລາເວົ້າເຖິງຂະບວນການທີ່ສອງປະເທດສ້າງສາຍພົວພັນທາງການທູດ, ທ່ານສົມສະຫວາດ ເລັ່ງສະຫວັດກ່າວວ່າ:
"ຈຸດເວລາສ້າງຕັ້ງສາຍພົວພັນກັນນັ້ນແມ່ນ 1961, ໃນເວລານັ້ນປະຊາຊົນລາວກຳລັງຕໍ່ສູ້ຕ້ານຈັກກະພັດຮຸກຮານ, ແລະການສ້າງສາຍພົວພັນການທູດລາວຈີນນີ້, ເຮັດໃຫ້ການຊ່ວຍເຫຼືອຂອງປະເທດຈີນແກ່ການຕໍ່ສູ້ຂອງປະຊາຊົນລາວເປັນອັນຖືກຕ້ອງຕາມກົດໝາຍ, ເຮັດໃຫ້ກຳລັງປະຕິວັດລາວໄດ້ເຕີບໃຫຍ່ເຂັ້ມແຂງຂຶ້ນ. ຈົນໄດ້ຮັບໄຊຊະນະໃນປີ 1975."
ໃນໄລຍະໃໝ່ທີ່ຂະຫຍາຍການພົວພັນລະຫວ່າງລາວຈີນ, ສອງປະເທດອີງຕາມຈິດໃຈທີ່"ໝັ້ນທ່ຽງຍາວນານ, ເປັນບ້ານໃກ້ເຮືອນຄຽງທີ່ດີຕໍ່ກັນ, ໄວ້ເນື້ອເຊື່ອໃຈກັນແລະຮ່ວມມືກັນຢ່າງຮອບດ້ານ"ເປັນ"ເພື່ອນບ້ານໃກ້ຄຽງທີ່ດີ, ໝູ່ເພື່ອນທີ່ດີ, ສະຫາຍທີ່ດີແລະຄູ່ຮ່ວມມືທີ່ດີ". ສອງຝ່າຍໄດ້ຮັບໝາກຜົນອັນອຸດົມສົມບູນໃນການຮ່ວມມືໃນຂົງເຂດເສດຖະກິດ, ວັດທະນະທຳ, ການກໍ່ສ້າງພື້ນຖານໂຄງລ່າງແລະຊັບພະຍາກອນມະນຸດດັ່ງນີ້ເປັນຕົ້ນ.
"50 ປີແຫ່ງການສ້າງສາຍພົວພັນການທູດລາວຈີນນີ້ມີຄວາມໝາຍປະຫວັດສາດ, ໄດ້ນຳຜົນປະໂຫຍດມາສູ່ປະເທດລາວຢ່າງຫຼວງຫຼາຍ, ປີ 2009, ການນຳສູງສຸດຂອງສອງພັກສອງລັດຈຶ່ງຕົກລົງຍົກລະດັບການພົວພັນກັນຂຶ້ນເອີ້ນວ່າຄູ່ຮ່ວມມືຍຸດທະສາດຮອດ້ານ, ປີນີ້ແມ່ນປີທຳອິດແຫ່ງການເລີ່ມຕົ້ນປະຕິບັດແຜນການພັດທະນາເສດຖະກິດສັງຄົມ 5 ປີຄັ້ງທີ 7, ແລະປະເທດຈີນກໍ່ແມ່ນປະຕິບັດແຜນພັດທະນາເສດຖະກິດສັງຄົມ 5 ປີຄັ້ງທີ 12, ຕາມທີ່ຜູ້ນຳທີ່ຕົກລົງກັນໃນໂອກາດປະທານຈູມມາລີໄປຢ້ຽມຢາມປະເທດຈີນຫວ່າງມໍ່ໆມານີ້, ຜູ້ນຳທາງສອງໄດ້ຕົກລົງວ່າເອົາແຜນພັດທະນາເຂົ້າປະສັນສົມທົບກັນ, ອັນນັ້ນແມ່ນເປັນການສະແດງອອກເຖິງການຮ່ວມມືກັນທີ່ດີແລ້ວ"
