ວັນທີ 31ມັງກອນນີ້, ຈີນໄດ້ເຜີຍແຜ່ະອກະສານນະໂຍບາຍສະບັບທຳອິດຂອງປີນີ້ຂອງ ສູນກາງພັກຄອມມູນິດຈີນປີ 2010 ຢ່າງເປັນທາງການ, ເພື່ອຕົກລົງບັນຫາກະສິກຳ,ຊົນນະບົດແລະຊາວກະສິກອນເປັຍປີທີ 7 ປີແລ້ວ. ນະໂຍບາຍສະບັບນີ້ສະເຫນີໃຫ້ຄວນ ປະສານງານການພັດທະນາໃນຕົວເມືອງແລະຊົນນະບົດຢ່າງເປັນເອກະພາບ, ຊຸກຍູ້ການປະດິດສ້າງ ລະບຽບການພັດທະນາຕົວເມືອງແລະຊົນນະບົດ. ວັນທີ 1 ກຸມພານີ້, ຢູ່ທີ່ນະຄອນຫຼວງປັກກິ່ງ, ທ່ານເສີນຊີ່ເຫວີນ, ຮອງຫົວຫນ້າແລະຫົວຫນ້າຫອ້ງການຂອງຫນ່ວຍງານນຳພາວຽກງານຊົນນະບົດຂອງສູນກາງ ກ່າວວ່າ, ພາຍໃນໄລຍະຫນຶ່ງຕໍ່ຫນ້າ, ວຽກງານສຳຄັນທີ່ຊຸກຍູ້ໃຫ້ຫັນເປັນຕົວເມືອງນັ້ນ ຈະແມ່ນການໃຫ້ປະຊາກອນໃນຊົນນະບົດຍ້າຍໄປຢູ່ໃນເມືອງ ຂະຫນາດ ກາງແລະນ້ອຍ ຕໍ່ໄປເຊີນຟັງລາຍລະອຽດກ່ຽວກັບເລື່ອງນີ້:
ວັນທີ 1 ກຸມພານີ້, ໃນການຖະແຫຼງຂ່າວທີ່ຫ້ອງການຖະແຫຼງຂ່າວຂອງລັດຖະບານຈີນຈັດຂຶ້ນ, ທ່ານເສີນຊີ່ເຫວີນ ກ່າວວ່າ,ນັບແຕ່ຈີນດຳເນີນການ ປະຕິຮູບແລະໄຂປະຕູສູ່ພາຍນອກ ເປັນຕົ້ນມາ,ການຫັນເປັນຕົວເມືອງຂອງຈີນໄດ້ຮັບຜົນສຳເລັດຢ່າງໃຫຍ່ຫຼວງ, ແຕ່ວ່າຍັງມີ 2 ບັນຫາທີ່ຈະແຈ້ງຄື: ຫນຶ່ງແມ່ນການພັດທະນາຫັນເປັນຕົວເມືອງ ສົນໃຈນຳແຕ່ການພັດທະນາຕົວເມືອງໃຫຍ່,ຕົວເມືອງໃຫຍ່ພິເສດແລະຕົວເມືອງໃຫຍ່ທີ່ສຸດໃນເຂດພັດທະນາຕາມແຄມທະເລ, ບໍ່ເອົາໃຈໃສ່ນຳການພັດທະນາຕົວເມືອງຂະຫນາດກາງແລະນ້ອຍ, ອີກດ້ານຫນຶ່ງກໍ່ແມ່ນໃນຂະບວນການຫັນເປັນຕົວເມືອງ, ສົນໃຈນຳການເປີດກວ້າງຂະຫນາດຂອງຕົວເມືອງແລະສ້າງສາສະພາບແວດລ້ອມທີ່ສວຍງາມໃນຕົວເມືອງຫຼາຍກວ່າ, ແຕ່ບໍ່ໄດ້ສ້າງໂອກາດຫຼາຍກວ່າເກົ່າໃຫ້ແກ່ຊາວກະສິກອນຫັນເປັນປະຊາຊົນໃນຕົວເມືອງຢ່າງແທ້ຈິງ.
