ທ່ານເວິ່ນເຈ່ຍປາວກ່າວວ່າ, ຈີນຈະທຳຄວາມພະຍາຍາມຢ່າງບໍ່ລົດລະເພື່ອຮັບມືກັບການປ່ຽນແປງຂອງດິນຟ້າອາກາດ
(GMT+08:00) 2009-12-19 19:16:50 cri
ວັນທີ18ທັນວານີ້, ໃນກອງປະຊຸມສຸດຍອດທີ່ເປັນກອງປະຊຸມສຳຄັນຕອນສຸດທ້າຍຂອງກອງປະຊຸມ ສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດໂກເປັນຮາກ, ທ່ານເວິ່ນເຈ່ຍປາວ, ນາຍົກລັດຖະມົນຕີຈີນໄດ້ອະທິບາຍຢ່າງຮອບດ້ານກ່ຽວກັບຫຼັກໝັ້ນ, ເຈດຈຳນົງແລະມາດຕະການຂອງລັດຖະບານຈີນໃນການຮັບມືກັບການປ່ຽນແປງຂອງດິນຟ້າອາກາດ. ທ່ານກ່າວວ່າ, ບໍ່ວ່າກອງປະຊຸມຄັ້ງນີ້ມີຜົນແນວໃດ, ຈີນກໍ່ຈະທຳຄວາມພະຍາຍາມຢ່າງບໍ່ລົດລະແລະໝັ້ນໜຽວບໍ່ປຽນແປງເພື່ອຮັບມືກັບການປ່ຽນແປງຂອງດິນຟ້າອາກາດ.
ວັນທີ7ທັນວານີ້, ຢູ່ນະຄອນຫຼວງໂກເປັນຮາກຂອງແດນມາກ, ໄດ້ຈັດກອງປະຊຸມເທື່ອທີ15ຂອງຜູ້ລົງນາມສົນທິສັນຍາຂອບດິນຟ້າອາກາດສະຫະປະຊາຊາດ, ທັງເປັນກອງປະຊຸມເທື່ອທີ5ຂອງຜູ້ລົງນາມສັນຍາກຽວໂຕ, ຫຼືກອງປະຊຸມໂກເປັນຮາກສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດ, ຈຸດປະສົງແມ່ນປຶກສາຫາລືກ່ຽວກັບແຜນການຕາມຫຼັງຂອງຄຳໝັ້ນສັນຍາໄລຍະທຳອິດໃນອະນຸສັນຍາກຽວໂຕໝົດເວລາກຳນົດແລ້ວ, ພ້ອມດ້ວຍການກະທຳທົ່ວໂລກໃນຕໍ່ໜ້ານີ້ເພື່ອຮັບມືກັບປ່ຽນແປງຂອງດິນຟ້າອາກາດ. ຜູ້ແທນວົງການຕ່າງໆ1ໝື່ນ5ພັນກວ່າຄົນຈາກ190ກວ່າປະເທດແລະເຂດແຄວ້ນໄດ້ເຂົ້າຮ່ວາຢ່າງກວ້າງຂວາງ, ຫຼັງຈາກຖົກຖຽງເປັນເວລາ12ວັນ, ຮອດມື້ສຸດທ້າຍຍັງມີບັນຫາຫຼາຍຢ່າງຂັດກັນຢ່າງໜັກໜ່ວງ, ກ່ຽວກັບເລື່ອງນີ້, ທ່ານເວິ່ນເຈ່ຍປາວກ່າວວ່າ, ການຮັບມືກັບການປ່ຽນແປງຂອງດິນຟ້າອາກາດຕ້ອງການປະຊາຄົມໂລກມີຄວາມໝັ້ນໃຈອັນໜັກແໜ້ນ. ທ່ານກ່າວວ່າ,
ສົນທິສັນຍາຂອບດິນຟ້າອາກາດສະຫະປະຊາຊາດແລະສັນຍາກຽວໂຕແມ່ນຜົນງານທີ່ປະເທດຕ່າງໆຍາດມາໄດ້ຫຼັງຈາກທຳຄວາມພະຍາຍາມຢ່າງລຳບາກເປັນເວລາຍາວນານ, ເປັນພື້ນຖານກົດໝາຍແລະການຊີ້ນຳການເຄື່ອນໄຫວຂອງການຮ່ວມມືສາກົນຮັບມືກັບການປ່ຽນແປງຂອງດິນຟ້າອາກາດ, ຄວນທະນຸຖະໜອມແລະພັດທະນາຢ່າງຄົບເທົ່າ. ໝາກຜົນຂອງກອງປະຊຸມເທື່ອນີ້ຄວນຍຶດໝັ້ນແຕ່ບໍ່ແມ່ນເຮັດໃຫ້ຫຼັກການພື້ນຖານໃນສົນທະສັນຍາແລະສັນຍາກຽວໂຕມືດມົວ, ຄວນປະຕິບັດຫາກບໍ່ແມ່ນຫ່າງຈາກສິດໃນແຜນການບາຫຼີ, ຄວນຕົກລົງແຕ່ບໍ່ຄວນປະຕິເສດຄວາມເຫັນຄືກັນທີ່ໄດ້ມີຢູ່ແລະຄວາມຄືບໜ້າຂອງການເຈລະຈາ.
