ວັນທີ 20 ພະຈິກນີ້, ກອງປະຊຸມນັກທຸລະກິດຈີນຂອງໂລກຄັ້ງທີ 10 ໄດ້ຈັດຂຶ້ນຢູ່ນະຄອນຫຼວງມານີລາຂອງຟິລິບປິນ.ທ່ານເຈຍຊິ້ງຫລິນ,ປະທານສະພາປຶກສາການເມືອງປະຊາຊົນແຫ່ງຊາດຈີນໄດ້ກ່າວຄຳປາໄສໃນພິທີໄຂປະຊຸມ.ທ່ານໄດ້ຕີລາຄາສູງຕໍ່ຊາວຈີນທີ່ອາໄສຢູ່ຕ່າງປະເທດທັງຫຼາຍທີ່ປະກອບສ່ວນອັນດີເດັ່ນເຂົ້າໃນການພັດທະນາເສດຖະກິດສັງຄົມຂອງຈີນ, ແລະຫວັງຢາກໃຫ້ເຂົາເຈົ້າລົງເລິກແລກປ່ຽນແລະຮ່ວມມືກັນ, ຊຸກຍູ້ໃຫ້ຕ່າງຝ່າຍຕ່າງມີຜົນປະໂຫຍດ, ເພື່ອປະກອບສ່ວນຫຼາຍກວ່າເກົ່າ ເຂົ້າໃນຄວາມຈະເລີນແລະກ້າວຫນ້າຂອງຈີນພ້ອມທັງສ້າງສັນຕິພາບແລະການພັດທະນາຂອງໂລກ.
ໃນຄຳປາໄສ, ທ່ານເຈຍຊິ້ງຫລິນໄດ້ສະແດງຄວາມອວຍພອນຕໍ່ກອງປະຊຸມເທື່ອນີ້,ແລະຢືນຢັນຢ່າງເຕັມສ່ວນຕໍ່ບົດບາດສຳຄັນຂອງກອງປະຊຸມນັກທຸລະກິດຈີນຂອງໂລກ.ທ່ານກ່າວວ່າ:
"ກອງປະຊຸມນັກທຸລະກິດຈີນໂລກໄດ້ສະໜອງຊ່ອງທາງສຳຄັນທີ່ເພີ່ມຄວາມເຂົ້າໃຈແລະເພີ່ມທະວີການແລກປ່ຽນແລະຮ່ວມມືໃຫ້ແກ່ນັກທຸລະກິດຈີນໃນທົ່ວໂລກ, ໄດ້ເສີມຂະຫຍາຍບົດບາດສຳຄັນໃນດ້ານການຊຸກຍູ້ການພັດທະນາເສດຖະກິດຂອງປະເທດແລະເຂດແຄວ້ນທີ່ຈັດກອງປະຊຸມ, ຈີນແລະປະເທດທີ່ມີນັກທຸລະກິດຈີນ, ເພີ່ມທະວີອິດທິພົນຂອງຊາວຈີນໃນສາກົນ."
ປັດຈຸບັນ, ຊາວຈີນຕ່າງດ້າວທີ່ແຈກຢາຍຢູ່ແຫ່ງຕ່າງໆຂອງໂລກມີ 30 ກວ່າລ້ານຄົນ. ໃນປັດຈຸບັນທີ່ໂລກາພິວັດພັດທະນາຂຶ້ນ, ການປັບປຸງຊັບພະຍາກອນແລະການຮ່ວມມືກັນລະຫວ່າງນັກທຸລະກິດຈີນໃນທົ່ວໂລກແຮ່ງມີຄວາມສຳຄັນກວ່າເກົ່າ.
ກອງປະຊຸມນັກທຸລະກິດຈີນໂລກສ້າງຕັ້ງຂຶ້ນໃນປີ 1991, ແມ່ນກອງປະຊຸມການຄ້າຊາວຈີນລະດັບສູງພຽງກອງປະຊຸມດຽວທີ່ທົ່ວໂລກຮັບຮູ້, ຈັດຂຶ້ນທຸກໆ 2 ປີ, ແລະໄດ້ຈັດຂຶ້ນຢູ່ອາຊີ, ອາເມລິກາເໜືອແລະທະວີບໂອເຊອານີແລ້ວ. ກອງປະຊຸມນັກທຸລະກິດຈີນໂລກເທື່ອນີ້ມີຫົວຂໍ້ວ່າ"ເພີ່ມທະວີການພົວພັນລະຫວ່າງນັກທຸລະກິດຈີນ, ຊຸກຍູ້ໃຫ້ໂລກຈະເລີນ" ນັກທຸລະກິດຊາວຈີນປະມານ 3000 ຄົນທີ່ມາຈາກ 20 ກວ່າປະເທດໄດ້ປຶກສາຫາລືຢ່າງກວ້າງຂວາງກ່ຽວກັບການປະຕິຮູບຂະແໜງການທະນາຄານສາກົນແລະການເງິນ, ການຮ່ວມມືລະຫວ່າງລັດຖະບານກັບເອກະຊົນຊຸກຍູ້ໃຫ້ວິສາຫະກິດນັກທຸລະກິດຈີນພັດທະນາ, ທິດທາງໃນອະນາຄົດຂອງຂະແໜງການຜະລິດແລະຂະແໜງການບໍລິການນັກທຸລະກິດຈີນໃນທົ່ວໂລກເປັນຕົ້ນ.
