ໃນກອງປະຊຸມປະຈຳປີຂອງສະພາຜູ່ແທນປະຊາຊົນແຫ່ງຊາດຈີນທີ່ໄຂຂຶ້ນໃນໄລຍະນີ້,ວາລະປະຊຸມທີ່ຕ່າງຈາກທຸກປີທີ່ຜ່ານມາກໍ່ແມ່ນພິຈາລະນາຮ່າງກົດຫມາຍວ່າດ້ວຍການເລືອກຕັ້ງສະບັບດັດແກ້.ວັນທີ 8 ມີນານີ້, ຢູ່ນະຄອນຫລວງປັກກິ່ງ, ສະມາຊິກສະພາຜູ່ແທນປະຊາຊົນທົ່ວປະເທດເກືອບ 3 ພັນທ່ານໄດ້ຮັບຟັງການອະທິບາຍຂອງທ່ານວາງຈ້າວໂກ,ຮອງປະທານຄະນະປະຈຳສະພາປະຊາຊົນແຫ່ງຊາດກ່ຽວກັບຮ່າງກົດຫມາຍວ່າດ້ວຍການເລືອກຕັ້ງສະບັບດັດແກ້.ເນື້ອໃນໃຈກາງຂອງການດັດແກ້ກົດຫມາຍເທື່ອນີ້ກໍ່ແມ່ນມີຈຸດປະສົງເຮັດໃຫ້ການເລືອກຕັ້ງຜູ່ແທນປະຊາຊົນຕົວຈິງຕາມຈຳນວນປະຊາຊົນໃນຕົວເມືອງແລະຊົນນະບົດທີ່ເທົ່າທຽມກັນ,ສ່ວນຈຸດປະສົງຂອງການດັດແກ້ເທື່ອນີ້ກໍ່ແມ່ນເຮັດໃຫ້ລະບຽບການເລືອກຕັ້ງຂອງຈີນໄດ້ຮັບການປັບປຸງໃຫ້ສົມບູນຂຶ້ນຕື່ມ.
ກົດຫມາຍວ່າດ້ວຍການເລືອກຕັ້ງຂອງຈີນເຄີຍໄດ້ຮັບການດັດແກ້ຂະຫນາດໃຫຍ່ເທື່ອຫນຶ່ງແລະດັດແກ້ຂະຫນາດນ້ອຍສີ່ເທື່ອ.ເທື່ອນີ້ໄດ້ດັດແກ້ 23 ມາດຕາ,ເຊິ່ງກວມເຄິ່ງຫນຶ່ງຂອງມາດຕາທັງຫມົດໃນກົດຫມາຍວ່າດ້ວຍການເລືອກຕັ້ງ.ທ່ານວາງຈ້າວໂກໄດ້ອະທິບາຍໃນມື້ນີ້ວ່າ:ເນື້ອໃນສຳຄັນທີ່ສຸດໃນການດັດແກ້ເທື່ອນີ້ກໍ່ຄື:
ບັນລຸການເລືອກຕັ້ງຜູ່ແທນສະພາປະຊາຊົນຕາມຈຳນວນປະຊາຊົນຕົວຈິງໃນຕົວເມືອງແລະຊົນນະບົດທີ່ເທົ່າທຽມກັນ, ແລະຮັບປະກັນໃຫ້ທຸກເຂດແຄວ້ນ, ທຸກຊົນເຜົ່າແລະຂົງເຂດລ້ວນແຕ່ມີຜູ່ແທນປະຊາຊົນຕາມຈຳນວນທີ່ສົມເຫດສົມຜົນ.
ເພື່ອເປັນການສົມທົບກັນ, ຍັງມີ 5 ມາດຕາຖືກດັດແກ້.ຜ່ານມາຜູ່ແທນປະຊາຊົນໃນຕົວເມືອງແມ່ນຫລາຍກວ່າ 4 ເທົ່າຂອງຜູ່ແທນຂອງຊາວກະສິກອນຈະຖືກດັດແກ້ໃຫ້ເທົ່າທຽມກັນ.ສຳລັບການດັດແກ້ຂໍ້ນີ້, ນາງຊິ່ນຊີອີ້, ຊາວກະສິກອນແຂວງຫູເປີຍທີ່ໄດ້ຮັບເລືອກຕັ້ງເປັນຜູ່ແທນປະຊາຊົນທົ່ວປະເທດສອງເທື່ອລຽນຕິດນັ້ນເຫັນວ່າ, ການດັດແກ້ດັ່ງກ່າວຈະເພີ່ມຈຳນວນຜູ່ແທນປະຊາຊົນໃນຊົນນະບົດໃຫ້ຫລາຍຂຶ້ນ,ມີຜົນດີຕໍ່ການສ່ອງແສງບັນຫາຊົນນະບົດໄດ້ດີກວ່າເກົ່າ.
