ທ່ານວາງເກີ່ງນຽນ, ຜູ້ອຳນວຍການໃຫຍ່ວິທະຍຸສາກົນແຫ່ງປະເທດຈີນກ່າວຄຳປາໄສອວຍພອນປີໃໝ່ຕໍ່ຜູ້ຟັງຕ່າງປະເທດ
(GMT+08:00) 2010-01-01 21:56:06 cri
ສະບາຍດີທ່ານຜູ້ຟັງ, ປີໃໝ່ໃກ້ມາເຖິງແລ້ວ, ທ່ານວາງເກີ່ງນຽນ, ຜູ້ອຳນວຍການໃຫຍ່ວິທະຍຸສາກົນແຫ່ງປະເທດຈີນຫຼືCRI, ຕາງໜ້າພະນັກງານທັງໝົດຂອງCRI, ຜ່ານຄື້ນວິທະຍຸສົ່ງຄວາມອວຍພອນປີໃໝ່ທີ່ດີງາມມາຍັງເພື່ອນມິດຜູ້ຟັງໃນທົ່ວໂລກ. ຕໍ່ໄປເຊີນຟັງລາຍລະອຽດ.
ເພື່ອນຜູ້ຟັງທີ່ຮັກແພງ:
ເນື່ອງໃນໂອກາດທີ່ປີໃໝ່2010ໃກ້ຈະວຽນມາເຖິງ, ຂ້າພະເຈົ້າຂໍຕາງໜ້າພະນັກງານທັງໝົດຂອງວິທະຍຸສາກົນແຫ່ງປະເທດຈີນCRI, ທັງໃນນາມສ່ວນຕົວ, ຂໍສະແດງຄວາມອວຍພອນແລະຄວາມທັກທາຍຢ່າງຈິງໃຈຈາກນະຄອນຫຼວງປັກກິ່ງມາສູ່ເພື່ອນມິດທັງຫຼາຍ. ຂໍອວຍພອນບັນດາທ່ານຈົ່ງມີອາຍຸວັນນະສຸຂະພະລະຕະຫຼອດໄປ!
ເມື່ອ3ເດືອນກ່ອນ, ໃນໂອກາດທີ່ປະເທດຈີນໃໝ່ສ້າງຕັ້ງຂຶ້ນຄົບຮອບ60ປີ, CRI ໄດ້ລາຍງານຂ່າວກ່ຽວກັບເຫດການທີ່ໃຫຍ່ໂຕມະໂຫລານຂອງພິທີສະເຫຼີມສະຫຼອງວັນຊາດຢູ່ທີ່ສະໜາມຫຼວງທ່ຽນອ່ານເມີນນະຄອນຫຼວງປັກກິ່ງຢ່າງຮອບດ້ານ. ພວກເຮົາດີໃຈຫຼາຍທີ່ໄດ້ເຫັນວ່າ, ເພື່ອນມິດຈາກປະເທດຕ່າງໆ, ກໍ່ໄດ້ສົ່ງຄວາມອວຍພອນຢ່າງສຸດໃຈໄປໃຫ້ວັນເກີດຂອງປະເທດຈີນໃໝ່, ທ່ານອານດຼິອັສ ມູຄຼິສ, ຜູ້ຟັງເຢຍລະມັນບອກວ່າ, ໃນ60ປີຜ່ານມາ, ປະຊາຊົນທົ່ວໂລກຮູ້ສຶກງຶດງໍ້ວ່າ, ຈີນໄດ້ຫັນຈາກປະເທດທຸກຍາກມາເປັນປະເທດໃຫຍ່ດ້ານເສດຖະກິດທີ່ຢູ່ແຖວໜ້າຂອງໂລກຢ່າງວ່ອງໄວ. ພວກເຮົາເຊື່ອໝັ້ນວ່າ, ນີ້ບໍ່ແມ່ນຈຸດສິ້ນສຸດ, ແຕ່ແມ່ນຈຸດເລີ່ມຕົ້ນເທົ່ານັ້ນ. ໃນເວລາຟັງລາຍການCRI, ຂ້ອຍມີຄວາມຮູ້ສຶກຢ່າງຈະແຈ້ງວ່າ, ຈີນພວມທຳຄວາມພະຍາຍາມເພື່ອເລື່ອງນີ້. ຄວາມເວົ້າເຫຼົ່ານີ້ຄືຄຳໃຫ້ກຳລັງໃຈຂອງເພື່ອນເກົ່າ, ແລະໄດ້ສະແດງນ້ຳໃຈຂອງເພື່ອນມິດຜູ້ຟັງໃນທົ່ວໂລກ ໃນຂະນະທີ່ພວກເຮົາຮູ້ສຶກພາກພູມໃຈຕໍ່ປະເທດຊາດຂອງຕົນ, ກໍ່ຮູ້ສຶກຕື້ນຕັນໃຈຕໍ່ການໃຫ້ກຳລັງໃຈຂອງຜູ້ຟັງທີ່ໜ້າຮັກ.
