ວັນທີ 1 ມັງກອນປີ 2010 ເຂດການຄ້າເສລີຈີນ-ອາຊຽນຈະສ້າງສຳເລັດຢ່າງເປັນທາງການ. ວັນທີ 29 ທັນວານີ້ຢູ່ທີ່ປັກກິ່ງ, ທ່ານຈ່າງເຄີ້ນິງ, ທີ່ປຶກສາການຄ້າຂອງກົມສາກົນຂອງກະຊວງການຄ້າຈີນແລະທ່ານວະຣາວຸດ ຊຸວິຣຸດ, ລາຊະທູດໄທປະຈຳຈີນໄດ້ຮ່ວມກັນກ່າວວ່າ, ເຂດການຄ້າເສລີຈີນ-ອາຊຽນທີ່ຈະສ້າງສຳເລັດນັ້ນຈະອຳນວຍຜົນປະໂຫຍດໃຫ້ແກ່ສອງຝ່າຍ, ຊຸກຍູ້ໃຫ້ເສດຖະກິດຂອງສອງຝ່າຍເຕີບໂຕ. ຕໍ່ໄປເຊີນຟັງລາຍລະອຽດ:
ເຂດການຄ້າເສລີຈີນ-ອາຊຽນແມ່ນເຂດການຄ້າເສລີແຫ່ງທຳອິດທີ່ຈີນເຈລະຈາກັບຕ່າງປະເທດ, ແລະກໍແມ່ນເຂດແຫ່ງຄ້າເສລີເຂດທຳອິດຂອງອາຊຽນທີ່ເຈລະຈາເປັນກຸ່ມກັບຕ່າງປະເທດ, ພາຍຫຼັງເຂດການຄ້າເສລີສ້າງສຳເລັດແລ້ວຈະກວມປະຊາກອນ 1 ຕື້ 900 ລ້ານຄົນ, ກາຍເປັນເຂດການຄ້າເສລີໃຫຍ່ອັນດັບ 3 ໃນໂລກ. ໃນງານຖະແຫຼງຂ່າວທີ່ຈັດຂຶ້ນໃນວັນທີ 29 ທັນວາ, ທ່ານຈ່າງເຄີ້ນິງ, ທີ່ປຶກສາການຄ້າຂອງກົມສາກົນຂອງກະຊວງການຄ້າຈີນກ່າວວ່າ, ພາຍຫຼັງເຂດການຄ້າເສລີຈີນ-ອາຊຽນສ້າງສຳເລັດແລ້ວ, ສິນຄ້າຂອງສອງຝ່າຍຈະບໍ່ເກັບພາສີເລີຍໂດຍພື້ນຖານ.
ໃນເວລາກ່າວເຖິງເລື່ອງຫຼຸດພາສີໃຫ້ຕ່ຳລົງຢ່າງຫຼວງຫຼາຍແລະເພີ່ມສິນຄ້າຂາເຂົ້າໃຫ້ຫຼາຍຂຶ້ນ ອາດຈະສ້າງຜົນກະທົບຕໍ່ການຜະລິດຂອງ ອຸດສາຫະກຳຂອງປະເທດຕົນລະຫວ່າງຈີນກັບອາຊຽນຫຼືບໍ່ນັ້ນ, ເຈົ້າຫນ້າທີ່ຜູ່ນີ້ກ່າວວ່າ, ລະຫວ່າງຈີນກັບປະເທດຕ່າງໆໃນອາຊຽນ ມີອຸດສາຫະກຳທີ່ຊ່ອຍຊູຍູ້ຫນູນກັນຢ່າງຫຼວງຫຼາຍ, ໂຄງປະກອບຜະລິດຕະພັນທີ່ສົ່ງອອກກໍ່ຕ່າງກັນໃນລະດັບໃດຫນຶ່ງ, ການສ້າງຕັ້ງເຂດການຄ້າເສລີຈີນ-ອາຊຽນນັ້ນ ສາມາດເຮັດໃຫ້ສອງຝ່າຍເສີມຂະຫຍາຍທ່າແຮງຂອງຕົນເອງແລະຕ່າງຝ່າຍຕ່າງໄດ້ຮັບຜົນປະໂຫຍດ.
