ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີ,ທ່ານຜູ່ຟັງທີ່ໂຄລົບ,ວັນທີ 22 ກຸມພານີ້ຕາມເວລາທ້ອງຖິ່ນ, ທ່ານບາຣັກ ໂອບາມາ,ປະທານາ ທິບໍດີອາເມລິກາໄດ້ປະກາດແຜນການຫຼ້າສຸດກ່ຽວກັບການປະຕິຮູບການປິ່ນປົວແລະຮັກສາສຸຂະພາບໃນເວັບໄຊຂອງທຳນຽບຂາວ. ແຜນການໃຫມ່ນີ້ຈະໃຊ້ງົບປະມານເກືອບ 1000 ຕື້ໂດລາ, ຈະດຳເນີນໄປເປັນເວລາ 10 ປີ. ແຜນການໃຫມ່ນີ້ເຫັນວ່າ ໄດ້ເຮັດໃຫ້ຄວາມເຫັນທີ່ຂັດແຍ່ງກັນຈຳນວນຫນຶ່ງຂອງແຜນການປິ່ນປົວແລະຮັກສາສຸຂະພາບລະຫວ່າງວຸດທິສະພາກັບ ສະພາຕ່ຳຂອງອາເມລິກາ ຫຼຸດຫນ້ອຍລົງ,ແລະຮັບເອົາຂໍ້ສະເຫນີສ່ວນຫນຶ່ງຂອງສະມາຊິພັກສາທາລະນະລັດຫຼືລິພັບບຼີກີກັນກ່ຽວກັບການປະຕິຮູບການປິ່ນປົວແລະຮັກສາສຸຂະພາບ . ແຕ່ວ່າ,ນັກວິເຄາະຊີ້ອອກວ່າ, ແຜນການໃຫມ່ທີ່ ທ່ານໂອບາມາ ປະກາດອອກມານີ້ ຍັງບໍ່ຮູ້ວ່າ ຈະກ້າວໄປສູ່ທິດທາງໃດ? ຕໍ່ໄປເຊີນທ່ານຟັງລາຍລະອຽດກ່ຽວກັບເລື່ອງນີ້.
ໃນແຜນການໃຫມ່ນີ້ທີ່ທ່ານໂອບາມາປະກາດໃນມື້ວານນີ້, ເນື້ອໃນທີ່ເຮັດໃຫ້ປະຊາຊົນອາເມລິກາຫຼາຍກວ່າເກົ່າ ໄດ້ຮັບການປະກັນໄພການປິ່ນປົວແລະຮັກສາສຸຂະພາບນັ້ນຍັງແມ່ນເນື້ອໃນຫນຶ່ງທີ່ເປັນໃຈກາງ. ຖ້າແຜນການໃຫມ່ນີ້ໄດ້ຮັບຄວາມເຫັນດີໂດຍທົ່ວໄປແລ້ວ, ຈະເຮັດໃຫ້ຄົນອາເມລິກາຫຼາຍກວ່າ 31 ລ້ານຄົນທີ່ຍັງບໍ່ໄດ້ມີການປະກັນໄພການປິ່ນປົວແລະຮັກສາສຸຂະ ພາບໃນປະຈຸບັນນັ້ນ ໄດ້ຮັບການປະກັນໄພໃນດ້ານນີ້. ສິ່ງທີ່ຕ່າງກັນກັບຄວາມຮຽກຮ້ອງຕ້ອງການຂອງບຸກຄົນຝ່າຍເສລີຢ່າງຫຼວງຫຼາຍນັ້ນແມ່ນ ທ່ານໂອບາມາ ໄດ້ປ່ຽນແປງຄວາມຄິດຄວາມເຫັນຂອງລັດຖະບານທີ່ເຂົ້າຮ່ວມຕະຫຼາດປະກັນໄພການປິ່ນປົວແລະຮັກສາສຸຂະພາບ, ກຳນົດໃຫ້ບົດບາດຂອງລັດຖະບານ ເປັນຜູ່ຕິດຕາມຄຸ້ມຄອງຂອງການປະກັນໄພ. ພ້ອມກັນນັ້ນ,ແຜນການໃຫມ່ຂອງທ່ານໂອບາມາ ຈະຫຼຸດຂຸມການເງິນຂອງລັດຖະບານອາເມລິກາໃຫ້ຫນ້ອຍລົງຢ່າງຫຼວງຫຼາຍ,ຄາດວ່າຈະເຮັດໃຫ້ຂຸມງົບປະມານຂອງລັດຖະບານ ຫຼຸດລົງ 100 ຕື້ໂດລາພາຍໃນ 10ປີທຳອິດຫຼັງຈາກປະຕິບັດແຜນການນີ້,ແລະຈະຫຼຸດຂຸມງົບປະມານ1000ຕື້ໂດລາ ພາຍໃນ 10 ປີທີສອງ.