ກອງປະຊຸມການຄ້າດ້ານບໍລິການຈີນຄັ້ງທີສອງທີ່ຈັດຂຶ້ນເປັນເວລາສອງວັນຢູ່ປັກກິ່ງໄດ້ອັດລົງໃນວັນທີ 25 ພະຈິກນີ້.ເຈົ້າຫນ້າທີ່ແລະຜູ່ຊ່ຽວຊານທີ່ຮ່ວມປະຊຸມຕ່າງກໍ່ກ່າວວ່າ,ການອອກແຮງຂະຫຍາຍການຄ້າໃນດ້ານການບໍລິການແມ່ນພະລັງແຮງອັນໃຫມ່ທີ່ນຳພາເສດຖະກິດໂລກຟື້ນຕົວຄືນ.ທ່ານເສີນເຕີມິງ, ລັດຖະມົນຕີວ່າການກະຊວງການຄ້າຈີນກ່າວວ່າ,ໃນ 5 ປີຕໍ່ຫນ້ານີ້,ການສົ່ງອອກທາງການບໍລິການຂອງຈີນຈະຫລາຍກວ່າ 1 ພັນຕື້ໂດລາ,ຈະນຳເອົາໂອກາດການຄ້າອັນມະຫາສານມາໃຫ້ການພັດທະນາການຄ້າດ້ານບໍລິການຂອງບັນດາປະເທດໃນໂລກ.
ຜູ່ຮັບຜິດຊອບຂອງສີ່ອົງການຈັດຕັ້ງເສດຖະກິດທີ່ມີອິດທິພົນທີ່ສຸດໃນໂລກຄື ອົງການການຄ້າໂລກ, ທະນາຄານໂກ,ກອງປະຊຸມການຄ້າແລະການພັດທະນາການຄ້າສະຫະປະຊາຊາດແລະອົງການຮ່ວມມືເສດຖະກິດໄດ້ເຂົ້າຮ່ວມກອງປະຊຸມເທື່ອນີ້, ພວກທ່ານມ່ຄວາມເຫັນໂດຍທົ່ວໄປວ່າ, ການຄ້າດ້ານບໍລິການຍ້ອນຈຸດພິເສດຂອງມັນເອງຈິ່ງຖືກກະທົບຈາກວິກິດການການເງິນສາກົນຫນ້ອຍກວ່າການຄ້າສິນຄ້າ, ການຂະຫຍາຍຂະແຫນງການບໍລິການແລະການຄ້າດ້ານບໍລິການໄດ້ກາຍເປັນພະລັງແຮງອັນໃຫມ່ຂອງ ໂລກໃນການຮັບມືກັບວິກິດການການເງິນແລະຊຸກຍູ້ການພັດທະນາເສດຖະກິດ.
ທ່ານອາເລຈັນໂດຼ ຈາຣາ,ຮອງຜູ່ອຳນວຍການໃຫຍ່ອົງການການຄ້າໂລກກ່າວວ່າ, ຕາມສະຖິຕິຂອງອົງການການຄ້າໂລກ, ລວມຍອດການສົ່ງອອກດ້ານການບໍລິການຂອງທົ່ວໂລກໃນປີ 2008 ແມ່ນ 3700 ຕື້ໂດລາ,ເພີ່ມຂຶ້ນຫລາຍກວ່າປີ 2007 11%.ທ່ານເວົ້າວ່າ:
"ຂະແໜງການບໍລິການໄດ້ຖືກຜົນກະທົບຈາກວິກິດການດັ່ງກ່າວໜ້ອຍກວ່າການຄ້າສິນຄ້າຫຼາຍ. ເຖິງວ່າຂະແໜງການການທະນາຄານ, ຂະແໜງການຂົນສົ່ງແລະຂະແໜງການທ່ອງ ທ່ຽວໄດ້ຖືກຜົນສະທ້ອນສົມຄວນໃຫຍ່ໃນໄລຍະຕົ້ນທີ່ເກີດວິກິດການ, ແຕ່ຂະແໜງການບໍລິການອື່ນໆຍັງໄດ້ຮັກສາທ່າອຽງພັດທະນາສົມຄວນໃນເສດຖະກິດຂອງປະເທດຕ່າງໆແລະການຄ້າບໍລິການສາກົນ. ບົດຮຽນໄດ້ຢັ້ງຢືນວ່າ, ໃນໄລຍະທີ່ເສດຖະກິດບໍ່ດີ, ການຟື້ນຟູຂອງຂະແໜງການບໍລິການຈະໄວກວ່າຂະແໜງການອື່ນໆ, ສ່ນຂະແໜງການບໍລິການຟື້ນຟູຂຶ້ນໃໝ່ຈະເຮັດໃຫ້ກຳລັງການຜະລິດຍົກສູງຂຶ້ນ."
