ວັນທີ 23 ພະຈິກນີ້, ແຂວງມາກິນດານາວທີ່ພາກໃຕ້ຂອງຟີລິບປີນ ໄດ້ເກີດເຫດການ ທີ່ກຸ່ມປະກອບອາວຸດລັກພາຕົວແລະຂ້າຕົວປະກັນ,ໃນເຫດການດັ່ງກ່າວມີ40ຄົນທີ່ລວມທັງມີນັກຂ່າວ20ຄົນຖືກລັກພາຕົວ,ແລະຢ່າງຫນ້ອຍມີ36ຄົນຖືກສັງຫານ, ໃນນັ້ນຫຼາຍຄົນຖືກຕັດຫົວ.ນີ້ແມ່ນເຫດການໃຊ້ຄວາມຮຸນແຮງທາງການເມືອງທີ່ຫນັກຫນ່ວງທີ່ສຸດທີ່ເກີດຂຶ້ນຢູ່ພາກໃຕ້ຂອງຟິລິບປິນ,ແລະເປັນສັນຍານເຕືອນໄພຕໍ່ບັນຫາຄວາມຫມັ້ນຄົງຂອງຟິລິບປິນອີກເທື່ອຫນຶ່ງ.
ເຫດການລັກພາຕົວໄດ້ເກີດຂຶ້ນຢູ່ເມືອງບູລູອັນຂອງແຂວງມາກິນດານາວ, ຫ່າງຈາກນະຄອນຫຼວງມານີລາ 930 ກິໂລແມັດ. ເພື່ອເຂົ້າຮ່ວມການເລືອກຕັ້ງເຈົ້າແຂວງປີ 2010,ວັນທີ23ພະຈິກນີ້,ທ່ານອິສມາເອວ ແມນກູດາດາຕູ ,ເຈົ້າເມືອງເມືອງດັ່ງກ່າວ ໄດ້ມອບໃຫ້ນາງເຈນາລຽນ,ພັນລະຍາຂອງທ່ານພ້ອມດ້ວຍຄອບຄົວ,ຜູ່ຊ່ອຍແລະບຸກຄົນສຳຄັນວົງການການເມືອງປະມານ20ຄົນ, ໄປສົ່ງເອກະສານໃຫ້ຫ້ອງການຄະນະກຳມະການເລືອກຕັ້ງຂອງທ້ອງຖິ່ນ.ໃນຄົນເຫຼົ່ານີ້ ຍັງມີນັກຂ່າວ 20 ຄົນ. ໃນເວລາເດີນທາງ,ຂະບວນລົດໄດ້ຖືກກຸ່ມປະກອບອາວຸດປິດລ້ອມ, ແລະຖືກລັກພາຕົວ.ຜູ່ເຫັນເຫດການບອກວ່າ,ກຸ່ມປະກອບອາວຸດແຕ່ງຕົວຄືທະຫານລາດກອງຫຼອນທ້ອງຖິ່ນ,ມີປະມານ100ຄົນ,ທຸກໆຄົນຖືປຶນຄົບມື. ແຕ່ວ່າ ,ມາຮອດປະຈຸບັນ, ຕົວເລກດັ່ງກ່າວຍັງບໍ່ໄດ້ຮັບການຢືນຢັນຈາກອົງການປົກຄອງທ້ອງຖິ່ນ.
ຫຼັງຈາກເກີດເຫດການດັ່ງກ່າວແລ້ວບໍ່ດົນ, ທະຫານລັດຖະບານຟີລິບປີນໄດ້ເຂົ້າໄປກອບກູ້ຕົວປະກັນໂດຍທັນທີ. ແຕ່ວ່າໃນເວລາທີ່ທະຫານລັດຖະບານຟິລິບປີນ ໄປຮອດສະຖານທີ່ເກີດເຫດ, ໄດ້ພົບສົບຂອງຕົວປະກັນ21ຄົນທີ່ຖືກສັງຫານແລ້ວ.ຄຽງຄູ່ກັບພະຍາຍາມກອບກູ້,ຕອນຄ່ຳວັນທີ23ພະຈິກນີ້,ທະຫານຟິລິບປິນໄດ້ຢືນຢັນວ່າ, ໃນຕົວປະກັນທີ່ຖືກລັກພາຕົວ ມີ36ຄົນຖືກສັງຫານແລ້ວ, ໃນນັ້ນມີພັນລະຍາແລະນ້ອງຊາຍຂອງທ່ານແມນກູດາດາຕູ . ທ່ານອານເຟຼໂດ ຄາອິຕັນ,ຜູ່ຮັບຜິດຊອບຂອງທະຫານທ້ອງຖິ່ນເຜີຍໃຫ້ຮູ້ວ່າ, ຜູ່ເສຍຊີວິດຈຳນວນຫນຶ່ງຖືກກຸ່ມປະກອບອາວຸດຕັດຫົວ.
ເຫດການລັກພາຕົວແລະຕົວປະກັນຖືກຂ້າຕາຍນັ້ນເຮັດໃຫ້ລັດຖະບານຟິລິບປິນຄຽດແຄ້ນທີ່ສຸດ.ນາງກຼໍເລຍ ອາໂລໂຢ,ປະທານາທິບໍດີຟິລິບ ປິນອອກຄຳສັ່ງໃນວັນທີ23ພະຈິກນີ້ວ່າ,ຈະໃຊ້ທຸກວິທີແລະເຮັດສຸດຄວາມສາມາດເພື່ອຈັບຕົວຄາດຕະກອນມາລົງໂທດໃຫ້ໄດ້. ທີ່ປຶກສາວຽກງານເກາະມິນດານາວຂອງປະທານາທິບໍດີຟິລິບປິນຈົນໄດ້ເຕືອນໃຫ້ປະທາ ນາທິບໍດີຟິລິບປິນປະຕິບັດພາວະສຸກເສີນຢູ່ແຂວງມາກິນດານາວ,ເພື່ອປ້ອງກັນບໍ່ໃຫ້ເກີດເຫດການນອງເລືອດໃຊ້ຄວາມຮຸນແຮງອີກ.