ເຖິງວ່າຈີນກັບອາຊຽນລ້ວນແຕ່ມີວິສາຫະກິດທີ່ສົ່ງອອກຈຳນວນອ່າວ ຫຼາຍກໍຕາມ,ແຕ່ສອງຝ່າຍກໍ່ມີຜະລິດຕະພັນແລະອຸດສາຫະກຫຼາຍຢ່າງ ທີ່ຊ່ອຍຊູຍູ້ຫນູນກັນຢ່າງຫຼາກຫຼາຍ, ຕົວຢ່າງຄື:ປະຈຸບັນ, ຜະລິດຕະພັນຂອງຈີນທີ່ສົ່ງຂາຍໃຫ້ປະເທດຕ່າງໆໃນອາຊຽນນັ້ນ ຕົ້ນຕໍມີກ່ຳປັ່ນ, ຂາງແລະເຫຼັກກ້າ, ສົ້ງເສື້ອຢືດ,ເຄື່ອງດິນເຄືອບດິນເຜົາແລະອື່ນໆ. ຜະລິດຕະພັນທີ່ອາຊຽນນຳເຂົ້າອ່າວຫຼາຍນັ້ນແມ່ນວັດຖຸດິບຕ່າງໆເຊັ່ນວ່າ: ຜະລິດຕະພັນເຄື່ອງທອງ, ຜະລິດຕະພັນຢາງແລະອື່ນໆ. ຄຽງຄູ່ກັບເຂດການຄ້າເສລີຈີນ-ອາຊຽນຈະສ້າງສຳເລັດຢ່າງຮອບດ້ານ, ຈີນແລະປະເທດຕ່າງໆໃນອາຊຽນຈະເພີ່ມຄວາມຊ່ອຍຊູຍູ້ຫນູນກັນໃຫ້ຫຼາຍຂຶ້ນແລະປັບປຸງໂຄງປະກອບການຄ້າໃຫ້ດີຂຶ້ນກວ່າເກົ່າ
ໃນກອງປະຊຸມຂາວທີ່ຈັດຂຶ້ນໃນວັນທີ 29 ທັນວານີ້, ທ່ານວາຣະວຸດ ຊູວິຣັດ,ອັກຄະລາດຊະທູດໄທ ປະຈຳຈີນທີ່ເປັນປະທານປະເທດຫມູນວຽນອາຊຽນ ກ່າວວ່າ,ບັນດາປະເທດໃນອາຊຽນສະແດງຄວາມມຸ້ງມາດປາຖະຫນາຢ່າງເຕັມປ່ຽມຕໍ່ການພັດທະນາການລົງທຶນລະຫວ່າງຈີນກັບອາອຽນ.ທ່ານກ່າວ ວ່າ:
ເວົ້າຈາກດ້ານລັດຖະບານແລ້ວ, ພວກເຮົາໄດ້ສ້າງຂອບໃຫ້ແກ່ວິສາຫະກິດ,ເພື່ອເຮັດໃຫ້ເຂດການຄ້າເສລີສາມາດເສີມຂະຫຍາຍບົດບາດຢ່າງບັງເກີດຜົນກວ່າເກົ່າ.ປັດຈຸບັນ, ກະຊວງພານິດຂອງໄທພວມໂຄສະນາກ່ຽວກັບໂອກາດທີ່ເຂດການຄ້າເສລີອາດຈະນຳມາໃຫ້ວິສາຫະກິດຂອງປະເທດຕົນ, ໃນຕໍ່ຫນ້າ, ຍັງຈະສືບຕໍ່ເພີ່ມການໂຄສະນາໃນດ້ານນີ້.ນອກຈາກໄທແລ້ວ, ມາເລເຊຍແລະສິງກະໂປກໍ່ໄດ້ວາງນະໂຍບາຍທີ່ກ່ຽວຂ້ອງເພື່ອດຶງດູດນັກລົງທຶນຈາກຈີນ,ປະເທດອາຊຽນຫລາຍປະເທດກໍ່ເລີ່ມຮູ້ຈຸດພິເສດແລະຄວາມສຳຄັນຂອງເຂດການຄ້າເສລີແລ້ວ, ແລະຈະພະຍາຍາມເຮັດໃຫ້ນະໂຍບາຍຂອງເຂດການຄ້າເສລີໄດ້ຮັບການຜັນຂະຫຍາຍ.ຕັ້ງແຕ່ປະຕິບັດສັນຍາການຄ້າສິນຄ້າໃນເຂດການຄ້າເສລີຈີນອາຊຽນເມື່ອປີ 2005 ເປັນຕົ້ນມາ, ມູນຄ່າການຄ້າລະຫວ່າງຈີນກັບອາຊຽນກໍ່ເພີ່ມຂຶ້ນຢ່າງວ່ອງໄວ,ປີ 2008, ການຄ້າລະຫວ່າງສອງຝ່າຍຫລາຍກວ່າ 230 ຕື້ໂດລາ.ຜູ່ຊ່ຽວຊານເຫັນວ່າ, ຈີນກັບບັນດາປະເທດອາຊຽນມີທີ່ຕັ້ງຕິດຈອດກັນ,ເສດຖະກິດກໍ່ມີລັກສະນະຄ້ຳຊູຍູ້ຫນູນກັນຫລາຍ, ສະນັ້ນ, ເຂດການຄ້າເສລີຈີນອາຊຽນມີອະນາຄົດອັນກວ້າງຂວາງຫລາຍ,ແຕ່ຢາກຈະເຮັດໃຫ້ເຂດການຄ້າເສລີສົ່ງຜົນປະໂຫຍດໄປຍັງປະຊາຊົນຢ່າງແທ້ຈິງ,ຍັງຕ້ອງການໃຫ້ວິສາຫະກິດຂອງສອງຝ່າຍຕັ້ງໃຈຄົ້ນຄວ້າລາຍລະອຽດຂອງນະໂຍບາຍຂອງເຂດການຄ້າເສລີ, ອີງຕາມຄວາມຕ້ອງການແລະຂໍ້ກຳນົດຂອງສັນຍາເຂດການຄ້າເສລີ,ເພື່ອຊົມໃຊ້ຜົນປະໂຫຍດທີ່ເຂດການຄ້າເສລີນຳມາໃຫ້ຢ່າງແທ້ຈິງ.
