ວັນທີ 7 ມີນານີ້,ໃນກອງປະຊຸມຂ່າວຂອງກອງປະຊຸມປະຈຳປີສະພາປະຊາຊົນແຫ່ງຊາດຈີນ,ທ່ານຢາງເຈຍຊື,ລັດຖະມົນຕີວ່າການກະຊວງການຕ່າງປະເທດຈີນກ່າວວ່າ,ປີ 2010,ຈີນຈະສືບຕໍ່ຊຸກຍູ້ການຕ່າງປະເທດຄົບວົງຈອນ,ຍິນດີພ້ອມກັບປະເທດຕ່າງໆໃນໂລກເພີ່ມຄວາມໄວ້ເນື້ອເຊື່ອໃຈກັນ,ສະໜັບສະໜູນກັນແລະພັດທະນາພ້ອມກັນ,ແລະຈະປະກອບສ່ວນຫຼາຍກວ່າເກົ່າເຂົ້າໃນສັນຕິພາບ ສະຖຽນລະພາບແລະການພັດທະນາຂອງພາກພື້ນກໍ່ຄືຂອງໂລກຕາມຄວາມສາມາດຂອງຕົນ.
ໃນກອງປະຊຸມຂ່າວເປັນເວລາເກືອບ 2 ຊົ່ວໂມງ,ທ່ານຢາງເຈຍຊືໄດ້ຕອບຄຳຖາມຂອງນັກຂ່າວກ່ຽວກັບວຽກງານຫຼາຍຝ່າຍແລະບັນຫາຈຸດຮ້ອນຂອງພາກພື້ນເຊັ່ນຈຸດໜັກວຽກງານການຕ່າງປະເທດຂອງຈີນໃນປີນີ້,ການພົວພັນຈີນອາເມລິກາ,ບັນຫານີວເຄຼຍແຫຼມເກົາຫຼີແລະບັນຫາອື່ນໆ.ທ່ານຢາງເຈຍຊືກ່າວວ່າ,ປີ 2010 ແມ່ນປີທີ່ສຳຄັນທີ່ສຸດໃນການສືບຕໍ່ຮັບມືກັບວິກິດການການເງິນສາກົນ,ຊຸກຍູ້ເສດຖະກິດໂລກໃຫ້ຟື້ນຕົວຂຶ້ນ,ຈີນຈະສືບຕໍ່ປົກປັກຮັກສາອະທິປະໄຕ ຄວາມປອດໄພແລະຜົນປະໂຫຍດພັດທະນາແຫ່ງຊາດຢ່າງເດັດດ່ຽວໜຽວແໜ້ນ,ຊຸກຍູ້ການຕ່າງປະເທດຄົບວົງຈອນ.
"ນະໂອກາດນີ້,ຂ້າພະເຈົ້າຂໍກ່າວເນັ້ນເປັນພິເສດວ່າ,ປີນີ້,ຕ້ອງເຮັດການຕ່າງປະເທດກອງປະຊຸມສຸດຍອດແລະການຕ່າງປະເທດງານວາງສະແດງໂລກໃຫ້ດີຢ່າງເປັນພິເສດ,ພ້ອມກັນນັ້ນ,ຕ້ອງສ້າງສະພາບແວດລ້ອມທາງນອກທີ່ດີກວ່າເກົ່າໃຫ້ປະເທດພວກເຮົາຮັກສາຄວາມໝັ້ນຄົງ ຊຸກຍູ້ການພັດທະນາແລະປັບປຸງອົງປະກອບ."
ຕາມຂ່າວແຈ້ງວ່າ,ງານວາງສະແດງໂລກທີ່ຈະໄຂຢູ່ນະຄອນຊຽງໄຮໃນເດືອນພຶດສະພາປີນີ້,ໄດ້ມີ 190 ກວ່າປະເທດແລະ 50 ກວ່າອົງການຈັດຕັ້ງສາກົນສະເໜີຈະເຂົ້າຮ່ວມ,ຈະມີຜູ້ນຳຕ່າງປະເທດເກືອບ 100 ທ່ານມາຊຽງໄຮ,ແລະຈະມີຜູ້ຊົມຕ່າງປະເທດຫຼາຍລ້ານຄົນມາເຂົ້າຮ່ວມກິດຈະກຳຕ່າງໆຂອງງານວາງສະແດງໂລກຢູ່ຊຽງໄຮ.ທ່ານຢາງເຈຍຊືກ່າວເນັ້ນວ່າ,ນີ້ແມ່ນງານວາງສະແດງໂລກຈັດຂຶ້ນຢູ່ປະເທດທີ່ພວມພັດທະນາເປັນຄັ້ງທຳອິດ,ມັນບໍ່ພຽງແຕ່ເປັນງານໃຫຍ່ໂຕມະໂຫລານໃນຂົງເຂດເສດຖະກິດ,ສັງຄົມ,ວິທະຍາສາດເຕັກໂນໂລຊີແລະວັດທະນະທຳເທົ່ານັ້ນ,ຍັງແມ່ນງານໃຫຍ່ໂຕມະໂຫລານດ້ານການຕ່າງປະເທດ,ຍິ່ງແມ່ນໂອກາດທີ່ດີສຳລັບຈີນຮຽນນຳໂລກແລະປະຊາຊົນຂອງປະເທດຕ່າງໆ.