ປີ2009, ຈີນໄດ້ພະຍາຍາມຮັບມືກັບວິກິດການການເງິນສາກົນ, ເສດຖະກິດໄດ້ດີຂຶ້ນຢ່າງໝັ້ນທ່ຽງ, ການພັດທະນາເສດຖະກິດສັງຄົມໄດ້ຮັບຜົນສຳເລັດອັນພົ້ນເດັ່ນ, ໄດ້ບັນລຸເປົ້າໝາຍທີ່ເຕີບໂຕ8%. ຈີນພວມພົ້ນເດັ່ນຂຶ້ນໃນເວທີສາກົນ. ເມື່ອເຂົ້າສູ່ເວທີດັ່ງກ່າວແລ້ວ, ກໍ່ຄວນມີສາຍຕາທົ່ວໂລກ. ຢູ່ໃນອາຄານເຮັດວຽກຂອງCRI, ກໍ່ມີຄຳຂວັນທີ່ວ່າ"ຫຼັກໝັ້ນຂອງຈີນ, ສາຍຕາຂອງໂລກ, ຈິດໃຈຂອງມວນມະນຸດ", ເພື່ອລະດົມກຳລັງໃຈໃຫ້ຕົນເອງກ້າວໄປໜ້າ.
ໃນໜຶ່ງປີຜ່ານມາ, CRIໄດ້ພັດທະນາກ້າວໄປໜ້າລະຫວ່າງການປ່ຽນແປງກັບບໍ່ປ່ຽນແປງ. ສິ່ງບໍ່ປ່ຽນແປງນັ້ນກໍ່ແມ່ນຈຸດປະສົງຂອງພວກເຮົາ, ຄື: ເພີ່ມຄວາມເຂົ້າໃຈແລະມິດຕະພາບລະຫວ່າງປະຊາຊົນຈີນກັບປະຊາຊົນທົ່ວໂລກ. ສ່ວນການປ່ຽນແປງນັ້ນກໍ່ແມ່ນເພື່ອໃຫ້ພັດທະນາກ້າວໜ້າໄວກວ່າເກົ່າ, ຕອບສະໜອງຄວາມຕ້ອງການຂອງຜູ້ຟັງໄດ້ດີກວ່າເກົ່າ. ປີ2009, ເວັບໄຊCRI ໄດ້ເພີ່ມອີກ6ພາສາ, ປະຈຸບັນ, ການຈະຈາຍສຽງແລະເວັບໄຊຂອງCRI ໄດ້ມີ59ພາສາແລ້ວ, ເຊິ່ງເປັນສື່ມວນຊົນທີ່ມີຈຳນວນພາສາຫຼາຍທີ່ສຸດໃນໂລກ. ໄດ້ສ້າງສະຖານີວິທະຍຸທີ່ເຕັມຮູບແບບໃໝ່14ແຫ່ງຢູ່ຕ່າງປະເທດ, ຄວາມສາມາດຜະລິດລາຍການຢູ່ປະເທດເປົ້າໝາຍສູງຂຶ້ນຕື່ມອີກ. ປັດຈະບັນນີ້ແມ່ນຍຸກອິນເຕີເນັດ, ພວກຂ້າພະເຈົ້າໄດ້ຕັ້ງໜ້າປະຕິບັດການປັບປຸງໂຄງປະກອບວຽກງານແບບຍຸດທະສາດທີ່ຖືການສ້າງສື່ປະເພດໃໝ່ເປັນເປົ້າໝາຍ, ເພີ່ມການສື່ສານກັບຜູ້ຟັງ. CRIໄດ້ຈັດກິດຈະກຳຕ່າງໆ, ເຊັ່ນ"ກິດຈະກຳໄປເອົາຂ່າວຢູ່ຊາຍແດນຂອງນັກຂ່າວຕ່າງປະເທດຂອງCRI", "ການແຂ່ງຂັນຕອບຄຳຖາມຂອງຜູ້ຟັງທົ່ວໂລກ", ການປະກວດຄົນຈີນຮ້ອງເພງຣັດເຊຍ", "ການຄັດເລືອກ10ເພື່ອນມິດສາກົນທີ່ດີທີ່ສຸດ", ແລະອື່ນໆ, ເຊິ່ງສະແດງໃຫ້ເຫັນຄວາມຫຼາກຫຼາຍຮອບດ້ານຂອງວຽກງານCRI. ການສົນທະນາທາງອິນເຕີເນັດທີ່ມີຫົວເລື່ອງວ່າ"ສຽງຈາກອຸລຸມກີ", ໄດ້ແຈ້ງສະພາບຄວາມຈິງກ່ຽວກັບເຫດການຈະລາຈົນຮຸນແຮງ"5ກໍລະກົດ"ໃຫ້ປະຊາຊົນຕວກກີຊາບ, ໄດ້ຮັບການຊົມເຊີຍຈາກຜູ້ຟັງຕວກກີຫຼາຍ. ຜົນສຳເລັດນີ້ເຮັດໃຫ້ຮູ້ສຶກຕື່ນເຕັ້ນທີ່ສຸດ, ໃນປີ2009, ພວກຂ້າພະເຈົ້າໄດ້ຮັບຈົດໝາຍຈາກຜູ້ຟັງແລະຜູ້ໃຊ້ອິນເຕີເນັດຂອງຕ່າງປະເທດເປັນ2ລ້ານ9ແສນກວ່າສະບັບ, ຊຶ່ງເປັນຈຳນວນສູງສຸດໃນປະຫວັດສາດ.