ທ່ານເສີນຊີເວີນກ່າວວ່າ, ເພື່ອແກ້ໄຂບັນຫາເຫລົ່ານີ້,ເອກະສານເລກ 1 ຂອງສູນກາງປີນີ້ໄດ້ສະເຫນີອອກມາວ່າ, ປັດຈຸບັນ, ຕ້ອງຖືການເພີ່ມທະວີການພັດທະນາຕົວເມືອງລະດັບກາງແລະນ້ອຍເປັນຈຸດຫນັກ, ອອກແຮງພັດທະນາເສດຖະກິດໃນຕົວເມືອງນ້ອຍ, ຊຸກຍູ້ໃຫ້ອຸດສາຫະກຳທີ່ມີເອກະລັກພິເສດແລະໂຄງການທີ່ມີທ່າແຮງໄປເຕົ້າໂຮມຢູ່ເທດສະບານເມືອງນ້ອຍແລະເມືອງນ້ອຍທີ່ສຳຄັນ.ທ່ານກ່າວວ່າ:ຈຸດສຸມໃນການຊຸກຍູ້ການຫັນເປັນຕົວເມືອງໃນບາດກ້າວຕໍ່ໄປແມ່ນຕ້ອງເພີ່ມການກໍ່ສ້າງພື້ນຖານໂຄງລ່າງແລະການປົວແປງສະພາບແວດລ້ອມຂອງຕົວເມືອງນ້ອຍ, ຜ່ານການແຈກຢາຍສິດນຳໃຊ້ທີ່ດິນກໍ່ສ້າງ, ຊີ້ນຳການຍ້າຍອຸດສາຫະກຳ, ເພີ່ມທະວີການກໍ່ສ້າງພື້ນຖານໂຄງລ່າງຂອງຕົວເມືອງລະດັບກາງແລະນ້ອຍ,ເພື່ອເພີ່ຄວາສາມາດສັງລວມຂອງຕົວເມືອງເຫລົ່ານີ້, ດຶງດູດອຸດສາຫະກຳທີ່ບໍ່ແມ່ນກະສິກຳແລະຊາວກະສິກອນຫລາຍກວ່າເກົ່າຍ້າຍໄປຢູ່ຕົວເມືອງລະດັບກາງແລະນ້ອຍ.ເອກະສານເລກທີ 1 ຂອງສູນກາງຈີນຍັງສະເຫນີອອກມາວ່າຕ້ອງລົງເລິກການປະຕິຮູບລະບຽບການສຳມະໂນຄົວ, ເລັ່ງລັດຜັນຂະຫຍາຍນະໂຍບາຍຜ່ອນຄາຍເງື່ອນໄຂຍ້າຍເຂົ້າສູ່ຕົວເມືອງລະດັບກາງແລະນ້ອຍ.
ຕົວເລກສະແດງໃຫ້ເຫັນວ່າ, ໃນຈຳນວນຊາວກະສິກອນທີ່ເຮັດວຽກຢູ່ຕົວເມືອງຂອງຈີນປະມານ 150 ລ້ານຄົນໃນປະຈຸບັນນັ້ນ, ມີປະມານ 100 ລ້ານຄົນແມ່ນເກີດໃນຊຸມປີ1980ຫຼື1990, ເຂົາເຈົ້າຢາກເຊື່ອມເຂົ້າສັງຄົມຕົວເມືອງ. ກ່ຽວກັບເລື່ອງນີ້, ໃນເອກະສານເລກໜຶ່ງຂອງສູນກາງໃນປີນີ້ໄດ້ສະເໜີວ່າ, ຄວນອອກແຮງແກ້ໄຂບັນຫາຊາວກະສິກອນລຸ້ນໃໝ່ທີ່ເຮັດວຽກຢູ່ຕົວເມືອງ, ນີ້ແມ່ນເອກະສານຂອງພັກຄອມມູນິດຈີນໃຊ້ຄຳທີ່ວ່າ"ຊາວກະສິກອນລຸ້ນໃໝ່ທີ່ເຮັດວຽກໃນຕົວເມືອງ" ເທື່ອທຳອິດ.
ທ່ານຖັງເຢີນຈ້ຽນ, ຮອງຫົວໜ້າຫ້ອງການໜ່ວຍງານວຽກງານນຳພາຊົນນະບົດສູນກາງຈີນກ່າວວ່າ, ລັດຖະບານຈີນຈະວາງແຜນທີ່ມີລັກສະນະເຈາະຈົງ, ເຮັດໃຫ້ຊາວກະສິກອນລຸ້ນໃໝ່ສາມາດປະກອບອາຊີບຢູ່ຕົວເມືອງໄດ້ຢ່າງໝັ້ນຄົງ.
"ຕໍ່ໄປພາຍໜ້າ, ສາມາດວາງທິດທາງດັ່ງນີ້ຄື, ໜຶ່ງໃຊ້ວິທີທີ່ບັງເກີດຜົນຊຸກຍູ້ການຫັນຊົນນະບົດໃຫ້ເປັນຕົວເມືອງ, ໂດຍສະເພາະແມ່ນໃຫ້ຊາວກະສິກອນທີ່ມີເງື່ອນໄຂໄປເຮັດວຽກຢູ່ໃນເມືອງ. ສອງແມ່ນຄວນຮັບປະກັນສິດຜົນປະໂຫຍດຂອງຊາວກະສິກອນທີ່ເຮັດວຽກຢູ່ຕົວເມືອງ, ລວມທັງການປະກອບອາຊີບ, ການອົບຮົມ, ໃຫ້ການຮັບປະກັນທາງສັງຄົມແລະໃຫ້ລູກເຂົາເຈົ້າໄດ້ເຂົ້າຮຽນແລະອື່ນໆ, ລ້ວນແຕ່ຖືຄວາມສຳຄັນຂອງເຂົາເຈົ້າເປັນຈຸດໜັກ."