ກ່ຽວກັບການພົວພັນລະຫວ່າງຈີນອາເມລິກາທີ່ຖືກສົນໃຈຫຼາຍໃນຫວ່າງມໍ່ໆນີ້,ທ່ານຢາງເຈີສືຊີ້ອອກວ່າ,ອາເມລິກາຂາຍອາວຸດໃຫ້ໄຕ້ຫວັນ,ຜູ້ນຳອາເມລິກາພົບປະດາໄລ ລາມະແລະການກະທຳທີ່ກ່ຽວຂ້ອງອື່ນໆ,ໄດ້ລະເມີດຫຼັກການໃນປະກາດແຈ້ງການຮ່ວມຈີນອາເມລິກາ3ສະບັບແລະ"ຖະແຫຼງການຮ່ວມຈີນອາເມລິກາ",ໄດ້ທຳລາຍຜົນປະໂຫຍດສຳຄັນຂອງຈີນ,ທຳລາຍສະຖານະການການພົວພັນຈີນອາເມລິກາ,ຈີນເດັດດ່ຽວຄັດຄ້ານເລື່ອງນີ້.
"ສິ່ງທີ່ສຳຄັນໃນປະຈຸບັນກໍ່ແມ່ນອາເມລິກາປະຕິບັດຕໍ່ຫຼັກໝັ້ນຂອງຈີນຢ່າງຈິງຈັງ,ເຄົາລົບຜົນປະໂຫຍດແກ່ນສານແລະຄວາມສົນໃຈສຳຄັນຂອງຈີນຢ່າງແທ້ຈິງ,ແກ້ໄຂບັນຫາອ່ອນໄຫວທີ່ກ່ຽວຂ້ອງຢ່າງເໝາະສົມ,ຮ່ວມກັບຈີນພ້ອມກັນພະຍາຍາມເພື່ອຊຸກຍູ້ການພົວພັນລະຫວ່າງຈີນອາເມລິກາໃຫ້ຟື້ນຟູການຂະຫຍາຍຕົວຢ່າງໝັ້ນທ່ຽງ."
ນອກນີ້,ທ່ານຢາງເຈີສືຍັງໄດ້ຕອບຄຳຖາມຂອງນັກຂ່າວກ່ຽວກັບການພົວພັນສອງຝ່າຍລະຫວ່າງຈີນຣັດເຊຍ,ຈີນຍິ່ປຸ່ນ,ຈີນເອີລົບແລະອື່ນໆ.ທ່ານກ່າວວ່າ,ຄວາມເຂົ້າໃຈກັນແມ່ນພື້ນຖານຂອງການພັດທະນາການພົວພັນລະຫວ່າງສອງປະເທດ,ຫວັງວ່າວົງການຕ່າງໆໃນໂລກສາມາດເຂົ້າໃຈລັກສະນະພິເສດແລະສະພາບແຫ່ງຊາດຕົວຈິງຂອງຈີນ,ກໍ່ຫວັງໃຫ້ບາງຄົນສາມາດປະຖິ້ມຄວາມເຫັນລຳອຽງແລະຈິນຕານາການເດີມ,ໂດຍສະເພາະແມ່ນອະຄະຕິໃນດ້ານຮູບຖານຈິດສຳນຶກ.ຈີນຍິນດີຮ່ວມກັບປະເທດຕ່າງໆໃນໂລກເພີ່ມຄວາມເຂົ້າໃຈກັນ,ເອົາຈຸດດີຊົດເຊີຍຈຸດອ່ອນ,ພ້ອມກັນພັດທະນາ.
ທ່ານຢາງເຈີສືຍັງໄດ້ຕອບຄຳຖາມຂອງນັກຂ່າວກ່ຽວກັບບັນຫານິວເຄຼຍແຫຼມເກົາຫຼີແລະບັນຫາພາກພື້ນແລະສາກົນອື່ນໆ,ໄດ້ບັນລະຍາຍຫຼັກໝັ້ນຂອງຈີນ.ທ່ານຊີ້ອອກວ່າ,ຈີນໃນຖານະເປັນປະເທດໃຫຍ່ທີ່ພວມພັດທະນາປະເທດໜຶ່ງ,ຈະປະກອບສ່ວນຫຼາຍກວ່າເກົ່າເຂົ້າໃນສັນຕິພາບ,ສະຖຽນລະພາບແລະການພັດທະນາຂອງພາກພື້ນແລະຂອງໂລກຕາມຄວາມສາມາດຂອງຕົນ.
