ຄຳປາໄສຂອງລັດຖະມົນຕີຊ່ວຍວ່າການກະຊວງອຸດສາຫະກຳແລະການຄ້າຂອງສ.ປ.ປ.ລາວໃນເວທີປຶກສາຫາລືເຂດການຄ້າເສລີຈີນ-ອາຊຽນ

(GMT+08:00) 2010-01-08 15:49:48 cri

ໃນໂອກາດທີ່ເຂົ້າຮ່ວມເວທີປຶກສາຫາລືເຂດການຄ້າເສລີຈີນ-ອາຊຽນຢູ່ນະຄອນໜານໜິງ, ເມືອງເອກຂອງເຂດປົກຄອງຕົນເອງເຜົ່າຈ້ວງກວາງຊີຂອງຈີນໃນວັນທີ 7 ມັງກອນນີ້; ທ່ານນາງເຂັມມະນີ ພົນເສນາ, ລັດຖະມົນຕີຊ່ວຍວ່າການກະຊວງອຸດສາຫະກຳການຄ້າຂອງສ.ປ.ປ.ລາວໄດ້ຂຶ້ນກ່າວຄຳປາໄສ, ຊິ່ງກ່ອນອື່ນທ່ານໄດ້ສະແດງຄວາມຊົມເຊີຍແລະຂອບໃຈຢ່າງສຸດຊື່ງຕໍ່ລັດຖະບານຈີນ, ໂດຍສະເພາະແມ່ນກະຊວງການຄ້າຈີນແລະອົງການປົກຄອງເຂດກວາງຊີທີ່ໄດ້ເຊື້ອເຊີນແລະໃຫ້ການຕ້ອນຮັບຄະນະຜູ້ແທນລາວດ້ວຍຄວາມອົບອຸ່ນນັບແຕ່ຄະນະໄດ້ເດີນທາງມາເຖິງນະຄອນທີ່ມີສະເໜ່ແຫ່ງນີ້. ທ່ານໄດ້ຕີລາຄາສູງຕໍ່ຄວາມສຳຄັນຂອງເວທີປຶກສາຫາລືເທື່ອນີ້ທີ່ຈະເປັນການປູທາງສຳລັບສົ່ງເສີມການຮ່ວມມືທີ່ໃກ້ຊິດກວ່າເກົ່າລະຫວ່າງຈີນ-ອາຊຽນກໍຄືຈີນ-ລາວ.

ບາງຕອນຂອງຄຳປາໄສທ່ານນາງເຂັມມະນີ ພົນເສນາກ່າວວ່າ: ໃນສະພາບທີ່ເສດຖະກິດຂອງໂລກພວມສືບຕໍ່ປ່ຽນແປງໃນປະຈຸບັນ, ສ.ປ.ປ.ລາວເຊື່ອວ່າການສືບຕໍ່ສົ່ງເສີມການຄ້າ, ການເປີດເສລີແລະການຮ່ວມມື, ເລັ່ງລັດການເຊື່ອມໂຍງກັນຂອງພາກພື້ນແມ່ນມີຄວາມຈຳເປັນສຳລັບພວກເຮົາເພື່ອສົ່ງເສີມການຮ່ວມມືທາງເສດຖະກິດແລະຂະຫຍາຍມູນຄ່າການຄ້າລະຫວ່າງກັນ.