ທ່ານເສີນເຕີມິງ, ລັດຖະມົນຕີວ່າການກະຊວງການຄ້າຈີນກ່າວວ່າ, ປີ 2008, ມູນຄ່າສົ່ງອອກຂອງຂະແໜງການບໍລິການຂອງຈີນມີ 146ຕື້ 500 ລ້ານໂດລາ, ແຕ່ປີ 1982 ຫາປີ 2008, ມູນຄ່າສົ່ງອອກຂອງຂະແໜງການບໍລິການຂອງຈີນໄດ້ເພີ່ມຂຶ້ນ 17% ຕໍ່ປີ, ມູນຄ່ານຳເຂົ້າໄດ້ເພີ່ມຂຶ້ນ 14,8% ຕໍ່ປີ. ທ່ານເສີນເຕີມິງກ່າວວ່າ, ຈີນຈະສືບຕໍ່ສຸມກຳລັງເພື່ອຊຸກຍູ້ການຄ້າບໍລິການຂອງຈີນໃຫ້ພັດທະນາໃນຕໍ່ໜ້າ.
"ຈີນຈະສົ່ງເສີມຂະຫນາດຂອງຂະແຫນງການຕ່າງໆເຊັ່ນ: ການຂົນສົ່ງ,ການທ່ອງທ່ຽວ, ການກໍ່ສ້າງແລະອື່ນໆໃນການຄ້າດ້ານການບໍລິການຕື່ມອີກ, ລົງເລິກສ້າງການຄ້າດ້ານການບໍລິການໃນຂະແຫນງການຕ່າງໆເຊັ່ນ: ໂທລະຄົມ,ການທະນາຄານ,ການບໍລິການດ້ານຄອບພິມເຕີແລະຂໍ້ມູນຂ່າວສານ, ພິມຈຳຫນ່າຍ,ສື່ມວນຊົນແລະທີ່ປຶກສາເປັນຕົ້ນ, ຮັບເອົາວຽກງານດ້ານການບໍລິການຂອງຕ່າງປະເທດຢ່າງຕັ້ງຫນ້າ. ພ້ອມກັນນັ້ນ, ຈີນຍັງຈະເປີດກວ້າງການນຳເຂົ້າຂອງການຄ້າບໍລິການຢ່າງຫມັ້ນຄົງ, ຄາດວ່າໃນ 5 ປີຕໍ່ຫນ້າ, ການນຳເຂົ້າການຄ້າດ້ານການບໍລິການຂອງຈີນນັບລວມແລ້ວ ຈະຫຼາຍກວ່າ 1 ພັນຕື້ໂດລາ. ນີ້ທີ່ບໍ່ຕ້ອງສົງໄສເລີຍວ່າ ຈະສ້າງ ໂອກາດການຄ້າອັນໃຫຍ່ຫຼວງໃຫ້ແກ່ການພັດທະນາການຄ້າດ້ານການບໍລິ ການຂອງປະເທດຕ່າງໆໃນໂລກ."
ເຖິງວ່າສິ່ງກີດຂວາງຂອງລັດທິປົກປ້ອງການຄ້າດ້ານການບໍລິການໄດ້ບໍ່ທໍ່ຫຼາຍກວ່າການຄ້າສິນຄ້າກໍຕາມ, ແຕ່ບັນດາຜູ່ແທນທີ່ເຂົ້າຮ່ວມກອງປະຊຸມ ກໍ່ກ່າວວ່າ, ຄວນມີຄວາມລະມັດລະວັງ ອ່ຽງໄປສູ່ລັດທີປົກປ້ອງການຄ້າທີ່ເກີດຂຶ້ນໃນຂົງເຂດການຄ້າດ້ານການບໍລິການ.
ທ່ານເສີນເຕີມິງ,ລັດຖະມົນຕີວ່າການກະຊວງການຄ້າຈີນກ່າວວ່າ, ພາຍໃຕ້ສະພາບຂອງວິກິດການການເງິນ, ລັດທິປົກປ້ອງການຄ້າໄດ້ແຜ່ລາມໄປຮອດຂົງເຂດການຄ້າດ້ານການບໍລິການ, ກ່ຽວກັບເລື່ອງນີ້, ຄວນຮັກສາ ຄວາມລະມັດລະວັງໃນລະດັບສູງ. ທ່ານກ່າວວ່າ, ຈີນເປັນປະເທດທີ່ສະຫນັບ ສະຫນູນທີ່ຫນັກແຫນັ້ນໃນການຫັນການຄ້າເປັນແບບເສລີແລະສ້າງຄວາມສະດວກໃຫ້ແກ່ການຄ້າ, ພະຍາຍາມສ້າງໂຄງປະກອບການຄ້າຫຼາຍຝ່າຍທີ່ຍຸດຕິທຳ,ສົມເຫດສົມຜົນແລະບໍ່ມີການຈຳແນກ. ທ່ານກ່າວວ່າ,ການຄ້າດ້ານການບໍລິການແມ່ນຫນຶ່ງໃນ 8 ຫົວຂໍ້ສຳຄັນຂອງການເຈລະຈາຮອບໂດຮາ, ຈີນຍິນດີສືບຕໍ່ຮ່ວມກັບຝ່າຍຕ່າງໆທຳຄວາມພະຍາຍາມ, ສືບຕໍ່ຊຸກຍູ້ການເຈລະຈາຮອບໂດຮາ, ພະຍາຍາມໃຫ້ໄດ້ຮັບຜົນສຳເລັດຢ່າງຮອບດ້ານແລະະເຫມີພາບກັນໂດຍໄວ, ເພື່ອບັນລຸເປົ້າຫມາຍແຫ່ງການພັດທະນາຂອງການເຈລະຈາຮອບໂດຮາ.
