ທະນາຄານໂລກເບິ່ງເສດຖະກິດທົ່ວໂລກໃນປີນີ້ໃນແງ່ດີ
(GMT+08:00) 2010-01-25 17:48:39 cri
ວັນທີ 25 ມັງກອນນີ້, ຢູ່ນະຄອນຫລວງປັກກິ່ງ, ທະນາຄານໂລກໄດ້ເຜີຍແຜ່ບົດລາຍງານເບິ່ງເສດຖະກິດໂລກປີ 2010,ບົດລາຍງານສະບັບນີ້ກ່າວວ່າ, ປີ 2010, ເສດຖະກິດທົ່ວໂລກຈະເຕີບໂຕ 2,7%, ສ່ວນເສດຖະກິດຈີນຈະເຕີບໂຕ 9%.ທ່ານຮັນສ໊ ທິມເມີ,ຫົວຫນ້າພະແນກວາງຄາດຫມາຍຂອງທະນາຄານໂລກກ່າວວ່າ, ປັດຈຸບັນ,ປະເທດທີ່ພວມພັດທະນາພວມຊັກນຳເສດຖະກິດທົ່ວໂລກໄປສູ່ການຟື້ນຕົວຄືນ,ແຕ່ເບິ່ງຈາກໄລຍະຍາວແລ້ວ, ຍັງຕ້ອງແກ້ໄຂບັນຫາທີ່ຕົ້ນທຶນ ເງິນກູ້ຖີບສູງຂຶ້ນ.ນອກນີ້, ຄວາມສ່ຽງທີ່ເກີດຟອງສະບູດ້ານທຶນຮອນກໍ່ຕ້ອງການໃຫ້ລັດຖະບານແລະທະນາຄານກາງຂອງປະເທດຕ່າງໆລະມັດລະວັງ.ບົດລາຍງານຂອງທະນາຄານໂລກກ່າວວ່າ,ຍ້ອນມີນະໂຍບາຍການເງິນທີ່ເຂັ້ມແຂງແລະຄວາມຕ້ອງການອັນຫລວງຫລາຍທາງພາຍໃນ, ປີກາຍນີ້, ອາຊີຕາເວັນອອກແລະເຂດປາຊີຟິກໄດ້ນຳພາເສດຖະກິດທົ່ວໂລກຟື້ນຕົວຄືນ,ແລະທ່າອຽງເຕີບໂຕແບບນີ້ຍັງຈະສືບຕໍ່ຈົນຮອດປີນີ້.ຈີນແມ່ນຫົວຈັກທີ່ຊັກນຳເສດຖະກິດຢູ່ເຂດນີ້ເຕີບໂຕ.ທະນາຄານໂລກຄາດວ່າ, ປີ 2010, ເສດຖະກິດຈີນຈະເຕີບໂຕ 9%,ເຊິ່ງໄດ້ສູງກວ່າການຄາດໄວ້ໃນສອງເດືອນກ່ອນ 0,3%.
ທ່ານອາໂດ ຮັນເຊິນ, ຫົວຫນ້ານັກເສດຖະສາດຈີນຂອງທະນາຄານໂລກກ່າວວ່າ, ການທີ່ເສດຖະກິດຈີນຄ່ອຍໆຫມັ້ນທ່ຽງແລະດີຂຶ້ນນັ້ນຕົ້ນຕໍ່ແມ່ນຍ້ອນວ່າ ລັດຖະບານຈີນວາງແຜນການທີ່ເປັນລະບົບຄົບຊຸດເພື່ງຊຸກຍູ້ການພັດທະນາເສດຖະກິດ. ເພື່ອສືບຕໍ່ເຮັດໃຫ້ເສດຖະກິດຈີນຟື້ນຕົວຄືນ ແລະພັດທະນາຢ່າງວ່ອງໄວ, ລັດຖະບານຈີນຄວນເພີ່ມທະວີມາດຕະການທີ່ໃຊ້ໃນຂົງເຂດການປະກັນສັງຄົມໃນປະຈຸບັນຕື່ມອີກ, ແລ້ວສ້າງໃຫ້ເປັນຄວາມຕ້ອງການພາຍໃນທີ່ຍືນຍົງໄດ້.
ປະຈຸບັນ, ແຜນການທີ່ເປັນລະບົບຄົບຊຸດເພື່ອກະຕຸ້ນເສດຖະກິດພຽງແຕ່ແມ່ນຊົ່ວຄາວເທົ່ານັ້ນ, ແລະຈະປະເຊີນກັບບັນຫາທີ່ຖອນຕົວອອກຈາກຕະຫຼາດບໍ່ໄວກໍ່ຊ້າ, ສິ່ງທີ່ຈະປະເຊີນໃນອະນາຄົດນັ້ນ ແມ່ນການເຮັດແນວໃດສ້າງຄວາມຕ້ອງການ, ນີ້ຕ້ອງໃຫ້ໃຊ້ມາດຕະການປະຕິຮູບຢູ່ພາຍໃນປະເທດ, ເພື່ອຮັບປະກັນໃຫ້ຄວາມຕ້ອງການພາຍໃນ ຮັກສາຄວາມຍືນຍົງໄດ້. ເຖິງວ່າພວກເຮົາໄດ້ເຫັນລັດຖະບານຈີນປະກາດມາດຕະການຈຳນວນຫນຶ່ງກໍຕາມ,ແຕ່ຍັງຄວນເພີ່ມໃຫ້ຫຼາຍຂຶ້ນຕື່ມນຳອີກ.
