ຕາມຂ່າວ cri:ເວທີປຶກສາຫາລືກ່ຽວກັບເຂດການຄ້າເສລີຈີນອາຊຽນໄດ້ໄຂຂຶ້ນຢູ່ນະຄອນນານນິງ,ເທດສະບານເຂດກວາງຊີຂອງຈີນໃນວັນທີ 7 ມັງກອນນີ້. ໃນພິທີໄຂ,ທ່ານອີ້ສ້ຽວຈຸນ,ລັດຖະມົນຕີວ່າການກະຊວງການຄ້າຈີນກ່າວວ່າ, ການສ້າງເຂດການຄ້າເສລີສຳເລັດ,ບໍ່ຫມາຍຄວາມວ່າໄດ້ສິ້ນສຸດຂະບວນການຫັນເສດຖະກິດສອງຝ່າຍເຊື່ອມໂຍງເຂົ້າກັນແລ້ວ, ກົງກັນຂ້າມມັນແມ່ນຈຸດເລີ່ມໃຫມ່ທີ່ສອງຝ່າຍໄດ້ຂະຫຍາຍກາພນົວພັນດ້ານເສດຖະກິດການຄ້າຕື່ມອກີດ, ສືບຕໍ່ຊຸກຍູ້ໃຫ້ເສດຖະກິດພາກພື້ນເຊື່ອມໂຍງເຂົ້າເປັນອັນຫນຶ່ງອັນດຽວກັນ.
ທ່ານອີ້ສ້ຽວຈຸນກ່າວວ່າ, ເຂດການຄ້າເສລີຈີນອາຊຽນບົນພື້ນຖານທີ່ພິຈາລະນາເຖິງລະດັບການພັດທະນາເສດຖະກິດຂອງທຸກຝ່າຍແລະຄວາມສາມາດແບກຫາບຂອງຕະຫລາດຢ່າງເຕັມສ່ວນແລ້ວ, ຜ່ານການເປີດກວ້າງເງື່ອນໄຂເຂົ້າສູ່ຕະຫລາດ, ລົບລ້າງກຳແພງການຄ້າແລະການລົງທຶນ, ສາມາດເຮັດໃຫ້ສອງຝ່າຍຊົມໃຊ້ຜົນປະໂຫຍດຈາກການເຊື່ອມໂຍງເສດຖະກິດເຂົ້າກັນ.ທ່ານອີ້ສ້ຽວຈຸນກ່າວວ່າ, ເພື່ອເຮັດໃຫ້ເຂດການຄ້າເສລີສົ່ງຜົນປະໂຫຍດໃຫ້ວິສາຫະກິດແລະປະຊາຊົນຂອງທັງສອງຝ່າຍຢ່າງແທ້ຈິງນັ້ນ, ລັດຖະບານສອງຝ່າຍນອກຈາກຄວນປະຕິບັດຕາມພັນທະທີ່ກຳນົດໄວ້ໃນສົນທິສັນຍາເຂດການຄ້າເສລີ,ສືບຕໍ່ໂຄສະນາເປີດກວ້າງຜົນສັກສິດທີ່ຕັ້ງຫນ້າຂອງເຂດການຄ້າເສລີແລ້ວ, ຍັງຄວນໃຫ້ການສະຫນັບສະຫນູນໃນດ້ານພື້ນຖານໂຄງລ່າງ, ການຊອກຫາທຶນຮອນແລະອື່ນໆ,ເພື່ອຊຸກຍູ້ການຄ້າແລະການລົງທຶນລະຫວ່າງສອງຝ່າຍສະດວກກວ່າເກົ່າ.
ໃນພິທີໄຂ,ທ່ານຊຸນດຣາມ ພຸສປານາທານ ຮອງເລຂາທິການໃຫຍ່ອາຊຽນກ່າວວ່າ, ການສ້າງເຂດການຄ້າເສລີຈີນອາຊຽນໃຫ້ສຳເລັດ,ບໍ່ພຽງແຕ່ໄດ້ນຳເອົາໂອກາດທີ່ໃຫຍ່ກວ່າເກົ່າໃຫ້ແກ່ການຄ້າຢູ່ພາກພື້ນຂະຍຫາຍຕົວທໍ່ນັ້ນ, ຍັງມີຜົນດີຕໍ່ການຫລຸດຄວາມໂຕນກັນດ້ານຄວາມຮັ່ງກັບຄວາມທຸກລະຫວ່າງປະເທດຕ່າງໆໃນພາກພື້ນນີ້ໃຫ້ຫນ້ອຍລົງ, ຊຸກຍູ້ການຄ້າແລະການລົງທຶນຂ້າມແດນ.ພ້ອມກັນນັ້ນ, ຍັງມີຜົນດີຕໍ່ການເຮັດໃຫ້ພາກພື້ນນີ້ຟື້ນຕົວຄືນຈາກວິກິດການການເງິນ,ເຊິ່ງເປັນໂອກາດສຳຄັນທີ່ສຸດທີ່ສ້າງເສດຖະກິດອາຊີຕາເວັອອກເຊື່ອມໂຍງເຂົ້າກັນ.