"ພວກຂ້າພະເຈົ້າຄິດວ່າ,ໃນເວລາເລືອກຕັ້ງຜູ່ແທນສະພາປະຊາຊົນ,ປະຊາກອນໃນຕົວເມືອງແລະປະຊາກອນໃນຊົນນະບົດຄວນມີອັດຕາສ່ວນທໍ່ກັນ,ຖ້າວ່າມີຜູ່ແທນຊົນນະບົດຫຼາຍກວ່າກໍ່ຈະສ່ອງແສງບັນຫາຫຼາຍຂຶ້ນ.ນີ້ຈະມີຜົນດີຕໍ່ການໃຫ້ຂໍ້ສະເໜີແລະວຽກງານດ້ານອື່ນໆໃນອະນາຄົດ."
ທີ່ຈິງແລ້ວ,ຈີນບໍ່ເຄີຍຢຸດທຳຄວາມພະຍາຍາມຈັກເທື່ອເພື່ອຈັດການເລືອກຕັ້ງທີ່ສະເໝີພາບທັງໝົດ.ພາຍຫຼັງພັກຄອມມູນິດຈີນທີ່ເປັນພັກກຳອຳນາດຂອງຈີນໄດ້ວາງເປົ້າໝາຍ ທີ່ຄ່ອຍໆເຮັດໃຫ້ຕົວເມືອງແລະຊົນນະບົດເລືອກຕັ້ງຜູ່ແທນສະພາປະຊາຊົນໃນອັດຕາສ່ວນທີ່ທໍ່ກັນໃນປີ2007ແລ້ວ,ອົງການນິຕິບັນຍັດຈີນກໍ່ລົງມືກຽມດັດແກ້ກົດໝາຍ.
ນອກຈາກເຮັດໃຫ້ການເລືອກຕັ້ງຜູ່ແທນສະພາປະຊາຊົນສະເໝີພາບກວ່າເກົ່າແລ້ວ,ການດັດແກ້ເທື່ອນີ້ຍັງໄດ້ເສີມສ້າງລັກສະນະທົ່ວໄປຂອງການເລືອກຕັ້ງ.ຮ່າງກົດໝາຍສະບັບດັດ ແກ້ລະບຸໄວ້ວ່າ,ໃນຜູ່ແທນສະພາປະຊາຊົນທຸກຂັ້ນ,ຄວນມີຜູ່ແທນຂັ້ນພື້ນຖານໃນຈຳ ນວນອັນເໝາະສົມ,ໂດຍສະເພາະແມ່ນຜູ່ແທນກຳມະກອນ,ຊາວກະສິກອນແລະປັນຍາຊົນ.
ການດັດແກ້ກົດໝາຍວ່າດ້ວຍການເລືອກຕັ້ງເທື່ອນີ້ອີງຕາມຫຼັກການທີ່ທຸກຄົນສະເໝີພາບ, ທຸກເຂດແຄ້ວນສະເໝີພາບແລະທຸກຊົນເຜົ່າສະເໝີພາບ.ໃນນັ້ນ,ຄົນຈີນໄດ້ລື້ງກັບຄຳທີ່ວ່າ ທຸກຄົນສະເໝີພາບແລະທຸກຊົນເຜົ່າສະເໝີພາບຈາກການເລືອກຕັ້ງມາຫຼາຍປີແລ້ວ.
ແຕ່ຫຼັກການທີ່ວ່າທຸກເຂດແຄ້ວນສະເໝີພາບພັດແມ່ນນິຍາມໃໝ່ສຳລັບປະຊາຊົນຈີນ.ທ່ານວາງຈ້າວກົວສະເໜີໃຫ້ຮູ້ວ່າ:
"ຮັບປະກັນໃຫ້ແຫ່ງຕ່າງໆມີສິດສະເໝີພາບເຂົ້າຮ່ວມອົງການອຳນາດແຫ່ງຊາດ, ເຂດບໍລິຫານຕ່າງໆບໍ່ວ່າຈະມີປະຊາກອນຫຼາຍເທົ່າໃດກໍຕາມ, ລ້ວນແຕ່ຄວນມີຈຳນວນຜູ້ແທນພື້ນຖານຄືກັນ, ສາມາດເລືອກຕັ້ງຜູ້ແທນຈຳນວນໜຶ່ງ, ເພື່ອສະແດງໃຫ້ເຫັນເຂດແຄວ້ນກັນສະເໝີພາບ."