ທ່ານເອັນເດີ, ຜູ້ຟັງເບຼຊິນທີ່ເຄີຍໄປຈີນໃຫ້ກຳລັງໃຈແກ່ພວກຂ້າພະເຈົ້າວ່າ"ມີຄວາມຈິງໃຈ, ມີເພື່ອນມິດຫຼວງຫຼາຍ. ຍຶດໝັ້ນຈິດໃຈເກົ່າ, ແລະມີຄວາມຊົງຈຳຫຼາຍຢ່າງ, ເຂົ້າສູ່CRI, ຊົມໂລກທີ່ມີຫຼາຍສີຫຼາຍສັນ". ທ່ານຜູ້ຟັງທີ່ຮັກແພງ, ການສະໜັບສະໜູນແລະຄວາມເອົາໃຈໃສ່ຂອງພວກທ່ານ, ແມ່ນກຳລັງໃຈທີ່ຊຸກຍູ້ການກ້າວໄປໜ້າຂອງພວກຂ້າພະເຈົ້າ, ຄວາມມຸ້ງມາດປາຖະໜາຂອງພວກທ່ານແມ່ນກຳລັງທີ່ຊຸກຍູ້ໃຫ້ພວກຂ້າພະເຈົ້າປະດິດຄິດສ້າງໃໝ່. ຜູ້ຟັງຈຳນວນຫຼວງຫຼາຍໄດ້ຜູກສາຍພົວພັນກັບCRIດ້ວຍຄວາມຈິງໃຈ, ພວກຂ້າພະເຈົ້າຈະຜະລິດລາຍການທີ່ດີກວ່າເກົ່າເພື່ອຕອບແທນບຸນຄຸນຂອງເພື່ອນມິດທັງຫຼາຍ. ເນື່ອງໃນໂອກາດນີ້, ຂ້າພະເຈົ້າຂໍຕາງໜ້າພະນັກງານທັງໝົດຂອງCRI, ຂໍສະແດງຄວາມຂອບອົກຂອບໃຈຢ່າງສຸດຊຶ້ງມາຍັງໄປສູ່ເພື່ອນມິດຜູ້ຟັງຂອງປະເທດຕ່າງໆໃນໂລກ.
ປີໃໝ່ວຽນມາເຖິງ, ສິ່ງຕ່າງໆຈະມີໂສມໜ້າໃໝ່. ພວກຂ້າພະເຈົ້າຈະເພີ່ມທະວີການປ່ຽນແປງແລະປັບປຸງລາຍການຕາມຄວາມຮຽກຮ້ອງຕ້ອງການຂອງທ່ານ, ສືບຕໍ່ຊຸກຍູ້ວຽກງານຜະລິດລາຍການຢູ່ໃນແຕ່ລະປະເທດ. ຫວັງວ່າໃນຕໍ່ໜ້ານີ້, ເພື່ອນມິດຜູ້ຟັງທັງຫຼາຍຈະສືບຕໍ່ເປັນກຳລັງແຮງໃຈແລະສະໜັບສະໜູນCRI, ຮ່ວມກັນສ້າງອະນາຄົດອັນດີງາມ. ສຸດທ້າຍ, ຂໍສະແດງຄວາມອວຍພອນຢ່າງສຸດໃຈຕໍ່ເພື່ອນມິດຜູ້ຟັງທັງຫຼາຍ!
ທ່ານຜູ້ຟັງ, ທີ່ຟັງມານັ້ນແມ່ນທ່ານວາງເກີ່ງນຽນ, ຜູ້ອຳນວຍການໃຫຍ່ວິທະຍຸສາກົນແຫ່ງປະເທດຈີນກ່າວຄຳອວຍພອນປີໃໝ່ຕໍ່ຜູ້ຟັງຕ່າງປະເທດ. ປີໃໝ່2010, ພວກເຮົາຈະພະຍາຍາມຜະລິດລາຍການຫຼາຍກວ່າເກົ່າແລະດີກວ່າເກົ່າໃຫ້ທ່ານຟັງ, ຫວັງວ່າລາຍການພວກເຮົາຈະຢູ່ນຳທ່ານທຸກເວລາທຸກສະຖານທີ່. ສະບາຍດີ.