ທ່ານໂອບາມາ ຍັງຫວັງຢາກຜ່ານການປະຕິຮູບການປິ່ນປົວແລະຮັກສາສຸຂະພາບ, ສ້າງຕະຫຼາດປະກັນໄພທີ່ມີກຳລັງແຂ່ງຂັນແລະເຫມາະສົມຢູ່ລັດຕ່າງໆ, ເພື່ອເຮັດໃຫ້ວິສາຫະກິດຂະຫນາດກາງແລະນ້ອຍຫຼືສ່ວນບຸກຄົນ ສາມາດເລືອກເອົາແຜນການປະກັນໄພຂອງຕົນເອງຢ່າງເສລີພາບ. ນອກນີ້, ແຜນການປະຕິຮູບໃຫມ່ນີ້ຍັງປະຕິເສດບໍ່ຮັບຮອງເງື່ອນໄຂບູລິມະສິດຂອງວຸດທິສະພາທີ່ມີຕໍ່ບາງລັດ.
ນັກວິເຄາະຍັງສົງໄສວ່າ,ແຜນການໃຫມ່ຂອງທ່ານໂອບາມານີ້ຈະສາມາດຊ່ອຍເອົາການປະຕິຮູບການປິ່ນປົວແລະຮັກສາສຸຂະພາບໄດ້ຢ່າງແທ້ຈິງຫຼືບໍ່. ນັບແຕ່ທ່ານໂອບາມາຂຶ້ນດຳລົງຕຳແຫນ່ງເປັນປະທານາທິບໍດີອາເມລິກາເປັນຕົ້ນມາ, ເຖິງວ່າທ່ານໄດ້ອອກແຮງພະຍາຍາມສົ່ງເສີມແຜນ ການປະຕິຮູບນີ້ ຕະຫຼອດມາກໍຕາມ, ແຕ່ເມື່ອໄດ້ຜ່ານຄວາມພະຍາຍາມຫຼາຍເທື່ອແລ້ວ ກໍ່ຍັງບໍ່ໄດ້ຮັບຜົນຫຍັງ. ແລະບວກກັບສະມາຊິກພັກປະຊາທີປະໄຕຫຼືດີໂມແຄຼັດ ໄດ້ເສຍໄຊໃນການເລືອກຕັ້ງເພີ່ມຕື່ມຂອງສະມາຊິກວຸດທິສະພາຂອງລັດແມັດຊາຈູເຊັດສ໌, ແລ້ວເສຍທີ່ນັ່ງ 2/3 ໃນວຸດທິສະພາ,ສະນັ້ນ ຈະເຮັດໃຫ້ແຜນການປະຕິຮູບໃຫມ່ນີ້ ໄດ້ຜ່ານໂດຍສະດວກ,ກາຍເປັນສິ່ງທີ່ສຳເລັດຍາກທີ່ສຸດ.ບວກກັບປີນີ້ພໍດີແມ່ນໄລຍະກາງຂອງການເລືອກ, ສະມາຊິກວຸດທິສະພາຫຼາຍທ່ານທີ່ສະຫນັບສະຫນູນການປະຕິຮູບການປິ່ນປົວແລະຮັກສາສຸຂະ ພາບກ່ອນຫນ້ານີ້ ກໍ່ອາດຈະພິຈາລະຈານາຜົນໄດ້ຜົນເສຍ,ແລ້ວອາດຈະມີການຕັດສິນໃຈທີ່ຕ່າງກັນໃນບັນຫາສະຫນັບສະຫນູນທ່ານໂອບາມາຫຼືບໍ່. ນອກນີ້, ໃນປະຈຸບັນ,ແຜນການໃຫມ່ນີ້ຂອງທ່ານໂອບາມາຍັງຕອບສະຫນອງຕາມຄວາມຮຽກຮ້ອງຕ້ອງການຂອງຝ່າຍຕ່າງໆ ຍາກ.ແລະໃນລະຫວ່າງສອງພັກຄື: ພັກສາທາລະນະລັດ ແລະ ພັກປະຊາທິປະໄຕຂອງອາເມລິກາຍັງຍາກທີ່ຈະກຳຈັດຄວາມເຫັນທີ່ຂັດແຍ່ງກັນໃນບັນຫາການປະຕິຮູບການປິ່ນປົວແລະຮັກສາສຸຂະພາບ. ສ່ວນທ່ານໂອບາມາ ຢາກຮັບເອົາຄວາມເຫັນຂອງສະມາຊິກພັກສາທາລະນະລັດສ່ວນຫນຶ່ງເພື່ອຍາດແຍ່ງເອົາການສະຫນັບສະຫນູນຂອງເຂົາເຈົ້ານັ້ນກໍ່ຈະພົບຄວາມຫຍຸ້ງຍາກນາໆປະການຄືກັນ.
