ວັນທີ 30 ພະຈິກນີ້, ກອງປະຊຸມສຸດຍອດຈີນ-ເອີລົບຄັ້ງທີ 12 ໄດ້ຈັດຂຶ້ນຢູ່ນະຄອນນານກິ່ງແຂວງຈ່ຽງຊູ່ ພາກຕາເວັນອອກຂອງຈີນ. ໃນການພົບປະ, ສອງຝ່າຍໄດ້ຫາລຶຫົວຂໍ້ຕ່າງໆເຊັ່ນການພົວພັນຈີນສະຫະພາບເອີລົບ, ວິກິດການການເງິນສາກົນ, ການປ່ຽນແປງຂອງດິນຟ້າອາກາດແລະອື່ນໆ, ແລະໄດ້ເຊັນສນຍາຮ່ວມມືໃນຂົງເຂດວິທະຍາສາດເຕັກໂນໂລຊີ, ເສດຖະກິດການຄ້າ, ການອະນຸລັກສິ່ງແວດລ້ອມ, ແລະອຸດສາຫະກຳເປັນຕົ້ນ. ຫຼັງກອງປະຊຸມໄດ້ອອກຖະແຫຼງການຮ່ວມໂດຍກ່າວວ່າ, ຈະອອກແຮງຊຸກຍູ້ໃຫ້ການພົວພັນຈີນສະຫະພາບເອີລົບຮັບການຂະຫຍາຍຕົວຫຼາຍກວ່າເກົ່າໃນສະພາບການໃໝ່.
ການພົບປະຜູ້ນຳຈີນສະຫະພາບເອີລົບແມ່ນກົນໄກສົນທະນາທາງການເມືອງລະດັບສູງສຸດຂອງສອງຝ່າຍ. ນີ້ແມ່ນການພົບປະເທື່ອທີ 2 ທີ່ຜູ້ນຳຈີນແລະສະຫະພາບເອີລົບຈັດໃນປີນີ້, ການພົບປະແມ່ນທ່ານເວີ່ນເຈຍປາວ, ນາຍົກລັດຖະມົນຕີຈີນ, ທ່ານເຟຼດຣິກ ເຣນເຟວ, ນາຍົກລັດຖະມົນຕີຊູແອັດ ປະເທດປະທານໝູນວຽນສະຫະພາບເອີລົບແລະທ່ານໂຈເຊ ມານູເອວ ບາໂຣໂຊ, ປະທານຄະນະກຳມາທິການສະຫະພາບເອີລົບເປັນປະທານຮ່ວມ.
ທ່ານເວີ່ນເຈຍປາວໄດ້ຕີລາຄາຢ່າງຕັ້ງໜ້າຕໍ່ການຂະຫຍາຍການພົວພັນລະຫວ່າງຈີນກັບສະຫະພາບເອີລົບໃນຫຼາຍປີຜ່ານມາ, ແລະສະເໜີວ່າ:
"ຈີນແລະສະຫະພາບເອີລົບຕ້ອງປະຖິ້ມການດູຖູກ, ການເປັນປໍລະປັກແລະການສະກັດກັ້ນກັນຢ່າງຈິງຈັງ, ສົ່ງເສີມຄວາມສະເໝີພາບ, ການສົນທະນາແລະການຮ່ວມມື, ເພີ່ມຄວາມໄວ້ເນື້ອເຊື່ອໃຈກັນທາງຍຸດທະສາດ, ຄວນເປັນເພື່ອນມິດຕະຫຼອດໄປ, ບໍ່ຄວນເປັນຄູ່ປໍລະປັກ; ຕ້ອງຕ້ານລັດທິເຈົ້າອຳນາດຢ່າງຈະແຈ້ງ, ຊຸກຍູ້ໃຫ້ໂລກຫັນເປັນຫຼາຍຂວັ້ນ, ແລະສະໜັບສະໜູນລັດທິຫຼາຍຝ່າຍ, ຕ້ອງຖືການພັດທະນາເປັນໜ້າທີ່ອັນດັບໜຶ່ງ, ເດີນຕາມເສັ້ນທາງທີ່ຕ່າງຝ່າຍຕ່າງໄດ້ຮັບຜົນປະໂຫຍດແລະພັດທະນາຮ່ວມກັນ."