ນອກຈາກການດັດແກ້ເຫຼົ່ານີ້ທີ່ມີຄວາມໝາຍສຳຄັນແລ້ວ, ການດັດແກ້"ກົດໝາຍວ່າດ້າວຍການເລືອກຕັ້ງ"ເທື່ອນີ້ຍັງເອົາໃຈໃສ່ເລື່ອງປີກຍ່ອຍໃຫ້ເຂົ້າສູ່ລະບົບລະບຽບແບບແຜນເພື່ອປັບປຸງລະບົບການເລືອກຕັ້ງໃຫ້ສົມບູນ. ຕົວຢ່າງວ່າ, ຕົກລົງລະອຽດກ່ຽກັບການຕັ້ງຫ້ອງຂີດບັດເລືອກຕັ້ງຢ່າງປິດລັບ, ເຮັດໃຫ້ຜູ້ສະໝັກຮັບເລືອກຕັ້ງໄດ້ພົບປະກັບປະຊາຊົນຜູ້ມີສິດເລືອກຕັ້ງຢ່າງເປັນລະບຽບແບບແຜນ, ຕົກລົງເຮັດຫີບປ່ອນບັດເຄື່ອນທີ່ເປັນຕົ້ນ.
ກ່ຽວກັບການດັດແກ້"ກົດໝາຍເລືອກຕັ້ງ"ເທື່ອນີ້, ນັກວິຊາການຂອງຈີນເຫັນວ່າເປັນການປັບປຸງແລະພັດທະນາເອງຂອງລະບົບການເລືອກຕັ້ງທີ່ມີເອກະລັກຂອງຈີນ. ຮ່າງ"ກົດໝາຍວ່າດ້ວຍການເລືອກຕັ້ງສະບັບດັດແກ້"ທີ່ຍື່ນໃຫ້ຜູ້ແທນສະພາປະຊາຊົນແຫ່ງຊາດຈີນເກືອບ 3000 ທ່ານຄົ້ນຄວ້າພິຈາລະນານັ້ນ, ກ່ອນໜ້ານີ້ເຄີຍຜ່ານຄະນະປະຈຳສະພາປະຊາຊົນແຫ່ງຊາດຈີນພິຈາລະນາສອງເທື່ອແລ້ວ, ແລະໄດ້ສຳຫຼວດຄວາມເຫັນຢູ່ແຫ່ງຕ່າງໆແລະພາກສ່ວນຕ່າງໆຫຼາຍເທື່ອແລ້ວ, ຮ່າງດັດແກ້ກໍເຄີຍປະກາດເນື້ອໃນທັງໝົດ, ເພື່ອຂໍຄຳເຫັນຈາກວົງການຕ່າງໆຂອງສັງຄົມ. ສ່ວນຜູ້ແທນສະພາປະຊາຊົນແຫ່ງຊາດທັງຫຼາຍກໍໄດ້ເຫັນຮ່າງກົດໝາຍກ່ອນນີ້ສອງເດືອນ, ຜູ້ແທນຫຼາຍຄົນກໍມີຄວາມເຫັນທີ່ດີຂອງຕົນຫຼາຍ, ແລະພວກເພິ່ນກໍ່ໄດ້ຂໍຄວາມເຫັນຂອງຝ່າຍຕ່າງໆຢ່າງກວ້າງຂວາງແລ້ວ. ຮ່າງ"ກົດໝາຍວ່າດ້ວຍການເລືອກຕັ້ງ"ສະບັບດັດແກ້ຈະດັດແກ້ໂດຍອີງຕາມຄວາມເຫັນຂອງພວກເພິ່ນ, ແລະຍື່ນໃຫ້ກອງປະຊຸມສະພາຜູ້ແທນປະຊາຊົນແຫ່ງຊາດຈີນຄົ້ນຄວ້າພິຈາລະນາໃນວັນທີ 14 ມີນານີ້.