ຕາມການຢັ່ງປະຊາມະຕິທີ່ດຳເນີນໄປຫຼາຍເທື່ອແລ້ວກ່ອນຫນ້ານີ້,ປະຊາຊົນບໍ່ໄດ້ເບິ່ງໃນແງ່ດີຕໍ່ອະນາຄົດຂອງການປະຕິຮູບການປິ່ນປົວແລະຮັກສາສຸຂະພາບ, ຈຳນວນຜູ່ຄັດຄ້ານແຜນການໃຫມ່ນີ້ຫຼາຍກວ່າຜູ່ສະຫນັບສະຫນູນ. ແຕ່ວ່າ, ນັກວິເຄາະບາງຄົນຍັງກ່າວວ່າ, ໃນເວລານີ້,ທ່ານໂອບາມາ ປະກາດແຜນການໃຫມ່ຂອງຕົນເອງ,ແມ່ນເພື່ອໃຫ້ໄດ້ຮັບຫມາກຜົນໃນສອງດ້ານ,ນັ້ນກໍຄື: ບໍ່ພຽງແຕ່ແມ່ນຊຸກຍູ້ການປະຕິຮູບການປິ່ນປົວແລະຮັກສາສຸຂະພາບເທົ່ານັ້ນ, ແຕ່ຍັງກຽມວຽກງານໃນການເລືອກຕັ້ງໄລຍະກາງ. ສື່ມວນຊົນຊີ້ອອກວ່າ, ຖ້າ ພັກສາທາລະນະລັດໄດ້ຜ່ານການສົນທະນາ ແລ້ວຮັບເຫັນດີນຳແຜນການໃຫມ່ນີ້ໃນທີ່ສຸດ, ມັນກໍ່ຈະໄດ້ສ້າງຜົນງານໃນດ້ານການເມືອງໃຫ້ແກ່ທ່ານໂອບາມາ. ແຕ່ເມື່ອຮອດເວລານັ້ນ ພັກສາທາລະນະລັດ ຫາກຍັງປະຕິເສດແຜນການໃຫມ່ນີ້ຢູ່ຄືເກົ່າ, ແລະການສົນທະນາບໍ່ໄດ້ຮັບຜົນຫຍັງແລ້ວ, ສອງພັກບໍ່ສາມາດຮ່ວມມືກັນນັ້ນຫນ້າທີ່ຮັບຜິດຊອບສ່ວນໃຫຍ່ແມ່ນຂຶ້ນກັບພັກສາທາລະນະລັດ ແລະ ກໍ່ບໍ່ໄດ້ສ້າງຜົນກະທົບອັນໃຫຍ່ຫຼວງປານໃດຕໍ່ການເລືອກຕັ້ງໄລຍະກາງ ຂອງພັກປະຊາທິປະໄຕ.ແຕ່ ບໍ່ວ່າເລື່ອງນີ້ຈະໄດ້ຮັບຜົນແນວໃດກໍ່ຕາມ , ເມື່ອສັງເກດຈາກສະຫວັດດີການຂອງປະຊາຊົນແລ້ວເຫັນວ່າ,ແຜນການປະຕິຮູບໃຫມ່ນີ້ຈະຫັນເປັນພາຫະນະທາງການເມືອງທີ່ແຂ່ງຂັນກັນລະຫວ່າງ ສອງພັກ,ນີ້ສາມາດເວົ້າໄດ້ວ່າ, ແຜນການໃຫມ່ນີ້ໄດ້ຝ່າຝືນ ຈຸດປະສົງຂອງທ່ານໂອບາມາທີ່ອອກແຮງພະຍາຍາມປະຕິຮູບການປິ່ນປົວໃນເວລາເລີ່ມຕົ້ນ.