ທ່ານໂຈເຊ ມານເອວ ບາໂຣໂຊທີ່ຫາກໍ່ໄດ້ຮັບເລືອກຕັ້ງເປັນປະທານຄະນະກຳມາທິການສະຫະພາບເອີລົບອີກສະໄໝໜຶ່ງກ່າວວ່າ, ສົນທິສັນຍາລິສບອນທີ່ມີຈຸດປະສົງຊຸກຍູ້ຂະບວນວິວັດໃຫ້ສະຫະພາບເອີລົບເຊື່ອມໂຍງເຂົ້າກັນນັ້ນຈະມີຜົນບັງຄັບໃຊ້ນັບແຕ່ວັນທີ 1 ທັນວາປີນີ້ເປັນຕົ້ນໄປ, ນີ້ຈະນຳເອົາເງື່ອນໄຂທີ່ດີມາໃຫ້ການຂະຫຍາຍການພົວພັນສະຫະພາບເອີລົບກັບຈີນ. ທ່ານກ່າວວ່າ:
"ສົນທິສັນຍາລິສບອນຈະມີຜົນບັງຄັບໃຊ້ແຕ່ວັນທີ 1 ທັນວາປີນີ້ເປັນຕົ້ນໄປ,ນີ້ຈະນຳເອົາສິ່ງໃໝ່ມາໃຫ້ການພົວພັນລະຫວ່າງສະຫະພາບເອີຣົບກັບຈີນ.ຈະເຮັດໃຫ້ນະໂຍບາຍການຕ່າງປະເທດຂອງສະຫະພາບເອີຣົບເປັນເອກະພາບກັນກວ່າເກົ່າ ລຽນຕິດກວ່າເກົ່າແລະຕໍ່ເນື່ອງກວ່າເກົ່າ,ຂ້າພະເຈົ້າຫວັງວ່າ,ຈະນຳໃຊ້ໂອກາດນີ້,ຂະຫຍາຍການພົວພັນຄູ່ຍຸດທະສາດຮອບດ້ານລະຫວ່າງສະຫະພາບເອີຣົບກັບຈີນ."
ການປ່ຽນແປງຂອງດິນຟ້າອາກາດແມ່ນຫົວຂໍ້ຫາລືທີ່ສຳຄັນອີກອັນໜຶ່ງໃນການພົບປະເທື່ອນີ້.ທ່ານເວີ່ນເຈ່ຍປາວກ່າວວ່າ,ຫວ່າງກ່ອນນີ້,ລັດຖະບານຈີນໄດ້ໃຫ້ຄຳໝັ້ນສັນຍາຢ່າງຊັດເຈນຄື:ເມື່ອຮອດປີ 2020,ຈະບັນລຸເປົ້າໝາຍທີ່ເຮັດໃຫ້ການລະບາຍກາກບອນດີອອກຊິດໃນແຕ່ລະຫົວໜ່ວຍ GDP ຫຼຸດລົງໜ້ອຍກວ່າປີ 2005 40% ຫາ 45%.ແຜນການນີ້ໄດ້ຜ່ານການວິເຄາະວິໄຈຢ່າງຖີ່ຖ້ວນແລ້ວ,ຖືກຫຼັກວິທະຍາສາດແລະສອດຄ່ອງກັບສະພາບຕົວຈິງ.ຈີນຍ່ອມຈະເຄົາລົບຄຳໝັ້ນສັນຍາຂອງຕົນ.
ພ້ອມກັນນັ້ນ,ທ່ານເວີ່ນເຈ່ຍປາວຮຽກຮ້ອງໃຫ້ສະຫະພາບເອີຣົບມີຄວາມຈິງໃຈດ້ານການເມືອງໃຫ້ຫຼາຍກວ່າເກົ່າ,ຄືໃຫ້ EU ຫຼຸດການລະບາຍຢ່າງຫຼວງຫຼາຍກ່ອນ,ແລ້ວເສີມຂະຫຍາຍບົດບາດນຳໜ້າໃນປະເທດທີ່ພັດທະນາແລ້ວ.