ໃນເວລາກ່າວຄຳປາໃສ,ທ່ານເວິ່ນເຈ່ຍປາວຍັງໄດ້ແນະນຳວຽກງານຂອງຈີນທີ່ໃນຖານເປັນປະເທດໃຫຍ່ທີ່ພວມພັດທະນາໄດ້ເຮັດເພື່ອຮັບມືກັບການປ່ຽນແປງຂອງດິນຟ້າອາກາດ.ໃນເກືອບ30ປີຜ່ານມາ,ຜົນສຳເລັດດ້ານການກໍ່ສ້າງໃຫ້ຫັນເປັນທັນສະໄໝຂອງຈີນປະຈັກຕາຊາວໂລກ,ແຕ່ໃນຂະບວນການທີ່ພັດທະນາຢ່າງວ່ອງໄວນັ້ນ,ຈີນບໍ່ໄດ້ເບິ່ງຂ້າມບັນຫາການປ່ຽນແປງຂອງດິນຟ້າອາກາດ,ໃນປະເທດພວມພັດທະນາຕ່າງໆ,ຈີນໄດ້ນຳໜ້າສ້າງແລະປະຕິບັດແຜນການແຫ່ງລັດເພື່ອຮັບມືກັບການປ່ຽນແປງຂອງດິນຟ້າອາກາດ,ເພີ່ມຄວາມແຮງໃນການປະຢັດພະລັງງານແລະຫຼຸດການລະບາຍອາຍພິດເຮືອນແກ້ວຢ່າງບໍ່ຢຸດຢັ້ງ,ເລັ່ງລັດຄວາມໄວແຫ່ງການເພິ່ມພະລັງງານໃໝ່ແລະພະລັງງານໝູນວຽນ,ດຳເນີນການປູກຕົ້ນໄມ້ຕົ້ນຫຍ້າໃສ່ນາສວນຄືນໃໝ່ແລະປູກໄມ້ສ້າງປ່າຢ່າງຂະໜາດໃຫຍ່ແລະຕໍ່ເນື່ອງ.ສິ່ງທີ່ໜ້າເວົ້າເຖິງນັ້ນແມ່ນລະຫວ່າງປີ1990ຫາປີ2005,ການລະບາຍກາບອນດີອົກຊິດຕໍ່ຫົວໜ່ວຍGDPຂອງຈີນໄດ້ຫຼຸດລົງ46%.ບົນພື້ນຖານນີ້,ໃນໄລຍະມໍ່ໆນີ້,ຈີນໄດ້ວາງຄາດໝາຍວ່າ,ຮອດປີ2020,ການລະບາຍກາບອນດີອົກຊິດຕໍ່ຫົວໜ່ວຍGDPຈະຫຼຸດລົງປະມານ40%ຫາ45%ເມື່ອທຽບໃສ່ປີ2005.ທ່ານເວິ່ນເຈ່ຍປາວກ່າວວ່າ
"ເປົ້າໝາຍໃນການຫຼຸດການລະບາຍມົນລະພິດຂອງພວກຂ້າພະເຈົ້າຈະຖືກຖືເປັນຄາດໝາຍທີ່ມີລັກສະນະຜູກມັດຈັດເຂົ້າໃນແຜນການພັດທະນາເສດຖະກິດແຫ່ງຊາດແລະພັດທະນາສັງຄົມໄລຍະກາງແລະຍາວ,ຮັບປະກັນໃຫ້ການປະຕິບັດຄຳໝັ້ນສັນຍາໄດ້ຮັບການຕິດຕາມຈາກດ້ານກົດໝາຍແລະຫາງສຽງ.