ດັ່ງທີ່ພວກເຮົາຮູ້ແລ້ວວ່າຈີນ-ອາຊຽນມີພົນລະເມືອງລວມກັນປະມານ 1 ຕື້ 900 ລ້ານຄົນທີ່ກວມຈຳນວນ 1ສ່ວນ3ຂອງພົນລະເມືອງທັງໝົດຂອງໂລກ, ຈີນ-ອາຊຽນຍັງແມ່ນເຂດການຄ້າເສລີທີ່ໃຫຍ່ທີ່ສຸດໃນໂລກ, ນອກນັ້ນຈີນແລະປະເທດອາຊຽນພວມຫັນເປັນອຸດສາຫະກຳແລະກັນເປັນຕົວເມືອງຊຶ່ງເປັນຕະຫຼາດທີ່ກວ້າງໃຫຍ່ແລະເຕີບໂຕໄວຫຼາຍ. ສຳລັບມູນຄ່າການຄ້າລະຫວ່າງຈີນກັບລາວຈາກເດືອນມັງກອນຫາເດືອນກັນຍາ 2009 ກໍ່ບັນລຸເຖິງ 485 ລ້ານກວ່າໂດລາ, ຊຶ່ງເພີ່ມຂຶ້ນ 33,8% ທຽບໃສ່ປີ 2008. ພວກເຮົາເຊື່ອໝັ້ນຢ່າງຕາຍໃຈວ່າ, ຕົວເລກນີ້ຈະເພີ່ມຂຶ້ນອີກຫຼັງຈາກທີ່ເຂດການຄ້າເສລີຈີນ-ອາຊຽນເລີ່ມປະຕິບັດຢ່າງເຕັມຮູບແບບໃນປີ 2010 ນີ້.
ທ່ານນາງເຂັມມະນີກ່າວວ່າ: ການທີ່ລັດຖະບານຈີນໄດ້ຕັດສິນໃຈສ້າງຕັ້ງກອງທຶນຈີນ-ອາຊຽນມູນຄ່າ 10 ຕື້ໂດລາເພື່ອຮ່ວມມືກັນລົງທຶນແລະຍັງໃຫ້ສິນເຊື່ອອີກ 15 ຕື້ໂດລາແກ່ບັນດາປະເທດອາຊຽນນັ້ນ, ຈະຊ່ອຍເຫຼືອໃຫ້ການລົງທຶນໃນພາກພື້ນໄປໄດ້ດີ, ໂດຍສະເພາະແມ່ນຕໍ່ປະເທດດ້ອຍພັດທະນາຄືລາວແລ້ວ, ນີ້ແມ່ນມີຄວາມຈຳເປັນຫຼາຍແລະເປັນໂອກາດທີ່ຍິ່ງໃຫຍ່ໃນການຂະຫຍາຍການຮ່ວມມືລົງທຶນໃນປະເທດພາກເຮົາ. ພວກເຮົາຫວັງວ່າຈະນຳໃຊ້ທຶນນີ້ເພື່ອການກໍ່ສ້າງໂຄງການພື້ນຖານໂຄງລ່າງຕ່າງໆໃນສ.ປ.ປ.ລາວ.

ຕອນທ້າຍຂອງການກ່າວຄຳປາໄສ, ທ່ານນາງເຂັມມະນີໄດ້ກ່າວຢ້ຳບາງຕອນວ່າ: ໃນຫຼາຍທົດສະວັດທີ່ຜ່ານມາ, ສ.ປ.ປ.ລາວໄດ້ຮັບຜົນສຳເລັດທີ່ສຳຄັນໃນການສ້າງຄວາມມີສະຖຽນລະພາບແລະເລັ່ງລັດການເຕີບໂຕທາງເສດຖະກິດແລະຫຼຸດຜ່ອນຄວາມທຸກຍາກ, ປະຈຸບັນນີ້ອັດຕາເຕີບໂຕສະເລ່ຍGDPຂອງລາວແມ່ນຢູ່ລະຫວ່າງ 6 ຫາ 7 ສ່ວນຮ້ອຍ. ລາວມີທ່າແຮງບົ່ມຊ້ອນດ້ານຊັບພະຍາກອນທຳມະຊາດຫຼາຍ, ໂດຍສະເພາະແມ່ນໃນຂະແໜງການກະສິກຳ, ບໍ່ແຮ່ແລະໄຟຟ້ານຳຕົກຊື່ງເປັນຂະແໜງການທີ່ສຳຄັນຫຼາຍໃນການປະກອບສ່ວນເຮັດໃຫ້ອັດຕາການເຕີບໂຕຂອງGDPເພີ່ມຂຶ້ນ. ນອກຈາກນັ້ນ, ໃນດ້ານນະໂຍບາຍຕ່າງໆ, ລັດຖະບານລາວກໍ່ໄດ້ປັບປຸງແລະອອກຂໍ້ກຳນົດກົດລະບຽບແລະກົດໝາຍໃໝ່ຈຳນວນໜຶ່ງເພື່ອອຳນວຍຄວາມສະດວກໃຫ້ແກ່ການຄ້າແລະດຶງດູດນັກລົງທຶນຈາກຕ່າງປະເທດໃຫ້ນັບມື້ນັບຫຼາຍຂຶ້ນ.

ຂ່າວ-ບົດທີ່ກ່ຽວຂ້ອງ

ຄຳເຫັນ