ວັນທີ 24 ສິງຫານີ້, ຢູ່ທີ່ປັກກິ່ງ, ທ່ານທອງລຸນ ສີສຸລິດ, ຮອງນາຍົກລັດຖະມົນຕີ, ທັງເປັນລັດຖະມົນຕີວ່າການກະຊວງການຕ່າງປະເທດລາວທີ່ກຳລັງຢ້ຽມຢາມຈີນ ໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ, ທ່ານໄດ້ຕີລາຄາສູງຕໍ່ໝາກຜົນຂອງການພົວພັນທາງການທູດລະຫວ່າງ ຈີນລາວໃນ 50 ປີທີ່ຜ່ານມາ, ແລະເຫັນວ່າ, ການພົວພັນແລະການຮ່ວມມືຮອບດ້ານລະຫວ່າງລາວຈີນໄດ້ຂະຫຍາຍຕົວຢ່າງຕໍ່ເນື່ອງເຖິງຈຸດສູງສຸດ.
ໂດຍຕອບສະໜອງຕາມຄຳເຊີນຂອງທ່ານຢຽງເຈຍຊື, ທ່ານທອງລຸນ ສີສຸລິດມາຢ້ຽມຢາມຈີນຢ່າງເປັນທາງການແຕ່ວັນທີ 22 ຫາວັນທີ 26 ສິງຫານີ້, ນີ້ແມ່ນເທື່ອທຳອິດທີ່ທ່ານມາຢ້ຽມຢາມຈີນນັບແຕ່ທ່ານໄດ້ຮັບການແຕ່ງຕັ້ງໃຫ້ສືບຕໍ່ດຳລົງຕຳແໜ່ງເປັນຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຕ່າງປະເທດລາວເປັນຕົ້ນມາ.