ໃນຕອນຄ່ຳມື້ດຽວກັນ,ໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງມະນິລາ,ທ່ານໂຣມິໂອ ບຼອນ,ໂຄສົກກອງທັບຟິລິບປິນເຜີຍໃຫ້ຮູ້ວ່າ,ການສືບສວນເບື້ອງຕົ້ນເຫັນວ່າ,ແມ່ນຜູ່ປະ ກອບອາວຸດກຸ່ມໜຶ່ງທີ່ມີການພົວພັນກັບທ່ານອຳປາທູອັນ,ເຈົ້າແຂວງແຂວງມາກິນດານາວ ຜູ່ປະຈຸບັນນັ້ນກໍ່ເຫດການລັກພາຕົວເທື່ອນີ້,ມີຈຸດປະສົງເພື່ອສະກັດກັ້ນບໍ່ໃຫ້ທ່ານແມນກູດາດາຕູເຂົ້າຮ່ວມການເລືອກຕັ້ງເຈົ້າແຂວງແຂວງມາກິນດານາວ.ຕາມສື່ມວນຊົນຟິລິບປິນ ລາຍງານວ່າ,ທ່ານອຳປາທູອັນມີກອງປະກອບອາວຸດສ່ວນຕົວກອງໜຶ່ງທີ່ມີປະມານ100ຄົນ,ແມ່ນລູກຊາຍຂອງທ່ານເປັນຫົວໜ້າກອງນີ້.ສ່ວນທ່ານແມນກູດາດາຕູກໍແມ່ນຫົວໜ້າຂອງຝ່າຍທ້ອງຖິ່ນໜຶ່ງ,ທີ່ບໍ່ເປັນມິດກັບທ່ານເຈົ້າແຂວງອຳປາທູອັນຕະຫຼອດມາ.
ມາຮອດປັດຈຸບັນ, ທ່ານອຳປາທູອັນຍັງບໍ່ໄດ້ສະແດງຄຳເຫັນຕໍ່ເຫດການລັກພາຕົວ. ແຕ່ນັກວິເຄາະເຫັນວ່າ,ນີ້ແມ່ນເຫດການເສົ້າສະຫຼົດໃຈຍ້ອນຄວາມຂັດແຍ່ງຕ້ານການເມືອງຢ່າງຈະແຈ້ງ, ແຕ່ການເກີດເຫດການດັ່ງກ່າວແມ່ນກ່ຽວພັນເຖິງການເລືອກຕັ້ງທົ່ວໄປຂອງຟີລິບປີນທີ່ຈະຈັດຂຶ້ນໃນປີ 2010 ໂດຍກົງ.
ເຫດການລັກພາຕົວເທື່ອນີ້ໄດ້ເປັນສັນຍານເຕືອນໄພຕໍ່ວຽກງານຄວາມປອດໄພພາຍໃນຂອງລັດຖະບານຟີລິບປີນອີກເທື່ອໜຶ່ງ. ຕາມຕົວເລກທີ່ອົງການຕ້ານອາຊະຍາກຳຂອງປະຊາຊົນຟີລິບປີນແຫ່ງໜຶ່ງທີ່ປະກາດໃນຫວ່າງມໍ່ໆນີ້, ໜັບແຕ່ຕົ້ນປີນີ້ມາຄະດີລັກພາຕົວຂອງຟີລິບປີນໄດ້ເພີ່ມຂຶ້ນຢ່າງຫຼວງຫຼາຍ,ຈຳນວນຄະດີທີ່ບັນທຶກໄດ້ໄດ້ຫຼາຍກວ່າຈຳນວນສະເລ່ຍຕໍ່ປີໃນ4ປີແລ້ວທີ່ຜ່ານມາ. ຕາມສະຖິຕິບໍ່ຄົບຖ້ວນ,ມາຮອດປັດຈຸບັນ, ໃນປີ2009ຟີລິບປີນຢ່າງໜ້ອຍໄດ້ມີ85ຄົນຖືກລັກພາຕົວແລ້ວ, ໃນນັ້ນມີຫຼາຍກວ່າ50% ໄດ້ເກີດຂຶ້ນຢູ່ເຂດມິນດານາວທີ່ພາກໃຕ້ຂອງຟີລິບປີນເຊິ່ງເປັນເຂດທີ່ບໍ່ສະຫງົບ.
ສະຖານະການຟີລິບປີນໃນປີທີ່ຜ່ານມາກໍ່ສະແດງໃຫ້ເຫັນວ່າ, ໃນປີທີ່ກ່ອນຈະຈັດຕັ້ງການເລືອກຕັ້ງທົ່ວໄປ,ອາຊະຍະກຳເຊັ່ນລັກພາຕົວເປັນຕົ້ນລ້ວນແຕ່ຈະເພີ່ມຂຶ້ນກ່ອນຈະຮອດປີເລືອກຕັ້ງ.ສິ່ງທີ່ຈະແຈ້ງນັ້ນຄື,ຈະເຮັດແນວໃດເພື່ອເຮັດໃຫ້ສະຖານະການຄວາມປອດໄພໝັ້ນທ່ຽງກ່ອນການເລືອກຕັ້ງທົ່ວໄປທີ່ຈະຈັດຂຶ້ນໃນປີ 2010 ແມ່ນວຽກງານດ່ວນທີ່ສຸດຂອງລັດຖະບານອາໂຣໂຢ.
