ຕາມຂ່າວCRI: ຕອນຄ່ຳວັນທີ 5 ມັງກອນນີ້, ທ່ານສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີຜູ້ປະຈຳການລັດຖະບານລາວພ້ອມດ້ວຍຄະນະໄດ້ເດີນທາງດ້ວຍເຄື່ອງບິນນໄປຮອດນະຄອນນານນິງຂອງຈີນ, ເພື່ອເຂົ້າຮ່ວມເວທີປຶກສາຫາລືເຂດການຄ້າເສລີຈີນ-ອາຊຽນທີ່ຈະໄຂຂຶ້ນຢູ່ນານນິງໃນວັນທີ 7 ມັງກອນນີ້.
ທ່ານສົມສະຫວາດ ເລັ່ງສະຫວັດພ້ອມດ້ວຍຄະນະໄດ້ຮັບການຕ້ອນຮັບຢ່າງອົບອຸ່ນຈາກເຈົ້າໜ້າທີ່ທ້ອງຖິ່ນ. ຫຼັງລົງຈາກເຄື່ອງບິນ, ທ່ານໄດ້ໂອ້ລົມກັບເຈົ້າໜ້າທີ່ທ້ອງຖິ່ນດ້ວຍພາສາຈີນຢ່າງສະໜິດສະໜົມ. ຕາມຄະນະກຳມະການຈັດຕັ້ງແຈ້ງວ່າ, ທ່ານເອຣິກ S. ມັສກິນ, ຜູ້ໄດ້ຮັບລາງວັນໂນເບວສາຂາເສດຖະສາດປີ 2007 ກໍຈະເຂົ້າຮ່ວມເວທີປຶກສາຫາລືເຂດການຄ້າເສລີຈີນ-ອາຊຽນ. ປັດຈຸບັນໃນແຂກ 229 ທ່ານທີ່ໄດ້ຕົກລົງຈະເຂົ້າຮ່ວມກອງປະຊຸມນັ້ນມີແຂກລະດັບລັດຖະມົນຕີຂອງປະເທດອາຊຽນ 10 ທ່ານ.
ເວທີປຶກສາຫາລືເທື່ອນີ້ແມ່ນກະຊວງການຄ້າຈີນ, ພາກສ່ວນເສດຖະກິດການຄ້າຂອງປະເທດອາຊຽນ, ກອງເລຂາອາຊຽນແລະເຂດປົກຄອງຕົນເອງເຜົ່າຈວ້າງກວາງຊີຮ່ວມກັນເປັນເຈົ້າພາບ. ວັນທີ 24 ຕຸລາປີ 2009, ໃນເວລາເຂົ້າຮ່ວມກອງປະຊຸມສຸດຍອດຈີນ-ອາຊຽນຄັ້ງທີ 12, ທ່ານເວີນເຈ່ຍປາວ, ນາຍົກລັດຖະມົນຕີຈີນລິເລີ່ມຈັດເວທີປຶກສາຫາລືເຂດການຄ້າເສລີຈີນ-ອາຊຽນ, ໄດ້ຮັບການຕອບຮັບເປັນຢ່າງດີຈາກຜູ້ນຳປະເທດອາຊຽນ.