ໃນພິທີໄຂກອງປະຊຸມ, ທ່ານເຈຍຊິ້ງຫລິນຍັງໄດ້ແນະນຳຂະບວນວິວັດພັດທະນາອັນຮຸ່ງເຮືອງຂອງປະເທດຈີນໃຫມ່ນັບແຕ່ສ້າງຕັ້ງຂຶ້ນ 60 ປີມາ.ທ່ານກວ່າ, ໃນຜົນສຳເລັດນັ້ນ, ຊາວຈີນທີ່ອາໃສຢູ່ຕ່າງປະເທດຫລາຍສິບລ້ານຄົນກໍ່ມີການປະກອບສ່ວນອັນພົ້ນເດັ່ນ,.ໂລກໃນປັດຈຸບັນພວມຢູ່ໃນໄລຍະປະຕິຮູບແລະປັບປຸງຄືນໃຫມ່ຢ່າງໃຫຍ່,ຈີນພວມພົບກັບໂອກາດປະຫວັດສາດແລະສິ່ງທ້າທາຍອັນຂ້ຽວຂາດທີ່ບໍ່ເຄີຍມີມາກ່ອນ,ພວມກ້າວສູ່ຈຸດເລີ່ມຕົ້ນປະຫວັດສາດອັນໃຫມ່.ການພັດທະນາຂອງຈີນຈະປະກອບສ່ວນຫລາຍກວ່າເກົ່າໃຫ້ແກ່ທົ່ວໂລກ,ແລະຈະນຳເອົາໂອກາດທີ່ນັບມື້ນັບຫລາຍໄປໃຫ້ທົ່ວໂລກ,ທັງໄດ້ສະຫນອງເວທີທີ່ກວ້າງຂວາງກວ່າເກົ່າໃຫ້ແກ່ຊາວຈີນທີ່ອາໃສຢູ່ຕ່າງປະເທດທັງຫລາຍເຊິ່ງລວມທັງນັກທຸລະກິດຈີນທີ່ຢູ່ຕ່າງປະເທດ.ສະນັ້ນ, ທ່ານໄດ້ຝາກຄວາມຫວັງໄປເຖິງຊາວຈີນທີ່ຢູ່ຕ່າງປະເທດຄືດັ່ງນີ້:
ຫວັງວ່າຊາວຈີນທີ່ຢູ່ຕ່າງປະເທດທີ່ມີຈຳນວນຫລວງຫລາຍຈະເປັນເຈົ້າການເຊື່ອມໂຍງເຂົ້າກັບສັງຄົມທ້ອງຖິ່ນນັ້ນ, ຊຸກຍູ້ເສດຖະກິດແລະສັງຄົມຢູ່ບ່ອນທີ່ອາໃສນັ້ນພັດທະນາຂຶ້ນເລື້ອຍໆ,ຄວນນຳໃຊ້ທຶນຢ່າງຫລວງຫລາຍ,ເຕັກນິກທີ່ກ້າວຫນ້າແລະຕາຫນ່າງການຄ້າທີ່ແຜ່ຂະຫຍາຍຢູ່ໃນທົ່ວໂລກຢ່າງເຕັມທີ່,ໄປລົງທຶນຢູ່ຈີນ,ສະຫນັບສະຫນູນແລະເຂົ້າຮ່ວມການສ້າງສາທັນສະໄຫມຂອງຈີນດ້ວຍຫລາຍຮູບແບບ;ຕ້ອງຊຸກຍູ້ການແລກປ່ຽນແລະການໄປມາຫາສູ່ກັນລະຫວ່າງສອງຝັ່ງຊ່ອງແຄບໄຕ້ຫວັນ, ພະຍາຍາມຊຸກຍູ້ການໂຮມຈີນເປັນເອກະພາບກັນໂດຍສັນຕິ;ຕ້ອງຊຸກຍູ້ການແລກປ່ຽນແລະຮ່ວມມືກັນລະຫວ່າງຈີນກັບປະເທດຕ່າງໆໃນໂລກ,ເພີ່ມມິດຕະພາບລະຫວ່າງປະຊາຊົນຈີນແລະທົ່ວໂລກຂຶ້ນເລື້ອຍໆ.
