ວັນທີ 1 ທັນວານີ້,ຢູ່ທີ່ນະຄອນຫຼວງປັກກິ່ງ, ກະຊວງການຄ້າຈີນໄດ້ເຜີຍແຜ່"ບົດລາຍງານກ່ຽວກັບຄວາມຂັດແຍ່ງດ້ານການຄ້າຂອງທົ່ວໂລກປີ 2009" ໂດຍຂຽນວ່າ, ມາຮອດປີ 2008, ຈີນເປັນອັນດັບຫນຶ່ງໃນການຖືກສຳຫຼວດດ້ານການອຸດຫນູນດ້ານການຄ້າໃນທົ່ວໂລກໃນ 14 ປີລຽນຕິດ.ເຈົ້າຫນ້າທີ່ກະຊວງການຄ້າຈີນກ່າວວ່າ,ໂດຍປະເຊີນກັບສະພາບທີ່ຄວາມຂັດແຍ່ງດ້ານການຄ້າຂອງທົ່ວໂລກເພີ່ມຫຼາຍຂື້ນ, ຈີນຈະດຳເນີນການສົນທະນາແລະແລກປ່ຽນດ້ານການຄ້າ, ເພື່ອຕັ້ງຫນ້ານຳໃຊ້ກົນໄກແກ້ໄຂຄວາມຂັດແຍ່ງຂອງອົງການການຄ້າໂລກຫຼືWTO ເພື່ອປົກປ້ອງສິດແລະຜົນປະໂຫຍດທີ່ຊອບກົດຫມາຍຂອງອຸດສາຫະກຳປະເທດຕົນ.ຕໍ່ໄປເຊີນຟັງລາຍລະອຽດກ່ຽວກັບເລື່ອງນີ້.
ການອຸດຫນູນດ້ານການຄ້າແມ່ນໃນເວລາຜະລິດຕະພັນທີ່ນຳເຂົ້າຈາກຕ່າງປະເທດໄດ້ສ້າງຜົນກະທົບທາງລົບໃຫ້ແກ່ ອຸດສາຫະກຳຂອງພາຍໃນປະເທດຫນຶ່ງ, ລັດຖະບານຂອງປະເທດນີ້ ຈຶ່ງໃຊ້ມາດຕະການເພື່ອຜ່ອນຄາຍແລະກຳຈັດຜົນກະ ທົບທາງລົບດັ່ງກ່າວ, ເຊິ່ງມີທັງການຕ້ານການຂາຍເລແລະຕ້ານການອຸດຫນູນແລະອື່ນໆ.
ບົດລາຍງານທີ່ກະຊວງການຄ້າເຜີຍແຜ່ໃນວັນທີ 1 ທັນວານີ້ຂຽນວ່າ, ຍ້ອນໄດ້ຮັບຜົນກະທົບຈາກວິກິດການການເງິນທົ່ວໂລກ, ນັບແຕ່ 6 ເດືອນ ທ້າຍປີກາຍນີ້ເປັນຕົ້ນມາ, ປະເທດແລະເຂດແຄວ້ນທີ່ເປັນສະມາຊິກ ຂອງWTO ຈຳນວນຫຼວງຫຼາຍໄດ້ເລີ່ມໃຊ້ມາດຕະການໃຫ້ການອຸດຫນູນດ້ານການຄ້າເລື້ອຍໆ,ເພື່ອປົກປ້ອງອຸດສາຫະກຳຂອງປະເທດຕົນ. ຕົວເລກສະແດງໃຫ້ເຫັນວ່າ, ປີ 2008, ກໍລະນີທີ່ໃຫ້ການອຸດຫນູນດ້ານການຄ້າໃນທົ່ວໂລກ ໄດ້ເພີ່ມຂຶ້ນອີກ 222 ລາຍ, ເຊິ່ງຫຼາຍກວ່າປີ 2007 ເກືອບ 25%. ສ່ວນນັບແຕ່ຕົ້ນປີນີ້ມາ, ຈຳນວນກໍລະນີໃຫ້ການອຸດຫນູນ ດ້ານການຄ້າຂອງ ປະເທດແແລະເຂດແຄວ້ນທີ່ເປັນສະມາຊິກຂອງWTOທີ່ເພີ່ມຂຶ້ນອີກນັ້ນ ໄດ້ໃກ້ຄຽງຕົວເລກຂອງປີກາຍນີ້.
ທ່ານຢາງອີ້,ຫົວຫນ້າກົມສຳຫລວດການທຳລາຍອຸດສາຫະກຳຂອງກະຊວງການຄ້າຈີນກ່າວວ່າ, ໃນກໍລະນີອຸດຫນູນການຄ້າປີນີ້,ມີເກືອບເຄິ່ງຫນຶ່ງແມ່ນແນໃສ່ຜະລິດຕະພັນຈີນ.ທ່ານເວົ້າວ່າ:
ຕົວເລກຫລ້າສຸດຂອງກອງເລຂາອົງການການຄ້າໂລກສະແດງໃຫ້ເຫັນວ່າ, ຈີນໄດ້ຖືກສຳຫລວດດ້ານການອຸດຫນູນການຄ້າໃນ 101 ກໍລະນີທີ່ເກີດຂຶ້ນໃຫມ່, ເຊິ່ງກວມຫລາຍກວ່າ 11 ຕື້ 600 ລ້ານໂດລາ.ນີ້ແມ່ນຈີນຖືກສຳຫລວດດ້ານການອຸດຫນູນການຄ້າຫລາຍກວ່າ 100 ກໍລະນີເປັນເທື່ອທຳອິດນັບແຕ່ປີ 2002 ເປັນຕົ້ນມາ,ໃນເດືອນສິງຫາປີນີ້, ຍອດມູນຄ່າໃນກໍລະນີສູງກວ່າ 10 ຕື້ໂດລາແລ້ວ.ຄວາມຂັດແຍ່ງກັນດ້ານການຄ້າພວມເກີດມີຜົນສະທ້ອນນັບມື້ນັບແຮງຂຶ້ນຕໍ່ຜະລິດຕະພັນສົ່ງອອກຂອງຈີນ.
ກະຊວງການຄ້າຈີນລາຍງານວ່າ, ຄຽງຄູ່ກັບຈັງຫວະການປັບປຸງຂະແໜງການໃນທົ່ວໂລກໄວຂຶ້ນແລະການແຂ່ງຂັນສາກົນນັບມື້ນັບຮຸນແຮງຂຶ້ນ, ການຄ້າຕໍ່ຕ່າງປະເທດຂອງຈີນຈະປະເຊີນກັບການສະກັດກັ້ນຂອງລັດທິປົກປ້ອງການຄ້າເປັນໄລຍະຍາວ. ໂດນແນ່ໃສ່ສະພາບການດັ່ງກ່າວ, ທ່ານຫວາງຊາວ, ຜູ້ຊ່ອຍລັດຖະມົນຕີກະຊວງການຄ້າຈີນກ່າວວ່າ, ຈີນຈະຍຶດໝັ້ນຄັດຄ້ານລັດທິປົກປ້ອງການຄ້າ, ລິເລີ່ມສ້າງລະບົບການຄ້າແລະການລົງທຶນທີ່ເປີດປະຕູ.