ບົດລາຍງານຂອງທະນາຄານໂລກຂຽນວ່າ, ເຖິງວ່າຂອບເຂດທີ່ເສດໂຖະກິດທົ່ວໂລກຟື້ນຕົວຄືນນັ້ນ ນັບມື້ນັບຂະຫຍາຍກວ້າງອອກກໍ່ຕາມ, ແຕ່ລະດັບຟື້ນຕົວຄືນຍັງອ່ອນແອຢູ່, ຍັງບໍ່ພຽງພໍເພື່ອຫຼຸດຜ່ອນຄວາມເສຍຫາຍຈາກວິກິດການການເງິນທົ່ວໂລກປີ 2009. ທ່ານຮັນສ໌ ທິມເມີ, ຫົວຫນ້າພະແນກວາງຄາດຫມາຍຂອງທະນາຄານໂລກເຫັນວ່າ, ເມື່ອສັງເກດຈາກໄລຍະກາງແລ້ວເຫັນວ່າ, ຈິດໃຈຫຼີກລຽງຄວາມສ່ຽງຂອງປະເທດທີ່ມີລາຍໄດ້ສູງທີ່ສູງຂຶ້ນແລະການຕິດຕາມຄຸ້ມຄອງທະນາຄານຢ່າງສຸຂຸມຮອບຄອບກວ່າເກົ່ານັ້ນ ຈະເຮັດໃຫ້ປະເທດທີ່ພວມພັດທະນາ ປະເຊີນກັບບັນຫາຕ່າງໆເຊັ່ນ: ຕົ້ນທຶນຂອງເງິນກູ້ຈະສູງກວ່າເກົ່າ ເງິນທຶນທີ່ສາມາດນຳໃຊ້ໄດ້ມີຫນ້ອຍທີ່ສຸດແລະອື່ນໆ.
"ຄາດວ່າຄຽງຄູ່ກັບການຕິດຕາມຄຸ້ມຄອງລະບົບການເງິນທົ່ວໂລກເພີ່ມຫຼາຍຂຶ້ນ, ແລະນັກລົງທຶນລະມັດລະວັງຂຶ້ນ, ໜີ້ສິນລະຫວ່າງລັດຖະບານທີ່ມີລາຍໄດ້ສູງເພີ່ມຂຶ້ນ, ສຳລັບປະເທດພວມພັດທະນາແລ້ວ, ຕົ້ນທຶນຂອງເງິນກູ້ຈະສູງກວ່າເກົ່າ. ປະເທດພວມພັດທະນາບໍ່ສາມາດປ່ຽນແປງໂຄງປະກອບຕະຫຼາດການເງິນຂອງໂລກ, ແຕ່ສາມາດປ່ຽນແປງຜົນກະທົບຕໍ່ເຂົາເຈົ້າໂດຍຜ່ານການມາດຕະການພາຍໃນປະເທດ."
ຄຽງຄູ່ກັບເສດຖະກິດໂລກຟື້ນຟູຄືນໃໝ່, ລາຄາສິນຄ້າໃຫຍ່ໆໃນສາກົນໄດ້ແພງຂຶ້ນຢ່າງຫຼວງຫຼາຍ, ນີ້ກໍໄດ້ເຮັດໃຫ້ຕົວເລກຄາດໝາຍເງິນເຟີ້ສູງຂຶ້ນ. ທ່ານຮັນນສ໌ ທິມໂມກ່າວວ່າ: "ໃນດ້ານນະໂຍບາຍເງິນຕາ, ຕ້ອງປະສານງານກັນຫຼາຍຂຶ້ນ, ນີ້ກໍແມ່ນບົດຮຽນທາງລົບຂອງວິກິດການການເງິນ. ທະນາຄານກາງຂອງປະເທດຕ່າງໆຄວນເອົາໃຈໃສ່ທ່າອຽງທີ່ກ່ຽວຂ້ອງຢ່າງໃກ້ຊິດ, ຕົວຢ່າງວ່າລາຄາຊັບສິນຈະສ້າງວິກິດການໃໝ່ຫຼືບໍ່. ປະຈຸບັນ, ຄວາມສ່ຽງເງິນເຟີ້ຍັງບໍ່ສູງປານໃດ, ແຕ່ມີຄວາມສ່ຽງທີ່ຈະເກີດວິກິດການໃໝ່ຫຼາຍທີ່ສຸດ. ປະຈຸບັນ, ລັດຖະບານຈີນພວມເອົາໃຈໃສ່ນຳທ່າອຽງຂອງຕະຫຼາດຫຸ້ນແລະອະສັງຫາລິມະຊັບ, ປັບປຸງນະໂຍບາຍຢ່າງເໝາະສົມ. ທະນາຄານກາງເອີລົບກໍພວມເອົາໃຈໃສ່ນຳທ່າອຽງຂອງຕະຫຼາດ."