ທ່ານເຣນເຟວດ໌,ນາຍົກລັດຖະມົນຕີຂອງຊູແອັດ,ປະເທດປະທານໝູນວຽນຂອງສະຫະພາບເອີຣົບໄດ້ຍ້ອງຍໍເປົ້າໝາຍຫຼຸດການລະບາຍຂອງຈີນ.
"ສຳລັບປະເທດທີ່ມີປະຊາກອນ 1 ຕື້ 300 ລ້ານຄົນ,ການວາງເປົ້າໝາຍແລະປະກາດໃຊ້ນະໂຍບາຍແບບນີ້,ເພື່ອຫຼຸດການລະບາຍອາຍພິດເຮືອນແກ້ວ,ນີ້ແມ່ນສຳຄັນທີ່ສຸດຕໍ່ໂລກ.ຈີນໄດ້ໃຊ້ງົບປະມານຈຳນວນຫຼວງຫຼາຍເຂົ້າໃນພະລັງງານໝູນວຽນ,ຈີນກັບສະຫະພາບເອີຣົບຄວນຮ່ວມມືຫຼາຍກວ່າເກົ່າໃນຂົງເຂດນີ້.ຖ້າຈີນບໍ່ເຂົ້າຮ່ວມ,ປະຊາຄົມໂລກຈະຮັບມືກັບບັນຫາການປ່ຽນແປງຂອງດິນຟ້າອາກາດບໍ່ໄດ້."
ກ່ຽວກັບບັນຫາອັດຕາແລກປ່ຽນເງິນຢວນທີ່ປະເທດຕ່າງໆສົນໃຈນັ້ນ,ທ່ານເວີ່ນເຈ່ຍປາວກ່າວເນັ້ນວ່າ,ຕ້ອງສືບຕໍ່ຮັກສາອັດຕາແລກປ່ຽນເງິນຢວນໃຫ້ມີຄວາມໝັ້ນທ່ຽງ.
ໃນຖະແຫຼງການຮ່ວມທີ່ປະກາດຫຼັງການພົບປະເຈລະຈາ,ຈີນກ່າວຢ້ຳຈະສືບຕໍ່ຍຶດໝັ້ນສະໜັບສະໜູນການສ້າງສະຫະພາບເອີລົບໃຫ້ເຊື່ອມໂຍງເຂົ້າກັນ;ສະຫະພາບເອີລົບກ່າວຢ້ຳສະໜັບສະໜູນຈີນພັດທະນາຢ່າງສັນຕິພາບ,ເຄົາລົບອະທິປະໄຕແລະຜືນແຜ່ນດິນອັນຄົບຖ້ວນຂອງຈີນ,ຍຶດໝັ້ນນະໂຍບາຍຈີນດຽວ,ສະໜັບສະໜູນການພົວພັນລະຫວ່າງສອງຝັ່ງຊ່ອງແຄບໃຕ້ຫວັນໃຫ້ຂະຫຍາຍຕົວຢ່າງສັນຕິພາບ.ຜູ້ນຳຈີນແລະສະຫະພາບເອີລົບລ້ວນແຕ່ກ່າວວ່າ,ການພົບປະເຈລະຈາຄັ້ງນີ້ໄດ້ຈັດຂຶ້ນຢ່າງສຳເລັດຜົນແລະໄດ້ເຊັນສັນຍາຮ່ວມມື,ນີ້ຈະມີຜົນດີຕໍ່ການເພີ່ມຄວາມໄວ້ເນື້ອເຊື່ອໃຈກັນລະຫວ່ງຈີນກັບສະຫະພາບເອີລົບ,ເພີ່ມທະວີການຮ່ວມມື,ພ້ອມກັນຮັບມືກັບການທ້າທາຍຂອງໂລກ,ເພື່ອສຸມທຸກກຳລັງເຂົ້າໃນການຂະຫຍາຍການພົວພັນລະຫວ່າງຈີນສະຫະພາບເອີລົບ.