ໃນເວລາໃຫ້ສຳພາດຕໍ່ນັກຂ່າວ, ທ່ານສົມສະຫວາດ ເລັ່ງສະຫວັດຍັງກ່າວວ່າ, ຈີນໃນຖານະເປັນປະເທດອາຊີທີ່ເສດຖະກິດພັດທະນາໄວ, ໄດ້ເສີມຂະຫຍາຍບົດບາດອັນໃຫຍ່ຫຼວງເຂົ້າໃນວຽກງານເສດຖະກິດການຄ້າຂອງພາກພື້ນ. ໃນໄລຍະ 20 ປີທີ່ຈີນ-ອາຊຽນສ້າງສາຍພົວພັນຄູ່ເຈລະຈາ, ສອງຝ່າຍໄດ້ທຳຄວາມພະຍາຍາມຢ່າງບໍ່ຢຸດຢັ້ງເພື່ອຊຸກຍູ້ການພັດທະນາຂອງເສດຖະກິດພາກພື້ນເຊື່ອມໂຍງເຂົ້າກັນ, ແລະໄດ້ສ້າງເຂດການຄ້າເສລີຈີນ-ອາຊຽນທີ່ມີປະຊາກອນຫຼາຍທີ່ສຸດໃນໂລກໃນປີ 2010 ຜ່ານມາ. ຕົວເລກສະຖິຕິສະແດງໃຫ້ເຫັນວ່າ, ຈີນໄດ້ກາຍເປັນຄູ່ການຄ້າໃຫຍ່ອັນດັບທີໜຶ່ງແລະຈຸດສົ່ງອອກສິນຄ້າໃຫຍ່ທີໜຶ່ງຂອງອາຊຽນ.
"ການຮ່ວມມືລະຫວ່າງຈີນອາຊຽນນີ້, ກໍ່ໄດ້ປະກອບສ່ວນເຂົ້າໃນການພັດທະນາເສດຖະກິດຂອງພວກເຮົາທັງ 10 ປະເທດນັ້ນ, ຕົວຢ່າງເວົ້າແຕ່ດ້ານການຄ້າ, ມາຮອດປະຈຸບັນນີ້ກໍ່ໄດ້ຮອດ 300 ກວ່າຕື້ແລ້ວ, ແລະການລົງທຶນຂອງຈີນນີ້ກໍ່ນັບມື້ນັບເພີ່ມຂຶ້ນ, ພວກເຮົາຄິດວ່າການຮ່ວມມືອາຊຽນຈີນນີ້ມີອະນາຄົດ, ແລະຈະນຳຜົນປະໂຫຍດມາໃຫ້ສອງຝ່າຍ."
ໃນຕອນທ້າຍຂອງການສຳພາດທ່ານສົມສະຫວາດ ເລັ່ງສະຫວັດກ່າວຕໍ່ນັກຂ່າວວ່າ, ທ່ານກໍ່ແມ່ນຜູ້ຟັງຜູ້ໜຶ່ງຂອງCRI, ເລີ່ມແຕ່ໄລຍະສົງຄາມຮຸກຮານລາວທ່ານກໍ່ໄດ້ຮັບຟັງລາຍການພາສາລາວຂອງວິທະຍຸສາກົນແຫ່ງປະເທດຈີນ. ທ່ານໄດ້ຕີລາຄາສູງວ່າCRIໄດ້ເສີມຂະຫຍາຍບົດບາດອັນຕັ້ງໜ້າໃນການເຜີຍແຜ່ມິດຕະພາບແລະເພີ່ມທະວີການແລກປ່ຽນລະຫວ່າງຈີນກັບລາວ.
"CRIນີ້ຂ້າພະເຈົ້າໄດ້ຕິດຕາມມາເປັນຫຼາຍສິບປີແລ້ວ, ອັນເຫັນວ່າCRIໄດ້ຂໍ້ມູນທີ່ເປັນຜົນປະໂຫຍດຫຼາຍອັນກ່ຽວກັບຂ່າວໂລກ, ສາລະຂະດີໜ້າຮູ້ຈັ່ງຊີ້ນີ້ລະ, ຊັ້ນເວົ້າແລ້ວCRIນີ້ກໍ່ໄດ້ປະກອບສ່ວນເຂົ້າໃນການເຮັດໃຫ້ປະຊາຊົນສອງຊາດມີຄວາມເຂົ້າໃຈກັນເລິກເຊິ່ງຂຶ້ນ."