ພວກຂ້າພະເຈົ້າຈະປັບປຸງວິທີສະຖິຕິ,ຕິດຕາມກວດກາພາຍໃນປະເທດໃຫ້ສົມບູນຂຶ້ນ,ປັບປຸງວິທີເຜີຍແຜ່ຂໍ້ມູນຂ່າວສານດ້ານການຫຼຸດການລະບາຍມົນລະພິດໃຫ້ດີຂຶ້ນ,ເພີ່ມຄວາມໂປ່ງໃສ,ຕັ້ງໜ້າດຳເນີນການແລກປ່ຽນ,ການສົນທະນາແລະການຮ່ວມມືລະຫວ່າງຊາດ.
ເຖິງວ່າຍັງບໍ່ຮູ້ເທື່ອວ່າ,ກອງປະຊຸມເທືອນີ້ຈະສາມາດບັນລຸເອກະສານໝາກຜົນທີ່ສະແດງໃຫ້ເຫັນຄວາມປາຖະໜາຮ່ວມດ້ານການເມືອງຂອງປະຊາຄົມໂລກ,ສ່ອງແສງເຖິງຄວາມພະຍາຍາມຂອງປະເທດຕ່າງໆໃນການຮັບມືກັບການປ່ຽນແປງຂອງດິນຟ້າອາກາດແລະຝ່າຍຕ່າງໆລ້ວນແຕ່ຮັບເອົາໄດ້ນັ້ນໃນທີ່ສຸດຫຼືບໍ່,ແຕ່ວ່າ,ໃນເວລາກ່າວຄຳປາໃສ,ທ່ານນາຍົກເວິ່ນເຈ່ຍປາວໄດ້ໃຫ້ຄຳໝັ້ນສັນຍາຢ່າງເດັດດ່ຽວວ່າ
"ລັດຖະບານຈີນກຳນົດເປົ້າໝາຍຫຼຸດການລະບາຍອາຍພິດເຮືອນແກ້ວໃຫ້ໜ້ອຍລົງນັ້ນແມ່ນຈີນໃຊ້ການກະທຳຢ່າງເປັນເຈົ້າຕົນເອງຕາມສະພາບຕົວຈິງຂອງປະເທດຕົນ,ເປົ້າໝາຍນີ້ແມ່ນມີຄວາມຮັບຜິດຊອບຕໍ່ປະຊາຊົນຈີນແລະມວນມະນຸດ,ບໍ່ມີເງື່ອນໄຂເພີ່ມຕື່ມໃດໆແລະບໍ່ເຂົ້າກ່ຽວກັບເປົ້າໝາຍຫຼຸດການລະບາຍອາຍພິດເຮືອນແກ້ວຂອງປະເທດໃດໆ.ພວກຂ້າພະເຈົ້າຮັກສາຄຳໝັ້ນສັນຍາຂອງຕົນ,ແລະຈະປະຕິບັດໃຫ້ໄດ້ຮັບຜົນສຳເລັດແນ່ນອນ.ບໍ່ວ່າກອງປະຊຸມເທື່ອນີ້ຈະບັນລຸໝາກຜົນຫຍັງ,ຈີນກໍ່ຈະທຳຄວາມພະຍາຍາມຢ່າງເດັ່ນດ່ຽວໜຽວແໜ້ນເພື່ອບັນລຸເປົ້າໝາຍດັ່ງກ່າວຈົນວ່າລື່ນຄາດໝາຍນີ້."
